ܒܪܹܐ ܠܵܗ̇ ܥܹܕܬܐ ܕܖ̈ܗܘܿܡܵܝܹܐ ܐܲܖ̈ܬ݂ܘܿܕܘܿܟܣܵܝܹܐ ܡܼܢ ܦܘܼܠܵܓ݂ܵܐ ܕܲܓܕܸܫܠܹܗ ܒܫܲܢ݇ܬܐ ܕ1054: ܕܲܦܪܸܫܠܹܗ ܪܗܘܿܡܵܐ ܡܼܢ ܩܸܣܛܲܢܛܝܼܢܝܼܵܐ: ܕܝܼܗ݇ܘܵܘ ܬܪܹܝܢ ܩܸܢܛܖ̈ܘܿܢܹܐ ܖܹ̈ܫܵܝܹܐ ܕܲܡܫܝܼܚܵܝܘܼܬܐ ݂ ܣܲܪܢܵܐ ܕܥܹܕܬܐ ܕܖ̈ܗܘܿܡܵܝܹܐ ܐܲܖ̈ܬ݂ܘܿܕܘܿܟܣܵܝܹܐ (ܪܘܼܡ ܐܲܪܬ݂ܘܿܕܘܿܟܣ): ܝܼܠܹܗ ܚܕܵܪ ܦܵܛܪܝܼܵܪܟܘܼܬܐ ܕܩܸܣܛܲܢܛܝܼܢܝܼܵܐ: ܘܐܵܢܛܝܘܿܟ݂ܝ: ܘܐܘܿܪܸܫܠܸܡ: ܘܩܘܼܦܪܸܣ ܘܐܸܣܟܲܢܕܸܪܝܼܵܐ ݂ ܘܡܲܖ̈ܥܝܵܬܐ ܕܠܸܒ݂ܢܵܢ ܘܣܘܼܪܝܼܵܐ ܘܐܝܼܪܵܢ ܘܥܝܼܪܵܐܩ ܘܟܘܿܘܹܝܬ ܘܥܲܪܲܒܝܼܵܐ ܣܘܼܥܘܼܕܝܼܵܐ: ܟܹܐ ܬܵܒܥܝܼ ܠܫܘܼܠܛܵܢܵܐ ܕܦܵܛܪܝܼܵܪܟܘܼܬܐ ܕܐܲܢܛܝܘܿܟ݂ܝ ݂

ܘܲܓܡܝܼܪܵܐܝܼܬ ܐܲܝܟ݂ ܐܵܖܸ̈ܡܢܵܝܹܐ: ܠܵܐ ܦܵܝܫܝܼ ܚܫܝܼܒܹ̈ܐ ܡܗܘܼܡܢܹ̈ܐ ܕܥܹܕܬܐ ܕܐܲܢܛܝܘܿܟ݂ܝ ܕܖ̈ܗܘܿܡܵܝܹܐ ܐܲܖ̈ܬ݂ܘܿܕܘܿܟܣܵܝܹܐ ܕܓܲܘ ܥܝܼܪܵܐܩ ܡܼܢ ܥܵܡܘܿܖܹ̈ܐ ܫܸܖ̈ܫܵܝܹܐ ܒܣܘܼܟܵܠܵܐ ܥܲܡܝܼܩܵܐ ܕܚܲܒܪܵܐ: ܒܦܘܼܚܵܡܵܐ ܥܲܡ ܐܵܬ݂ܘܿܖ̈ܵܝܹܐ ܘܟܲܠܕܵܝܹ̈ܐ ܘܐ݇ܣܘܼܖ̈ܝܵܝܹܐ ݂ “ܐܵܦܸܢ ܒܪܹܐ ܠܵܗ̇ ܚܕܵܐ ܣܝܼܥܬܐ ܡܼܢ ܝܲܘܢܵܝܹ̈ܐ ܡܲܥܖ̈ܒ݂ܵܝܹܐ ܓܲܘ ܒܹܝܬ ܢܲܗܖ̈ܝܼܢ ܒܫܘܼܪܵܝܵܐ ܕܕܵܖܹ̈ܐ ܡܸܨܥܵܝܹ̈ܐ: ܒܥܸܠܬܐ ܕܓܵܠܘܼܬܐ ܕܥܵܡܘܿܖܹ̈ܐ ܒܐܝܼܬܘܼܬܐ ܕܲܦܠܵܫܹ̈ܐ ܐܝܼܖ̈ܵܢܵܝܹܐ ܥܲܖ̈ܒ݂ܵܝܹܐ ܘܒܹܝܙܲܢܛܵܝܹ̈ܐ: ܐܸܠܵܐ ܐܸܣܵܐ ܕܝܼܩܖ̈ܵܬܐ ܕܝܲܘܡܵܢܵܐ ܝܼܠܹܗ ܡܼܢ ܝܼܩܖ̈ܬܐ ܐܸܬܝܹ̈ܐ ܡܼܢ ܣܘܼܪܝܼܵܐ ܘܠܸܒ݂ܢܵܢ ܘܦܲܠܣܛܝܼܢ ܒܫܘܼܪܵܝܵܐ ܕܕܵܪܵܐ ܕܥܸܣܪܝܼܢ”[1] ݂

ܒܣܝܼܩܘܿܡ 16 ܒܐܵܕܵܪ 1942: ܘܓܲܘ ܦܠܵܫܵܐ ܬܹܒܹܝܠܵܝܵܐ ܬܪܲܝܵܢܵܐ ܓܲܘ ܒܲܝܪܘܼܬ: ܡܫܘܼܬܐܸܣܠܗ݇ܘܿܢ (16) ܡܘܼܖ̈ܕܸܢܹܐ ܣܘܼܖ̈ܝܵܝܹܐ (سوريين) ܘܠܸܒ݂ܢܵܢܵܝܹ̈ܐ: ܥܠܲܝܡܹ̈ܐ ܘܝܵܠܘܿܦܹ̈ܐ ܡܼܢ ܖ̈ܗܘܿܡܵܝܹܐ ܐܲܖ̈ܬ݂ܘܿܕܘܿܟܣܵܝܹܐ: ܠܙܲܘܥܵܐ ܕܲܥܠܲܝܡܹ̈ܐ ܐܲܖ̈ܬ݂ܘܿܕܘܿܟܣܵܝܹܐ ܠܲܪܢܵܝܵܐ ܘܲܡܛܲܟܘܿܣܹܐ ܚܘܼܕܵܬܐ ܥܹܕܬܵܢܵܝܵܐ ܓܲܘ ܥܹܕܬܐ ܕܐܲܢܛܝܘܿܟ݂ܝ ܓܲܘ ܟܠܲܝܗܝ ܡܲܖ̈ܥܝܵܬܵܗ̇: ܡܸܢܲܝܗܝ ܐܵܦ ܡܲܪܥܝܼܬܐ ܕܒܲܓ݂ܕܵܕ ݂ ܦܵܛܪܝܼܵܪܟܵܐ ܕܖ̈ܗܘܿܡܵܝܹܐ ܐܲܖ̈ܬ݂ܘܿܕܘܿܟܣܵܝܹܐ ܥܒ݂ܝܼܪܵܐ ܓܲܘ ܐܲܢܛܝܘܿܟ݂ܝ (ܐܸܓ݂ܢܵܛܝܘܿܣ ܪܒ݂ܝܼܥܵܝܵܐ ܗܲܙܝܼܡ): ܝܼܗ݇ܘܵܐ ܚܲܕ ܡܼܢ ܡܫܲܬܐܸܣܵܢܹ̈ܐ ݂

ܒܚܘܼܬܵܡܵܐ ܕܲܦܠܵܫܵܐ ܬܹܒܹܝܠܵܝܵܐ ܬܪܲܝܵܢܵܐ: ܦܝܼܫܠܵܗ̇ ܐܘܼܡܬܵܝܘܼܬܐ ܥܲܪܒ݂ܵܝܬܐ ܗܵܝ ܬܲܦܢܟ݂ܵܐ (ܛܘܼܦ̮ܣܵܐ: نموذج) ܣܝܼܵܣܵܝܵܐ ܡܫܲܠܛܵܐ ݂ ܡܫܘܼܬܸܦܠܗ݇ܘܿܢ ܚܲܕܟܡܵܐ ܥܲܖ̈ܒ݂ܵܝܹܐ ܡܫܝܼܚܵܝܹ̈ܐ ܒܐܵܗܵܐ ܨܒ݂ܘܼܬܐ: ܟܲܕ “ܡܫܲܪܘܿܪܹܐ ܡܸܬܚܲܝܕܵܢܘܼܬܐ ܕܲܟܢܘܼܫܝܹ̈ܐ ܚܕܵܪ ܚܕܵܐ ܗܝܼܵܝܘܼܬܐ ܥܲܪܒ݂ܵܝܬܐ ܡܫܲܘܬܦܵܢܬܐ”[2]: ܘܲܡܗܘܼܡܢܹ̈ܐ “ܐܵܢܝܼ ܒܸܕ ܡܫܲܬܐܸܣܝܼ ܚܲܕ ܟܢܘܼܫܝܵܐ ܚܲܕܬܐ ܘܲܦܬܝܼܚ ܪܸܥܝܵܢܵܐ” [3] ݂ ܘܗܿܘ ܦܲܪܨܘܿܦܵܐ ܝܲܬܝܼܪ ܡܫܲܡܗܵܐ ܡܼܢ ܗܵܠܹܝܢ ܦܲܖ̈ܨܘܿܦܵܐ: ܝܼܠܹܗ ܚܲܕ ܓܲܒ݂ܪܵܐ ܣܘܼܪܝܵܝܵܐ (السوري)[4] ܡܝܼܫܹܝܠ ܥܲܦܠܲܩ ܕܦܝܼܫܠܹܗ ܡܛܘܼܡܪܵܐ ܓܲܘ ܒܲܓ݂ܕܵܕ ݂ ܥܲܦܠܲܩ ܝܼܠܹܗ ܚܲܕ ܡܼܢ ܒܢܘܿܢܹ̈ܐ ܕܥܹܕܬܐ ܕܪܘܼܡ ܐܲܪܬ݂ܘܿܕܘܿܟܣ (ܖ̈ܗܘܿܡܵܝܹܐ ܐܲܖ̈ܬ݂ܘܿܕܘܿܟܣܵܝܹܐ) ݂ ܘܝܼܠܹܗ ܡܫܲܬܐܸܣܵܢܵܐ ܕܓܲܒܵܐ ܕ(ܐܲܠܒܲܥܬ݂) ܒܢܝܼܣܵܢ 1947: ܘܙܝܼܦܠܹܗ ܩܵܐ ܡܫܝܼܚܵܝܹ̈ܐ ܠܲܡܫܲܘܬܘܿܦܹܐ ܓܲܘ ܓܲܒܹܗ ܒܲܚܦܝܼܛܘܼܬܐ: ܘܗܵܘܝܼ ܥܵܒ݂ܘܿܕܹ̈ܐ ܘܦܵܥܘܿܠܹ̈ܐ ܓܲܘ ܙܲܘܥܵܐ ܐܘܼܡܬܵܢܵܝܵܐ ܥܲܪܒ݂ܵܝܵܐ ܫܲܘܬܵܦܵܝܵܐ ܘܥܵܠܡܵܢܵܝܵܐ: ܥܲܡ ܫܒ݂ܵܩܬܐ ܘܲܦܝܵܫܬܐ ܕܡܲܫܠܡܵܢܘܼܬܐ ܓܲܘ ܠܸܒܵܐ ܕܥܲܪܒܵܝܘܼܬܐ (ܥܲܪܒܘܼܬܐ: العروبة): ܟܲܕ ܡܙܘܼܟܲܝܬܐ ܘܥܸܠܝܵܬܐ ܥܲܠ ܟܠ ܝܘܼܪܬܵܢܵܐ ܐ݇ܚܹܪ݇ܢܵܐ ݂

ܡܼܢ ܫܘܼܪܵܝܵܐ ܕ2003: ܓܡܝܼܪܵܐܝܼܬ ܐܲܝܟ ܟܠܲܝܗܝ ܟܢܘܼܫܝܹ̈ܐ ܡܫܝܼܚܵܝܹ̈ܐ ܫܸܖ̈ܫܵܝܹܐ ܕܓܲܘ ܥܝܼܪܵܐܩ: ܣܒܸܠܠܗ݇ܘܿܢ ܖ̈ܗܘܿܡܵܝܹܐ ܐܲܖ̈ܬ݂ܘܿܕܘܿܟܣܵܝܹܐ ܡܼܢ ܓܸܠܝܵܢܵܐ ܕܕܘܼܡܣܵܢܵܝܘܼܬܐ (الأصولية) ܡܲܫܠܡܵܢܝܼܬܐ ܕܲܒܪܹܐ ܠܵܗ̇ ܒܥܸܠܬܐ ܕܲܫܓ݂ܘܼܫܝܵܐ ܫܘܼܬܐܵܣܵܝܵܐ ݂ ܘܲܠܦܘܼܬ݂ ܠܡܵܐ ܕܐܬܹܐ ܠܹܗ: ܠܵܐ ܦܵܠܛܝܼ ܗ݇ܘܵܘ ܦܲܖ̈ܨܘܿܦܵܐ ܬܵܒܘܿܥܹܐ ܠܥܹܕܬܐ ܕܖ̈ܗܘܿܡܵܝܹܐ ܐܲܖ̈ܬ݂ܘܿܕܘܿܟܣܵܝܹܐ ܝܲܬܝܼܪ ܡܼܢ (30) ܝܼܩܖ̈ܵܬܐ ܓܲܘ ܒܲܓ݂ܕܵܕ ܒܫܲܢ݇ܬܐ ܕ2014 ܒܲܠܩܘܼܒ݂ܠ (600) ܝܼܩܖ̈ܵܬܐ ܩܕܵܡ ܨܦܵܚܬܐ ܠ(ܟܘܿܘܹܝܬ) ܒܫܲܢ݇ܬܐ ܕ1991[5] ݂ ܓܲܘ ܡܲܘܨܸܠ: ܦܝܼܫܠܗ݇ܘܿܢ ܡܐܲܠܨܹ̈ܐ ܥܣܲܪ ܝܼܩܖ̈ܵܬܐ ܐ݇ܚܵܖ̈ܵܝܹܐ ܠܲܫܒ݂ܵܩܵܐ ܘܲܬܪܵܟܵܐ ܠܒܵܬܲܝܗܝ: ܐܝܼܢܵܐ ܓܲܘ ܒܲܨܪܵܐ ܠܲܝܬ ܗ݇ܘܵܐ ܠܗ݇ܘܿܢ ܐܝܼܬܘܼܬܐ ݂

ܥܹܕܬܐ ܕܖ̈ܘܿܡܵܝܹܐ ܐܲܖ̈ܬ݂ܘܿܕܘܿܟܣܵܝܹܐ ܕܐܲܢܛܝܘܿܟ݂ܝ: ܐܝܼܬ ܠܵܗ̇ ܬܲܪܬܹܝܢ ܥܹܕܵܬ̈ܐ ܓܲܘ ܒܲܓ݂ܕܵܕ: ܡܸܢܲܝܗܝ ܟܵܬܸܕܪܵܐܝܼܵܐ ܕܩܲܕܝܼܫܵܐ ܡܵܪܝ ܓܝܼܘܲܪܓܝܼܣ: ܘܲܚܕܵܐ ܡܲܕܪܲܫܬܐ: ܘܚܲܕ ܒܲܝܬܐ ܪܲܒܵܐ: ܘܒܲܝܬܐ ܩܵܐ ܝܲܬܘܼܡܹ̈ܐ: ܘܚܲܕ ܟܘܼܢܵܫܵܐ ܐܲܬ݂ܠܹܝܛܵܝܵܐ ܘܡܲܪܕܘܼܬܵܢܵܝܵܐ ܘܝܘܼܠܦܵܢܵܝܵܐ ݂

ܒܝܲܘܡܵܐ ܕ17 ܒܟܵܢܘܿܢ ܩܲܕܡܵܝܵܐ ܒܫܲܢ݇ܬܐ ܕ2012: ܦܝܼܫܠܹܗ ܡܓܲܒܝܵܐ ܓ̰ܵܐܢ ܥܣܝܼܪܵܝܵܐ ܡܼܢ ܐܲܢܛܝܘܿܟ݂ܝ: ܦܵܛܪܝܼܵܪܟܵܐ ܠܥܹܕܬܐ ܕܖ̈ܗܘܿܡܵܝܹܐ ܐܲܖ̈ܬ݂ܘܿܕܘܿܟܣܵܝܹܐ ܕܐܲܢܛܝܘܿܟ݂ܝ ܘܟܠܹܗ ܡܲܕܢܚܵܐ: ܘܦܝܼܫܠܹܗ ܣܝܼܡܵܐ ܒܲܫܒ݂ܵܛ 10 ܒܹܗ ܒܫܲܢ݇ܬܐ ܕ2013: ܚܠܵܦ ܦܵܛܪܝܼܵܪܟܵܐ ܐܸܓ݂ܢܵܛܝܘܿܣ ܪܒ݂ܝܼܥܵܝܵܐ ܗܲܙܝܼܡ ݂

ܡܼܢ ܫܲܢ݇ܬܐ ܕ2015: ܡܲܛܪܵܢ ܓ݂ܲܛܵܣ ܗܲܙܝܼܡ ܗܘܹܐ ܠܹܗ ܪܹܫܵܢܵܐ ܕܡܲܪܥܝܼܬܐ ܕܖ̈ܗܘܿܡܵܝܹܐ ܐܲܖ̈ܬ݂ܘܿܕܘܿܟܣܵܝܹܐ ܓܲܘ ܒܲܓ݂ܕܵܕ ܘܟܘܿܘܹܝܬ: ܝܼܠܹܗ ܡܼܢ ܐܲܬ݂ܪܵܐ ܕܣܘܼܪܝܼܵܐ: ܘܦܝܼܫܠܹܗ ܝܼܠܝܼܕܵܐ ܓܲܘ (ܗܲܡܵܗ): ܘܝܼܠܹܗ ܒܪܘܿܢܵܐ ܕܐܲܚܵܐ ܕܦܵܛܪܝܼܵܪܟܵܐ ܡܢܵܚܵܐ ܐܸܓ݂ܢܵܛܝܘܿܣ ܪܒ݂ܝܼܥܵܝܵܐ ܗܲܙܝܼܡ ݂

__________

[1] ܚܙܝܼ: “ܚܲܝܹ̈ܐ ܘܡܲܘܬܐ ܕܲܡܫܝܼܚܵܝܹ̈ܐ ܕܡܲܕܢܚܵܐ”: ܓ̰ܵܐܢ ܦܹܝܝܪ ܦܵܠܘܼܢܝܼ: ܛܲܒ݂ܥܵܐ ܕܦܵܝܵܪܕ: 1994 ܦ 755 ݂

[2] ܡܲܒܘܼܥܵܐ ܥܒ݂ܝܼܪܵܐ: ܦ 102 ݂

[3] ܡܲܒܘܼܥܵܐ ܥܒ݂ܝܼܪܵܐ: ܦ 103

[4] ܗܘܼܓܵܝܵܐ ܕ(ܣܘܼܪܝܵܝܵܐ) ܕܠܵܐ ܐܵܠܲܦ ܕܫܘܼܪܵܝܵܐ: ܝܼܠܹܗ ܒܲܝܬܵܝܘܼܬܐ ܠܐܲܬ݂ܪܵܐ ܥܲܪܒ݂ܵܝܵܐ ܕ(ܣܘܼܪܝܼܵܐ: سوريا): ܐܸܠܵܐ ܐ݇ܣܘܼܪܝܵܝܵܐ ܒܐܵܠܲܦ ܛܠܝܼܩܬܐ ܕܫܘܼܪܵܝܵܐ: ܓܡܝܼܪܵܐܝܼܬ ܘܝܘܼܠܦܵܢܵܐܝܼܬ ܝܵܗܹܒ݂ ܣܘܼܟܵܠܵܐ ܕ(سرياني): ܕܝܼܠܹܗ ܒܲܝܬܵܝܘܼܬܐ ܠܲܚܕܵܐ ܐܘܼܡܬܐ ܩܵܐܹܡ ܒܝܵܬܵܗ̇ ܕܠܵܐ ܐܲܬ݂ܪܵܐ ܫܸܪܝܵܐ ݂ ܘܥܲܠܗܵܕܹܐ ܐܵܢܲܢܩܵܝܬܐ ܝܠܵܗ̇ ܕܦܵܪܫܲܚ ܒܹܝܬ ܬܪܲܝܗܘܿܢ ܗܘܼܓܵܝܹ̈ܐ ܡܫܲܚܠܦܹ̈ܐ: ܐܵܦܸܢ ܩܲܖ̈ܝܼܒܹܐ ܠܲܚܕܵܕܹ̈ܐ ܒܪܸܬܡܵܐ ܘܛܵܒ݂ ܒܲܥܝܼܕܹ̈ܐ ܒܣܘܼܟܵܠܵܐ ݂ (ܡܬܲܪܓܡܵܢܵܐ)

[5] ܡܲܒܘܼܥܵܐ: ܡܲܛܪܵܢ (ܓ݂ܲܛܵܣ ܗܲܙܝܼܡ): ܦܵܛܪܝܼܵܪܟܵܐ ܕܡܲܪܥܝܼܬܐ ܕܪܘܼܡ ܐܲܪܬ݂ܘܿܕܘܿܟܣ ܓܲܘ ܒܲܓ݂ܕܵܕ ܘܟܘܿܘܹܝܬ ݂ ܒܸܕ ܚܵܙܹܝܚ ܠܗܵܕܹܐ ܡܩܲܝܡܵܢܘܼܬܐ ܓܲܘ ܟܬܵܒ݂ܵܐ ܕܓ̰ܵܐܢ ܦܹܝܝܪ ܦܵܠܘܼܢܝܼ “ܚܲܝܹ̈ܐ ܘܡܲܘܬܐ ܕܲܡܫܝܼܚܵܝܹ̈ܐ ܕܡܲܕܢܚܵܐ”: ܦ 755 ܒܫܲܢ݇ܬܐ ܕ1994: ܕܲܡܨܘܼܘܸܬ ܠܹܗ ܥܲܠ (2500) ܦܲܖ̈ܨܘܿܦܹܐ ܡܼܢ ܥܹܕܬܐ ܕܪܘܼܡ ܐܲܪܬ݂ܘܿܕܘܿܟܣ ܓܲܘ ܥܝܼܪܵܐܩ ݂

ܦܝܼܫܠܵܗ̇ ܒܢܝܼܬܐ ܟܵܬܸܕܪܵܐܝܼܵܐ ܕܩܲܕܝܼܫܵܐ ܓܝܼܘܲܪܓܝܼܣ ܓܲܘ ܒܲܓ݂ܕܵܕ ܒܫܲܢ݇ܬܐ ܕ1976 ܒܝܲܕ ܡܲܚܵܪܵܐ (ܦܵܗܪܵܡ ܣܸܬܪܵܐܟ) ݂

ܒܲܠܚܘܿܕ ܒܲܦܣܵܥܬܐ ܕܬܲܪܥܵܐ ܕܡܲܥܠܵܢܵܐ: ܒܸܕ ܚܵܙܹܝܚ ܠܕܵܪܬܐ ܙܥܘܿܪܬܐ ܕܥܲܠ ܝܲܡܝܼܢܵܗ̇ ܐܝܼܬ ܒܸܢܝܵܢܹ̈ܐ ܕܡܲܪܥܝܼܬܐ: ܘܢܵܦܠܵܐ ܟܵܬܸܕܪܵܐܝܼܵܐ ܥܲܠ ܓܹܒܵܐ ܕܣܸܡܵܠܵܐ ݂ ܡܼܢ ܒܲܪܵܐ ܕܥܹܕܬܐ: ܟܵܬܸܕܪܵܐܝܼܵܐ ܕܩܲܕܝܼܫܵܐ ܓܝܼܘܲܪܓܝܼܣ ܕܖ̈ܗܘܿܡܵܝܹܐ ܐܲܖ̈ܬ݂ܘܿܕܘܿܟܣܵܝܹܐ: ܝܼܠܵܗ̇ ܚܲܕ ܒܸܢܝܵܢܵܐ ܡܼܢ ܫܡܸܢܬܐ ܦܲܪܙܠܵܝܬܐ: ܡܥܘܿܕܲܪܬܐ ܒܚܲܕ ܟܣܵܝܵܐ ܡܼܢ ܐܵܓ݂ܘܿܪܵܐ (الآجر): ܘܲܡܟܘܼܣܝܵܐ ܒܚܲܕ ܩܪܵܫܵܐ ܡܼܢ ܩܘܼܦܣܵܐ (بلاط) ܘܓܲܘ ܦܲܠܓܘܼܬܹܗ ܐܝܼܬ ܚܲܕ ܒܘܼܪܓܵܐ ܕܢܵܩܘܿܫܵܐ ܙܥܘܿܪܵܐ ܡܪܲܒܥܵܐ ܒܐܼܣܟܹܝܡܵܐ ݂ ܘܐܝܼܬ ܚܲܕ ܓܸܢܝܵܢܵܐ ܦܲܠܓܘܿ ܚܘܼܕܪܵܢܵܝܵܐ ܡܒܲܝܢܵܐ ܡܼܢ ܓܹܒܵܐ ܝܲܡܝܼܢܵܝܵܐ: ܘܥܲܠ ܓܹܒܵܢܹ̈ܗ ܐܝܼܬ ܚܲܕ ܨܠܝܼܒ݂ܵܐ ܛܵܒ݂ ܪܲܒܵܐ ݂

ܐܝܼܢܵܐ ܡܼܢ ܓܵܘܵܐ: ܦܝܼܫܠܵܗ̇ ܡܣܘܼܟܲܡܬܐ ܟܵܬܸܕܪܵܐܝܼܵܐ ܕܩܲܕܝܼܫܵܐ ܓܝܼܘܲܪܓܝܼܣ ܕܖ̈ܗܘܿܡܵܝܹܐ ܐܲܖ̈ܬ݂ܘܿܕܘܿܟܣܵܝܹܐ ܥܲܠ ܐܸܣܟܹܝܡܵܐ ܒܵܙܝܼܠܝܼܟܵܝܵܐ: ܚܲܕ ܒܸܢܝܵܢܵܐ ܝܲܪܝܼܟ݂ ܐܸܣܟܹܝܡܵܐ ܡܵܪܹܐ ܗܲܝܟܠܵܐ ܘܲܬܪܹܝܢ ܡܲܥܒܖܹ̈ܐ ܓܹܒܵܢܵܝܹ̈ܐ ܦܖ̈ܝܼܫܹܐ ܡܸܚܕܵܕܹ̈ܐ ܒܥܲܡܘܼܕܹ̈ܐ ܡܖ̈ܲܒܥܹܐ ݂ ܡܼܢ ܓܹܒܵܐ ܕܡܲܥܪܒ݂ܵܐ: ܒܪܹܫ ܡܲܥܠܵܢܵܐ ܐܝܼܬ ܚܲܕ ܡܕܲܪܓ݂ܵܐ (مدرج): ܘܥܲܠ ܝܲܡܝܼܢܹܗ ܐܝܼܬ ܡܲܕܒܚܵܐ ܕܐܝܼܬ ܩܕܵܡܹܗ ܬܠܵܬܐ ܬܲܖ̈ܥܵܢܹܐ ܡܵܖ̈ܲܝ ܣܸܬܖܹܐ ݂

ܡܸܬܪܲܫܡܵܢܬܐ ܝܠܵܗ̇ ܥܹܕܬܐ ܒܦܸܪܝܘܼܬܐ ܕܨܸܒܬܐ (زخرفة) ܒܹܝܙܲܢܛܵܝܬܐ ܓܵܘܵܗ̇: ܐܲܝܟ݂ ܩܘܼܒܬܵܗ̇ ܦܲܠܓܘܿ ܚܘܼܕܪܵܢܵܝܬܐ: ܩܲܝܣܵܐ ܐܲܘ ܦܲܪܙܠܵܐ ܕܐܝܼܬ ܚܕܵܪ ܐܘܼܪܚܵܐ ܐܲܘ ܣܸܡܲܠܬܐ: ܓܘܼܕܵܢܹ̈ܐ ܕܦܵܬܘܵܬܐ ܕܥܹܕܬܐ ܘܓܸܢܝܵܢܵܐ ܕܗܵܘܹܐ ܒܡܲܕܒܚܵܐ: ܘܐܲܛܪܵܐ ܕܨܘܼܖ̈ܵܬܐ: ܘܲܒܚܲܪܬܐ ܥܲܡܘܼܕܹ̈ܐ ܡܟܘܼܣܝܹ̈ܐ ܒܠܘܼܚܹ̈ܐ ܘܨܘܼܖ̈ܝܵܬܐ ܐ݇ܚܖܹ̈ܢܹܐ ܕܟܹܐ ܡܛܲܦܣܝܼ ܠܡܫܲܩܠܹ̈ܐ ܡܫܲܚܠܦܹ̈ܐ ܡܼܢ ܚܲܝܹ̈ܐ ܕܲܡܫܝܼܚܵܐ: ܨܘܼܖ̈ܵܬܐ ܕܲܫܠܝܼܚܹ̈ܐ ܘܩܲܕܝܼܫܹ̈ܐ ܘܡܲܠܲܐܟܹ̈ܐ ܘܦܵܠܚܹ̈ܐ ܘܫܲܠܝܼܛܹ̈ܐ ܘܲܢܒ݂ܝܼܹ̈ܐ ܘܐܲܒ݂ܵܗܵܬܐ ܕܥܹܕܬܐ ܕܖ̈ܗܘܿܡܵܝܹܐ (ܝܲܘܢܵܝܹ̈ܐ) ܐܲܖ̈ܬ݂ܘܿܕܘܿܟܣܵܝܹܐ ݂

ܦܝܼܫܠܗ݇ܘܿܢ ܬܸܠܝܹ̈ܐ ܬܪܹܝܢ ܒܸܖ̈ܩܹܐ ܖ̈ܲܒܹܐ ܠܲܓ̰ܠܸܓ̰ܵܢܹ̈ܐ ܡܼܢ ܩܘܼܒܬܐ ܫܡܲܝܵܢܝܼܬܐ ܠܒܵܠܵܐ ܕܡܲܥܒܪܵܐ ܩܸܢܛܪܘܿܢܵܝܵܐ: ܘܝܼܢܵܐ ܒܬܘܼܩܵܢܵܐ ܘܣܘܼܟܵܡܵܐ ܕܡܝܼܪܵܐ ܟܲܕ ܦܝܼܫܠܗ݇ܘܿܢ ܨܒ݂ܝܼܥܹ̈ܐ ܒܡܲܝܵܐ ܕܕܲܗܒ݂ܵܐ: ܘܡܲܡܬܼܸܠܝܼ ܠܡܸܬܥܲܡܪܵܢܝܼܬܐ ܘܚܘܼܕܪܵܐ ܕܟܲܘܟܒܹ̈ܐ: ܕܐܝܼܬ ܚܕܵܪ ܬܠܝܼܬܵܝܘܼܬܐ ܩܲܕܝܼܫܬܐ ܐܝܼܩܵܪܵܐ ܠܝܘܼܒܵܠܹ̈ܐ ܐܲܖ̈ܬ݂ܘܿܕܘܿܟܣܵܝܹܐ ݂

ܒܗܸܦܟܵܐ ܕܥܹܕܵܬܐ ܐܵܬܘܿܖ̈ܵܝܵܬܐ ܘܟܲܠܕܵܝܵܬܐ: ܦܵܝܫܵܐ ܚܫܝܼܒ݂ܬܐ ܟܵܬܸܕܪܵܐܝܼܵܐ ܕܡܵܪܝ ܓܝܼܘܲܪܓܝܼܣ ܠܵܐ ܥܝܵܕܵܝܬܐ ܘܦܪܝܼܫܬܐ ܒܐܘܼܡܵܢܘܼܬܵܗ̇ ܘܨܘܼܒܵܬܵܗ̇ (زخارفها) ݂