ܢܵܦܠܵܐ ܥܹܕܬܐ ܕ(ܛܵܗܝܼܪܵܐ: ܒܛܝܼܢܘܼܬ݂ܐ ܕܠܵܐ ܡܘܼܡܵܐ) ܕܐ݇ܣܘܼܪ̈ܵܝܹܐ ܩܵܬ݂ܘܿܠܝܼܩܵܝܹ̈ܐ ܥܲܠ ܣܘܼܪܛܵܐ ܕܦܸܬ݂ܘܵܐ: 36.20404 ܓܲܪܒܝܵܐܝܼܬ ܘ 43.07575 ܡܲܕܢܚܵܐܝܼܬ: ܘܥܲܠ ܪܵܡܘܼܬ݂ܐ ܕ(237) ܡܝܼܬܪܹ̈ܐ ܡܼܢ ܫܲܘܝܘܼܬ݂ ܫܸܛܚܵܐ ܕܝܲܡܵܐ: ܒܡܲܫܪܝܼܬܐ ܕ(ܩܲܠܥܵܐ) ܩܘܼܪܒܵܐ ܕܲܬܦܵܩܬܐ ܕܥܵܠܘܿܠܵܐ ܕ(ܐܲܠܢܲܒܝܼ) ܓܝܼܘܲܪܓܝܼܣ: ܘܐܘܼܪܚܵܐ ܪܹܫܵܝܬܐ ܕܐܵܙܵܠ݇ܐ ܠܢܝܼܢܘܹܐ ݂ ܘܢܵܦܠܵܐ ܓܲܘ ܠܸܒܵܐ ܕܡܲܘܨܸܠ ܥܲܬܝܼܩܬܐ ܕܝܼܗ݇ܘܵܐ ܒܕܲܥܒܲܪ ܟܪܝܼܟ݂ܬܐ ܒܫܘܼܪܹ̈ܐ ܥܘܼܬ݂ܡܵܢܵܝܹ̈ܐ: ܥܲܠ ܣܸܦܬܐ ܡܲܥܪܒ݂ܵܝܬܐ ܕܢܲܗܪܵܐ ܕܕܸܩܠܲܬ ܒܲܠܩܘܼܒ݂ܠ (ܒܲܪܩܘܼܒ݂ܠ) ܢܝܼܢܘܹܐ: ܥܲܠ ܒܘܼܥܕܵܐ ܕ(400) ܟܠܡ ܠܓܲܪܒܝܵܐ ܕܒܲܓ݂ܕܵܕ ݂

ܘܢܵܦܠܵܐ ܓܲܘ ܠܸܒܵܐ ܕܲܚܕܵܐ ܐܲܪܥܵܐ ܟܪܝܼܟ݂ܬܐ ܒܪܵܒܵܐ ܒܸܢܝܵܢܹ̈ܐ ܡܫܝܼܚܵܝܹ̈ܐ ܐܲܝܟ݂: ܥܹܕܬܐ ܚܕܲܬܐ ܕܛܵܗܝܼܪܵܐ ܕܐ݇ܣܘܼܪ̈ܵܝܹܐ ܩܵܬ݂ܘܿܠܝܼܩܵܝܹ̈ܐ: ܘܥܹܕܬܐ ܕܛܵܗܝܼܪܵܐ ܕܐ݇ܣܘܼܪ̈ܵܝܹܐ ܐܲܪ̈ܬ݂ܘܿܕܘܿܟܣܵܝܹܐ: ܘܥܹܕܬܐ ܐܵܪܸܡܢܵܝܬܐ ܫܠܝܼܚܵܝܬܐ: ܘܚܲܪܬܐ ܩܸܢܛܪܘܿܢ ܕܟܘܼܪܣܝܵܐ ܕܡܲܪܥܝܼܬܐ ܕܐ݇ܣܘܼܪ̈ܵܝܹܐ ܩܵܬ݂ܘܿܠܝܼܩܵܝܹ̈ܐ ݂

ܠܦܘܼܬ݂ ܝܘܼܒܵܠܵܐ ܐ݇ܣܘܼܪܝܵܝܵܐ: ܡܲܫܚܲܕܬܐ ܒܲܡܫܝܼܚܵܝܘܼܬ݂ܐ ܕܵܥܪܵܐ ܐܲܘ ܡܒܲܝܬܝܵܐ (تنسب) ܠܲܫܠܝܼܚܵܐ ܬܐܘܿܡܵܐ ܘܬܲܠܡܝܼܕܹ̈ܗ ܐܲܕܲܝ ܘܡܵܐܪܝܼ: ܐܸܠܵܐ ܟܠ ܕܐܲܝܟ݂ ܕܗܵܘܝܵܐ:” ܡܲܒܝܘܿܢܹܐ ܝܠܵܗ̇ ܕܲܥܒ݂ܵܪܬܐ ܕܲܡܫܝܼܚܵܝܘܼܬ݂ܐ ܓܲܘ ܦܢܝܼܬܐ: ܫܲܪܝܼܪܵܐܝܼܬ ܒܸܕܥܵܪܵܐ ܝܠܵܗ̇ ܠܫܘܼܪܵܝܵܐ ܕܕܵܪܵܐ ܬܪܲܝܵܢܵܐ ܒܡܸܨܥܵܝܘܼܬ݂ܐ ܕܡܲܫܚܕܵܢܹ̈ܐ ܝܗܘܼܕܵܝܹ̈ܐ ܘܲܡܫܝܼܚܵܝܹ̈ܐ ܐܸܬܝܹ̈ܐ ܡܼܢ ܐܲܬ݂ܪܵܐ ܦܲܠܣܛܝܼܢ “[1] ݂

ܡܫܝܼܚܵܝܘܼܬ݂ܐ ܓܲܘ ܐܲܬ݂ܪܵܐ ܕܒܹܝܬ ܢܲܗܪ̈ܝܼܢ ܦܝܼܫܠܵܗ̇ ܡܫܘܼܬܐܲܣܬܐ ܓܲܘ ܣܵܠܝܼܩ ܘܲܩܛܝܼܣܦܘܿܢ: ܥܲܠ ܣܸܦ̈ܘܵܬ݂ܐ (ضفاف) ܕܢܲܗܪܵܐ ܕܕܸܩܠܲܬ: ܘܥܲܠ ܒܘܼܥܕܵܐ ܕ(30) ܟܠܡ ܬܲܝܡܢܵܐ ܕܒܲܓ݂ܕܵܕ: ܐܲܝܟܵܐ ܕܲܡܬܲܢܹܐ ܝܘܼܒܵܠܵܐ ܕܩܲܕܝܼܫܵܐ ܡܵܪܝ ܬܐܘܿܡܵܐ: ܕܲܟܠܹܐ ܠܹܗ ܬܵܡܵܐ ܟܲܕ ܒܐܘܼܪܚܹܗ ܠܗܸܢܕܘܿ ݂ ܘܥܲܠ ܚܕܵܐ ܪܵܡܬܐ ܓܲܘ ܦܢܝܼܬܐ ܕܟܘܿܟ݂ܹܐ: ܦܝܼܫܠܵܗ̇ ܒܢܝܼܬܐ ܥܹܕܬܐ ܦܵܛܪܝܼܵܪܟܵܝܬܐ ܩܲܕܡܵܝܬܐ ܕܥܹܕܬܐ ܕܐܲܬ݂ܪܵܐ ܕܒܹܝܬ ܢܲܗܪ̈ܝܼܢ: ܘܩܵܬ݂ܘܿܠܝܼܩܵܝܘܼܬ݂ܵܗ̇ ܦܝܼܫܠܵܗ̇ ܡܫܘܼܬܐܲܣܬܐ ݂ ܗܵܕܹܐ ܡܫܝܼܚܵܝܘܼܬ݂ܐ ܕܡܼܢ ܫܸܪܫܵܐ ܘܝܘܼܒܵܠܵܐ ܕܠܸܫܵܢܵܐ ܐ݇ܣܘܼܪܝܵܝܵܐ: ܥܕܲܡܵܐ ܠܝܲܘܡܵܢܵܐ ܡܫܲܬܐܘܿܣܹܐ ܝܠܵܗ̇ ܚܲܕ ܐܸܣܵܐ ܡܫܲܘܬܦܵܐ ܒܹܝܬ ܥܹܕܵܬ݂̈ܐ ܕܘܼܟܬܵܢܵܝܹ̈ܐ ܕܥܝܼܪܵܐܩ: ܐܲܝܟܵܐ ܕܲܦܝܵܫܵܐ ܝܠܹܗ ܡܫܘܼܢܝܵܐ ܘܲܢܛܝܼܪܵܐ ܗܵܢ ܝܘܼܒܵܠܵܐ ܝܼܪܝܼܬܐ ܠܝܲܘܡܵܢܵܐ ݂

ܦܝܼܫܠܹܗ ܡܦܲܠܓ݂ܵܐ ܗܵܢܵܐ ܐܸܣܵܐ ܡܫܲܘܬܦܵܐ ܕܪܝܼܓ݂ܵܐܝܼܬ ܠܚܲܕ ܡܸܢܝܵܢܵܐ ܪܵܒܵܐ  ܕܥܹܕܵܬ݂̈ܐ: ܡܼܢ ܙܲܒ݂ܢܵܐ ܕܲܟܢܘܼܫܝܹ̈ܐ ܥܹܕܬܵܢܵܝܹ̈ܐ ܩܲܕܡܵܝܹ̈ܐ ܠܗܲܠ ܕܵܪܵܐ ܕܥܸܣܪܝܼܢ: ܠܥܸ̈ܠܵܬ݂ܐ ܐܲܝܟ݂ ܕܲܒܣܘܿܓ݂ܐܵܐ (غالبًا): ܝܼܗ݇ܘܵܘ ܓ̰ܝܘܿܦܘܿܠܝܼܛܝܼܩܵܝܹ̈ܐ ܝܲܬܝܼܪ ܡܼܢ ܕܝܼܗ݇ܘܵܘ ܟܪ̈ܝܼܣܬܘܿܠܘܿܓ̰ܝܼܵܝܹܐ ݂

ܘܗܵܕܟ݂ܵܐ: ܦܝܼܫܠܹܗ ܩܛܝܼܪܵܐ ܗܿܘ ܟܢܘܼܫܝܵܐ ܬܹܒܹܝܠܵܝܵܐ ܩܲܕܡܵܝܵܐ ܓܲܘ ܢܝܼܩܝܵܐ ܒܫܲܢ݇ܬܐ ܕ(325): ܘܦܝܼܫܠܹܗ ܩܛܝܼܪܵܐ ܒܪܹܫܵܢܘܼܬ݂ܐ ܕܐܸܡܦܪܵܛܘܿܪܵܐ ܪܗܘܿܡܵܢܵܝܵܐ ܩܸܣܛܲܢܛܝܼܢ ܩܲܕܡܵܝܵܐ: ܕܠܵܐ ܡܛܲܝܒ݂ܘܼܬܐ (بغياب) ܕܐܲܦܸܣܩܘܿܦܹ̈ܐ ܕܐܲܬ݂ܪܵܐ ܕܦܵܪܹܣ (ܥܹܕܬܐ ܕܡܲܕܢܚܵܐ): ܣܛܲܪ ܡܼܢ ܝܲܥܩܘܿܒ݂ ܢܨܝܼܒ݂ܵܝܵܐ ݂ ܒܗܿܝ ” ܕܠܵܐ ܝܗ݇ܘܵܐ ܡܸܬ݂ܡܲܨܝܵܢܝܼܬܐ ܠܐܲܦܸܣܩܘܿܦܹ̈ܐ ܐ݇ܚܪ̈ܢܹܐ: ܒܥܸܕܵܢ ܠܵܐ ܦܪܵܩܬܐ ܕܲܦܠܵܫܹ̈ܐ: ܡܛܲܝܒ݂ܘܼܬ݂ܐ ܘܐܬܵܝܬܐ ܠܚܲܕ ܟܢܘܼܫܝܵܐ ܩܛܝܼܪܵܐ ܓܲܘ ܚܲܕ ܐܲܬ݂ܪܵܐ ܒܥܸܠܕܒ݂ܵܒ݂ܵܐ: ܘܝܲܬܝܼܪܵܐܝܼܬ ܕܗܵܘܹܐ ܒܪܹܫܵܢܘܼܬܐ ܕܐܸܦܪܵܛܘܿܪܵܐ ܪܗܘܿܡܵܢܵܝܵܐ “[2] ݂

ܘܵܠܹܐ ܕܦܵܝܫܵܐ ܐܡܝܼܪܬܐ ܕܡܼܢ ܝܘܿܡ ܚܦܵܩܬܐ ܕܩܸܣܛܲܢܛܝܼܢ ܩܲܕܡܵܝܵܐ ܠܲܡܫܝܼܚܵܝܘܼܬ݂ܐ: ܡܫܘܼܢܹܐ ܠܹܗ ܐܸܦܪܵܛܘܿܪܵܐ ܣܵܣܵܢܵܝܵܐ ܫܵܒܘܼܪ ܬܪܲܝܵܢܵܐ ܡܼܢ ܡܸܫܬܲܒ݂ܩܵܢܘܼܬ݂ܐ (ܡܬ݂ܦܲܚܠܵܢܘܼܬ݂ܐ: التسامح): ܠܠܵܐ ܚܲܬܝܼܬܘܼܬ݂ܐ ܒܲܡܫܝܼܚܵܝܹ̈ܐ ܕܐܲܬ݂ܪܵܐ ܕܦܵܪܹܣ ݂ ܘܲܡܫܘܼܢܹܐ ܠܵܗ̇ ܗܵܕܹܐ ܠܵܐ ܚܲܬܝܼܬܘܼܬ݂ܐ (عدم الثقة) ܒܐ݇ܚܵܪܵܝܘܼܬ݂ܐ ܠܲܒܥܸܠܕܒ݂ܵܒ݂ܘܼܬ݂ܐ: ܘܦܝܼܫܠܗ݇ܘܿܢ ܡܘܼܚܪܸ̈ܒ݂ܹܐ ܥܹܕܵܬ̈ܐ ܘܲܪ̈ܕܝܼܦܹܐ ܐ݇ܢܵܫܲܝ̈ ܬܲܘܕܝܼܬܐ ݂ ” ܠܵܐ ܝܗ݇ܘܵܐ ܢܝܼܫܵܐ ܡܼܢ ܪܕܘܼܦܝܵܐ ܡܲܘܒܕܵܢܘܼܬ݂ܐ (إبادة) ܕܲܡܫܝܼܚܵܝܹ̈ܐ: ܐܸܠܵܐ ܡܫܲܒܠܵܢܘܼܬܲܝܗܝ ܠܲܗܦܵܟ݂ܬܐ (ܕܥܵܪܬܐ ܡܼܢ ܗܲܝܡܵܢܘܼܬ݂ܐ): ܐܝܼܡܲܢ ܕܦܵܝܫܝܼ ܡܐܲܒܕܹ̈ܐ (ܡܛܘܼܠܩܹ̈ܐ) ܥܲܠܠܵܢܹ̈ܐ ܕܥܹܕܬܐ”[3] ݂

ܒܵܬܲܪ ܚܲܕ ܕܵܪܵܐ ܡܼܢ ܙܲܒ݂ܢܵܐ: ܒܫܲܢ݇ܬܐ ܕ(431): ܕܝܼܢܹܗ ܟܢܘܼܫܝܵܐ ܕܐܲܦܸܣܘܿܣ ܠܦܵܛܪܝܼܵܪܟܵܐ ܕܩܸܣܛܲܢܛܝܼܢܝܼܵܐ (ܢܸܣܛܘܿܪ) ܟܲܕ ܥܒ݂ܵܕܵܐ ܝܗ݇ܘܵܐ ܣܘܼܬܵܪܵܐ (دفاع) ܥܲܠ ܬܪܹܝܢ ܟܝܵܢܹ̈ܐ ܕܚܵܝܝܼ ܡܸܚܕܵܕܹ̈ܐ ܓܲܘ ܩܢܘܿܡܵܐ ܕܲܡܫܝܼܚܵܐ: ܟܝܵܢܵܐ ܐܲܠܵܗܵܝܵܐ ܒܲܪ ܐܲܠܵܗܵܐ: ܘܗܿܘ ܐ݇ܚܪܢܵܐ ܒܲܪܢܵܫܵܝܵܐ ܒܪܘܿܢܵܐ ܕܡܲܪܝܲܡ ݂ ܦܝܼܫܠܵܗ̇ ܚܫܝܼܒ݂ܬܐ ܗܵܕܹܐ ܗܲܝܡܵܢܘܼܬ݂ܐ: ܗܲܪܵܛܝܼܩܘܼܬ݂ܐ ܘܦܝܼܫܠܹܗ ܡܘܼܚܸܪܡܵܐ (ܢܸܣܛܘܿܪ) ݂ ܡܥܘܼܕܸܪܹܗ ܡܘܼܪܵܝܵܐ (تنافس) ܓ̰ܝܘܿܦܘܿܠܝܼܛܝܼܩܵܝܵܐ: ܒܹܝܬ ܐܸܡܦܪܵܛܘܿܪܘܼܬ݂ܐ ܪܗܘܿܡܵܢܵܝܬܐ ܠܐܸܦܪܵܛܘܿܪܘܼܬ݂ܐ ܦܵܪܣܵܝܬܐ ܣܵܣܵܢܵܝܬܐ: ܠܥܹܕܬܐ ܕܡܲܕܢܚܵܐ ܕܲܡܩܲܒܠܵܐ ܠܢܸܣܛܘܿܪܢܵܝܘܼܬ݂ܐ ܒܦܲܠܓܵܐ ܬܪܲܝܵܢܵܐ ܕܕܵܪܵܐ ܚܡܝܼܫܵܝܵܐ: ܘܚܲܪܬܐ ܦܪܸܣܠܵܗ̇ ܒܐܲܬ݂ܪܵܐ ܕܒܹܝܬ ܢܲܗܪ̈ܝܼܢ: ܘܒܲܐܬ݂ܪܵܐ ܕܦܵܪܹܣ ܘܗܸܢܕܘܿ ݂

ܘܒܵܬܲܪ ܥܸܣܪܝܼܢ ܫܸܢܹ̈ܐ: ܒܫܲܢ݇ܬܐ ܕ 451: ܓܲܘ ܟܢܘܼܫܝܵܐ ܕܚܲܠܩܝܼܕܘܿܢܝܵܐ: ܗܘܹܐ ܠܹܗ ܚܲܕ ܕܘܼܪܵܫܵܐ ܟܪܝܼܣܬܘܿܠܘܿܓ̰ܵܝܵܐ ܚܲܕܬܐ ݂ ܦܝܼܫܠܗ݇ܘܿܢ ܡܚܲܝܒ݂ܹ̈ܐ (متهمة) ܥܹܕܵܬ݂̈ܐ: ܐ݇ܣܘܼܪܝܵܝܬܐ ܘܡܸܨܪܵܝܬܐ ܘܐܸܬ݂ܝܘܼܒܵܝܬܐ ܘܐܵܪܸܡܢܵܝܬܐ ܒܣܘܼܬܵܪܵܐ ܥܲܠ ܗܲܝܡܵܢܘܼܬ݂ܐ ܡܘܿܢܘܿܦܝܼܙܵܝܬܐ: ܕܐܵܡܪܵܐ ܕܲܟܝܵܢܵܐ ܐܲܠܵܗܵܝܵܐ ܕܲܡܫܝܼܚܵܐ: ܕܪܸܟܠܹܗ ܠܲܟܝܵܢܹܗ ܒܲܪܢܵܫܵܝܵܐ ܕܲܡܫܝܼܚܵܐ: ܘܲܒܚܘܼܬܵܡܵܐ ܡܫܝܼܚܵܐ ܒܸܕ ܗܵܘܹܐ ܠܹܗ ܒܲܠܚܘܿܕ ܚܲܕ ܟܝܵܢܵܐ ܐܲܠܵܗܵܝܵܐ ݂ ܡܗܘܼܕܹܐ ܝܠܹܗ ܕܘܼܪܵܫܵܐ ܥܲܠ ܗܵܕܹܐ ܗܲܝܡܵܢܘܼܬ݂ܐ ܠܦܘܼܠܵܓ݂ܵܐ ܐ݇ܚܪܢܵܐ: ܘܦܝܼܫܠܗ݇ܘܿܢ ܥܹܕܵܬ̈ܐ ܕܝܲܨܝܼܦܹ̈ܐ ܝܗ݇ܘܵܘ ܠܲܢܛܵܪܵܐ ܗܸܢܝܵܢܲܝ̈ܗܝ ܓ̰ܝܘܿܦܘܿܠܝܼܛܝܼܩܵܝܹ̈ܐ ܕܝܼܠܵܢܵܝܹ̈ܐ: ܗܘܹܐ ܠܗ݇ܘܿܢ ܫܸܪ̈ܝܹܐ ܒܝܵܬܲܝܗܝ (مستقلة بذاتها) ݂

ܒܕܵܪܵܐ ܫܬܝܼܬܵܝܵܐ: ܩܝܼܡܠܹܗ ܪܲܒܵܢܵܐ ܐ݇ܣܘܼܪܝܵܝܵܐ ܝܲܥܩܘܿܒ݂ ܒܘܼܪܕܥܵܝܵܐ ܒܲܡܛܲܟܣܵܢܘܼܬ݂ܐ ܕܥܹܕܬܐ ܐ݇ܣܘܼܪܝܵܝܬܐ ܚܲܕܬܵܐܝܼܬ ݂ ܘܡܼܢ ܒܵܬܲܪ ܣܝܵܡܬܹܗ ܘܡܲܪܲܡܬܹܗ ܠܕܲܪܓ݂ܵܐ ܕܐܲܦܸܣܩܘܿܦܘܼܬ݂ܐ: ܩܝܼܡܠܹܗ ܒܚܲܕ ܚܙܘܼܩܝܵܐ ܝܲܪܝܼܟ݂ܵܐ ܠܦܸܢ̈ܝܵܬ݂ܐ ܘܡܵܬ݂ܘܵܬ݂ܐ ܕܐ݇ܣܘܼܪ̈ܵܝܹܐ: ܠܲܣܝܵܡܐܝܼܕܵܐ ܕܚܲܕ ܡܸܢܝܵܢܵܐ ܪܲܒܵܐ ܡܼܢ ܐܲܦܸܣܩܘܿܦܹ̈ܐ ܘܟܵܗܢܹ̈ܐ ܘܲܡܫܲܡܫܵܢܹ̈ܐ ݂ ܘܐܝܼܩܵܪܵܐ ܐܸܠܹܗ: ܦܝܼܫܠܵܗ̇ ܡܫܘܼܡܲܗܬܐ ܥܹܕܬܐ ܐ݇ܣܘܼܪܝܵܝܬܐ ܐܲܪܬ݂ܘܿܕܘܿܟܣܵܝܬܐ ܒـ (ܝܲܥܩܘܿܒܵܝܬܐ): ܘܢܲܩܝܼ̈ܦܵܗ̇ ܐܲܘ ܡܗܘܼܡ̈ܢܵܗ̇ ܒـ (ܝܲܥܩܘܼܒܵܝܹ̈ܐ: يعاقبة) ݂

ܥܹܕܬܐ (ܐܲܪܬ݂ܘܿܕܘܿܟܣܵܝܬܐ): ܦܠܸܓ݂ܠܵܗ̇ ܒܕܵܪܵܐ ܕ(18): ܘܲܒܫܲܢ݇ܬܐ ܕ1783 ܒܪܹܐ ܠܹܗ ܡܼܢ ܗܵܢ ܦܘܼܠܵܓ݂ܵܐ: ܥܹܕܬܐ ܕܐ݇ܣܘܼܪ̈ܵܝܹܐ ܩܵܬ݂ܘܿܠܝܼܩܵܝܹ̈ܐ ܐܣܝܼܪܬܐ ܒܪܗܘܿܡܵܐ ݂

_______

[1] ܚܙܝܼ: ܚܲܝܹ̈ܐ ܘܡܲܘܬܐ ܕܲܡܫܝܼܚܵܝܸ̈ܐ ܕܥܝܼܪܵܐܩ ܡܼܢ ܩܕܝܼܡ ܘܲܥܕܲܡܵܐ ܠܝܲܘܡܵܢܵܐ: ܓ̰ܵܐܢ ܦܝܹܝܪ ܦܵܠܘܿܢ: ܦܲܝܝܵܐܪܕ 1994: ܦ 737 ݂

[2] ܚܙܝܼ : ܬܲܫܥܝܼܬܐ ܕܥܹܕܬܐ ܕܡܲܕܢܚܵܐ: ܪܝܼܡܘܿܢܕ ܠܘܿܟܘܿܙ: ܠܘܿ ܣܹܝܪܦ 1995: ܦ 31 ݂

[3] ܚܙܝܼ : ܬܲܫܥܝܼܬܐ ܕܥܹܕܬܐ ܕܡܲܕܢܚܵܐ: ܪܝܼܡܘܿܢܕ ܠܘܿܟܘܿܙ: ܠܘܿ ܣܹܝܪܦ 1995: ܦ 31 ݂

ܗܵܢ ܦܵܣܘܿܩܵܐ ܒܣܘܿܓ݂ܐܹܗ ܬܟܝܼܠܵܐ ܝܠܹܗ ܥܲܠ ܥܲܡܠܵܐ ܕ(ܓ̰ܵܐܢ ܡܵܐܪܝܼ ܡܝܼܪܝܼܓ̰ܘܿ): ܗܿܘ ܕܲܚܝܹܐ ܠܹܗ ܓܲܘ ܥܝܼܪܵܐܩ (14) ܫܸܢܹ̈ܐ: ܡܼܢ 1968 ـ 1983 ܐܲܝܟ݂ ܚܲܕ ܗܲܕܵܡܵܐ ܓܲܘ ܡܫܲܕܪܘܼܬ݂ܐ ܕܐܲܒ݂ܵܗܵܬ݂ܐ ܕܘܿܡܢܝܼܟܵܝܹ̈ܐ ܠܐܲܬ݂ܪܵܐ ܕܒܹܝܬ ܢܲܗܪ̈ܝܼܢ ܘܟܘܼܪܕܸܣܬܵܐܢ ܘܐܲܪܡܝܼܢܝܵܐ: ܘܩܸܢܛܪܘܿܢܵܗ̇ ܝܼܗ݇ܘܵܐ ܒܡܲܘܨܸܠ ݂ ܘܐܵܦ ܚܙܝܼ: ܬܪܹܝܢ ܟܬܵܒܹ̈ܐ ܡܼܢ ܥܲܡܠܹ̈ܗ: (ܙܸܠ (ܣܝܼ) ܠܢܝܼܢܘܹܐ/ ܣܘܼܘܵܕܵܐ ܥܲܡ ܥܝܼܪܵܐܩ): ܐܲܨܲܚܬܐ ܕܣܹܝܪܦ: ܬܸܫܪܝܼܢ ܩܲܕܡܵܝܵܐ 2000 ݂ ܚܙܝܼ: ܬܦܵܩܬܐ ܚܕܵܪܲܝ ܡܲܕܢܚܵܐ ܡܫܝܼܚܵܝܵܐ: ܐܲܨܲܚܬܐ ܕܠܵܐܬܘܿܢ: ܬܲܡܘܼܙ 2015 ݂ 

 ܐܵܦܸܢ ܕܩܵܐܹܡ ܕܲܡܫܝܼܚܵܝܹ̈ܐ ܕܡܲܘܨܸܠ ܕܪܵܡܵܝܵܐ ܝܠܹܗ (مأساوي): ܐܸܠܵܐ ” ܒܸܕ ܦܵܝܫܵܐ ܡܲܘܨܸܠ ܚܕܵܐ ܡܕܝܼܢ݇ܬܐ ܡܫܝܼܚܵܝܬܐ “[1] ܐܲܝܟ݂ ܕܲܓܠܝܼܬܐ ܝܠܵܗ̇ ܡܼܢ ܬܲܫܥܝܼܬܵܗ̇ ܘܝܵܪܬܘܼܬܵܗ̇ ܥܲܬܝܼܩܹ̈ܐ ܘܕܵܪ̈ܵܝܹܐ ݂

ܘܐܵܦܸܢ ܕܐܲܦܸܣܩܘܿܦܘܼܬ݂ܐ ܩܲܕܡܵܝܬܐ ܡܫܘܼܬܐܸܣܬܐ ܝܗ݇ܘܵܐ ܒܫܲܢ݇ܬܐ ܕ(554)[2]: ܐܸܠܵܐ ܐܵܦ ܐܵܢܲܢܩܵܝܬܐ ܝܠܵܗ̇ ܕܡܲܬܒܲܚ ܓܲܘ ܒܵܠܲܢ: ܗܿܘ ܝܘܼܒܵܠܵܐ ܡܫܝܼܚܵܝܵܐ ܫܠܝܼܚܵܝܵܐ ܥܲܬܝܼܩܵܐ ݂ “ܬܠܵܬ ܥܹܕܵܬ̈ܐ ܐܝܼܬ ܠܗ݇ܘܿܢ ܐܝܼܩܵܪܵܐ ܕܦܝܼܫܠܗ݇ܘܿܢ ܡܫܘܼܬܐܸܣܹ̈ܐ ܓܲܘ ܒܵܬܹ̈ܐ ܕܦܝܼܫܬܐ ܝܠܵܗ̇ ܐܡܝܼܪܬܐ ܕܝܬܸܒ݂ܠܗ݇ܘܿܢ ܐܲܘ ܫܟܸܢܘܼܢ ܓܵܘܲܝܗܝ ܫܠܝܼܚܹ̈ܐ ܕܡܵܪܲܢ ݂ ܐܲܝܟܵܐ ܕܦܝܼܫܠܵܗ̇ ܒܢܝܼܬܐ ܥܹܕܬܐ ܕ(ܫܸܡܥܘܿܢ ܐܲܠ ـ ܨܲܦܵܐܐ) ـ ܦܝܼܫܠܵܗ̇ ܒܢܝܼܬܐ ܒܡܸܬܚܵܐ ܕܕܵܪܵܐ ܬܪܲܥܣܝܼܪܵܝܵܐ ܘܲܬܠܵܬܲܥܣܝܼܪܵܝܵܐ ـ ܓܲܘ ܡܲܘܬܒ݂ܵܐ (موقع)ܕܫܵܟܹܢ ܗ݇ܘܵܐ ܓܵܘܹܗ ܩܲܕܝܼܫܵܐ ܦܲܛܪܘܿܣ: ܒܥܸܕܵܢ ܚܙܘܼܩܝܹܗ ܠܒܵܒܹܝܠ: ܘܥܹܕܬܐ ܕܡܵܪܝ ܬ݂ܝܘܿܕܘܿܪܣ ܒܸܕ ܦܵܝܫܵܐ ܐܣܝܼܪܬܐ ܒܲܚܙܘܼܩܝܵܐ ܕܡܵܪܝ ܒܲܪܬ݂ܘܿܠܡܵܘܸܣ ݂ ܐܸܠܵܐ ܠܦܘܼܬ݂ ܫܠܝܼܚܵܐ ܡܵܪܝ ܬܐܘܿܡܵܐ ܟܲܕ ܗܿܘ ܒܐܘܼܪܚܹܗ ܠܗܸܢܕܘܿ: ܒܲܝܬܐ ܕܲܫܟܝܼܢܵܐ ܝܗ݇ܘܵܐ ܓܵܘܹܗ ܦܝܼܫܠܹܗ ܥܹܕܬܐ”[3] ݂ ܘܬܲܚܘܼܒܵܐܝܼܬ ܗܵܕܹܐ ܥܹܕܬܐ: ܝܼܠܵܗ̇ ܥܹܕܬܐ ܕܡܵܪܝ ܬܐܘܿܡܵܐ ܕܐ݇ܣܘܼܪ̈ܵܝܹܐ ܐܲܪ̈ܬ݂ܘܿܕܘܿܟܣܵܝܹܐ ݂

ܒܸܕܥܵܪܵܐ ܝܠܵܗ̇ ܬܲܫܥܝܼܬܵܐ ܕܥܹܕܬܐ ܩܲܕܡܵܝܬܐ ܕܦܝܼܫܠܵܗ̇ ܚܙܝܼܬܐ ܓܲܘ ܢܝܼܢܘܹܐ (ܝܲܘܡܵܢܵܐ ܡܲܘܨܸܠ ܡܲܕܢܚܵܝܬܐ) ܠܫܲܢ݇ܬܐ ܕ570: ܘܦܵܝܫܵܐ ܕܟ݂ܝܼܪܬܐ ܓܲܘ ܬܲܫܥܝܼܬܐ ܣܥܲܪܕܵܝܬܐ (ܢܸܣܛܘܿܪܢܵܝܬܐ) ܒܫܸܡ ܥܹܕܬܐ ܕܡܵܪܝ ܐܹܫܲܥܝܵܐ ݂ ܘܒܲܫܪܵܪܵܐ: ܐܵܗܵܐ ܡܫܲܪܘܿܪܹܐ ܝܠܵܗ̇ ܠܥܲܬܝܼܩܘܼܬ݂ ܐܝܼܬܘܼܬܐ ܕܲܟܢܘܼܫܝܵܐ ܡܫܝܼܚܵܝܵܐ ܒܗܵܕܹܐ ܦܢܝܼܬܐ ݂ ܒܕܵܪܵܐ ܫܒ݂ܝܼܥܵܝܵܐ: ܥܹܕܬܐ ܕܡܵܪܝ ܬܐܘܿܡܵܐ ܢܲܩܝܼܦܬܐ ܠܟܢܘܼܫܝܵܐ ܐ݇ܣܘܼܪܵܝܵܐ ܐܲܪܬ݂ܘܿܕܘܿܟܣܵܝܵܐ: ܝܼܕܝܼܥܬܐ ܝܗ݇ܘܵܐ ܬܘܼܒ݂ ݂ ܘܕܲܝܪܵܐ ܕܡܵܪܝ ܓܲܒ݂ܪܝܼܐܹܝܠ ܡܼܢ ܕܵܪܵܐ ܫܒ݂ܝܼܥܵܝܵܐ ܘܒܵܬܪܹܗ: ܝܼܗ݇ܘܵܐ ܩܸܢܛܪܘܿܢ ܕܲܚܕܵܐ ܡܲܕܪܲܫܬܐ ܬܹܐܘܿܠܘܿܓ݂ܵܝܬܐ ܘܠܝܼܬܘܿܪܓ̰ܵܝܬܐ ܪܲܒܬܐ ܕܥܹܕܬܐ ܕܡܲܕܢܚܵܐ ݂ ܥܹܕܬܐ ܟܲܠܕܵܝܬܐ ܕ(ܐܲܠܛܵܗܝܼܪܵܐ: ܒܛܝܼܢܘܼܬܐ ܕܠܵܐ ܡܘܼܡܵܐ): ܦܝܼܫܠܵܗ̇ ܒܢܝܼܬܐ ܒܕܘܼܟܬܐ ܕܗܵܢ ܕܲܝܪܵܐ ܒܕܵܪܵܐ ܕ(18)[4] ݂

ܘܒܲܥܒ݂ܘܼܪܝܵܐ ܕܙܲܒ݂ܢܹ̈ܐ ܘܕܵܪܹ̈ܐ: ܘܥܲܡ ܛܘܼܘܵܪܵܐ ܕܲܟܢܘܼܫܝܹ̈ܐ ܘܟܘܼܬܵܫܹ̈ܐ ܓܲܘ ܡܲܘܨܸܠ: ܐܬܹܐ ܠܗ݇ܘܿܢ ܠܲܡܫܲܬܐܘܿܣܹܐ ܥܹܕܵܬ̈ܐ ܣܲܓܝܼܐܵܬ݂ܐ ܒܫܘܼܡܵܗܹ̈ܐ ܡܫܲܚܠܦܹ̈ܐ: ܚܒ݂ܵܫܵܐ ܐܵܦ ܥܹܕܵܬ̈ܐ ܕܐܵܪܸ̈ܡܢܵܝܹܐ ܘܠܵܬܝܼܢܵܝܹ̈ܐ ݂

ܚܵܒ݂ܹܫ ܗܵܢ ܦܸܣܩܵܐ ܡܼܢ ܬܲܫܥܝܼܬܐ ܕܲܡܫܝܼܚܵܝܹ̈ܐ ܓܲܘ ܡܲܘܨܸܠ: ܐܬܵܝܬܐ ܕܡܲܫܠܡܵܢܘܼܬ݂ܐ ܘܲܦܪܵܣܬܵܗ̇ ݂ ܢܦܸܠܠܵܗ̇ ܡܲܘܨܸܠ ܒܫܲܢ݇ܬܐ ܕ 641: ܘܦܝܼܫܠܗ݇ܘܿܢ ܡܫܝܼܚܵܝܹ̈ܐ ܕܡܲܘܨܸܠ ܡܼܢ (ܐ݇ܢܵܫܲܝ̈ ܕܼܸܡܵܐ: أهل ذمة): ܥܲܡ ܚܲܕܟܡܵܐ ܙܸܕܩܹ̈ܐ ܡܬܲܚܡܹ̈ܐ: ܘܘܵܠܝܵܬܹܐ ܐܲܠܝܼܨܹ̈ܐ ܠܲܥܒ݂ܵܕܵܐ ܕܒܵܥܝܵܐ ܠܗ݇ܘܿܢ ܘܛܵܠܒܵܐ ܠܗ݇ܘܿܢ ܗܝܼܵܝܘܼܬܲܝܗܝ ܬܲܘܕܝܼܬܵܢܵܝܬܐ ݂ ܗܵܢܵܐ ܩܵܐܹܡ ܗܘܹܐ ܠܹܗ ܐܲܡܝܼܢܵܐ ܠܗܲܠ ܕܵܪܵܐ ܬܫܲܥܣܝܼܪܵܝܵܐ: ܘܲܚܬܸܡܠܹܗ ܓܲܘ ܐܸܡܦܪܵܛܘܿܪܘܼܬ݂ܐ ܥܘܼܬ݂ܡܵܢܵܝܬܐ ܒܫܲܢ݇ܬܐ ܕ1855 ݂ ܘܐܵܦܸܢ ܕܗܵܢ ܪܸܥܝܵܢܵܐ ܡܒܲܣܬܪܵܐ ܝܠܹܗ: ܦܝܼܫܠܗ݇ܘܿܢ ܡܫܝܼܚܵܝܹ̈ܐ ܘܝܗܘܼܕܵܝܹ̈ܐ ܝܼܕܝܼܥܹ̈ܐ ܒܩܵܐܹܡܲܝܗܝ (ܕܼܸܡܵܝܵܐ): ܘܦܝܼܫܠܹܗ ܗܵܢ ܪܸܥܝܵܢܵܐ ܡܬܲܚܘܿܡܹܐ ܠܗܲܘܢܵܐ ܡܲܫܠܡܵܢܵܐ: ܘܲܡܫܲܠܛܘܿܢܹܐ ܠܚܲܝܹ̈ܐ ܓܵܘܵܢܵܝܹ̈ܐ: ܒܩܘܼܪܒܵܐ (تقريبًا) ܓܲܘ ܟܠܲܝܗܝ ܐܲܬ݂ܪ̈ܵܘܵܬ݂ܐ ܕܡܲܫܠܡܵܢܹ̈ܐ ݂ ܘܲܥܕܲܡܵܐ ܠܝܲܘܡܵܢܵܐ: ܚܲܝܠܵܢܵܐ ܝܠܹܗ ܩܵܢܘܿܢܵܐܝܼܬ ܓܲܘ ܐܲܬ݂ܪܵܐ ܕܐܝܼܪܵܢ ݂

ܒܕܵܪܵܐ ܬܪܲܥܣܝܼܪܵܝܵܐ ܘܬܠܵܬܲܥܣܝܼܪܵܝܵܐ: ܒܙܲܒ݂ܢܵܐ ܕܲܣܠܘܿܩܵܝܹ̈ܐ: ܡܫܘܼܠܛܸܢܘܼܢ ܐܲܬܵܒܟܵܝܹ̈ܐ ܠܟܠܲܝܗܝ ܦܸܢ̈ܝܵܬܐ ܕܡܝܼܙܘܿܦܘܿܬܵܡܝܵܐ: ܘܲܥܒܸܕܠܗ݇ܘܿܢ ܠܡܲܘܨܸܠ ܩܸܢܛܪܘܿܢ ܕܫܘܼܠܛܵܢܵܐ ݂ ܒܗܵܢܵܐ ܙܲܒ݂ܢܵܐ: ܐ݇ܣܘܼܪ̈ܵܝܹܐ ܐܲܪ̈ܬ݂ܘܿܕܘܿܟܣܵܝܹܐ ܕܦܝܼܫܠܗ݇ܘܿܢ ܪ̈ܕܝܼܦܹܐ ܓܲܘ ܬܲܟܪܝܼܬ: ܥܪܸܩܠܗ݇ܘܿܢ ܠܫܸܛܚܵܐ ܕܢܝܼܢܘܹܐ ܘܲܠܡܲܘܨܸܠ: ܐܲܝܟܵܐ ܕܲܡܫܘܼܬܐܸܣܠܗ݇ܘܿܢ ܟܢܘܼܫܝܲܝܗܝ ܕܝܼܠܵܢܵܝܵܐ: ܘܲܒܢܹܐ ܠܗ݇ܘܿܢ ܠܥܹܕܬܐ ܕܡܵܪܝ ܐܲܚܵܐ ܕܝܸܡܹܗ (ܚܘܿܕܹܝܢܝܼ) ݂ ܒܚܘܼܬܵܡܵܐ ܕܕܵܪܵܐ ܕܥܸܣܪܝܼܢ: ܒܥܸܠܬܐ ܕܛܲܘܦܵܢܹ̈ܐ ܕܲܗܘܹܐ ܠܗ݇ܘܿܢ ܒܡܲܫܪܝܼܬܐ ܕܲܢܦܝܼܠܬܐ ܝܗ݇ܘܵܐ ܓܵܘܵܗ̇ ܥܹܕܬܐ: ܡܲܝܵܐ ܡܟܘܼܣܹܐ ܠܗ݇ܘܿܢ ܠܥܹܕܬܐ ܕܦܝܼܫܬܐ ܝܗ݇ܘܵܐ ܒܢܝܼܬܐ ܒܲܚܕܵܐ ܐܲܪܥܵܐ ܒܸܫ ܟܘܿܦܵܢܬܐ ܡܼܢ ܫܲܘܝܘܼܬܐ ܕܐܲܪܥܵܐ ܥܝܵܕܵܝܬܐ ݂ ܠܗܵܕܹܟ݂ ܦܝܼܫܠܵܗ̇ ܫܒ݂ܝܼܩܬܐ ܥܹܕܬܐ ܘܲܬܠܝܼܚܬܐ: ܘܦܝܼܫܠܵܗ̇ ܒܢܝܼܬܐ ܚܕܵܐ ܥܹܕܬܐ ܚܕܲܬܐ ܒܪܹܫ ܗܿܝ ܥܲܬܝܼܩܬܐ ݂ ܘܡܼܢ ܛܵܒ݂ܘܼܬ݂ ܓܲܕܵܐ: ܦܝܼܫܠܹܗ ܡܫܘܼܢܝܵܐ ܬܲܪܥܵܐ ܡܲܠܟܵܝܵܐ ܕܲܓܠܝܼܦܵܐ ܝܗ݇ܘܵܐ (منحوت)ܐܲܘ ܢܓ݂ܝܼܪܵܐ ܥܲܠ ܐܸܣܟܹܝܡܵܐ ܕܐܲܬܵܒܟܵܝܹ̈ܐ: ܘܲܕܡܫܘܼܡܸܗ ܠܹܗ ܐܲܒ݂ܵܐ ܦܝܼܝܹܗ ܒـ ” ܡܲܪܓܵܢܝܼܬܐ ܕܲܓܠܝܼܦܘܼܬ݂ܐ ܡܫܝܼܚܵܝܬܐ ܒܕܵܪܵܐ ܬܠܵܬܲܥܣܝܼܪܵܝܵܐ “[5] ݂

ܒܵܬܲܪ ܫܘܼܠܛܵܢܵܐ ܕܐܲܬܵܒܟܵܝܹ̈ܐ: ܡܨܹܐ ܠܹܗ ܡܓܘܿܠܵܝܵܐ (ܗܘܿܠܵܟܘܿ ܚܵܐܢ) ܕܫܲܠܛܸܢ ܥܲܠ ܡܲܘܨܸܠ: ܐܸܠܵܐ ܠܵܐ ܥܒܸܕܠܹܗ ܓܵܘܵܗ̇ ܡܵܐ ܕܲܥܒܸܕܠܹܗ ܡܼܢ ܚܪܵܒ݂ܵܐ ܘܲܢܚܵܪܵܐ ܓܲܘ ܒܲܓ݂ܕܵܕ ܒܫܲܢ݇ܬܐ ܕ1258: ܘܗܵܕܹܐ ܒܛܲܝܒܘܼܬ݂ܐ ܕܕܲܝܵܢܵܐ ܡܗܝܼܪܵܐ ܕܲܡܕܝܼܢ݇ܬܐ (ܠܘܼܠܘܼ): ܕܝܼܗ݇ܘܵܐ ܡܼܢ ܫܸܪܫܵܐ ܐܵܪܸܡܢܵܝܵܐ[6] ݂ ܘܥܲܡ ܗܵܕܹܐ: ܕܵܪܵܐ ܢܲܩܝܼܦܵܐ (ܕܒܵܬܪܹܗ) ܝܼܗ݇ܘܵܐ ܕܪܵܡܵܝܵܐ ݂ ” ܪ̈ܕܘܼܦܝܹܐ ܥܲܠ ܡܫܝܼܚܵܝܹ̈ܐ ܡܛܹܐ ܠܗ݇ܘܿܢ ܠܪܹܫܲܝܗܝ (ܠܕܲܪ̈ܓ݂ܲܝܗܝ ܥܸܠܵܝܵܐ) ܒܙܲܒ݂ܢܵܐ ܕ(ܬܝܼܡܘܿܪܠܸܢܟ): ܗܿܘ ܕܲܨܦܸܚܠܹܗ ܓܲܝܣܹܗ ܠܡܲܕܢܚܵܐ ܡܸܨܥܵܝܵܐ ܒܫܸܢܹ̈ܐ ܩܲܕܡܵܝܹ̈ܐ ܕܕܵܪܵܐ ܐܲܪܒܲܥܣܝܼܪܵܝܵܐ: ܘܲܟܣܸܚܠܹܗ ܠܥܵܡܘܿܪܹ̈ܐ ܡܫܝܼܚܵܝܹ̈ܐ ݂ ܠܲܝܬ ܥܹܕܬܐ ܡܫܝܼܚܵܝܬܐ ܡܲܕܢܚܵܝܬܐ ܕܲܚܙܹܐ ܠܵܗ̇ ܪ̈ܕܘܼܦܝܹܐ ܘܩܸܛܠܹ̈ܐ ܐܲܝܟ݂ ܥܹܕܬܐ ܕܡܲܕܢܚܵܐ ܝܸܡܵܐ: ܟܢܘܼܫܝܵܐ ܡܫܝܼܚܵܝܵܐ ܥܝܼܪܵܩܵܝܵܐ ܚܫܝܼܚܵܐ ܝܠܹܗ ܕܛܵܠܹܒ ܘܩܵܪܹܐ ܠܙܸܕܩܵܐ ܕܣܵܗܕܘܼܬ݂ܐ “[7] ݂

ܒܫܲܢ݇ܬܐ ܕ1516: ܢܦܸܠܠܵܗ̇ ܡܲܘܨܸܠ ܠܓܵܗܵܐ ܩܲܕܡܵܝܬܐ ܒܐܝܼܕܵܐ ܕܬܘܼܪ̈ܟܵܝܹܐ ܥܘܼܬ݂ܡܵܢܵܝܹ̈ܐ: ܐܸܠܵܐ ܒܕܵܪܵܐ ܢܲܩܝܼܦܵܐ ܦܫܸܛܠܗ݇ܘܿܢ ܫܘܼܠܛܵܢܲܝܗܝ ܕܲܡܬܸܚܠܹܗ ܠܐܲܪܒܲܥ ܕܵܪܹ̈ܐ ܓܲܘ ܐܲܬ݂ܪܵܐ ܕܒܹܝܬ ܢܲܗܪ̈ܝܼܢ: ܒܵܬܲܪ ܟܒ݂ܵܫܬܐ ܕܒܲܓ݂ܕܵܕ ܒܫܲܢ݇ܬܐ ܕ1638 ܒܝܲܕ ܫܲܠܝܼܛܵܐ ܡܘܼܪܵܐܕ ܪܒ݂ܝܼܥܵܝܵܐ ݂

ܡܲܘܨܸܠ ܒܕܵܪܵܐ ܫܬܲܥܣܝܼܪܵܝܵܐ: ܝܼܗ݇ܘܵܐ ܩܸܢܛܪܘܿܢ ܪܲܒܵܐ ܕܡܲܥܒ̇ܕܵܢܘܼܬ݂ܐ ܡܫܝܼܚܵܝܬܐ: ܒܗܿܝ ܕܝܼܗ݇ܘܵܐ ܕܘܼܟܬܐ ܕܲܒܪܹܐ ܠܹܗ ܓܵܘܵܗ̇ ܦܘܼܠܵܓ݂ܵܐ ܓܲܘ ܥܹܕܬܐ ܕܡܲܕܢܚܵܐ: ܥܲܡ ܓܘܼܒܵܝܵܐ ܕܝܘܿܚܲܢܵܐ ܣܘܼܠܵܩܵܐ ܦܵܛܪܝܼܵܪܟܵܐ ܩܲܕܡܵܝܵܐ ܠܥܹܕܬܐ ܟܲܠܕܵܝܬܐ ݂ ܝܼܗ݇ܘܵܐ ܪܹܫܵܢܵܐ ܕܕܲܝܪܵܐ ܕܪܲܒܵܢ ܗܘܿܪܡܝܼܙܕ ܕܓܲܘ ܐܲܠܩܘܿܫ: ܕܲܫܩܸܠܠܹܗ ܫܘܼܡܵܗܵܐ ܕܝܘܿܚܲܢܵܐ ܬܡܝܼܢܵܝܵܐ: ܘܲܚܙܸܩܠܹܗ ܠܪܗܘܿܡܵܐ ܕܡܲܘܕܹܐ ܒܗܲܝܡܵܢܘܼܬ݂ܐ ܩܵܬ݂ܘܿܠܝܼܩܵܝܬܐ ݂ ܒܝܲܘܡܵܐ ܕ(20) ܒܢܝܼܣܵܢ ܫܲܢ݇ܬܐ ܕ1553: ܦܝܼܫܠܹܗ ܣܝܼܡܵܐ ܣܘܼܠܵܩܵܐ ܒܝܲܕ ܦܵܦܵܐ ܝܘܿܠܝܘܿܣ ܬܠܝܼܬܵܝܵܐ: ܦܵܛܪܝܼܵܪܟܵܐ ܠܥܹܕܬܐ ܟܲܠܕܵܝܬܐ ܩܵܬ݂ܘܿܠܝܼܩܵܝܬܐ: ” ܗܿܝ ܕܦܝܼܫܠܵܗ̇ ܝܼܠܝܼܕܬܐ ܪܘܼܫܡܵܐܝܼܬ ܡܼܢ ܣܝܼܩܘܿܡ ܣܝܵܡܝܼܕܹܗ”[8] ݂ ܡܼܢ ܒܵܬܲܪ ܕܝܼܵܪܒܲܟܪ (ܬܲܝܡܢܵܐ ܡܲܕܢܚܵܝܵܐ ܕܬܘܼܪܟܝܵܐ ܕܝܲܘܡܵܢܵܐ): ܘܡܼܢ ܩܕܵܡ ܒܲܓ݂ܕܵܕ (1950): ܦܝܼܫܠܹܗ ܡܫܘܼܬܐܸܣܵܐ ܟܘܼܪܣܝܵܐ ܕܥܹܕܬܐ ܟܲܠܕܵܝܬܐ ܓܲܘ ܡܲܘܨܸܠ ܒܫܲܢ݇ܬܐ ܕ1830: ܥܲܡ ܓܘܼܒܵܝܵܐ ܕܝܘܿܚܲܢܵܐ ܗܘܿܪܡܝܼܙܕ ܬܡܝܼܢܵܝܵܐ ܡܝܼܛܪܵܦܘܿܠܹܝܛܵܐ ܕܡܲܘܨܸܠ: ܠܕܲܪܓ݂ܵܐ ܕܦܵܛܪܝܼܵܪܟܘܼܬܐ ܕܥܹܕܬܐ ܟܲܠܕܵܝܬܐ ݂

ܒܫܲܢ݇ܬܐ ܕ1743: ܡܫܘܼܬܸܦܠܗ݇ܘܿܢ ܡܫܝܼܚܵܝܹ̈ܐ ܕܡܲܘܨܸܠ ܒܟܲܫܝܼܪܘܼܬ݂ܐ ܓܲܘ ܣܘܼܬܵܪܵܐ ܕ(42) ܝܲܘܡܵܢܹ̈ܐ ܕܲܚܨܵܪܵܐ ܕܡܲܘܨܸܠ: ܕܲܥܒܸܕܠܹܗ (ܢܵܕܹܪ ܫܵܐܗ ܦܵܪܣܵܝܵܐ): ܗܿܘ ܕܲܓܢܸܒ݂ ܠܹܗ ܘܲܣܠܸܒ ܠܹܗ ܠܫܸܛܚܵܐ ܕܢܝܼܢܘܹܐ ܡܼܢ ܩܕܵܡ ܗܵܢ ܚܨܵܪܵܐ ݂ ܘܦܵܫܵܐ (ܡܕܲܒܪܵܢܵܐ) ܕܡܲܘܨܸܠ (ܚܘܿܣܲܝܢ ܐܲܠ ـ ܓ̰ܲܠܝܼܠܝܼ) ܕܲܙܟܹܐ ܠܹܗ ܓܲܘ ܦܠܵܫܵܐ ܒܥܘܼܕܪܵܢܵܐ ܓܲܠܝܵܐ ܘܦܵܥܘܿܠܵܐ ܕܲܡܫܝܼܚܵܝܹ̈ܐ ܕܡܲܘܨܸܠ:” ܩܢܹܐ ܠܹܗ ܠܚܲܕ ܦܘܼܣܩܵܢܵܐ (ܦܲܪܡܵܐܢ) ܠܗܸܢܝܵܢܵܐ ܕܥܹܕܵܬ̈ܐ ܕܡܲܘܨܸܠ “[9] ݂ ܘܒܫܲܢ݇ܬܐ ܕ1744: ܦܝܼܫܠܗ݇ܘܿܢ ܒܸܢܝܹ̈ܐ ܬܲܪܬܹܝܢ ܥܹܕܵܬ̈ܐ ܓܲܘ ܡܲܘܨܸܠ: ܚܕܵܐ ܩܵܐ ܥܹܕܬܐ ܟܲܠܕܵܝܬܐ: ܘܐ݇ܚܪܬܐ ܩܵܐ ܥܹܕܬܐ ܐ݇ܣܘܼܪܵܝܬܐ ܐܲܪܬ݂ܘܿܕܘܿܟܣܵܝܬܐ ݂ ܘܡܼܢ ܓܹܒܵܐ ܐ݇ܚܪܢܐ: ܦܝܼܫܠܗ݇ܘܿܢ ܡܚܘܼܕܸܬܹ̈ܐ ܘܡܘܼܥܡܸܪܹ̈ܐ ܥܹܕܵܬ̈ܐ ܡܘܼܚܪܸ̈ܒ݂ܐ ܒܡܲܦܩܵܝܵܬ݂ܐ (ܒܘܼܡܒܹ̈ܐ) ݂

ܡܼܢ ܒܵܬܲܪ ܕܦܘܼܠܵܓ݂ܵܐ ܓܲܘ ܥܹܕܬܐ ܐ݇ܣܘܼܪܝܵܝܬܐ ܐܲܪܬ݂ܘܿܕܘܿܟܣܵܝܬܐ (ܝܲܥܩܘܿܒܵܝܬܐ) ܒܫܲܢ݇ܬܐ ܕ 1783: ܘܡܲܘܠܵܕܵܐ ܕܥܹܕܬܐ ܐ݇ܣܘܼܪܝܵܝܬܐ ܩܵܬ݂ܘܿܠܝܼܩܵܝܬܐ: ܐܝܼܬ ܗ݇ܘܵܐ ܟܘܼܬܵܫܵܐ ܒܹܝܬ ܥܹܕܬܐ ܐ݇ܣܘܼܪܝܵܝܬܐ ܐܲܪܬ݂ܘܿܕܘܿܟܣܵܝܬܐ ܠܥܹܕܬܐ ܐ݇ܣܘܼܪܝܵܝܬܐ ܩܵܬ݂ܘܿܠܝܼܩܵܝܬܐ ܥܲܠ ܡܵܪܘܼܬ݂ܐ ܘܡܲܦܠܲܚܬܐ ܕܒܸܢܝܵܢܹ̈ܐ ܕܥܹܕܬܐ ݂ ܗܵܢܵܐ ܟܘܼܬܵܫܵܐ ܦܝܼܫܠܹܗ ܫܸܪܝܵܐ ܓܲܘ ܡܲܘܨܸܠ ܒܐܘܼܪܚܵܐ ܕܲܒܢܵܝܬܐ ܕܬܲܪܬܹܝܢ ܥܹܕܵܬ݂̈ܐ: ܥܹܕܬܐ ܕܐܲܠ ܛܵܗܝܼܪܵܐ (ܒܛܝܼܢܘܼܬܐ ܕܠܵܐ ܡܘܼܡܵܐ) ܘܥܹܕܬܐ ܕܡܵܪܝ ܬܐܘܿܡܵܐ: ܒܫܲܢ݇ܬܐ ܕ1862 ݂ ܘܦܝܼܫܠܹܗ ܦܣܝܼܩܵܐ ܚܲܕ ܦܘܼܣܩܵܢܵܐ ܥܘܼܬ݂ܡܵܢܵܝܵܐ ܒܫܲܢ݇ܬܐ ܕ1879 ܒܲܡܦܲܠܲܓ݂ܬܐ ܕܡܘܼܠܟܵܢܹ̈ܐ ܘܡܵܪܘܼܬܐ ܕܥܹܕܵܬ݂̈ܐ ܘܕܲܝܪܹ̈ܐ ܒܹܝܬ ܬܸܪܘܲܝܗܝ ܥܹܕܵܬ݂̈ܐ ݂ ܘܗܿܘ ܐܲܦܸܣܩܘܿܦܵܐ ܩܲܕܡܵܝܵܐ ܠܥܹܕܬܐ ܐ݇ܣܘܼܪܝܵܝܬܐ ܩܵܬ݂ܘܿܠܝܼܩܵܝܬܐ ܓܲܘ ܡܲܪܥܝܼܬܐ ܕܡܲܘܨܸܠ: ܝܗ݇ܘܵܐ ܩܘܿܪܸܠܘܿܣ ܒܸܗܢܵܡ ܐܲܚܬܵܠ (1760 ـ 1828)[10] ݂

ܚܙܹܐ ܠܹܗ ܕܵܪܵܐ ܫܒܲܥܣܝܼܪܵܝܵܐ ܦܘܼܬܵܚܵܐ ܕܫܘܼܕܵܪܹ̈ܐ ܠܵܬܝܼܢܵܝܹ̈ܐ ܓܲܘ ܐܲܬ݂ܪܵܐ ܕܒܹܝܬ݂ ܢܲܗܪ̈ܝܼܢ (ܥܝܼܪܵܐܩ ܕܝܲܘܡܵܢܵܐ) ݂ ܦܬܸܚܠܗ݇ܘܿܢ ܪ̈ܲܒܵܢܹܐ ܟܲܒܘܼܫܵܝܹ̈ܐ ܠܩܸܢܛܪܘܿܢܲܝܗܝ ܩܲܕܡܵܝܵܐ ܓܲܘ ܡܲܘܨܸܠ ܒܫܲܢ݇ܬܐ ܕ1636 ݂ ܘܐܲܒ݂ܵܗܵܬ݂ܐ ܕܘܿܡܢܝܼܟܵܝܹ̈ܐ ܡܛܹܐ ܠܗ݇ܘܿܢ ܡܼܢ ܐܲܬ݂ܪܵܐ ܕܪܗܘܿܡܵܐ ܒܫܲܢ݇ܬܐ ܕ1750: ܘܒܵܬܪܲܝܗܝ ܐܬܹܐ ܠܗ݇ܘܿܢ ܐ݇ܚܪ̈ܢܐ: ܡܼܢ ܐܲܬ݂ܪܵܐ ܕܲܦܪܲܢܣܵܐ ܒܫܲܢ݇ܬܐ ܕ1859 ݂ ܒܚܵܝܘܿܪܘܼܬܲܝܗܝ: ܦܝܼܫܠܵܗ̇ ܒܢܝܼܬܐ ܥܹܕܬܐ ܠܵܬܝܼܢܵܝܬܐ ܪܲܒܬܐ ܒܫܸܡ (ܡܵܪܬܐ ܕܫܵܥܬܐ):” ܥܲܠ ܐܸܣܟܹܝܡܵܐ ܒܝܼܙܲܢܛܵܝܵܐ ܒܹܝܬ ܫܲܢ݇ܬܐ ܕ1866 ܠܫܲܢ݇ܬܐ ܕ1873″ [11] ݂ ܘܲܒܫܲܢ݇ܬܐ ܕ1880: ܝܗܸܒ݂ܠܵܗ̇ ܐܸܡܦܪܵܛܘܿܪܬܐ (ܐܘܿܓ̰ܝܼܢܝܵܐ ܕܝܼ ܡܘܿܢܬܝܼܓ̰ܘܿܬ): ܒܲܪ݇ܬ݂ܙܲܘܓܵܐ ܕܢܵܦܸܠܝܘܿܢ ܬܠܝܼܬܵܝܵܐ: ܗܿܝ ܫܵܥܬܐ ܡܫܲܡܲܗܬܐ ܐܲܝܟ݂ ܕܵܫܢܵܐ ܠܥܹܕܬܐ: ܘܦܝܼܫܠܵܗ̇ ܡܪܘܼܟܲܒ݂ܬܐ ܒܒܘܼܪܓܵܐ ܩܲܕܡܵܝܵܐ ܕܙܲܓܵܐ ܕܦܝܼܫܠܹܗ ܒܸܢܝܵܐ ܓܲܘ ܐܲܪܥܵܐ ܕܥܝܼܪܵܐܩ ݂ ܘܩܘܼܪܒܵܐ ܠܲܬܠܵܬܐ ܕܵܪܹ̈ܐ: ܗܲܕܵܡܹ̈ܐ ܕܲܡܫܲܕܪܘܼܬ݂ܐ ܕܐܲܒ݂ܵܗܵܬ݂ܐ ܕܘܿܡܢܝܼܟܵܝܹ̈ܐ ܒܐܲܬ݂ܪܵܐ ܕܒܹܝܬ ܢܲܗܪ̈ܝܼܢ ܘܟܘܼܪܕܸܣܬܵܐܢ ܘܐܲܪܡܝܼܢܝܵܐ: ܝܼܗ݇ܘܵܘ ܡܼܢ ܥܵܒ݂ܘܿܕܹ̈ܐ ܘܦܵܥܘܿܠܹ̈ܐ ܪܹ̈ܫܵܝܹܐ ܘܲܣܦܝܼܪܹ̈ܐ ܘܣܲܗܵܕܹ̈ܐ ܠܬܲܫܥܝܼܬܐ ܕܲܡܫܝܼܚܵܝܘܼܬ݂ܐ ܓܲܘ ܥܝܼܪܵܐܩ: ܘܐܵܦ ܣܲܗܵܕܹ̈ܐ ܠܩܸܢܛܹ̈ܐ ܕܚܵܙܝܼܠܗ݇ܘܿܢ ܡܫܝܼܚܵܝܹ̈ܐ ܓܲܘ ܡܲܕܢܚܵܐ ܩܘܼܪܒܵܐ ݂

ܢܘܼܩܕܵܐ (ܢܘܼܩܙܵܐ) ܕܫܘܼܚܠܵܦܵܐ: ܒܪܹܐ ܠܹܗ ܒܫܸܢܹ̈ܐ ܕ1915 ـ 1918: ܒܥܸܕܵܢ ܐܲܒܝܼܕܘܼܬܐ ܟܢܘܼܫܝܵܝܬܐ ܕܐܵܪܸ̈ܡܢܵܝܹܐ ܘܐܵܬ݂ܘܿܪ̈ܵܝܹܐ ـ ܟܲܠܕܵܝܹ̈ܐ ܒܐܲܬ݂ܪܵܐ ܕܬܘܼܪܟܝܵܐ ܥܘܼܬ݂ܡܵܢܵܝܬܐ [12] ݂ ܚܲܕ ܡܸܢܝܵܢܵܐ ܪܵܒܵܐ ܡܸܢܲܝܗܝ ܕܲܦܪܸܩܠܗ݇ܘܿܢ ܡܼܢ ܡܲܘܬܐ: ܫܟܸܢܘܼܢ ܓܲܘ ܐܲܬ݂ܪܵܐ ܕܥܝܼܪܵܐܩ ܡܬܲܪܨܵܐ ܒܝܲܕ ܐܸܢܓܠܹܝܫܵܝܹ̈ܐ: ܘܝܲܬܝܼܪܵܐܝܼܬ ܓܲܘ ܡܲܘܨܸܠ: ܐܲܝܟܵܐ ܕܐܝܼܬ ܗ݇ܘܵܐ ܟܸܢܫܹ̈ܐ ܡܫܝܼܚܵܝܹ̈ܐ ܡܼܢ ܩܕܝܼܡ ݂ ܒܗܿܘ ܙܲܒ݂ܢܵܐ: ܒܟܵܢܘܿܢ ܬܪܲܝܵܢܵܐ ܕܫܲܢ݇ܬܐ ܕ1916: ܘܓܲܘ ܬܲܪܬܹܝܢ ܠܲܝ̈ܠܵܘܵܬ݂ܐ ܒܲܠܚܘܿܕ: ܦܝܼܫܠܗ݇ܘܿܢ ܩܛܝܼܠܹ̈ܐ (15000) ܐܲܠܦܹ̈ܐ ܐܵܪܸ̈ܡܢܵܝܹܐ ܡܘܼܥܪܸ̈ܩܹܐ ܠܡܲܘܨܸܠ ܘܦܸܢ̈ܝܵܬ݂ܐ ܕܒܲܫܒ݂ܵܒ݂ܘܼܬ݂ܵܗ̇ (ܚܵܕܹܪܘܵܢܵܗ̇): ܘܦܝܼܫܠܗ݇ܘܿܢ ܐܣܝܼܪܹ̈ܐ ܟܠ ܥܸܣܪܵܐ ܦܲܪ̈ܨܘܿܦܹܐ ܡܸܚܕܵܕܹ̈ܐ: ܘܲܡܪ̈ܘܼܦܝܹܐ ܓܲܘ ܢܲܗܪܵܐ ܕܕܸܩܠܲܬ ݂ ܘܲܚܫܝܼܚܬܐ ܝܠܵܗ̇ ܠܡܲܕܟ݂ܘܿܪܹܐ: ܕܲܩܕܵܡ ܗܵܢܵܐ ܓܘܼܢܚܵܐ ܒܝܘܿܡ (10) ܒܝܲܪܚܵܐ ܕܲܚܙܝܼܪܵܢ ܒܫܲܢ݇ܬܐ ܕ1915: ܡܫܘܼܕܸܪܹܗ ܩܲܢܨܠܵܐ (القنصل) ܐܲܠܡܵܢܵܝܵܐ ܓܲܘ ܡܲܘܨܸܠ (ܗܘܿܠܸܫܬܵܝܸܢ) ܠܐܝܼܙܓܲܕܵܐ ܕܐܲܬ݂ܪܹܗ ܒܲܪܩܝܼܬܐ ܕܒܐܝܼܬܵܝܵܐ ܝܠܵܗ̇:” 614 ܐܵܪܸ̈ܡܢܵܝܹܐ (ܓܲܒ݂ܪܹ̈ܐ ܘܢܸܫܹ̈ܐ ܘܫܲܒ݂ܪܹ̈ܐ) ܕܦܝܼܫܠܗ݇ܘܿܢ ܛܪ̈ܝܼܕܹܐ ܡܼܢ ܕܝܼܵܪܒܲܟܪ: ܘܡܘܼܥܪܸ̈ܩܹܐ ܒܚܲܝܠܵܐ ܠܡܲܘܨܸܠ: ܦܝܼܫܠܗ݇ܘܿܢ ܩܛܝܼܠܹ̈ܐ ܒܐܘܼܪܚܵܐ: ܟܲܕ ܦܝܵܫܵܐ ܝܗ݇ܘܵܘ ܢܩܝܼܠܹ̈ܐ ܒܛܵܝܘܿܦܹ̈ܐ (طوافات) ܓܲܘ ܢܲܗܪܵܐ ܕܕܸܩܠܲܬ ݂ ܒܐܸܬܡܵܠܝ: ܛܵܝܘܿܦܹ̈ܐ ܡܛܹܐ ܠܗ݇ܘܿܢ ܣܦܝܼܩܹ̈ܐ: ܘܡܼܢ ܩܕܵܡ ܝܲܘܡܵܢܹ̈ܐ: ܛܥܝܼܢܵܐ ܝܗ݇ܘܵܐ ܢܲܗܪܵܐ ܕܕܸܩܠܲܬ: ܫܠܲܕܹ̈ܐ ܘܲܕܪ̈ܵܥܹܐ ܐ݇ܢܵܫܵܝܹ̈ܐ”[13] ݂

ܢܦܵܠܬܐ ܕܛܲܟ݂ܣܵܐ ܕܨܲܕܵܐܡ ܚܘܿܣܲܝܢ ܒܫܲܢ݇ܬܐ ܕ2003: ܘܢܘܼܦܵܩܵܐ (ظهور) ܕܡܝܼ̈ܠܝܼܫܝܵܬ݂ܐ ܐܸܣܠܵܡܵܝܹ̈ܐ: ܐܝܼܬ ܗ݇ܘܵܐ ܠܗ݇ܘܿܢ ܡܲܥܒ̇ܕܵܢܘܼܬ݂ܐ ܪܲܒܬܐ ܥܲܠ ܫܘܼܚܠܵܦܵܐ ܕܝܼܡܘܿܓ݂ܪܵܦܵܝܵܐ ܓܲܘ ܡܵܬ݂ܘܵܬ݂ܐ ܕܲܡܫܝܼܚܵܝܹ̈ܐ ܒܥܝܼܪܵܐܩ: ܘܲܦܪܝܼܫܵܐܝܼܬ ܓܲܘ ܡܲܘܨܸܠ ݂ ܒܝܲܘܡܵܐ ܩܲܕܡܵܝܵܐ ܡܼܢ ܝܲܪܚܵܐ ܕܐܵܒ 2004: ܨܦܵܚ̈ܝܵܬ݂ܐ ܡܛܲܟܣܹ̈ܐ ܥܲܠ ܚܲܡܸܫ ܥܹܕܵܬ̈ܐ ܕܓܲܘ ܡܲܘܨܸܠ ܘܒܲܓ݂ܕܵܕ: ܝܼܗ݇ܘܵܘ ܫܘܼܪܵܝܵܐ ܕܲܥܪܵܩܬܐ ܕܲܡܫܝܼܚܵܝܹ̈ܐ: ܡܼܢ ܡܲܘܨܸܠ ܠܦܸܢ̈ܝܵܬ݂ܐ ܒܸܫ ܫܲܝܢܵܝܹ̈ܐ ܓܲܘ ܫܸܛܚܵܐ ܕܢܝܼܢܘܹܐ: ܘܟܘܼܪܕܸܣܬܵܐܢ ܕܥܝܼܪܵܐܩ: ܘܐܵܦ ܠܒܲܪ ܐܲܬ݂ܪܵܐ ݂ ܘܫܸܢܹ̈ܐ ܕܐܬܹܐ ܠܗ݇ܘܿܢ ܒܵܬܲܪ ܐܲܢܲܝ ܪ̈ܕܘܼܦܝܹܐ ܘܲܛܠܘܼܡܝܹ̈ܐ: ܝܼܗ݇ܘܵܘ ܪܵܒܵܐ ܥܲܣܩܹ̈ܐ ܓܲܘ ܡܲܘܨܸܠ: ܩܸܛܠܹ̈ܐ ܘܲܚܛܵܦܝܵܬ݂ܐ ܕܲܡܫܝܼܚܵܝܹ̈ܐ ܡܲܥܒ݂ܘܿܕܹܐ ܝܠܲܝܗܝ ܘܲܡܗܲܕܘܿܝܹܐ ܠܲܥܪܵܩܬܐ ܟܢܘܼܫܝܵܝܬܐ ݂ ܒܝܘܿܡ 6 ܒܟܵܢܘܿܢ ܬܪܲܝܵܢܵܐ ܫܲܢ݇ܬܐ ܕ2008: ܒܝܲܘܡܵܐ ܕܥܹܐܕܵܐ ܕܕܸܢܚܵܐ: ܚܲܪܬܐ 9 ܒܟܵܢܘܿܢ ܬܪܲܝܵܢܵܐ: ܗܘܹܐ ܠܗ݇ܘܿܢ ܢܝܼܫܹ̈ܐ ܕܥܲܡܠܹ̈ܐ ܐܲܘ ܣܘܼܥܪ̈ܵܢܹܐ ܕ(ܕܵܥܹܫ) ܓܘܼܢܚܵܝܹ̈ܐ: ܡܲܚܪܲܒ݂ܬܐ ܕܪܵܒܵܐ ܒܸܢܝܵܢܹ̈ܐ ܕܲܡܫܝܼܚܵܝܹ̈ܐ ܓܲܘ ܡܲܘܨܸܠ ܘܟܲܪܟܘܼܟ ݂

ܒܗܵܢܵܐ ܡܘܼܙܵܓ݂ܵܐ ܡܲܙܕܥܵܢܵܐ: ܦܝܼܫܠܹܗ ܚܛܝܼܦܵܐ ܡܲܛܪܵܢ ܦܲܘܠܘܿܣ ܦܲܪܲܓ̰ ܪܲܗܘܿ: ܐܲܦܸܣܩܘܿܦܵܐ ܕܥܹܕܬܐ ܟܲܠܕܵܝܬܐ ܒܡܲܘܨܸܠ: ܒܝܘܿܡ 13 ܫܒ݂ܵܛ 2008: ܟܲܕ ܡܩܲܒܘܿܠܹܐ ܠܲܚܕܵܐ ܡܫܲܕܪܘܼܬ݂ܐ ܡܼܢ (ܦܵܟܸܣ ܟܪܝܼܣܬܝܼ) ܓܲܘ ܥܹܕܬܐ ܕܟܲܪܲܡܠܸܫ ܒܩܘܼܪܒܵܐ ܕܡܲܘܨܸܠ ̣ ܘܲܓܠܹܐ ܠܹܗ ܐܲܦܸܣܩܘܿܦܵܐ ܠܲܓܙܵܡܵܐ (تهديد) ܕܲܡܩܘܼܒܸܠ ܠܹܗ ܡܼܢ ܚܕܵܐ ܟܢܘܼܫܬܐ ܪܗܝܼܒ݂ܵܝܬܐ ܡܼܢ ܩܕܵܡ ܚܲܕܟܡܵܐ ܝܲܘܡܹ̈ܐ: ܐܡܸܪܘܼܢ ܐܸܠܹܗ: ” ܚܲܝܘܼܬܘܼܟ݂ ܐܲܘ ܚܲܡܫܵܐ ܡܵܐܐ ܐܲܠܦܹ̈ܐ ܕܘܿܠܵܪܹ̈ܐ: ܡܦܘܼܢܹܐ ܠܹܗ (ܡܓ̰ܘܼܘܸܒܠܹܗ): ܚܲܝܘܼܬܝܼ ܠܵܐ ܫܵܘܝܵܐ (ܕܵܩܪܵܐ) ܗܵܢܵܐ ܛܝܼܡܵܐ ݂ ܘܒܵܬܲܪ ܚܲܕ ܝܲܪܚܵܐ: ܒܝܲܘܡܵܐ ܕ(13) ܒܐܵܕܵܪ: ܦܝܼܫܠܹܗ ܚܸܙܝܵܐ ܡܲܛܪܵܢ (ܪܲܗܘܿ) ܩܛܝܼܠܵܐ ܩܘܼܪܒܵܐ ܠܡܲܥܠܵܢܵܐ ܕܲܡܕܝܼܢ݇ܬܐ “[14] ݂

ܒܹܝܬ ܚܙܝܼܪܵܢ 2014 ܠܬܲܡܘܼܙ 2017: ܢܦܸܠܠܵܗ̇ ܡܲܘܨܸܠ ܒܐܝܼܕܹ̈ܐ ܕܲܪ̈ܗܝܼܒ݂ܵܝܹܐ ܐܸܣܠܵܡܵܝܹ̈ܐ ܕ(ܕܵܥܹܫ) ݂ ܘܲܚܙܹܐ ܠܗ݇ܘܿܢ ܡܫܝܼܚܵܝܹ̈ܐ ܕܡܸܢܝܵܢܲܝܗܝ ܩܘܼܪܒܵܐ ܝܗ݇ܘܵܐ ܠـ (10000) ܐܲܠܦܹ̈ܐ ܢܸܫܡܹ̈ܐ ܕܗܵܠܵܐ ܒܸܚܝܵܝܵܐ ܝܗ݇ܘܵܘ ܓܲܘ ܡܕܝܼܢܬܐ ܕܡܲܘܨܸܠ: ܕܒܵܬܘܵܬܲܝܗܝ ܛܒ݂ܝܼܥܹ̈ܐ ܝܠܲܝܗܝ ܒܝܲܕܥܵܐ ܐܲܘ ܚܫܲܚܬܐ (ܚܲܒ̇ܪܵܐ) ܕܢܲܨܪܵܢܝܼ (ܐܲܠ ـ ܢܵܨܹܝܪܝܼ: ܬܲܠܡܝܼܕܹ̈ܐ ܕܲܡܫܝܼܚܵܐ) ݂ ܘܗܵܕܟ݂ܵܐ ܦܝܼܫܠܗ݇ܘܿܢ ܐܡܝܼܪܹ̈ܐ: ܘܦܝܼܫܠܗ݇ܘܿܢ ܩܸܪ̈ܝܹܐ ܕܫܲܚܠܦܝܼ ܗܲܝܡܵܢܘܼܬܲܝܗܝ ܡܫܝܼܚܵܝܬܐ ܠܡܲܫܠܡܵܢܘܼܬ݂ܐ: ܐܲܘ ܦܪܵܥܬܐ ܕܡܲܕܲܐܬܐ (ܓ̰ܸܙܝܵܐ): ܐܲܘ ܡܲܘܬܐ ݂ ܥܪܸܩܠܗ݇ܘܿܢ ܡܫܝܼܚܵܝܹ̈ܐ ܕܲܡܕܝܼܢ݇ܬܐ ܒܣܘܼܪܗܵܒ݂ܵܐ: ܘܦܝܼܫܠܗ݇ܘܿܢ ܡܐܲܠܨܹ̈ܐ ܕܫܵܒ݂ܩܝܼ ܠܣܘܿܓ݂ܐܵܐ ܕܝܵܪܬܘܼܬܲܝܗܝ ܡܫܝܼܚܵܝܬܐ ܕܐܬܹܐ ܠܵܗ̇ ܠܲܓܢܵܒ݂ܵܐ ܘܠܲܚܪܵܒ݂ܵܐ ܘܠܲܡܫܲܚܬܘܿܢܹܐ ܒܚܲܕ ܕܲܪܓ݂ܵܐ ܟܲܒܝܼܪܵܐ ݂ ܩܪܵܒ݂ܵܐ (ܦܠܵܫܵܐ) ܕܡܲܘܨܸܠ: ܘܡܲܦ̈ܩܵܥܝܵܬ݂ܐ ܕܐܲܘܝܘܼܬܐ ܬܹܒܹܝܠܵܝܬܐ ܕܲܟܣܸܚܠܵܗ̇ ܠܲܪ̈ܗܝܼܒ݂ܵܝܹܐ ܕ(ܕܵܥܹܫ) ܒܚܲܝܠܵܐ ܕܢܘܼܪܵܐ: ܫܒܸܩܠܗ݇ܘܿܢ ܒܸܢܝܵܢܹ̈ܐ ܪ̈ܲܒܹܐ ܕܲܡܫܝܼܚܵܝܹ̈ܐ ܘܐܵܦ ܕܡܲܫܠܡܵܢܹ̈ܐ ܓܲܘ ܡܲܘܨܸܠ: ܕܚܵܕܪܝܼ ܠܥܲܦܪܵܐ ݂

_______

[1] ܚܙܝܼ : ܬܦܵܩܬܐ ܚܕܵܪܲܝ ܡܲܕܢܚܵܐ ܡܫܝܼܚܵܝܵܐ: ܐܲܨܲܚܬܐ ܕܠܵܐܬܘܿܢ: ܬܲܡܘܼܙ 2015: ܦ 88 ݂

[2] ܚܙܝܼ: ܐܵܫܘܿܪ ܡܫܝܼܚܵܝܬܐ: ܡܢܵܬ݂ܐ 2: ܓ̰ܵܐܢ ܡܘܿܪܝܼܣ ܦܝܼܝܹܗ: ܒܲܝܪܘܼܬ 1965: ܦ 115 ـ 116 ݂ ܚܙܝܼ ܐܵܦ (ܡܲܘܨܸܠ ܡܫܝܼܚܵܝܬܐ): ܓ̰ܵܐܢ ܡܘܿܪܝܼܣ ܦܝܼܝܹܗ ݂

[3] ܚܙܝܼ : ܬܦܵܩܬܐ ܚܕܵܪܲܝ ܡܲܕܢܚܵܐ ܡܫܝܼܚܵܝܵܐ: ܐܲܨܲܚܬܐ ܕܠܵܐܬܘܿܢ: ܬܲܡܘܼܙ 2015: ܦ 89 ݂

[4] ܚܙܝܼ : ܬܦܵܩܬܐ ܚܕܵܪܲܝ ܡܲܕܢܚܵܐ ܡܫܝܼܚܵܝܵܐ: ܐܲܨܲܚܬܐ ܕܠܵܐܬܘܿܢ: ܬܲܡܘܼܙ 2015: ܦ 92 ـ 93 ݂

[5] ܚܙܝܼ : ܬܦܵܩܬܐ ܚܕܵܪܲܝ ܡܲܕܢܚܵܐ ܡܫܝܼܚܵܝܵܐ: ܐܲܨܲܚܬܐ ܕܠܵܐܬܘܿܢ: ܬܲܡܘܼܙ 2015: ܦ 94 ݂

[6] ܚܙܝܼ : ܬܦܵܩܬܐ ܚܕܵܪܲܝ ܡܲܕܢܚܵܐ ܡܫܝܼܚܵܝܵܐ: ܐܲܨܲܚܬܐ ܕܠܵܐܬܘܿܢ: ܬܲܡܘܼܙ 2015: ܦ 95 ݂

[7] ܚܙܝܼ : ܚܲܝܹ̈ܐ ܘܡܲܘܬܐ ܡܫܝܼܚܵܝܹ̈ܐ ܕܡܲܕܢܚܵܐ: ܓ̰ܵܐܢ ܦܝܹܝܪ ܦܵܠܘܿܢ: ܦܵܝܵܐܪܕ 1994: ܦ 740 ݂

[8] ܡܼܢ (ܬܲܫܥܝܼܬܐ ܕܥܹܕܬܐ ܕܡܲܕܢܚܵܐ): ܪܝܼܡܘܹܢܕ ܠܘܿܟܘܿܙ: ܐܝܼܠܘܿܠ 1995: ܦ 328 ݂

[9] ܚܙܝܼ : ܬܦܵܩܬܐ ܚܕܵܪܲܝ ܡܲܕܢܚܵܐ ܡܫܝܼܚܵܝܵܐ: ܐܲܨܲܚܬܐ ܕܠܵܐܬܘܿܢ: ܬܲܡܘܼܙ 2015: ܦ 97 ݂

[10] ܗܵܢ ܦܸܬ݂ܓ݂ܵܡܵܐ (فقرة) ܠܲܝܬ ܗ݇ܘܵܐ ܒܐܲܨܲܚܬܐ ܕܠܸܫܵܢܵܐ ܥܲܪܒ݂ܵܝܵܐ: ܠܗܵܕܹܟ݂ ܡܬܘܼܪܓܸܡܠܲܢ ܡܼܢ ܐܲܨܲܚܬܐ ܕܠܸܫܵܢܵܐ ܐܸܢܓܠܹܝܫܵܝܵܐ ݂ (ܡܬܲܪܓܡܵܢܵܐ) ݂ هذه الفقرة لم تكن موجودة في النص العربي لهذه الكنيسة، فقمنا بترجمتها من النص الإنكليزي. (المترجم)

[11] ܚܙܝܼ : ܬܦܵܩܬܐ ܚܕܵܪܲܝ ܡܲܕܢܚܵܐ ܡܫܝܼܚܵܝܵܐ: ܐܲܨܲܚܬܐ ܕܠܵܐܬܘܿܢ: ܬܲܡܘܼܙ 2015: ܦ 102 ݂

[12] ܓܘܼܢܚܹ̈ܐ ܕܲܩܛܵܠ ـ ܥܲܡܵܐ: ܦܲܪ̈ܡܵܢܹܐ ܕܣܲܝܦܘܿ ݂ ܦܲܪ̈ܡܵܢܹܐ (ܦܘܼܣܩܵܢܹ̈ܐ ܪ̈ܘܼܫܡܵܝܹܐ ܕܵܢܦܸܩܠܲܝܗܝ ܡܼܢ ܫܘܼܠܛܵܢܵܐ ܥܘܼܬ݂ܡܵܢܵܝܵܐ) ݂ (ܡܬܲܪܓܡܵܢܵܐ)

[13] ܚܙܝܼ: ܐܲܒܝܼܕܘܼܬ݂ܐ ܕܥܵܪ̈ܘܿܩܹܐ ܐܵܪ̈ܡܢܵܝܹܐ ܥܘܼܬ݂ܡܵܢܵܝܹ̈ܐ ܓܲܘ ܡܲܫܪ̈ܝܵܬ݂ܐ ܕܐܲܣܝܼܪܹ̈ܐ ܓܲܘ ܣܘܼܪܝܵܐ ܘܒܹܝܬ ܢܲܗܪ̈ܝܼܢ: ܡܸܢܝܵܢܵܐ ܕܝܼܠܵܢܵܝܵܐ ܡܼܢ ܡܓ݂ܠܬܐ (ܬܲܫܥܝܼܬܐ ܕܵܪܵܝܬܐ ܕܐܵܪܸܡܝܼܢܝܵܐ: ܡܢܵܬ݂ܐ 2: 1998: ܪܝܼܡܘܿܢܕ ܐܹܝܟ̰ ܟܝܼܦܘܪܟܝܵܐܢ: ܦ 15 ݂

[14] ܚܙܝܼ: ܡܫܝܼܚܵܝܹ̈ܐ ܕܡܲܕܢܚܵܐ: ܛܸܠܵܠܹ̈ܐ ܘܒܲܗܪܹ̈ܐ: ܦܵܣܟܵܠ ܡܵܓ݂ܝܼܣܝܵܐܢ: ܛܲܒ݂ܥܵܐ ܕܬ݂ܵܕܹܐ: ܐܝܼܠܘܿܠ 2013: ܘܛܲܒ݂ܥܵܐ 2: ܟܵܢܘܿܢ ܬܪܲܝܵܢܵܐ 2014: ܦ 260 ݂

” ܦܝܼܫܠܵܗ̇ ܕܟ݂ܝܼܪܬܐ ܥܹܕܬܐ ܕܛܵܗܝܼܪܵܐ (ܥܲܬܝܼܩܬܐ) ܕܐ݇ܣܘܼܪ̈ܵܝܹܐ ܩܵܬ݂ܘܿܠܝܼܩܵܝܹ̈ܐ ܠܓܵܗܵܐ ܩܲܕܡܵܝܬܐ ܒܫܲܢ݇ܬܐ ܕ1672 “[1]: ܗ: ܕ: ܗܵܕܹܐ ܥܹܕܬܐ ܐܝܼܬ ܗ݇ܘܵܐ ܡܼܢ ܩܕܵܡ ܨܦܵܚܬܐ ܘܲܚܨܵܪܵܐ ܕܦܵܪ̈ܣܵܝܹܐ ܕܫܲܢ݇ܬܐ 1743 ܕ(ܢܵܕܹܪ ܫܵܐܗ): ܐܸܠܵܐ ܪܵܒܵܐ ܥܲܣܩܵܐ ܝܠܵܗ̇ ܡܬܲܚܲܡܬܐ ܠܣܝܼܩܘܿܡ ܫܘܼܬܐܵܣܵܗ̇ ܕܥܹܕܬܐ ܩܲܛܝܼܢܵܐܝܼܬ ݂ ܪܵܒܵܐ ܐܸܣܛܘܼܟ݂ܣܹ̈ܐ ܡܲܨܝܵܐ ܕܦܵܝܫܝܼ ܡܘܼܦܠܸܚܹ̈ܐ ܠܝܼܕܵܥܵܐ ܣܝܼܩܘܿܡܵܐ ܕܫܘܼܬܐܵܣܵܗ̇: ܡܸܢܲܝܗܝ ܐܝܼܬܘܼܬܵܐ ܕܚܲܕ ܟܹܐܦܵܐ ܕܲܟܒܲܪ ܗܵܘܹܐ ܡܼܢ ܕܵܪܹ̈ܐ ܕ(12 ـ 13)[2] ݂ ܕܘܼܟܬܐ ܕܗܵܕܹܐ ܥܹܕܬܐ ܒܗܿܝ ܡܲܫܪܝܼܬܐ ܒܸܫ ܥܲܬܝܼܩܬܐ ܒܲܡܕܝܼܢ݇ܬܐ ܕܡܲܘܨܸܠ: ܪܵܡܙܵܐ ܠܥܲܬܝܼܩܘܼܬ݂ ܫܘܼܬܐܵܣܵܗ̇: ܘܩܲܘܡܵܐ ܕܕܵܥܪܵܐ ܬܲܫܥܝܼܬܵܗ̇ ܠܕܵܪܵܐ ܫܒ݂ܝܼܥܵܝܵܐ ݂

ܡܼܢ ܓܹܒܵܐ ܐ݇ܚܪܹܢܵܐ: “ܐܝܼܬ ܚܕܵܐ ܟܬܝܼܒ݂ܬܐ ܕܪܵܡܙܵܐ ܕܲܒܫܲܢ݇ܬܐ 1744: ܦܝܼܫܠܵܗ̇ ܡܪܘܼܡܪܲܡܬܐ ܗܵܕܹܐ ܥܹܕܬܐ ܡܼܢ ܒܵܬܲܪ ܨܦܵܚܬܐ ܕܦܵܪ̈ܣܵܝܹܐ”[3] ݂ ܦܝܼܫܠܵܗ̇ ܡܪܘܼܡܪܲܡܬܐ ܒܦܘܼܣܩܵܢܵܐ (ܦܲܪܡܵܐܢ) ܥܘܼܬ݂ܡܵܢܵܝܵܐ ݂ ܘܲܕܠܵܐ ܦܘܼܫܵܟ݂ܵܐ ܝܼܗ݇ܘܵܐ ܚܲܕ ܦܘܼܪܣܵܐ ܠܵܐ ܣܦܝܼܪܵܐ ܠܬܘܼܪܵܨܵܐ ܪܘܝܼܚܵܐ: ܩܘܼܪܒܵܐ (ܚܲܕܟ̰ܵܐ ܦܝܵܫܵܐ) ܠܲܬܢܵܝܵܐ ܕܒܸܢܝܵܢܵܐ: ܐܲܝܟ݂ ܕܡܲܒܝܘܿܢܹܐ ܝܠܵܗ̇ ܡܼܢ ܐܸܣܟܹܝܡܵܐ ܐܵܪܕܸܟ݂ܠܵܝܵܐ ܕܒܸܢܝܵܢܵܐ ݂ ܘܥܲܡ ܗܵܕܹܐ: ܕܘܼܟܬܐ ܕܗܵܕܹܐ ܥܹܕܬܐ ܒܗܿܝ ܡܲܫܪܝܼܬܐ ܒܸܫ ܥܲܬܝܼܩܬܐ ܒܡܲܘܨܸܠ: ܘܲܫܪܵܪܵܐ ܕܲܚܕܵܐ ܡܢܵܬ݂ܐ ܡܸܢܵܗ̇ ܛܡܝܼܪܬܐ ܝܗ݇ܘܵܐ: ܪܵܡܙܝܼ ܕܐܸܣܹ̈ܐ ܕܒܸܢܝܵܢܵܗ̇ ܪܵܒܵܐ ܥܲܬܝܼܩܹ̈ܐ ܝܗ݇ܘܵܘ: ܘܲܟܒܲܪ ܕܵܥܪܝܼ ܒܬܲܫܥܝܼܬܵܗ̇ ܠܕܵܪܵܐ ܫܒ݂ܝܼܥܵܝܵܐ ݂ ܘܡܲܚܵܪܘܼܬ݂ܐ ܕܒܸܢܝܵܢܵܐ ܡܫܲܪܘܿܪܹܐ ܝܠܵܗ̇ ܠܗܵܢ ܚܘܼܫܵܒ݂ܵܐ:” ܒܲܫܪܵܪܵܐ ܝܼܠܵܗ̇ ܚܕܵܐ ܥܹܕܬܐ ܥܲܠ ܐܸܣܟܹܝܡܵܐ ܐܵܪܕܸܟ݂ܠܵܝܵܐ ܓ̰ܲܠܝܼܠܵܝܵܐ”[4]  ݂

ܘܦܝܼܫܠܗ݇ܘܿܢ ܥܒ݂ܝܼܕܹ̈ܐ ܬܘܼܩܵܢܹ̈ܐ (ترميمات) ܐ݇ܚܪ̈ܢܹܐ ܢܲܩܝܼܦܵܐܝܼܬ: ܗܿܘ ܩܲܕܡܵܝܵܐ ܒܫܲܢ݇ܬܐ ܕ1795 ܩܵܐ ܬܲܪܥܵܐ ܡܲܠܟܵܝܵܐ: ܚܲܪܬܐ ܒܫܲܢ݇ܬܐ ܕ1809: ܐܲܝܟ ܕܲܓܠܝܼܬܐ ܝܠܵܗ̇ ܡܼܢ ܚܕܵܐ ܟܬܝܼܒ݂ܬܐ ܕܐܝܼܬ ܥܲܠ ܥܲܡܘܼܕܵܐ ܕܝܼܠܹܗ ܒܩܘܼܕܡܵܐ (في واجهة)ܩܸܢܛܪܘܿܢܵܝܵܐ: ܘܲܒܫܲܢ݇ܬܐ ܕ1821 ܦܝܼܫܠܹܗ ܡܚܲܕܬܵܐ (ܡܪܲܡܡܵܐ) ܬܲܪܥܵܐ ܒܲܪܵܝܵܐ ܕܥܹܕܬܐ ݂

_______

[1] ܚܙܝܼ : ܡܫܝܼܚܵܝܹ̈ܐ ܕܡܲܕܢܚܵܐ: ܛܸܠܵܠܹ̈ܐ ܘܒܲܗܪܹ̈ܐ: ܦܵܣܟܵܠ ܡܵܓ݂ܝܼܣܝܵܐܢ: ܛܲܒ݂ܥܵܐ ܕܬܵܕܝܵܐ: ܐܝܼܠܘܿܠ 2013: ܬܢܵܝ ܛܲܒ݂ܥܵܐ: ܟܵܢܘܿܢ ܬܪܲܝܵܢܵܐ 2014: ܦ 260 ݂

[2] ܚܙܝܼ: ܓ̰ܵܐܢ ܡܵܐܪܝܼ ܡܝܼܪܓ݂ܘܿ: ܡܫܝܼܚܵܝܹ̈ܐ ܕܡܲܘܨܸܠ ܘܥܹܕܵܬܲܝܗܝ ܒܙܲܒ݂ܢܵܐ ܕܥܘܼܬ݂ܡܵܢܵܝܹ̈ܐ 1516 ـ 1815 : ܡܲܘܨܸܠ: ܢܝܼܢܘܹܐ 1983: ܦ 112 ܘܡܵܐ ܕܢܵܩܹܦ ܠܵܗ̇ ݂

[3] ܚܙܝܼ: ܥܹܕܵܬ̈ܐ ܘܕܲܝܪܹ̈ܐ ܓܲܘ ܟܘܼܪܕܸܣܬܵܐܢ ܕܥܝܼܪܵܐܩ ܩܕܵܡ ܘܒܵܬܲܪ ܡܲܫܠܡܵܢܘܼܬ݂ܐ: ܐܸܓܲܪܬܐ ܕܡܲܠܦܵܢܘܼܬ݂ܐ ܕܢܲܪܡܝܼܢ ܥܲܠܝܼ ܡܘܼܚܲܡܲܕ: ܒܹܝܬ݂ ܨܲܘܒܵܐ ܕܣܵܐܢ ܟܵܢܬܵܢ ܓܲܘ ܐܹܝܦܠܝܼܢ (ܦܪܲܢܣܵܐ): 2001: ܦ270 ـ 273 ݂

[4] ܚܙܝܼ: ܓ̰ܵܐܢ ܡܵܐܪܝܼ ܡܝܼܪܓ݂ܘܿ: ܡܫܝܼܚܵܝܹ̈ܐ ܕܡܲܘܨܸܠ ܘܥܹܕܵܬܲܝܗܝ ܒܙܲܒ݂ܢܵܐ ܕܥܘܼܬ݂ܡܵܢܵܝܹ̈ܐ 1516 ـ 1815 : ܡܲܘܨܸܠ: ܢܝܼܢܘܹܐ 1983: ܦ 112 ܘܡܵܐ ܕܢܵܩܹܦ ܠܵܗ̇ ݂

ܥܒ݂ܵܪܵܐ ܠܥܹܕܬܐ ܗܵܘܝܵܐ ܒܐܘܼܪܚܵܐ ܕܕܵܪܬܐ ܒܸܫ ܟܝܼܦܬܐ ܡܼܢ ܫܲܘܝܘܼܬ݂ ܐܲܪܥܵܐ ܚܕܵܪܲܝ ܬܠܵܬܐ ܡܝܼܬܪܹ̈ܐ ܬܚܘܿܬ ܫܲܘܝܘܼܬ݂ܐ ܩܵܐܹܡܵܝܬܐ ܕܕܵܪܬܐ: ܚܕܵܐ ܡܢܵܬ݂ܐ ܡܸܢܵܗ̇ ܛܡܝܼܪܬܐ ܝܠܵܗ̇ ܬܚܘܿܬ ܐܲܪܥܵܐ: ܘܐܵܗܵܐ ܒܸܣܗܵܕܵܐ ܝܠܵܗ̇ ܚܕܵܐ ܓܵܗܵܐ ܐ݇ܚܪܬܐ ܥܲܠ ܥܲܬܝܼܩܘܼܬ݂ܵܗ̇ ݂

ܣܘܼܡܵܟܵܐ (تصميم) ܕܥܹܕܬܐ ܕܛܵܗܝܼܪܵܐ: ܒܵܙܝܼܠܝܼܟܵܝܵܐ ܐܵܬܘܿܪܵܝܵܐ ܝܠܹܗ ܒܦܸܬ݂ܘܵܐ ܕ(18) ܡܝܼܬܪܹ̈ܐ: ܡܼܢ ܡܲܥܠܵܢܵܐ ܕܝܼܠܹܗ ܒܡܲܥܪܒ݂ܵܐ ܠܥܲܕ (ܠܗܲܠ) ܩܘܼܕܵܫ ܩܘܼܕܫܹ̈ܐ ܕܝܼܠܹܗ ܒܡܲܕܢܚܵܐ: ܘܦܸܬ݂ܝܘܼܬܐ ܕ(24) ܡܝܼܬܪܹ̈ܐ ܡܼܢ ܒܹܝܬ ܨܠܘܿܬܐ ܕܩܲܕܝܼܫܵܐ ܝܲܥܩܘܿܒ݂ ܕܝܼܠܹܗ ܒܬܲܝܡܢܵܐ ܠܐܲܦܲܝ̈ ܓܘܿܪܢܵܐ ܕܡܲܥܡܘܿܕܝܼܬܐ ܕܝܼܠܹܗ ܒܓܲܪܒܝܵܐ ݂ ܚܵܒ݂ܫܵܐ ܗܵܕܹܐ ܥܹܕܬܐ ܬܠܵܬ ܡܢܵܘܵܬ݂ܵܐ: ܦܪ̈ܝܼܫܹܐ ܒܐܲܪܒܥܵܐ ܙܲܘܓܹ̈ܐ ܡܼܢ ܥܲܡܘܼܕܹ̈ܐ ܪܵܒܵܐ ܦܸܬ݂ܝܹ̈ܐ: ܕܛܵܥܢܝܼ ܠܩܘܼܒܬܐ ܕܒܸܢܝܵܢܵܐ ݂ ܡܛܵܝܵܐ ܠܩܘܼܕܵܫ ܩܘܼܕܫܹ̈ܐ ܗܵܘܝܵܐ ܒܐܘܼܪܚܵܐ ܕ(4) ܬܲܪ̈ܥܵܢܹܐ ܚܒ݂ܵܫܵܐ ܐܵܦ ܬܲܪܥܵܐ ܡܲܠܟܵܝܵܐ ݂

ܐܝܼܬ ܡܢ ܬܲܝܡܢܵܐ ܠܓܲܪܒܝܵܐ ܕܒܸܢܝܵܢܵܐ: ܡܵܐ ܕܒܐܝܼܬܵܝܵܐ ܝܠܹܗ:

ܐ ـ ܒܹܝܬ ܨܠܘܿܬܐ ܕܝܲܥܩܘܿܒ݂ ܓܲܘ ܡܢܵܬ݂ܐ ܬܲܝܡܢܵܝܬܐ ܕܒܸܢܝܵܢܵܐ ݂ ܝܼܠܵܗ̇ ܚܕܵܐ

ܥܹܕܬܐ ܙܥܘܿܪܬܐ ܡܵܪܲܬ ܚܲܕ ܗܲܝܟܠܵܐ: ܡܵܛܹܐ ܝܘܼܪܟ݂ܗ̇ ܠـ (12) ܡܝܼܬܪܹ̈ܐ:

ܘܐܝܼܬ ܠܵܗ̇ ܚܲܕ ܡܲܕܒܚܵܐ ܐܣܝܼܪܵܐ ܒܗܲܝܟܠܵܐ ܒܐܘܼܪܚܵܐ ܕܚܲܕܟܡܵܐ ܬܲܪ̈ܥܵܢܹܐ

ܓܹܒܵܝܹ̈ܐ ݂ ܦܝܼܫܬܐ ܝܠܵܗ̇ ܐܡܝܼܪܬܐ ܕܐܝܼܬ ܓܲܘ ܙܵܘܝܼܬܐ ܕܝܲܡܝܼܢܵܐ ܪܸܡܬܵܐ (رفات)

ܕܩܲܕܝܼܫܵܐ ܝܲܥܩܘܿܒ݂ ݂

ܠܲܝܬ ܠܵܗ̇ ܗܵܕܹܐ ܥܹܕܬܐ ܬܲܪܥܵܐ ܒܲܪܵܝܵܐ: ܘܡܲܨܝܵܐ ܠܲܡܛܵܝܵܐ ܐܸܠܵܗ̇ ܡܼܢ ܓܵܘܵܐ ܕܥܹܕܬܐ: ܐܲܘ ܒܐܘܼܪܚܵܐ ܕܡܲܥܠܵܢܵܐ ܬܲܝܡܢܵܝܵܐ ݂ ܚܲܕܟܡܵܐ ܟܵܬܘܿܒܹ̈ܐ ܡܘܼܦܠܸܚܠܗ݇ܘܿܢ ܫܸܡܵܐ ܕܥܹܕܬܐ ܕܩܲܕܝܼܫܵܐ ܝܲܥܩܘܿܒ݂ ܠܲܡܫܲܡܘܿܗܹܐ ܟܠܹܗ ܒܸܢܝܵܢܵܐ ܒܗܵܢ ܫܸܡܵܐ ݂

ܒ ـ ܚܵܝܹܪ ܗܲܝܟܠܵܐ ܪܹܫܵܝܵܐ ܥܲܠ ܡܲܕܒܚܵܐ ܪܵܡܵܐ ܕܝܼܠܹܗ ܬܚܘܿܬ ܩܘܼܒܬܐ ݂

ܘܦܝܼܫܠܹܗ ܡܐܲܛܪܵܐ ܬܲܪܥܵܐ ܡܲܠܟܵܝܵܐ ܕܦܵܪܹܫ ܠܗܲܝܟܠܵܐ ܡܼܢ ܡܲܕܒܚܵܐ ܒܚܲܕ

ܬܲܪܥܵܐ ܩܲܝܣܵܝܵܐ ܦܵܬܹܚ ܒܲܠܚܘܿܕ ܒܥܸܕܵܢ ܩܘܼܕܵܫܵܐ ܐܲܠܵܗܵܝܵܐ[1] ݂

ܐܝܼܬ ܚܕܵܐ ܟܬܝܼܒ݂ܬܐ ܥܲܪܒ݂ܵܝܬܐ ܒܪܹܫ ܬܲܪܥܵܐ ܡܲܠܟܵܝܵܐ ܚܦܝܼܪܬܐ ܥܲܠ ܫܝܼܫܵܐ ܐܵܡܪܵܐ[2]:

” ܐܲܠܵܗܵܐ: ܗܿܘ ܕܲܡܩܘܼܕܸܫܠܹܗ ܠܡܲܕܒܚܵܐ ܕܩܲܡ ܡܬܲܪܸܨ ܠܹܗ ܢܒ݂ܝܼܵܐ ܩܲܕܡܵܝܵܐ ܡܘܼܫܹܐ: ܡܩܲܕܸܫ ܒܪܲܚܡܘܼܬܹܗ ܡܲܕܒܚܵܐ ܕܲܡܗܘܼܡܢܹ̈ܐ: ܘܒܸܕ ܡܚܲܣܹܐ ܠܲܚܛܵܗܹ̈ܐ ܕܚܲܛܵܝܹ̈ܐ ” ݂

ܒܫܲܢ݇ܬܐ ܕ1744: ܦܝܼܫܠܵܗ̇ ܡܪܘܼܡܪܲܡܬܐ ܥܹܕܬܐ ܕܡܵܪܬܵܐ ܒܬܘܼܠܬܐ ܒܝܲܕ (ܥܝܼܣܵܐ) ܒܥܘܼܕܪܵܢܵܐ ܕܟܵܗܢܹ̈ܐ ܘܫܲܡܵܫܹ̈ܐ ܘܲܒܢܲܝ̈ ܡܲܪܥܝܼܬܐ ݂ ܫܒ݂ܘܿܩ ܕܲܡܒܲܪܸܟ݂ܠܗ݇ܘܿܢ ܐܲܠܵܗܵܐ ܒܡܲܠܟܘܼܬܹܗ ܫܡܲܝܵܢܝܼܬܐ ݂

ܘܥܲܠ ܬܸܪܘܲܝܗܝ ܓܹܒܵܢܹ̈ܐ ܕܗܵܢܵܐ ܬܲܪܥܵܐ ܡܲܠܟܵܝܵܐ: ܐܝܼܬ ܬܪܹܝܢ ܩܸ̈ܠܵܝܵܬ݂ܐ ܕܚܵܒ݂ܫܝܼ ܟܬܝܼ̈ܒ݂ܵܬ݂ܐ ܒܠܸܫܵܢܵܐ ܐ݇ܣܘܼܪܝܵܝܵܐ ݂

ܗܲܝܟܠܵܐ ܪܹܫܵܝܵܐ: ܝܼܠܹܗ ܚܲܕ ܐܸܣܛܘܼܟ݂ܣܵܐ ܐܵܪܕܸܟ݂ܠܵܝܵܐ ܠܵܐ ܥܝܵܕܵܝܵܐ ݂ ܘܐܝܼܬ ܬܪܹܝܢ ܥܲܡܘܼܕܹ̈ܐ ܚܠܝܼܡܹ̈ܐ ܒܲܦܢܝܼܬܐ ܕܝܲܡܝܼܢܵܐ ” ܐܣܝܼܪܹ̈ܐ ܒܲܚܕܵܐ ܨܘܼܪܬܐ ܟܹܐܦܵܝܬܐ ܕܡܝܼܪܬܐ: ܦܝܼܫܠܵܗ̇ ܒܢܝܼܬܐ ܥܲܠ ܐܝܼܩܵܪܵܐ ܕܡܵܪܬܐ ܡܲܪܝܲܡ ܒܬܘܼܠܬܐ: ܢܵܛܘܿܪܬܐ ܕܡܲܘܨܸܠ ܒܫܲܢ݇ܬܐ ܕ1743″ [3] ݂ ܡܲܚܘܵܐ ܝܸܡܵܐ ܛܵܥܢܵܐ ܫܲܒ݂ܪܵܐ ܝܼܫܘܿܥ: ܒܚܲܕ ܫܒ݂ܝܼܠܵܐ ” ܕܡܲܕܟܸܪܲܢ ܒܲܣܪ̈ܝܼܛܵܬܐ ܐ݇ܣܘܼܪ̈ܝܵܝܵܬ݂ܐ ܛܵܒ݂ ܥܲܬܝܼܩܹ̈ܐ “[4] ݂

ܓ ـ ܐܝܼܬ ܬܪܹܝܢ ܬܲܪ̈ܥܹܐ ܕܸܦܢܵܝܹ̈ܐ ܚܕܵܪܲܝ ܬܲܪܥܵܐ ܡܲܠܟܵܝܵܐ ܡܗܲܕܝܼ ܠܡܲܕܒܚܵܐ ݂

ܚܵܝܹܪ ܬܲܪܥܵܐ ܬܲܝܡܢܵܝܵܐ ܦܪܝܼܫܵܐܝܼܬ ܥܲܠ ܒܹܝܬ ܓܲܙܵܐ ܕܥܹܕܬܐ: ܘܬܲܪܥܵܐ

ܓܲܪܒܝܵܝܵܐ ܥܲܠ ܡܲܕܒܚܵܐ ܬܪܲܝܵܢܵܐ ݂ ܐܝܼܬ ܒܪܹܫ ܗܵܢܵܐ ܬܲܪܥܵܐ ܓܲܪܒܝܵܝܵܐ:

ܟܬܝܼܒ݂ܵܬ݂ܐ ܒܠܸܫܵܢܵܐ ܥܲܪܒ݂ܵܝܵܐ ܒܐܸܣܟܹܝܡܵܐ ܕܨܘܼܒܵܬܹ̈ܐ ܓܸܠܵܝܹ̈ܐ (زخارف نباتية)[5] ݂

ܕ ـ ܚܵܒ݂ܹܫ ܡܲܥܒ̇ܪܵܐ ܓܹܒܵܝܵܐ ܓܲܪܒܝܵܝܵܐ ܩܲܒ݂ܪ̈ܵܬ݂ܐ ܕܟܵܗܢܹ̈ܐ ܘܐܲܦܸܣܩܘܿܦܹ̈ܐ: ܘܗܿܘ

ܒܨܲܘܒܵܐ ܝܠܹܗ ܠܐܲܦܲܝ̈ ܡܲܕܢܚܵܐ ܒܐܘܼܪܚܵܐ ܕܐܵܘܵܢܵܐ ܕܡܲܥܡܘܿܕܝܼܬܐ ܕܐܝܼܬ ܒܵܗ̇

ܚܲܕ ܩܒ݂ܵܝܵܐ (خزان) ܡܬܲܡܢܵܐ ܒܐܸܣܟܹܝܡܵܐ ݂ ܢܵܦܹܠ ܗܵܢܵܐ ܡܲܥܒܪܵܐ ܠܬܲܚܬ

ܕܥܵܠܘܿܠܵܐ ܕܦܵܪܹܫ ܥܹܕܬܐ ܕܛܵܗܝܼܪܵܐ ܥܲܬܝܼܩܬܐ ܡܼܢ ܥܹܕܬܐ ܕܛܵܗܝܼܪܵܐ ܚܕܲܬܐ ݂

_______

[1] ܚܙܝܼ: ܥܹܕܵܬ̈ܐ ܘܕܲܝܪܹ̈ܐ ܓܲܘ ܟܘܼܪܕܸܣܬܵܐܢ ܕܥܝܼܪܵܐܩ ܩܕܵܡ ܘܒܵܬܲܪ ܡܲܫܠܡܵܢܘܼܬ݂ܐ: ܐܸܓܲܪܬܐ ܕܡܲܠܦܵܢܘܼܬ݂ܐ ܕܢܲܪܡܝܼܢ ܥܲܠܝܼ ܡܘܼܚܲܡܲܕ: ܒܹܝܬ݂ ܨܲܘܒܵܐ ܕܣܵܐܢ ܟܵܢܬܵܢ ܓܲܘ ܐܹܝܦܠܝܼܢ (ܦܪܲܢܣܵܐ): 2001: ܦ270 ـ 273 ݂

[2] ܚܙܝܼ: ܬܘܼܪܓܵܡܵܐ ܓ̰ܵܐܢ ܡܵܐܪܝܼ ܡܝܼܪܓ݂ܘܿ: ܡܲܒܘܼܥܵܐ ܥܒ݂ܝܼܪܵܐ ݂

[3] ܚܙܝܼ: ܓ̰ܵܐܢ ܡܵܐܪܝܼ ܡܝܼܪܓ݂ܘܿ: ܡܫܝܼܚܵܝܹ̈ܐ ܕܡܲܘܨܸܠ ܘܥܹܕܵܬܲܝܗܝ ܒܙܲܒ݂ܢܵܐ ܕܥܘܼܬ݂ܡܵܢܵܝܹ̈ܐ 1516 ـ 1815 : ܡܲܘܨܸܠ: ܢܝܼܢܘܹܐ 1983: ܦ 112 ܘܡܵܐ ܕܢܵܩܹܦ ܠܵܗ̇ ݂

[4] ܦܝܼܫܠܵܗ̇ ܡܬܘܼܪܓܲܡܬܐ ܗܵܕܹܐ ܟܬܝܼܒ݂ܬܐ ܒܝܲܕ ܓ̰ܵܐܢ ܡܵܐܪܝܼ ܡܝܼܪܓ݂ܘܿ: ܡܫܝܼܚܵܝܹ̈ܐ ܕܡܲܘܨܸܠ ܘܥܹܕܵܬܲܝܗܝ ܒܙܲܒ݂ܢܵܐ ܕܥܘܼܬ݂ܡܵܢܵܝܹ̈ܐ 1516 ـ 1815 : ܡܲܘܨܸܠ: ܢܝܼܢܘܹܐ 1983: ܦ 112 ܘܡܵܐ ܕܢܵܩܹܦ ܠܵܗ̇ ݂

[5] ܦܝܼܫܠܵܗ̇ ܡܬܘܼܪܓܲܡܬܐ ܗܵܕܹܐ ܟܬܝܼܒ݂ܬܐ ܒܝܲܕ ܓ̰ܵܐܢ ܡܵܐܪܝܼ ܡܝܼܪܓ݂ܘܿ: ܡܫܝܼܚܵܝܹ̈ܐ ܕܡܲܘܨܸܠ ܘܥܹܕܵܬܲܝܗܝ ܒܙܲܒ݂ܢܵܐ ܕܥܘܼܬ݂ܡܵܢܵܝܹ̈ܐ 1516 ـ 1815 : ܡܲܘܨܸܠ: ܢܝܼܢܘܹܐ 1983: ܦ 112 ܘܡܵܐ ܕܢܵܩܹܦ ܠܵܗ̇ ݂

ܦܝܼܫܠܵܗ̇ ܬܠܝܼܚܬܐ ܥܹܕܬܐ ܕܛܵܗܝܼܪܵܐ (ܥܲܬܝܼܩܬܐ) ܒܥܸܕܵܢ ܡܲܦܩܲܥܬܐ ܟܲܒܝܼܪܬܐ ܕܲܡܕܝܼܢ݇ܬܐ ܕܡܲܘܨܸܠ ܥܲܬܝܼܩܬܐ ܒܫܲܢ݇ܬܐ ܕ2017 ݂ ܬܠܸܚܠܹܗ ܩܪܵܫܵܐ ܘܦܝܼܫܠܗ݇ܘܿܢ ܥܲܡܘܼܕܹ̈ܐ ܟܸܠܝܹ̈ܐ ܒܫܲܘܦܲܝܗܝ ݂ ܟܹܐܦܹ̈ܐ ܡܓܲܕܫܹ̈ܐ ܝܗ݇ܘܵܘ ܓܵܘܵܐ ܘܒܲܪܵܐ ܕܒܸܢܝܵܢܵܐ ݂ ܠܵܐ ܦܝܼܫܠܹܗ ܬܠܝܼܚܵܐ ܒܲܠܚܘܿܕ ܬܲܪܥܵܐ ܡܲܠܟܵܝܵܐ: ܘܬܲܪ̈ܥܵܢܹܐ ܓܹܒܵܝܹ̈ܐ ܕܡܲܕܒܚܵܐ: ܐܸܠܵܐ ܡܛܹܐ ܠܹܗ ܐܸܠܵܗ̇ ܚܪ̈ܵܒ݂ܹܐ ܪ̈ܲܒܹܐ ݂

ܝܲܘܡܵܢܵܐ: ܐܝܼܬ ܚܕܵܐ ܬܲܪܡܝܼܬܐ ܠܬܘܼܩܵܢܵܐ ܕܥܹܕܬܐ ܒܝܲܕ ܟܢܘܼܫܬܐ ܕ(ܐܲܚܘܼܬ݂ܐ ܓܲܘ ܥܝܼܪܵܐܩ) ܒܚܵܝܘܿܪܘܼܬ݂ܐ ܕܡܲܛܪܵܢ ܦܲܛܪܘܿܣ ܡܘܼܫܹܐ (ܘܗܿܝ ܝܼܠܵܗ̇ ܟܢܘܼܫܬܐ ܕܲܡܚܘܼܕܸܬ ܠܵܗ̇ ܠܩܲܒ݂ܪܵܐ ܕܡܵܪܝ ܒܸܗܢܵܡ ܘܣܵܪܵܐ ܒܫܸܛܚܵܐ ܕܢܝܼܢܘܹܐ): ܘܐܵܗܵܐ ܚܲܕ ܬܲܪܡܝܼܬܐ ܝܠܹܗ ܝܵܪܬܘܼܬܵܢܵܝܵܐ ܪܲܒܵܐ ܒܸܕ ܡܲܕܥܸܪ ܚܲܝܹ̈ܐ ܠܥܹܕܬܐ ܥܲܬܝܼܩܬܐ ܒܡܲܘܨܸܠ ݂

ܐܵܡܹܪ ܡܲܚܵܪܵܐ ܓ݂ܝܼܝܘܿܡ ܡܼܢ ܟܢܘܼܫܬܐ ܕܐܲܚܘܼܬ݂ܐ:” ܥܕܲܡܵܐ ܠܝܲܘܡܵܢܵܐ ܐܝܼܬ ܚܲܕܟܡܵܐ ܐܸܣܛܘܼܟ݂ܣܹ̈ܐ ܓܵܪ̈ܫܵܢܹܐ ܠܝܲܨܝܼܦܘܼܬ݂ܐ: ܡܸܢܲܝܗܝ ܒܨܝܼܪܵܐܝܼܬ ܬܪܹܝܢ ܡܼܢ ܬܠܵܬܐ ܒܹܝܬ ܒܹܐܡܵܐ ܠܠܸܒܵܐ ܕܥܹܕܬܐ: ܝܲܬܝܼܪ ܠܚܲܕ ܡܸܢܝܵܢܵܐ ܡܼܢ ܓܠܝܼ̈ܦܵܬ݂ܐ (منحوتات) ݂ ܘܓܵܘܵܢܵܐܝܼܬ: ܡܵܨܹܝܚ ܕܬܵܢܹܝܚ ܠܒܸܢܝܵܢܵܐ ܒܐܘܼܪܚܵܐ ܕܲܢܛܵܪܵܐ ܠܣܘܿܓ݂ܐܵܐ ܕܐܸܣܛܘܼܟ݂ܣܹ̈ܐ ܕܝܵܪܬܘܼܬ݂ܐ ܓܵܪ̈ܫܵܢܹܐ ܠܝܲܨܝܼܦܘܼܬܐ: ܕܘܵܠܝܵܐ ܕܦܵܝܫܝܼ ܚܸܙܝܹ̈ܐ ܐܵܦ ܬܚܘܿܬ ܚܪ̈ܝܼܒ݂ܵܬ݂ܐ ” ݂

ܦܝܼܫܠܵܗ̇ ܒܢܝܼܬܐ ܥܹܕܬܐ ܚܕܲܬܐ ܒܕܵܪܵܐ ܬܫܲܥܣܝܼܪܵܝܵܐ: ܘܗܿܝ ܒܸܫ ܪܲܒܬܐ ܝܠܵܗ̇ ܡܼܢ ܥܹܕܬܐ ܥܲܬܝܼܩܬܐ: ܐܸܠܵܐ ܦܝܼܫܠܵܗ̇ ܬܠܝܼܚܬܐ ܓܡܝܼܪܵܐܝܼܬ ܒܥܸܕܵܢ ܡܲܦܩܲܥܬܐ ܕܡܲܘܨܸܠ ܒܫܲܢ݇ܬܐ ܕ2017: ܘܗܵܫܵܐ ܡܠܝܼܬܐ ܝܠܵܗ̇ ܒܲܚܪ̈ܝܼܒ݂ܵܬ݂ܐ ܕܲܫܡܸܢܬܐ  (أنقاض سمنت) ݂ ܠܵܐ ܡܵܨܹܝܚ ܕܚܵܙܹܝܚ ܐܸܠܵܐ ܚܕܵܐ ܡܢܵܬ݂ܐ ܦܫܝܼܛܬܐ ܡܢ ܚܲܕ ܓܘܼܕܵܐ ܓܸܢܝܵܐ ܒܲܕܡܘܼܬ݂ ܩܸܛܪܵܐ: ܕܗܵܘܹܐ ܬܚܘܿܬ݂ ܩܘܼܒ̇ܬܐ ܘܦܵܠܹܚ ܐܲܝܟ݂ ܣܸܡܟ݂ܵܐ: ܘܡܲܒܝܘܿܢܹܐ ܕܠܲܝܬ ܚܕܵܐ ܬܲܪܡܝܼܬܐ ܠܲܡܚܲܕܲܬ݂ܬܵܗ̇ ܐܲܘ ܢܛܵܪܬܵܗ̇ ݂