En poursuivant votre navigation sans modifier vos paramètres, vous acceptez l'utilisation des cookies ou technologies similaires pour disposer de services et d'offres adaptés à vos centres d'intérêts ainsi que pour la sécurisation des transactions sur notre site. En savoir plus

ܥܹܕܬܐ ܕܡܵܪܝ ܒܸܗܢܵܡ ܘܣܵܪܵܐ ܓܲܘ ܒܲܟ݂ܕܹܝܕܹܐ (ܩܲܪܲܩܘܿܫ)

ܢܵܦܠܵܐ ܥܹܕܬܐ ܕܡܵܪܝ ܒܸܗܢܵܡ ܘܣܵܪܵܐ ܥܲܠ ܣܘܼܪܛܵܐ ܕܦܸܬ݂ܘܵܐ: ܓܲܪܒܝܵܐܝܼܬ 36.277130 ܘܡܲܕܢܚܵܐܝܼܬ   43.37570: ܘܥܲܠ ܪܵܡܘܼܬ݂ 275 ܡܝܼܬܪܹ̈ܐ ܡܼܢ ܫܲܘܝܘܼܬ݂ ܫܸܛܚܵܐ ܕܝܲܡܵܐ ݂

ܟܹܐ ܦܵܝܫܵܐ ܚܫܝܼܒ݂ܬܐ ܥܹܕܬܐ ܕܡܵܪܝ ܒܸܗܢܵܡ ܗܿܝ ܕܘܼܟܬܐ ܒܸܫ ܚܕܲܬܐ (ܚܲܕܬܐ) ܩܵܐ ܡܗܘܼܡܢܹ̈ܐ ܐ݇ܣܘܼܪ̈ܝܵܝܹܐ ܩܵܬ݂ܘܿܠܝܼܩܵܝܹ̈ܐ ܓܲܘ ܒܲܟ݂ܕܹܝܕܹܐ ݂ ܡܫܘܼܪܹܐ ܠܹܗ ܥܡܘܼܪܝܵܐ ܕܒܸܢܝܵܢܵܗ̇ ܚܲܕܬܵܐܝܼܬ ܒܫܲܢ݇ܬܐ ܕ 2005: ܘܦܝܼܫܠܵܗ̇ ܣܝܼܡܬܐ ܒܝܘܿܡ 4 ܒܐܵܒ ܫܲܢ݇ܬܐ ܕ2008 ݂ ܒܸܢܝܵܢܵܐ ܕܥܹܕܬܐ ܪܵܒܵܐ ܫܲܦܝܼܪܵܐ ܝܠܹܗ ܘܡܸܬܢܲܬܦܵܢܵܐ (ܡܸܬܓܲܪܫܵܢܵܐ) ܠܓܵܗܵܐ ܩܲܕܡܵܝܬܐ: ܒܡܲܚܵܪܘܼܬܹܗ ܐܲܪܕܸܟ݂ܠܵܝܬܐ ܠܒ݂ܝܼܒ݂ܬܐ ܥܲܠ ܐܸܣܟܹܝܡܵܐ ܕܲܩܛܵܪܬܵܐ (ܩܸܫܬܐ): ܘܩܲܕܡܵܝܬܐ ܝܠܵܗ̇ ܓܲܘ ܐܲܬ݂ܪܵܐ ܕܒܹܝܬ݂ ܢܲܗܪ̈ܝܼܢ ݂ ܘܒܵܥܝܵܐ ܥܹܕܬܐ ܕܗܵܘܝܵܐ ܐܵܬ݂ܵܐ ܠܚܲܝܘܼܬ݂ܵܢܘܼܬ݂ܐ (حيوية) ܕܐ݇ܣܘܼܪ̈ܝܵܝܹܐ ܩܵܬ݂ܘܿܠܝܼܩܵܝܹ̈ܐ ܓܲܘ ܒܲܟ݂ܕܹܝܕܹܐ ܒܫܘܼܪܵܝ ܕܵܪܵܐ ܕܥܸܣܪܝܼܢ ܘܚܲܕ: ܐܵܦܸܢ ܪܕܘܼܦܝܵܐ ܘܲܛܠܘܼܡܝܵܐ ܕܐܝܼܬ ܥܲܠ ܡܫܝܼܚܵܝܹ̈ܐ ܓܵܘܵܢܵܐܝܼܬ: ܘܐܵܦܸܢ ܦܝܼܫܠܵܗ̇ ܓܢܝܼܒ݂ܬܐ ܘܡܘܼܩܸܕܬܐ ܒܝܲܕ (ܕܵܥܹܫ): ܘܗܵܫܵܐ ܓܲܘ ܡܲܫܩܠܵܐ ܕܲܥܡܘܼܪܝܵܐ ܝܠܵܗ̇ ܕܒܸܢܝܵܢܵܗ̇: ܗ: ܕ: ܡܚܲܕܲܬ݂ܬܵܐ ܕܒܸܢܝܵܢܵܗ̇ ݂

ܡܲܘܬܒ݂ܵܐ (ܕܘܼܟܵܐ):

ܢܵܦܠܵܐ ܥܹܕܬܐ ܕܡܵܪܝ ܒܸܗܢܵܡ ܘܣܵܪܵܐ ܥܲܠ ܣܘܼܪܛܵܐ ܕܦܸܬ݂ܘܵܐ: ܓܲܪܒܝܵܐܝܼܬ  36.277130 ܘܡܲܕܢܚܵܐܝܼܬ   43.37570: ܘܥܲܠ ܪܵܡܘܼܬ݂ 275 ܡܝܼܬܪܹ̈ܐ ܡܼܢ ܫܲܘܝܘܼܬ݂ ܫܸܛܚܵܐ ܕܝܲܡܵܐ: ܢܵܦܠܵܐ ܓܲܘ ܦܸܠܓܵܐ (ܦܲܠܓܵܐ) ܕܲܡܕܝܼܢ݇ܬܐ ܕܒܲܟ݂ܕܹܝܕܹܐ: ܕܦܵܝܫܵܐ ܚܫܝܼܒ݂ܬܐ ܗܿܝ ܡܕܝܼܢ݇ܬܐ ܒܸܫ ܪܲܒܬܐ ܓܲܘ ܫܸܛܚܵܐ ܕܢܝܼܢܘܹܐ ݂ ܘܢܵܦܠܵܐ ܥܲܠ ܪܲܚܝܼܩܘܼܬ݂ܐ (ܒܘܼܥܕܵܐ) ܕ 30 ܟܠܡ ܠܬܲܝܡܢܵܐ ܡܲܕܢܚܵܝܵܐ ܕܲܡܕܝܼܢ݇ܬܐ ܕܡܲܘܨܸܠ: ܘ 80 ܟܠܡ ܒܡܲܥܪܒ݂ܵܐ ܕܲܡܕܝܼܢ݇ܬܐ ܕܐܲܪܒ݂ܹܝܠ ܓܲܘ ܦܢܝܼܬܐ ܩܪܝܼܬܐ ܒܠܸܫܵܢܵܐ ܣܲܪܩܵܝܵܐ (ܗܲܡܕܵܢܝܼܵܐ): ܘ 40 ܟܠܡ ܡܢ ܢܘܼܩܙܵܐ ܕܲܡܙܵܓ݂ܬܐ ܕܢܲܗܪܵܐ ܕܕܸܩܠܲܬ ܒܢܲܗܪܵܐ ܕܙܵܒ݂ܵܐ ܪܲܒܵܐ ݂ ܣܘܼܟܵܠܵܐ ܕܡܸܠܬܐ ܕܩܲܪܲܩܘܿܫ ܒܠܸܫܵܢܵܐ ܬܘܼܪܟܵܝܵܐ: ܝܼܠܹܗ ܛܲܝܪܵܐ ܐܘܼܟܵܡܵܐ (ܟܘܿܡܵܐ): ܘܲܠܗܵܫܵܐ ܡܘܼܦܠܚܵܐ ܝܠܹܗ ܗܵܢܵܐ ܪܸܬ݂ܡܵܐ ܒܲܪܘܝܼܚܘܼܬ݂ܐ: ܐܸܠܵܐ ܘܵܠܹܐ ܕܠܵܐ ܢܵܫܹܝܚ ܕܫܸܡܵܗ̇ ܡܵܪܹܐ ܫܸܪܫܵܐ ܐ݇ܣܘܼܪܝܵܝܵܐ ܝܠܹܗ (ܒܲܟ݂ܕܹܝܕܹܐ: ܒܲܓ݂ܕܹܝܕܵܐ) ݂ ܢܵܦܠܵܐ ܒܲܟ݂ܕܹܝܕܹܐ ܓܲܘ ܠܸܒܵܐ ܕܫܸܛܚܵܐ ܕܐ݇ܣܘܼܪ̈ܵܝܹܐ: ܒܨܸܒܥܵܗ̇ ܪܘܼܚܵܢܵܝܵܐ: ܘܲܕܝܼܠܵܗ̇ ܐܵܪܸܫܟ݂ܵܝܬܐ ܬܹܒ݂ܹܝܠܵܝܬܐ ܩܵܐ ܐ݇ܣܘܼܪ̈ܵܝܹܐ ܩܵܬ݂ܘܿܠܝܼܩܵܝܹ̈ܐ ܡܼܢ ܩܕܵܡ ܨܦܵܚܬܐ ܕ(ܕܵܥܹܫ): ܘܲܥܪܘܼܩܝܵܐ ܕܐ݇ܢܵܫܵܗ̇ ܒܠܲܝܠܹܐ ܕ 6/7 ܡܼܢ ܝܲܪܚܵܐ ܕܐܵܒ ܫܲܢ݇ܬܐ ܕ 2014 ݂ ܘܦܝܼܫܠܵܗ̇ ܡܚܘܼܪܲܪܬܐ ܡܕܝܼܢ݇ܬܐ ܕܒܲܟ݂ܕܹܝܕܹܐ ܒܝܲܪܚܵܐ ܕܬܸܫܪܝܼܢ ܩܲܕܡܵܝܵܐ ܫܲܢ݇ܬܐ ܕ 2016: ܘܲܒܝܲܪܚܵܐ ܕܢܝܼܣܵܢ ܕܫܲܢ݇ܬܐ ܕ 2017: ܕܥܸܪܘܼܢ ܐܸܠܵܗ̇ ܐ݇ܢܵܫܵܗ̇: ܘܡܘܼܕܥܸܪܵܗ̇ ܒܲܟ݂ܕܹܝܕܹܐ ܫܪܵܪܵܐ ܕܝܼܠܵܗ̇ ܩܸܢܛܪܘܿܢ ܓ̰ܝܘܿܓ݂ܪܵܦܵܝܵܐ ܚܲܝܘܼܬܵܢܵܝܵܐ ܠܩܘܼܝܵܡܵܐ ܐ݇ܣܘܼܪܵܝܵܐ ܘܲܡܫܝܼܚܵܝܵܐ ܓܲܘ ܫܸܛܚܵܐ ܕܢܝܼܢܘܹܐ: ܘܓܲܘ ܐܲܬ݂ܪܵܐ ܕܒܹܝܬ ܢܲܗܪ̈ܝܼܢ ݂

كنيسة القديس بهنام والقديسة سارة في قره قوش.
حزيران 2017 © باسكال ماغيسيان / ميزوبوتاميا

ܚܲܕ ܦܸܣܩܵܐ ܥܲܠ ܬܲܫܥܝܼܬܐ ܡܫܝܼܚܵܝܬܐ ܕܒܲܟ݂ܕܹܝܕܹܐ (ܩܲܪܲܩܘܿܫ):

ܒܸܕܥܵܪܵܐ ܝܠܵܗ̇ ܡܫܝܼܚܵܝܘܼܬ݂ܐ ܓܲܘ ܫܸܛܚܵܐ ܕܢܝܼܢܘܹܐ: ܘܓܲܘ ܡܕܝܼܢ݇ܬܐ ܕܒܲܟ݂ܕܹܝܕܹܐ ܠܚܘܼܬܵܡ ܕܵܪܵܐ ܪܒ݂ܝܼܥܵܝܵܐ ܐܲܘ ܫܘܼܪܵܝ ܕܵܪܵܐ ܚܡܝܼܫܵܝܵܐ: ܐܲܝܟ݂ ܕܲܡܫܲܪܸܪ ܝܘܼܪܬܵܢܵܐ ܝܘܼܒܵܠܵܝܵܐ ݂ ܘܫܲܪܝܼܪܵܐܝܼܬ ܘܲܠܦܘܼܬ݂ ܡܲܒܘܼܥܹ̈ܐ ܡܬܲܟܠܹ̈ܐ: ܡܫܘܼܪܹܐ ܠܵܗ̇ ܣܒ݂ܲܪܬܐ ܘܡܲܫܚܲܕܬܐ ܒܲܡܫܝܼܚܵܐ ܒܕܵܪܵܐ ܫܒ݂ܝܼܥܵܝܵܐ (ܡܵܬܵܐ ܢܸܣܛܘܿܪܢܵܝܬܐ ܝܗ݇ܘܵܐ ܒܫܸܪܫܵܐ)[1]: ܘܩܘܼܪܒܵܐ ܠܫܲܢ݇ܬܐ ܕ 615 ܦܝܼܫܠܵܗ̇ ܡܘܿܢܘܿܦܝܼܙܵܝܬܐ[2] ݂ ܒܕܵܪܵܐ ܕ (11) ܘ (12): ܪܵܒܵܐ ܡܫܝܼܚܵܝܹ̈ܐ ܬܲܓܪ̈ܝܼܬܵܝܹܐ ܬܪܸܟܠܗ݇ܘܿܢ ܘܲܫܒ݂ܸܩܠܗ݇ܘܿܢ ܠܲܡܕܝܼܢ݇ܬܲܝܗܝ ܡܼܢ ܒܵܬܲܪ ܣܝܵܡܬܐ ܕܚܲܝܠܵܐ ܥܲܠܠܲܝܗܝ ܕܥܵܒ݂ܪܝܼ ܓܲܘ ܡܲܫܠܡܵܢܘܼܬ݂ܐ: ܘܲܫܟܸܢܘܼܢ ܓܲܘ ܒܲܟ݂ܕܹܝܕܹܐ ݂ ܘܲܒܫܲܢ݇ܬܐ ܕ 1743: ܥܒ݂ܸܕܠܗ݇ܘܿܢ ܚܲܝܠܵܘܵܬ݂ܐ ܕ(ܢܵܐܕܹܪ ܫܵܐܗ) ܚܨܵܪܵܐ ܠܲܦܢܝܼܬܐ ܕܒܲܟ݂ܕܹܝܕܹܐ: ܘܩܲܡ ܓܵܢܒ݂ܝܼܠܵܗ̇ ܘܡܘܼܚܪܸܒ݂ܠܗ݇ܘܿܢ ܠܥܹ̈ܕܵܬܵܗ̇ ݂ ܦܝܼܫܠܗ݇ܘܿܢ ܡܐܲܠܨܹ̈ܐ ܐ݇ܢܵܫܹ̈ܐ ܕܡܵܬ݂ܐ ܕܐܵܙܠ݇ܝܼ ܘܥܵܪܩܝܼ ܠܡܲܘܨܸܠ: ܐܲܝܟܵܐ ܕܲܡܫܘܼܬܸܦܠܗ݇ܘܿܢ ܓܲܘ ܣܘܼܬܵܪܵܐ ܥܲܠ ܡܕܝܼܢ݇ܬܐ [3] ݂ ܦܝܼܫܠܵܗ̇ ܒܲܟ݂ܕܹܝܕܹܐ ܩܵܬ݂ܘܿܠܝܼܩܵܝܬܐ ܟܲܕ ܡܼܢ ܩܕܝܼܡ ܩܸܢܛܪܘܿܢ ܝܗ݇ܘܵܐ ܕܟܘܼܪܣܝܵܐ ܐܲܦܸܣܩܘܿܦܵܝܵܐ ܕܐ݇ܣܘܼܪ̈ܝܵܝܹܐ ܐܲܪ̈ܬ݂ܘܿܕܘܿܟܣܵܝܹܐ ݂

ܥܕܲܡܵܐ ܠܝܲܘܡܵܢܵܐ (لا يزال): ܚܵܒ݂ܫܵܐ ܡܕܝܼܢ݇ܬܐ ܕܒܲܟ݂ܕܹܝܕܹܐ ܥܹ̈ܕܵܬ݂ܐ ܐ݇ܣܘܼܪ̈ܝܵܝܵܬ݂ܐ ܩܵܬ݂ܘܿܠܝܼ̈ܩܵܝܵܬܐ ܘܐܲܪ̈ܬ݂ܘܿܕܘܿܟܣܵܝܵܬܐ ܥܲܬܝܼ̈ܩܵܬ݂ܐ ݂ ܩܝܼܡܠܹܗ (ܕܵܥܹܫ) ܒܲܓܢܵܒ݂ܬܐ ܘܡܲܚܪܲܒ݂ܬܐ ܕܐܲܢܲܝ ܥܹ̈ܕܵܬ݂ܐ: ܠܵܐ ܒܲܠ ܩܝܼܡܠܹܗ ܒܡܲܩܲܕܬܲܝܗܝ ܒܥܸܕܵܢ ܟܒ݂ܵܫܬܹܗ ܠܲܡܕܝܼܢ݇ܬܐ ܒܡܸܬܚܵܐ ܕܥܸܣܪܝܼܢ ܘܐܲܪܒܥܵܐ ܝܲܪ̈ܚܹܐ ݂ ܘܐܵܦܸܢ ܕܐܝܼܬ ܗ݇ܘܵܐ ܚܪܵܒ݂ܵܐ ܘܲܚܒ݂ܵܠܵܐ: ܐܸܠܵܐ ܥܕܲܡܵܐ ܠܝܲܘܡܵܢܵܐ ܐܲܢܲܝ ܥܹܕܵܬ݂̈ܐ ܟܠܵܝܵܐ ܝܠܲܝܗܝ ܓܲܘ ܦܵܬ݂ܐ ܕܨܵܦܘܿܚܹ̈ܐ: ܘܐܲܡܝܼܢܵܐܝܼܬ ܡܲܩܪܘܿܒ݂ܹܐ ܝܠܲܝܗܝ ܣܵܗܕܘܼܬܲܝܗܝ ܡܫܝܼܚܵܝܬܐ ܥܲܠ ܕܲܥܒܲܪܲܝܗܝ ܒܲܥܝܼܕܵܐ ܥܒ݂ܝܼܪܵܐ ݂

_______

[1] ܥܹܕܬܐ ܕܡܲܕܢܚܵܐ: NDA

[2] ܐ݇ܣܘܼܪ̈ܵܝܹܐ ܐܲܪ̈ܬ݂ܘܿܕܘܿܟܣܵܝܹܐ:  NDA

[3] ܚܙܝܼ̣ ܓ̰ܵܐܢ ܡܵܪܝܼ ܡܹܝܪܝܼܓ݂ܘܿ: (ܡܲܕܢܚܵܐ ܡܫܝܼܚܵܝܵܐ ܓܲܘ ܐܸܡܒܪܵܛܘܿܪܘܼܬ݂ܐ ܐܸܣܠܵܡܵܝܬܐ): ܟܘܼܢܵܫܵܐ ܕܲܣܬܘܿܕܝܘܿ ܐܵܪܵܒܝܼܟܵܐ: ܛܲܒ݂ܥܵܐ ܕܦܵܪܝܼܣ 2005 ݂

كنيسة القديس بهنام والقديسة سارة في قره قوش والتي تم حرقها من قبل داعش. أمام الهيكل أبونا شربل.
نيسان 2017 © باسكال ماغيسيان / ميزوبوتاميا

ܡܸܬ݂ܩܲܘܝܵܢܘܼܬ݂ܐ (ܐܲܡܝܼܢܘܼܬ݂ܐ) ܕܣܵܗܕܘܼܬ݂ܐ ܡܫܝܼܚܵܝܬܐ:

ܦܠܵܫܹ̈ܐ ܘܲܩܪ̈ܵܒܹܐ ܡܸܬ݂ܝܲܒܠܵܢܹ̈ܐ: ܘܬܲܘܬܵܒ݂ܘܼܬ݂ܐ ܐܲܡܝܼܢܬܐ ܕܐ݇ܢܵܫܹ̈ܐ: ܘܠܲܝܬ̇ܝܘܼܬ݂ ܚܘܼܫܒܵܢܵܐ ܪܘܼܫܡܵܝܵܐ ܕܥܵܡܘܿܪܹ̈ܐ : ܡܘܼܒܨܸܪܘܼܢ ܡܼܢ ܡܗܲܝܡܵܢܘܼܬ݂ܐ ܒܪ̈ܲܩܡܹܐ ܕܐܝܼܬ ܩܕܵܡ ܐܝܼܕܵܐ: ܐܵܢܝܼ ܕܲܡܬܲܚܸܡܝܼ ܘܲܡܬܲܚܸܒܝܼ ܠܡܸܢܝܵܢܵܐ ܕܥܵܡܘܿܪܹ̈ܐ ܕܲܡܕܝܼܢ݇ܬܐ ܕܒܲܟ݂ܕܹܝܕܹܐ: ܕܝܼܠܹܗ ܩܘܼܪܒܵܒܵܐ ܕ(40000 ـ 50000) ܢܸܫܡܹ̈ܐ ܡܼܢ ܩܕܵܡ ܨܦܵܚܬܐ ܕ(ܕܵܥܹܫ) ܒܝܲܪܚܵܐ ܕܐܵܒ ܫܲܢ݇ܬܐ ܕ2014 ݂ ܬܸܫܥܝܼܢ ܓܲܘ ܡܵܐܐ (90 %) ܡܸܢܲܝܗܝ ܐ݇ܣܘܼܪ̈ܵܝܹܐ ܩܵܬ݂ܘܿܠܝܼܩܵܝܹ̈ܐ ܝܠܲܝܗܝ: ܘܦܵܝܫܵܢܹ̈ܐ ܝܼܠܲܝܗܝ ܟܲܠܕܵܝܹ̈ܐ ܘܐ݇ܣܘܼܪ̈ܵܝܹܐ ܐܲܪ̈ܬ݂ܘܿܕܘܿܟܣܵܝܹܐ ܘܐܵܪܸ̈ܡܢܵܝܹܐ ܐܲܪ̈ܬ݂ܘܿܕܘܿܟܣܵܝܹܐ ݂ ܘܙܵܕܹܩ ܠܲܢ ܕܡܲܘܣܸܦܲܚ (ܡܲܙܝܸܕܲܚ) ܐܲܠܦܵܝܹ̈ܐ ܕܦܲܪ̈ܨܘܿܦܹܐ ܥܪ̈ܝܼܩܹܐ ܘܡܘܼܪ̈ܚܸܩܹܐ (ܒܹܝܬ 5000 ـ 13000 ܦܲܪ̈ܨܘܿܦܹܐ): ܡܼܢ ܒܲܓ݂ܕܵܕ ܘܡܲܘܨܸܠ: ܕܐ݇ܬܹܐ ܠܲܝܗܝ ܠܒܲܟ݂ܕܹܝܕܹܐ ܡܼܢ ܫܲܢ݇ܬܐ ܕ 2003: ܟܲܕ ܥܪ̈ܝܼܩܹܐ ܡܼܢ ܓܘܼܢܚܹ̈ܐ ܕܣܝܼܥܵܬ݂ܐ ܐܸܣܠܵܡܵܝܹ̈ܐ ܘܡܝܼ̈ܠܝܼܫܝܵܬ݂ܐ: ܕܦܝܼܫܠܗ݇ܘܿܢ ܡܫܘܼܬܐܸܣܹ̈ܐ ܡܼܢ ܒܵܬܲܪ ܢܦܵܠܬܐ ܕܛܲܟ݂ܣܵܐ ܕܫܘܼܠܛܵܢܵܐ ܕܨܲܕܵܐܡ ܓܲܘ ܥܝܼܪܵܐܩ ݂

القديس بهنام والقديسة سارة في قره قوش. أمسية موسيقية ميلادية.
كانون الأول 2017 © بولين بوشاير / ميزوبوتاميا

ܫܲܪܒܵܐ ܕܚܲܝܹ̈ܐ ܕܩܲܕܝܼܫܵܐ ܒܸܗܢܵܡ ܘܩܲܕܝܼܫܬܐ ܣܵܪܵܐ:

ܚܲܝܹ̈ܐ ܕܡܵܪܝ ܒܸܗܢܵܡ ܘܣܵܪܵܐ: ܦܝܼܫܠܗ݇ܘܿܢ ܕܟ݂ܝܼܪܹ̈ܐ ܓܲܘ ܟܬܵܒ݂ܵܐ ܕܚܲܕ ܪܲܒܵܢܵܐ ܡܼܢ ܐܘܼܪܗܵܝ (ܐܘܼܪܦܵܐ ܒܬܘܼܪܟܝܵܐ ܕܝܲܘܡܵܢܵܐ): ܒܕܵܪܵܐ ܕ(12) ܘ(13)[1] ݂ ܓܵܘܹܗ ܒܸܩܪܵܝܵܐ ܝܘܲܚ ܕܐܲܡܝܼܪܬܐ ܣܵܪܵܐ ܚܵܬܵܐ ܕܐܲܡܝܼܪܵܐ ܒܸܗܢܵܡ ܦܝܼܫܠܵܗ̇ ܒܣܝܼܡܬܐ ܡܼܢ ܡܲܪܥܵܐ ܕܐܲܪܝܵܐ (الجُذام) ܥܲܠ ܐܝܼܕܹ̈ܐ ܕܩܲܕܝܼܫܵܐ ܡܲܬܲܝ: ܒܲܚܕܵܐ ܕܘܼܟܬܐ ܩܪܝܼܬܐ (ܡܲܒܘܼܥ ܬܸܕܡܪ̈ܵܬ݂ܐ) ݂ ܐܵܣܝܘܼܬܐ (ܒܣܵܡܬܐ) ܠܵܐ ܒܲܠܚܘܿܕ ܦܲܓ݂ܪܵܢܵܐܝܼܬ ܝܗ݇ܘܵܐ: ܐܸܠܵܐ ܐܵܦ ܪܘܼܚܵܢܵܐܝܼܬ ܝܗ݇ܘܵܐ: ܥܲܠ ܕܩܲܕܝܼܫܵܐ (لأن القديس) ܪܲܒܵܢܵܐ ܡܲܬܲܝ: ܡܘܼܥܡܸܕ ܠܹܗ ܐܵܦ ܒܪܘܿܢܵܐ ܘܲܒܪܵܬܐ ܕܡܲܠܟܵܐ ܕܲܡܕܝܼܢ݇ܬܐ ܕܢܸܡܪܘܼܕ: ܗ: ܕ: ܡܲܠܟܵܐ ܣܲܢܚܝܼܪܸܒ݂ ܬܪܲܝܵܢܵܐ ݂ ܘܲܒܥܸܠܬܐ ܕܟܲܪܒܹܗ ܥܲܫܝܼܢܵܐ ܕܩܘܼܒܸܠܠܗ݇ܘܿܢ ܘܲܚܦܸܩܠܗ݇ܘܿܢ ܠܲܡܫܝܼܚܵܝܘܼܬ݂ܐ: ܩܝܼܡܠܹܗ ܗܵܢ ܡܲܠܟܵܐ ܐܵܬܘܿܪܵܝܵܐ ܒܲܩܛܵܠܬܐ ܕܲܒܪܘܿܢܹܗ ܘܲܒܪܵܬܹܗ: ܘܐܵܦ ܝܲܬܝܼܪ ܠـ (40) ܡܼܢ ܬܵܒܘܿܥܹ̈ܗ (ܠܵܘܘܿܝܹ̈ܗ: مرافقيه)[2] ݂

ܘܲܠܦܘܼܬ݂ ܝܘܼܒܵܠܹ̈ܐ (ܐܲܒ̈ܘܵܬ݂ܐ: تقاليد): ܚܝܹܐ ܠܗ݇ܘܿܢ ܡܵܪܝ ܒܸܗܢܵܡ ܘܣܵܪܵܐ: ܘܐܲܝܟ݂ ܕܲܒ݂ܣܘܿܓ݂ܐܵܐ (غالبًا) ܡܼܢ ܫܸܪܫܵܐ ܦܵܪܣܵܝܵܐ[3] ܓܲܘ ܕܵܪܵܐ ܪܒ݂ܝܼܥܵܝܵܐ: ܘܡܸܬ݂ܗܲܘܝܵܢܝܼܬܐ ܝܠܵܗ̇ ܕܦܵܝܫܵܐ ܐܡܝܼܪܬܐ ܕܐܵܢܝܼ ܚܝܹܐ ܠܗ݇ܘܿܢ ܒܕܵܪܵܐ ܚܡܝܼܫܵܝܵܐ ܐܲܘ ܫܬܝܼܬܵܝܵܐ[4]: ܕܠܵܐ ܐܝܼܬܘܼܬܐ ܕܫܘܼܪܪܹ̈ܵܐ ܘܐܸܫܛܵܪܹ̈ܐ ܒܥܸܠܬܐ ܕܒܵܨܘܿܪܘܼܬܐ ܕܡܲܒܘܼܥܹ̈ܐ ܬܲܫܥܝܼܬܵܢܵܝܹ̈ܐ ܡܬܲܟܠܹ̈ܐ ܕܐܝܼܬ݂ ܡܲܘܕܲܝܬܐ ܘܗܲܝܡܵܢܘܼܬ݂ܐ ܐܸܒܲܝܗܝ ݂  ܘܦܝܼܫܬܐ ܝܠܵܗ̇ ܐܡܝܼܪܬܐ ܬܘܼܒ݂ (ܡܸܢ݇ܕܪܹܫ݇) ܕܡܲܠܟܬܐ (ܣܝܼܪܝܼܢ): ܩܝܼܡܵܠܵܗ̇ (ܒܲܚܦܵܪܬܐ ܕܚܲܕ ܚܠܵܠܵܐ (نفق) ܒܝܘܼܪܟ݂ܘܼܬ݂ܐ ܕܫܲܒ݂ܥܵܐ ܟܠܡ ܕܡܲܡܛܹܐ ܠܕܘܼܟܵܐ ܕܚܲܝܘܼܬܵܗ̇ ܒܩܲܒ݂ܪܵܐ ܕܝܲܠ̈ܕܵܗ̇): ܕܡܵܨܝܵܐ ܒܵܟ݂ܝܵܐ ܥܲܠܠܲܝܗܝ ܐܝܼܡܲܢ ܕܒܵܥܝܵܐ: ܠܗܲܠ ܕܲܡܛܹܐ ܠܵܗ̇ ܠܢܝܼܫܵܗ̇ ܪܹܫܵܝܵܐ ܐܝܼܡܲܢ ܕܲܚܦܸܩܠܹܗ ܒܲܪ ܙܲܘܓܵܗ̇ (ܓܲܒ݂ܪܵܗ̇) ܠܲܡܫܝܼܚܵܝܘܼܬܐ: ܕܐܬܹܐ ܠܵܗ̇ ܠܐܝܼܬܘܼܬܐ ܒܗܲܝܡܵܢܘܼܬܐ ܕܩܲܕܝܼܫܵܐ ܡܵܪܝ ܡܲܬܲܝ[5] ݂ ܒܝܲܘܡܵܢܲܢ:”ܟܹܐ ܡܗܲܝܡܢܝܼ ܟܠܲܝܗܝ ܡܫܝܼܚܵܝܹ̈ܐ ܕܲܥܡܝܼܪܹ̈ܐ ܝܠܲܝܗܝ ܓܲܘ ܕܲܝܪܵܐ: ܘܐܵܦ ܥܲܪ̈ܒ݂ܵܝܹܐ ܫܟܝܼܢܹ̈ܐ ܚܕܵܪ ܡܕܝܼܢ݇ܬܐ ܕܢܸܡܪܘܼܕ ܒܐܝܼܬܘܼܬ݂ܐ ܕܗܵܢ ܚܠܵܠܵܐ: ܘܲܫܟܵܚܬܐ ܕܟܠ ܚܦܝܼܪܬܐ ܟܡܵܐ ܕܗܵܘܝܵܐ ܙܥܘܿܪܬܐ: ܦܵܝܫܵܐ ܚܫܝܼܒ݂ܬܐ ܐܲܝܟ ܡܲܥܲܠܬܐ ܠܗܵܢܵܐ ܚܠܵܠܵܐ”[6] ݂ ܘܗܵܕܟ݂ܵܐ ܦܝܼܫܠܵܗ̇ ܡܫܘܼܢܹܝܬܐ ܘܲܢܩܝܼܠܬܐ ܒܡܸܬ݂ܚܵܐ ܕܕܵܪܹ̈ܐ ܘܲܠܝܲܘܡܵܢܵܐ: ܬܘܼܢܝܼܬܐ ܘܫܘܿܥܝܼܬܐ ܕܦܝܼܫܠܵܗ̇ ܙܩܝܼܪܬܐ ܥܲܠ ܚܦܵܩܬܐ ܕܐܲܬ݂ܪܵܐ ܕܐܵܫܘܿܪ (ܒܹܝܬ݂ ܢܲܗܪ̈ܝܼܢ) ܠܲܡܫܝܼܚܵܝܘܼܬܐ ݂

ܢܵܦܹܠ ܕܲܝܪܵܐ ܕܡܝܼܪܵܐ (الرائع) ܕܡܵܪܝ ܒܸܗܢܵܡ ܘܣܵܪܵܐ ܓܲܘ ܦܢܝܼܬܐ ܕ(ܚܸܕܲܪ) ܩܘܼܪܒܵܐ ܕܒܲܟ݂ܕܹܝܕܹܐ: ܕܚܵܒ݂ܹܫ ܠܦܘܼܬ݂ ܝܘܼܒܵܠܵܐ: ܗܿܘ ܩܲܒ݂ܪܵܐ (الضريح) ܪܹܫܵܝܵܐ ܕܟܹܐ ܦܵܐܹܫ ܡܩܲܕܫܵܐ ܡܼܢ ܕܵܪܹ̈ܐ ܥܒ݂ܝܼܪܹ̈ܐ ݂ ܟܹܐ ܣܵܥܪܝܼ ܠܹܗ ܚܲܕ ܡܸܢܝܵܢܵܐ ܕܠܵܐ ܐܵܬܹܐ ܠܚܘܼܫܒܵܢܵܐ ܡܼܢ ܣܵܥܘܿܪܹ̈ܐ ܡܫܝܼܚܵܝܹ̈ܐ ܕܲܡܡܲܠܠܲܝ̈ ܐ݇ܣܘܼܪܝܵܐܝܼܬ: ܘܡܼܢ ܡܲܫܠܡܵܢܹ̈ܐ ܘܐܝܼܙܝܼܕܵܝܹ̈ܐ (ܘܝܲܬܝܼܪܵܐܝܼܬ ܢܸܫܹ̈ܐ ܕܒܵܥܝܼ ܘܛܵܠܒܝܼ ܡܼܢ ܩܲܕܝܼܫܹ̈ܐ ܕܦܵܝܫܝܼ ܒܲܛܢܹ̈ܐ ܘܗܵܘܹܐ ܠܲܝܗܝ ܝܲܠܹ̈ܕ݇ܐ): ܘܡܸܬܗܲܘܝܵܢܝܼܬܐ ܝܠܵܗ̇ ܕܗܵܘܹܐ ܫܲܘܦܵܐ ܕܗܵܢ ܩܲܒ݂ܪܵܐ ܕܘܼܟܵܐ ܕܲܚܕܵܐ ܥܹܕܬܐ ܡܼܢ ܥܹܕܵܬܵܐ ܫܲܪ̈ܘܵܝܵܬ݂ܐ ܥܲܬܝܼܩܹ̈ܐ ݂ ܡܫܲܬܐܲܣܬܐ ܕܗܵܕܹܐ ܥܹܕܬܐ ܓܲܘ ܡܕܝܼܢ݇ܬܐ ܕܒܲܟ݂ܕܹܝܕܹܐ: ܦܪܝܼܫܬܐ ܠܡܵܪܝ ܒܸܗܢܵܡ ܘܣܵܪܵܐ ܚܵܬܹܗ: ܡܓܲܫܡܘܿܢܹܐ ܝܠܵܗ̇ ܠܚܘܼܕܵܬ݂ܐ ܕܗܲܝܡܵܢܘܼܬ݂ܐ ܕܐܝܼܬ ܠܵܗ̇ ܘܲܪ̈ܝܼܕܹܐ ܥܲܡܘܼܩܹ̈ܐ ܓܲܘ ܪܘܼܚܵܐ ܘܦܲܓ݂ܪܵܐ ܕܲܡܫܝܼܚܵܝܹ̈ܐ ܕܥܝܼܪܵܐܩ ݂

_______

[1] ܦܝܼܫܠܹܗ ܕܟ݂ܝܼܪܵܐ ܒܲܟܬܵܒ݂ܵܐ (ܐܵܫܘܿܪ ܡܫܝܼܚܵܝܬܐ): ܓ̰ܵܐܢ ܡܘܿܪܝܼܣ ܦܝܼܝܹܗ: ܒܹܝܬ݂ ܕܪܵܫܵܐ ܕܐܸܓܪ̈ܵܬ݂ܐ ܡܲܕܢܚܵܝܹ̈ܐ: ܒܲܝܪܘܼܬ 1965 ـ 1968 ݂

[2] ܡܫܲܡܘܿܗܹܐ ܝܠܹܗ ܗܵܢ ܓܘܼܫܡܵܐ ܠܒܵܒܵܐ ܕܡܵܪܝ ܒܸܗܢܵܡ ܘܣܵܪܵܐ ܒܡܲܠܟܵܐ ܣܲܢܚܝܼܪܸܒ݂ ܬܪܲܝܵܢܵܐ: ܥܛܘܼܦܝܵܐ ܘܲܪܡܝܼܙܘܼܬܐ ܠܡܲܠܟܵܐ ܣܲܢܚܝܼܪܸܒ݂ ܩܲܕܡܵܝܵܐ ܕܚܝܹܐ ܠܹܗ ܒܕܵܪܵܐ ܕܫܲܒ݂ܥܵܐ ܡܼܢ ܩܕܵܡ ܡܫܝܼܚܵܐ: ܘܠܲܐܟ݂ܵܐ ܫܘܼܪܵܪܵܐ ܝܠܹܗ ܕܒܸܗܢܵܡ ܘܣܵܪܵܐ ܝܼܠܲܝܗܝ ܡܼܢ ܝܘܼܒܵܠܵܐ ܐܵܬܘܿܪܵܝܵܐ ܐܲܝܟ݂ ܝܵܠܘܿܕܲܝܗܝ ݂ (ܡܬܲܪܓܡܵܢܵܐ)

[3] ܗܵܢܵܐ ܪܸܥܝܵܢܵܐ ܠܵܐ ܝܠܹܗ ܩܲܛܝܼܢܵܐ ܘܐܵܦ ܠܵܐ ܕܲܩܝܼܩܵܐ: ܪܵܒܵܐ ܡܬܲܫܥܝܼܬܵܢܹ̈ܐ ܘܡܲܟ݂ܬ݂ܒ݂ܵܢ ܙܲܒ݂ܢܹ̈ܐ ܡܲܦܠܚܝܼ ܫܘܼܡܵܗܵܐ ܕ(ܦܵܪܣܵܝܵܐ) ܠܟܠܡ̇ܢ ܕܚܵܝܹܐ ܓܲܘ ܐܲܬ݂ܪܵܐ ܕܦܵܪܹܣ (ܐܝܼܪܵܢ ܕܝܲܘܡܵܢܵܐ): ܘܲܚܙܹܐ ܠܲܢ ܡܼܢ ܩܕܵܡ ܚܲܕܟܡܵܐ ܦܸܬ݂ܓ݂ܵܡܹ̈ܐ: ܡܫܘܼܡܸܗܠܗ݇ܘܿܢ ܠܒܵܒܲܝܗܝ (ܝܵܠܘܿܕܲܝܗܝ) ܒܫܸܡ: ܣܲܢܚܝܼܪܸܒ݂ ܡܲܠܟܵܐ ܐܵܬܘܿܪܵܝܵܐ: ܐܸܢ ܒܵܒܵܐ ܗܵܘܹܐ ܐܵܬ݂ܘܿܪܵܝܵܐ ܕܐܲܝܟ݂ ܙܲܪ̈ܥܹܐ ܐܲܘ ܒܢܘܿܢܹ̈ܐ ܒܗܵܘܝܼ ܦܵܪ̈ܣܵܝܹܐ ؟: ܗܵܢܵܐ ܪܸܥܝܵܢܵܐ ܠܵܐ ܝܠܹܗ ܚܠܝܼܡܵܐ (ܬܪܝܼܨܵܐ) ܘܠܵܐ ܠܘܿܓ݂ܝܼܩܵܝܵܐ!

[4] ܓܲܘ ܟܬܵܒ݂ܵܐ ܕ (ܐܵܫܘܿܪ ܡܫܝܼܚܵܝܬܐ): ܡܸܣܬܲܪܝܵܢܵܐ (ܡܸܬܡܲܕܢܚܵܢܵܐ) ܓ̰ܵܐܢ ܡܘܿܪܝܼܣ ܦܝܼܝܹܗ: ܡܬܲܢܘܿܝܹܐ ܝܠܹܗ ܒܦܘܼܫܵܟ݂ܵܐ ܥܲܠ ܬܲܫܥܝܼܬܐ ܕܡܵܪܝ ܒܸܗܢܵܡ: ܘܡܲܚܙܘܿܝܹܐ ܝܠܹܗ ܡܸܬܦܲܪ̈ܫܵܢܘܵܬ݂ܐ ܬܲܫܝܼܬܵܢܵܝܹ̈ܐ ܘܚܲܕܟܡܵܐ ܕܲܠܩܘܼܒ݂ܠܝܵܝܹ̈ܐ ܓ̰ܝܘܿܓ݂ܪ̈ܵܦܵܝܹܐ ݂ ܗܿܘ ܡܲܩܪܘܿܒܹܐ ܝܠܹܗ ܠܝܘܼܒܵܠܵܐ ܥܲܡܡܵܝܵܐ ܡܼܢ ܚܲܕܟܡܵܐ ܡܲܒܘܼܥܹ̈ܐ ܡܣܲܬܬܹ̈ܐ (ܡܬܲܟܠܹ̈ܐ) ܩܲܠܝܼܠܹ̈ܐ ݂

[5] ܚܙܝܼ: ܐܵܫܘܿܪ ܡܫܝܼܚܵܝܬܐ: ܓ̰ܵܐܢ ܡܘܿܪܝܼܣ ܦܝܼܝܹܗ ݂

[6] ܚܙܝܼ: ܐܵܫܘܿܪ ܡܫܝܼܚܵܝܬܐ: ܓ̰ܵܐܢ ܡܘܿܪܝܼܣ ܦܝܼܝܹܗ ݂

كنيسة القديس بهنام والقديسة سارة في قره قوش. الواجهة واللوحة الجدارية التي دمّرها داعش والتي كانت تمثل معمودية بهنام وسارة.
حزيران 2017 © باسكال ماغيسيان / ميزوبوتاميا

ܥܹܕܬܐ ܕܡܵܪܝ ܒܸܗܢܵܡ ܘܣܵܪܵܐ:

ܡܼܢ ܒܲܝܢܵܬ݂ ܟܠܲܝܗܝ ܒܸܢܝܵܢܹ̈ܐ ܡܫܝܼܚܵܝܹ̈ܐ ܕܐܝܼܬ ܓܲܘ ܒܲܟ݂ܕܹܝܕܹܐ: ܦܵܝܫܵܐ ܚܫܝܼܒ݂ܬܐ ܥܹܕܬܐ ܕܡܵܪܝ ܒܸܗܢܵܡ ܘܣܵܪܵܐ ܗܿܝ ܒܸܫ ܚܕܲܬܵܐ: ܦܝܼܫܠܵܗ̇ ܒܢܝܼܬܐ ܓܲܘ ܚܕܵܐ ܦܢܝܼܬܐ ܪܵܒܵܐ ܚܒ݂ܝܼܨܬܐ (مزدحمة) ܕܐܝܼܬ ܓܲܘ ܒܲܟ݂ܕܹܝܕܹܐ: ܘܚܲܕ ܛܘܼܦ̮ܣܵܐ ܬܲܦܸܢܟ݂ܵܝܵܐ ܝܠܵܗ̇ ܠܒܸܢܝܵܢܵܐ ܚܲܕܬܐ ܕܠܵܐ ܡܐܲܘܹܐ ܘܠܵܚܹܡ ܥܲܡ ܒܸܢܝܵܢܹ̈ܐ ܝܘܼܒܵܠܵܝܹ̈ܐ ܕܥܹ̈ܕܵܬ݂ܐ ܕܒܹܝܬ݂ ܢܲܗܪ̈ܝܼܢ ݂

ܐܸܢ ܕܲܝܪܵܐ ܕܡܵܪܝ ܒܸܗܢܵܡ ܘܣܵܪܵܐ ܓܲܘ (ܚܸܕܲܪ): ܗܵܦܹܟ݂ ܠܐܲܡܢܵܐ ܡܫܝܼܚܵܝܵܐ ܥܲܬܝܼܩܵܐ ܐܲܝܟܵܐ ܕܚܵܙܹܝܚ ܡܲܒܘܼܥܹ̈ܐ ܘܪܸ̈ܡܙܹܐ ܐܵܬܘܿܪ̈ܵܝܹܐ: ܘܐܸܣܟܹܝܡܵܐ ܐܸܣܠܵܡܵܝܵܐ ܕܕܵܥܹܪ ܠܙܲܒ݂ܢܵܐ ܕ(ܐܲܬܵܒܟܵܐ) ܒܕܵܪܵܐ ܕ(12): ܝܲܬܝܼܪ ܠܕܵܢܬܹܝܠ ܚܦܝܼܪܵܐ ܥܲܠ ܟܹܐܦܵܐ ܕܐܝܼܬ ܠܹܗ ܐܸܣܟܹܝܡܵܐ ܐܵܪܸܡܢܵܝܵܐ: ܐܸܠܵܐ ܡܲܚܵܪܘܼܬܐ ܕܒܸܢܝܵܢܵܐ ܕܥܹܕܬܐ ܕܡܵܪܝ ܒܸܗܢܵܡ ܘܣܵܪܵܐ ܓܲܘ ܒܲܟ݂ܕܹܝܕܹܐ: ܦܪܝܼܫܬܐ ܝܠܵܗ̇ ܒܐܸܣܟܹܝܡܵܗ̇: ܘܪܵܒܵܐ ܥܲܣܩܵܐ ܝܠܵܗ̇ ܕܡܲܝܕܸܥܲܚܠܵܗ̇ ܘܲܡܦܲܫܩܲܚܠܵܗ̇ ܒܲܪܦܵܦܵܐ ݂ ܗܿܘ ܒܸܢܝܵܢܵܐ ܩܲܕܡܵܝܵܐ (ܕܲܝܪܵܐ) ܟܹܐ ܡܫܲܒܸܚ ܠܘܲܪ̈ܝܼܕܹܐ ܘܫܸܪ̈ܫܹܐ: ܘܗܿܘ ܒܸܢܝܵܢܵܐ ܬܪܲܝܵܢܵܐ (ܥܹܕܬܐ) ܟܹܐ ܡܲܫܚܸܕ ܒܕܲܥܬܝܼܕ ݂

ܒܫܲܢ݇ܬܐ ܕ 2005: ܡܫܘܼܪܹܐ ܠܵܗ̇ ܒܢܵܝܬܐ ܚܕܲܬܐ ܕܥܹܕܬܐ ܕܡܵܪܝ ܒܸܗܢܵܡ ܘܣܵܪܵܐ: ܘܦܝܼܫܠܵܗ̇ ܣܝܼܡܬܐ ܒܝܘܿܡ 4 ܒܝܲܪܚܵܐ ܕܐܵܒ ܫܲܢ݇ܬܐ ܕ2008 ݂ ܓܡܝܼܪܵܐܝܼܬ ܐܲܝܟ݂ ܡܚܲܕܲܬ݂ܬܐ ܕܥܹܕܬܐ ܕܝܵܠܕܲܬ݂ ܐܲܠܵܗܵܐ[1] ܓܲܘ ܒܲܟ݂ܕܹܝܕܹܐ: ܦܝܼܫܠܗ݇ܘܿܢ ܡܟܲܢܫܹ̈ܐ ܙܘܼܙܹ̈ܐ ܠܲܒܢܵܝܬܐ ܕܗܵܕܹܐ ܥܹܕܬܐ ܚܲܕܬܵܐܝܼܬ: ܡܼܢ ܥܵܡܘܿܪܹ̈ܐ ܘܦܲܠܵܚܹ̈ܐ ܡܵܪ̈ܲܝ ܐܘܼܡܵܢܘܼܬ݂ܐ ܕܗܵܕܹܐ ܡܕܝܼܢ݇ܬܐ ܡܫܝܼܚܵܝܬܐ ݂ ܘܲܒܗܵܕܹܐ ܨܘܼܪܬܐ ܚܵܙܹܝܚ ܠܚܲܝܘܼܬ݂ܵܢܘܼܬ݂ܐ ܘܲܡܚܲܦܛܵܢܘܼܬ݂ܐ ܕܐ݇ܣܘܼܪ̈ܵܝܹܐ ܩܵܬ݂ܘܿܠܝܼܩܵܝܹ̈ܐ ܕܒܲܟ݂ܕܹܝܕܹܐ: ܠܲܒܢܵܝܬܐ ܕܥܹܕܬܐ ܕܡܵܪܝ ܒܸܗܢܵܡ ܘܣܵܪܵܐ ܒܫܘܼܪܵܝ ܕܵܪܵܐ ܕ(21): ܐܵܦܸܢ ܪܕܘܼܦܝܵܐ ܘܲܚܪܵܒ݂ܵܐ ܕܦܝܼܫܠܹܗ ܥܒ݂ܝܼܕܵܐ ܕܲܠܩܘܼܒ݂ܠ ܡܫܝܼܚܵܝܹ̈ܐ ܒܝܲܕ ܣܝܼ̈ܥܵܬ݂ܐ ܐܸܣܠܵܡܵܝܹ̈ܐ ܡܙܲܝܢܹ̈ܐ ݂

ܐܝܼܬ ܒܲܟܪܝܼܟ݂ܵܐ (محيط) ܕܥܹܕܬܐ ܘܒܸܢܝܵܢܵܗ̇: ܚܲܕ ܫܘܼܪܵܐ ܘܚܲܕ ܬܲܪܥܵܐ ܐܸܠܵܐ ܕܠܵܐ ܐܝܼܬܘܼܬܐ ܕܚܲܕܟܡܵܐ ܢܝܼܫܹ̈ܐ ܐܲܘ ܝܲܕܥܹ̈ܐ ܠܲܢܛܵܪܵܐ ܐܲܘ ܣܘܼܬܵܪܵܐ ܕܥܹܕܬܐ: ܒܗܸܦܟܵܐ ܕܣܘܼܟܵܡܵܐ (تصميم) ܕܕܘܼܟܵܢܹ̈ܐ ܕܥܲܒ̇ܝܼܕܘܼܬܐ (ܣܓ݂ܵܕܬܐ) ܥܲܬܝܼܩܹ̈ܐ: ܐܲܝܟܵܐ ܕܐܝܼܬ ܫܘܼܪ̈ܵܢܹܐ ܪ̈ܵܡܹܐ ܘܡܲܬ̇ܝܼܢܹ̈ܐ ݂

ܒܸܢܝܵܢܵܐ ܟܹܐ ܡܲܒܗܸܪ ܠܓܵܗܵܐ ܩܲܕܡܵܝܬܐ: ܡܲܚܵܪܘܼܬܹܗ ܐܲܪܕܸܟ݂ܠܵܝܬܐ ܠܒ݂ܝܼܒ݂ܬܐ ܕܝܼܠܵܗ̇ ܥܲܠ ܨܘܼܪܬܐ ܕܩܸܫܬܐ: ܩܲܕܡܵܝܬܐ ܝܠܵܗ̇ ܒܐܸܣܟܹܝܡܵܗ̇ ܒܥܵܠܡܵܐ ܕܐ݇ܣܘܼܪ̈ܵܝܹܐ: ܚܲܕܟܡܵܐ ܚܵܙܹܐ ܠܹܗ ܗܵܢ ܒܸܢܝܵܢܵܐ ܐܲܝܟ݂ ܚܲܕ ܟܒ݂ܝܼܢܵܐ ܕܡܲܡܬ݂ܸܠ ܐܲܘ ܡܛܲܦܸܣ (يمثل)ܠܐܲܚܘܼܬܐ ܡܫܝܼܚܵܝܬܐ ݂ ܡܼܢ ܒܲܪܵܐ ܐܝܼܬ݂ ܬܸܫܥܵܐ ܩܸܫܬܵܬ݂ܐ ܕܟܹܐ ܡܵܬܚܝܼ ܥܲܠ ܝܘܼܪܟ݂ܵܐ ܕܲܩܪܵܫܵܐ ܡܟܲܣܝܵܐ ܒܩܲܪܡܝܼܕܵܐ: ܘܡܼܢ ܓܵܘܵܐ ܐܝܼܬ ܚܕܵܐ ܩܘܼܒ̇ܬܐ ܕܲܥܝܵܕܵܐܝܼܬ ܠܵܐ ܣܵܡܟ݂ܵܐ ܥܲܠ ܥܲܡܘܼܕܹ̈ܐ: ܐܸܠܵܐ ܣܵܡܟ݂ܵܐ ܥܲܠ ܫܩܵܩܘܿܢܵܐ ܕܐܝܼܬ ܒܦܸܠܓܵܐ (ܦܲܠܓܵܐ) ܕܒܸܢܝܵܢܵܐ: ܘܗܿܘ ܕܲܡܥܲܕܸܪ ܠܓܘܼܕܵܐ ܓܵܘܵܝܵܐ ݂ ܦܝܼܫܠܵܗ̇ ܡܘܼܦܠܸܚܬܐ ܫܡܸܢܬܐ ܡܙܲܝܢܲܬܐ (سمنت مسلح) ܓܲܘ ܥܲܡܠܵܐ ܕܒܸܢܝܵܢܵܐ: ܘܦܝܼܫܠܹܗ ܡܟܲܣܝܵܐ ܒܟܹܐܦܹ̈ܐ ܡܵܪ̈ܲܝ ܓܲܘܢܹ̈ܐ ܒܲܗܘܼܪܹ̈ܐ (ܒܲܗܪ̈ܵܢܹܐ) ݂ ܐܸܠܵܐ ܗܿܘ ܡܬ݂ܲܠܬ݂ܐ ܕܐܝܼܬ ܒܪܵܡܘܼܬ݂ܐ ܕܒܸܢܝܵܢܵܐ: ܡܣܘܼܩܠܵܐ ܝܠܹܗ ܒܚܲܕ ܓܘܼܫܡܵܐ ܡܬܝܼܚܵܐ (مستطيل) ܡܨܲܢܥܵܐ (ܡܬܲܪܨܵܐ) ܝܲܬܝܼܪܵܐܝܼܬ ܡܼܢ ܓܹܨܵܐ ܡܟܲܣܝܵܐ ܒܡܵܐ ܕܕܵܡܹܐ ܠܲܒܪܘܿܢܙܵܐ: ܘܟܹܐ ܡܲܡܬܸܠ ܡܲܚܙܝܵܐ ܕܡܲܥܡܘܿܕܝܼܬܐ ܕܒܸܗܢܵܡ ܘܣܵܪܵܐ ܥܲܠ ܐܝܼܕܲܝ̈ ܩܲܕܝܼܫܵܐ ܡܲܬܲܝ: ܗܿܘ ܕܦܝܼܫܠܹܗ ܡܘܼܚܪܒ݂ܵܐ ܒܝܲܕ ܡܲܫܠܡܵܢܹ̈ܐ ܕܵܥܹܫܵܝܹ̈ܐ ܒܲܝܢܵܬ݂ ܫܸܢܹ̈ܐ ܕ 2014 ܘ 2016 ݂

ܡܵܨܹܝܚ ܕܐܵܡܪܲܚ ܕܥܹܕܬܐ ܡܫܘܼܦܪܲܢܬܐ ܝܠܵܗ̇ ܒܒܲܗܪܵܐ: ܒܡܸܨܥܵܝܘܼܬ݂ܐ ܕܪܵܒܵܐ ܫܲܒ݂ܟܹ̈ܐ (شبابيك) ܕܐܝܼܬ ܒܓܘܼܕܵܢܹ̈ܐ ܓܹܒܵܝܹ̈ܐ ݂ ܗܲܝܟܠܵܐ ܓܵܘܵܝܵܐ ܕܒܸܢܝܵܢܵܐ: ܕܵܡܹܐ ܠܚܲܕ ܐܵܘܵܢܵܐ ܟܲܒܝܼܪܵܐ ܝܪܝܼܡܐ ܒܲܚܕܵܐ ܫܲܘܝܘܼܬ݂ܐ ܦܫܝܼܛܬܐ ܘܩܲܠܝܼܠܬܐ ܐܝܼܡܲܢ ܕܡܵܛܹܝܚ ܠܠܸܒܹܗ ܕܲܦܬܝܼܚܵܐ ܝܠܹܗ ܟܠܵܢܵܐܝܼܬ: ܕܠܵܐ ܐܝܼܬܘܼܬܐ ܕܚܲܕ ܬܲܪܥܵܐ ܐܲܘ ܣܸܬܪܹ̈ܐ ݂ ܘܐܵܘܵܢܵܐ ܓܠܘܿܠܵܐ ܝܠܹܗ ܒܐܸܣܟܹܝܡܹܗ: ܘܐܝܼܬ ܒܪܹܫܹܗ ܚܲܕ ܩܲܒܵܐ (ܩܘܼܒ̇ܬܐ: قبة) ܡܬܲܪܨܵܐ ܡܼܢ (12) ܒܵܬܲܝ̈ ܚܘܼܣܵܝܵܐ: ܘܲܒܦܲܠܓܘܼܬܐ ܐܝܼܬ݂ ܡܲܕܒܚܵܐ ܘܒܵܬܪܹܗ ܐܝܼܬ݂ ܚܲܕ ܡܲܥܒ̇ܪܵܐ ݂ ܘܚܲܕ ܪܹܫܵܐ ܠܓܹܒ ܡܲܥܠܵܢܵܐ: ܒܸܕ ܚܵܙܹܝܚ ܓܘܿܪܢܵܐ ܕܡܲܥܡܘܿܕܝܼܬܐ ܕܦܝܼܫܠܹܗ ܡܘܼܚܪܒ݂ܵܐ ܓܡܝܼܪܵܐܝܼܬ ܒܝܲܕ ܡܟܲܬܡܹ̈ܐ ܐܸܣܠܵܡܵܝܹ̈ܐ ܕܵܥܹܫܵܝܹ̈ܐ: ܐܵܢܝܼ ܕܡܘܼܩܸܕܠܗ݇ܘܿܢ ܘܲܓܢܸܒ݂ܠܗ݇ܘܿܢ ܠܥܹܕܬܐ ݂ ܘܐܵܦ ܦܝܼܫܠܗ݇ܘܿܢ ܫܡܝܼܛܹ̈ܐ ܫܝܼܫܹ̈ܐ (ܡܲܪܡܲܪ) ܕܐܝܼܬ ܗ݇ܘܵܐ ܒܐܘܼܪܚܵܐ ܕܲܨܠܝܼܒ݂ܵܐ: ܘܗܲܪ ܗܵܕܹܟ݂ ܟܠܵܝ̈ ܣܦܵܩܹ̈ܐ ܘܡܵܐܢܹ̈ܐ ܠܝܼܬܘܿܪ̈ܓ̰ܵܝܹܐ ݂

ܘܦܝܼܫܠܹܗ ܡܸܚܝܵܐ ܒܢܘܼܪܵܐ ܒܘܼܪܓܵܐ ܕܙܲܓܵܐ: ܕܡܘܼܬܒ݂ܵܐ ܝܗ݇ܘܵܐ ܥܲܠ ܟܸܢܦܵܐ (ܓܘܼܠܦܵܐ) ܬܲܝܡܵܢܵܝܵܐ ܒܲܪܵܝܵܐ ܕܒܸܢܝܵܢܵܐ ݂ ܘܡܼܢ ܛܵܒ݂ܘܼܬ݂ ܓܲܕܵܐ: ܘܡܼܢ ܝܘܿܡ ܚܘܼܪܵܪܵܐ ܕܲܡܕܝܼܢ݇ܬܐ: ܦܝܼܫܠܹܗ ܡܸܚܝܵܐ ܢܵܩܘܿܫܵܐ ܚܕܵܐ ܓܵܗܵܐ ܐ݇ܚܪܹܬܐ (ܚܲܕܬܵܐܝܼܬ): ܟܲܕ ܣܘܼܥܪ̈ܵܢܹܐ ܘܫܘܼܓ݂ܠܵܢܹ̈ܐ ܕܲܥܡܘܼܪܝܵܐ (ܡܚܲܕܲܬ݂ܬܐ) ܕܒܸܢܝܵܢܵܐ ܦܝܵܫܵܐ ܝܗ݇ܘܵܘ ܡܘܼܓܡܸܪܹ̈ܐ ܘܲܪܚܵܫܵܐ ܠܲܩܕܵܡܵܐ ݂

_______

[1] ܚܙܝܼ: ܡܠܘܿܐܵܐ ܚܕܵܪ ܥܹܕܬܐ ܕܝܵܠܕܲܬ݂ ܐܲܠܵܗܵܐ ݂

كنيسة القديس بهنام والقديسة سارة في قره قوش أثناء أعمال البناء قبل ستة أشهر من التكريس.
شباط 2008 © باسكال ماغيسيان / ميزوبوتاميا

ܛܸܒܹ̈ܐ ܚܕܵܪ ܡܵܪܝ ܒܸܗܢܵܡ ܘܣܵܪܵܐ ܡܼܢ ܒܲܟ݂ܕܹܝܕܹܐ:

ܦܝܼܫܠܹܗ ܡܚܲܕܬܐ (ܡܚܘܼܕܸܬ݂ܐ) ܒܸܢܝܵܢܵܐ ܕܡܵܪܝ ܒܸܗܢܵܡ ܘܣܵܪܵܐ ܘܲܦܬܝܼܚܵܐ ܒܝܲܘܡܵܐ ܕ 15 ܐܵܒ 2019 ܒܦܘܼܪܣܵܐ ܕܥܹܐܕܵܐ ܕܫܘܼܢܵܝܵܐ ܕܡܵܪܬܝ ܡܲܪܝܲܡ ݂ ܣܝܼܥܬܐ ܕܒܸܢܝܵܢܵܐ ܚܲܕܬܐ ܡܫܘܼܪܹܐ ܠܵܗ̇ ܒܣܘܼܥܪ̈ܵܢܹܐ ܓܵܘܵܝܹ̈ܐ ܐ݇ܚܵܪ̈ܵܝܹܐ  ܒܝܲܪܚܵܐ ܕܐܵܕܵܪ 2019: ܒܚܵܝܘܿܪܘܼܬ݂ܐ ܘܥܘܼܕܪܵܢܵܐ ܡܵܠܵܝܵܐ (ܙܘܼܙܵܝܵܐ) ܡܼܢ ܡܛܲܟܲܣܬܐ ܕ(ܟܵܦܢܝܼ): ܘܒܲܡܕܲܒܪܵܢܘܼܬ݂ܐ ܕ(ܥܲܒܕܠܥܲܙܝܼܙ ܘܓ̰ܲܪܓ̰ܝܼܣ ܡܘܼܣܵܐ) ݂

كنيسة مار بهنام ومارت سارة بخديدة (قراقوش) في ترميم.
ماي 2019 © باسكال ماغيسيان / ميزوبوتاميا.

les monuments
à proximité

1 / 7

Contribuez à la sauvegarde de la mémoire des monuments.

Photos de famille, vidéos, témoignages, partagez vos documents pour enrichir le site.

Je participe
BESbswy