ܣܘܼܟܵܠܵܐ ܕܲܚܫܲܚܬܐ (ܩܲܪܲܩܘܿܫ) ܒܠܸܫܵܢܵܐ ܬܘܼܪܟܵܝܵܐ: ܝܼܠܹܗ ܛܲܝܪܵܐ ܐܘܼܟܵܡܵܐ (ܟܘܿܡܵܐ): ܥܕܲܟܹܝܠ (لا يزال) ܗܵܢ ܪܸܬܡܵܐ ܡܘܼܦܠܚܵܐ ܝܠܹܗ ܒܲܪܘܝܼܚܘܼܬ݂ܐ: ܐܸܠܵܐ ܘܵܠܹܐ ܕܠܵܐ ܡܲܢܫܹܝܚ ܕܫܸܡܵܗ̇ ܡܵܪܹܐ ܫܸܪܫܵܐ ܐ݇ܣܘܼܪܵܝܵܐ ܝܠܹܗ (ܒܲܟ݂ܕܹܝܕܹܐ: ܒܲܓ݂ܕܹܝܕܹܐ): (ܕܐܸܬܝܵܐ ܝܠܹܗ ܐܲܝܟ݂ ܕܲܒܣܘܿܓ݂ܐܵܐ ܡܼܢ ܒܹܝܬ݂ ܟ݂ܘܿܕܵܝܵܐܕ (ܒܹܝܬ ܐܲܠܵܗܵܐ): ܗ : ܕ: ܕܘܼܟܵܐ ܐܲܘ ܒܲܝܬܐ ܕܩܲܡ ܝܵܗܹܒ݂ ܠܹܗ ܐܲܠܵܗܵܐ)[1]: ܐܲܝܟܵܐ ܕܚܵܙܹܝܚ ܡܲܦܠܲܚܬܐ ܕܗܵܢ ܫܸܡܵܐ ܒܲܙܢܵܐ ܐܘܼܣܝܼܵܝܵܐ ݂

_______

[1] ܓ̣ܵܐܢ ܡܵܐܪܝ ܡܹܝܪܝܼܓ݂ܘܿ: (ܡܲܕܢܚܵܐ ܡܫܝܼܚܵܝܵܐ ܓܲܘ ܐܸܡܒܪܵܛܘܿܪܘܿܬܐ ܐܸܣܠܵܡܵܝܬܐ): ܟܘܼܢܵܫܵܐ ܕܣܬܘܿܕܝܵܐ ܐܵܪܵܒܝܼܟܵܐ: ܛܲܒ݂ܥܵܐ ܕܦܵܪܝܼܣ: 2005 ݂

ܠܦܘܼܬ݂ ܝܘܼܒܵܠܹ̈ܐ: ܒܸܕܥܵܪܵܐ ܝܠܵܗ̇ ܡܫܝܼܚܵܝܘܼܬ݂ܐ ܓܲܘ ܫܸܛܚܵܐ ܕܢܝܼܢܘܹܐ: ܘܓܲܘ ܡܕܝܼܢ݇ܬܐ ܕܒܲܟ݂ܕܹܝܕܹܐ ܠܚܘܼܬܵܡ ܕܵܪܵܐ ܪܒ݂ܝܼܥܵܝܵܐ ܐܲܘ ܫܘܼܪܵܝ ܕܵܪܵܐ ܚܡܝܼܫܵܝܵܐ ݂ ܘܫܲܪܝܼܪܵܐܝܼܬ ܘܲܠܦܘܼܬ݂ ܡܲܒܘܼܥܹ̈ܐ ܡܬܲܟܠܹ̈ܐ: ܡܫܘܼܪܹܐ ܠܵܗ̇ ܣܒ݂ܲܪܬܐ ܘܡܲܫܚܲܕܬܐ ܒܲܡܫܝܼܚܵܐ ܒܕܵܪܵܐ ܫܒ݂ܝܼܥܵܝܵܐ (ܡܵܬܵܐ ܢܸܣܛܘܿܪܢܵܝܬܐ ܝܗ݇ܘܵܐ ܒܫܸܪܫܵܐ)[1]: ܘܩܘܼܪܒܵܐ ܠܫܲܢ݇ܬܐ ܕ 615 ܦܝܼܫܠܵܗ̇ ܡܘܿܢܘܿܦܝܼܙܵܝܬܐ[2] ݂ ܒܕܵܪܵܐ ܕ (11) ܘ (12): ܪܵܒܵܐ ܡܫܝܼܚܵܝܹ̈ܐ ܬܲܓܪ̈ܝܼܬܵܝܹܐ ܬܪܸܟܠܗ݇ܘܿܢ ܘܲܫܒ݂ܸܩܠܗ݇ܘܿܢ ܠܲܡܕܝܼܢ݇ܬܲܝܗܝ ܡܼܢ ܒܵܬܲܪ ܣܝܵܡܬܐ ܕܚܲܝܠܵܐ ܥܲܠܠܲܝܗܝ ܕܥܵܒ݂ܪܝܼ ܓܲܘ ܡܲܫܠܡܵܢܘܼܬ݂ܐ: ܘܲܫܟܸܢܘܼܢ ܓܲܘ ܒܲܟ݂ܕܹܝܕܹܐ ݂ ܘܲܒܫܲܢ݇ܬܐ ܕ 1743: ܥܒ݂ܸܕܠܗ݇ܘܿܢ ܚܲܝ̈ܠܵܘܵܬ݂ܐ ܕ(ܢܵܐܕܹܪ ܫܵܐܗ) ܚܨܵܪܵܐ ܠܲܦܢܝܼܬܐ ܕܒܲܟ݂ܕܹܝܕܹܐ: ܘܩܲܡ ܓܵܢܒ݂ܝܼܠܵܗ̇ ܘܡܘܼܚܪܸܒ݂ܠܗ݇ܘܿܢ ܠܥܹ̈ܕܵܬܵܗ̇ ݂ ܦܝܼܫܠܗ݇ܘܿܢ ܡܐܲܠܨܹ̈ܐ ܐ݇ܢܵܫܹ̈ܐ ܕܡܵܬ݂ܐ ܕܐܵܙܠ݇ܝܼ ܘܥܵܪܩܝܼ ܠܡܲܘܨܸܠ: ܐܲܝܟܵܐ ܕܲܡܫܘܼܬܸܦܠܗ݇ܘܿܢ ܒܣܘܼܬܵܪܵܐ (دفاع) ܥܲܠ ܡܕܝܼܢ݇ܬܐ[3] ݂ ܦܝܼܫܠܵܗ̇ ܒܲܟ݂ܕܹܝܕܹܐ ܩܵܬ݂ܘܿܠܝܼܩܵܝܬܐ ܒܚܘܼܬܵܡܵܐ ܕܕܵܪܵܐ ܕ(18): ܟܲܕ ܡܼܢ ܩܕܝܼܡ ܩܸܢܛܪܘܿܢ ܝܗ݇ܘܵܐ ܕܟܘܼܪܣܝܵܐ ܐܲܦܸܣܩܘܿܦܵܝܵܐ ܕܐ݇ܣܘܼܪ̈ܝܵܝܹܐ ܐܲܪ̈ܬ݂ܘܿܕܘܿܟܣܵܝܹܐ ݂

ܥܕܲܟܹܝܠ (لا تزال) ܥܕܲܡܵܐ ܠܝܲܘܡܵܢܵܐ: ܚܵܒ݂ܫܵܐ ܡܕܝܼܢ݇ܬܐ ܕܒܲܟ݂ܕܹܝܕܹܐ ܥܹ̈ܕܵܬ݂ܐ ܐ݇ܣܘܼܪ̈ܝܵܝܵܬ݂ܐ ܩܵܬ݂ܘܿܠܝܼ̈ܩܵܝܵܬܐ ܘܐܲܪ̈ܬ݂ܘܿܕܘܿܟܣܵܝܵܬܐ ܥܲܬܝܼ̈ܩܵܬ݂ܐ ݂ ܩܝܼܡܠܹܗ (ܕܵܥܹܫ) ܒܲܓܢܵܒ݂ܬܐ ܘܡܲܚܪܲܒ݂ܬܐ ܕܐܲܢܲܝ ܥܹ̈ܕܵܬ݂ܐ: ܠܵܐ ܒܲܠ ܩܝܼܡܠܹܗ ܒܡܲܩܲܕܬܲܝܗܝ ܒܥܸܕܵܢ ܟܒ݂ܵܫܬܹܗ ܠܲܡܕܝܼܢ݇ܬܐ ܒܡܸܬܚܵܐ ܕܥܸܣܪܝܼܢ ܘܐܲܪܒܥܵܐ ܝܲܪ̈ܚܹܐ: ܡܼܢ ܝܲܪܚܵܐ ܕܐܵܒ 2014 ܠܥܲܕ ܬܸܫܪܝܼܢ ܩܲܕܡܵܝܵܐ 2016 ݂ ܘܐܵܦܸܢ ܐܝܼܬ ܗ݇ܘܵܐ ܚܪܵܒ݂ܵܐ ܘܲܚܒ݂ܵܠܵܐ: ܐܸܠܵܐ ܥܕܲܟܹܝܠ ܥܕܲܡܵܐ ܠܝܲܘܡܵܢܵܐ: ܐܲܢܲܝ ܥܹܕܵܬ݂̈ܐ ܟܠܵܝܵܐ ܝܠܲܝܗܝ ܓܲܘ ܦܵܬ݂ܐ ܕܨܵܦܘܿܚܹ̈ܐ: ܘܐܲܡܝܼܢܵܐܝܼܬ ܡܲܩܪܘܿܒ݂ܹܐ ܝܠܲܝܗܝ ܣܵܗܕܘܼܬܲܝܗܝ ܡܫܝܼܚܵܝܬܐ ܥܲܠ ܕܲܥܒܲܪܲܝܗܝ ܒܲܥܝܼܕܵܐ ܥܒ݂ܝܼܪܵܐ ݂

ܕܪܝܼܓ݂ܵܐܝܼܬ ܘܡܼܢ ܝܘܿܡ ܚܘܼܪܵܪܵܗ̇: ܕܥܸܪܵܗ̇ ܠܒܲܟ݂ܕܹܝܕܹܐ ܪܘܼܚܵܗ̇ ܫܸܪܫܵܝܬܐ: ܘܥܲܡ ܕܥܵܪܬܐ ܕܥܵܡܘܿܪ̈ܵܗ̇ ܡܼܢ ܝܲܪܚܵܐ ܕܢܝܼܣܵܢ 2017: ܦܝܼܫܠܵܗ̇ ܡܕܝܼܢ݇ܬܐ ܕܒܲܟ݂ܕܹܝܕܹܐ ܚܲܕ ܩܸܢܛܪܘܿܢ ܘܣܲܪܢܵܐ ܪܹܫܵܝܵܐ ܠܚܘܼܕܵܬܐ ܐ݇ܣܘܼܪܵܝܵܐ ܘܲܡܫܝܼܚܵܝܵܐ ܓܲܘ ܫܸܛܚܵܐ ܕܢܝܼܢܘܹܐ: ܘܓܲܘ ܐܘܼܚܕܵܢܵܐ ܕܒܹܝܬ ܢܲܗܪ̈ܝܼܢ ݂

_______

[1] ܥܹܕܬܐ ܕܡܲܕܢܚܵܐ: NDA

[2] ܐ݇ܣܘܼܪ̈ܵܝܹܐ ܐܲܪ̈ܬ݂ܘܿܕܘܿܟܣܵܝܹܐ:  NDA

[3] ܚܙܝܼ̣ ܓ̰ܵܐܢ ܡܵܐܪܝܼ ܡܹܝܪܝܼܓ݂ܘܿ: (ܡܲܕܢܚܵܐ ܡܫܝܼܚܵܝܵܐ ܓܲܘ ܐܸܡܒܪܵܛܘܿܪܘܼܬ݂ܐ ܐܸܣܠܵܡܵܝܬܐ): ܟܘܼܢܵܫܵܐ ܕܲܣܬܘܿܕܝܘܵܐ ܐܵܪܵܒܝܼܟܵܐ: ܛܲܒ݂ܥܵܐ ܕܦܵܪܝܼܣ 2005 ݂

ܠܲܝܬ̇ ܚܘܼܫܒܵܢܹ̈ܐ ܪ̈ܘܼܫܡܵܝܹܐ ܡܬܲܟܠܹ̈ܐ ܥܲܠ ܥܵܡܘܿܪܹ̈ܐ ܕܗܵܕܹܐ ܡܕܝܼܢ݇ܬܐ (ܘܓܲܘ ܗܵܢ ܐܲܬ݂ܪܵܐ): ܒܥܸܠܬܐ ܕܲܦܠܵܫܹ̈ܐ ܘܲܩܪ̈ܵܒܹܐ ܡܸܬ݂ܝܲܒܠܵܢܹ̈ܐ: ܘܬܲܘܬܵܒ݂ܘܼܬ݂ܐ ܐܲܡܝܼܢܬܐ ܕܐ݇ܢܵܫܹ̈ܐ: ܘܥܲܡ ܗܵܕܹܐ: ܡܸܬܡܲܨܝܵܢܝܼܬܐ ܝܠܵܗ̇ ܕܚܵܫܒܲܚ ܕܠܵܐ ܒܵܨܘܿܪܵܐ ܡܼܢ (40000 ـ 50000) ܢܸܫܡܹ̈ܐ ܚܵܝܝܼ ܗ݇ܘܵܘ ܓܲܘ ܒܲܟ݂ܕܹܝܕܹܐ ܡܼܢ ܩܕܵܡ ܨܦܵܚܬܐ ܕ(ܕܵܥܹܫ) ݂ ܚܲܕܟܡܵܐ ܚܘܼܫܒܵܢܹ̈ܐ ܘܪܸ̈ܥܝܵܢܹܐ: ܟܒܲܪ ܠܵܐ ܪܵܒܵܐ ܩܲܛܝܼܢܹ̈ܐ: ܐܵܡܪܝܼ ܕܥܵܡܘܿܪܹ̈ܐ ܕܒܲܟ݂ܕܹܝܕܹܐ ܡܛܹܐ ܠܗ݇ܘܿܢ ܠ (70000) ܢܸܫܡܹ̈ܐ ݂  ܘܐܵܢܲܢܩܵܝܬܐ ܝܠܵܗ̇ ܕܡܲܘܣܸܦܲܚ (ܡܲܙܝܸܕܲܚ) ܐܲܠܦܵܝܹ̈ܐ ܕܦܲܪ̈ܨܘܿܦܹܐ ܥܪ̈ܝܼܩܹܐ ܘܡܘܼܪ̈ܚܸܩܹܐ (ܒܹܝܬ 5000 ـ 13000 ܦܲܪ̈ܨܘܿܦܹܐ): ܡܼܢ ܒܲܓ݂ܕܵܕ ܘܡܲܘܨܸܠ: ܕܐ݇ܬܹܐ ܠܲܝܗܝ ܠܒܲܟ݂ܕܹܝܕܹܐ ܡܼܢ ܫܲܢ݇ܬܐ ܕ 2003: ܟܲܕ ܥܪ̈ܝܼܩܹܐ ܡܼܢ ܓܘܼܢܚܹ̈ܐ ܕܣܝܼ̈ܥܵܬ݂ܐ ܐܸܣܠܵܡܵܝܹ̈ܐ ܘܡܝܼ̈ܠܝܼܫܝܵܬ݂ܐ: ܕܦܝܼܫܠܗ݇ܘܿܢ ܡܫܘܼܬܐܸܣܹ̈ܐ ܡܼܢ ܒܵܬܲܪ ܢܦܵܠܬܐ ܕܛܲܟ݂ܣܵܐ ܕܫܘܼܠܛܵܢܵܐ ܓܲܘ ܥܝܼܪܵܐܩ: ܐܲܝܟܵܐ ܕܪܵܒܵܐ ܟܸܟ̰ܚܵܐ ܦܝܼܫܠܹܗ ܦܪܝܼܥܵܐ ܠܲܒܢܵܝܵܐ ܡܲܫܪ̈ܝܵܬ݂ܐ ܘܒܵܬܲܝ̈ ܓܲܘܣܵܐ ܐܲܡܝܼܢܹ̈ܐ ܩܵܐ ܡܘܼܥܪܸ̈ܩܹܐ ݂

ܘܡܵܐ ܕܝܼܗ݇ܘܵܐ ܩܵܐܹܡ ܕܥܵܡܘܿܪܹ̈ܐ: ܬܸܫܥܝܼܢ ܓܲܘ ܡܵܐܐ (90 %) ܡܼܢ ܥܵܡܘܿܪܹ̈ܐ ܕܒܲܟ݂ܕܹܝܕܹܐ: ܝܼܗ݇ܘܵܘ ܐ݇ܣܘܼܪ̈ܵܝܹܐ ܩܵܬ݂ܘܿܠܝܼܩܵܝܹ̈ܐ: ܘܦܵܝܫܵܢܹ̈ܐ ܝܼܗ݇ܘܵܘ ܟܲܠܕܵܝܹ̈ܐ ܘܐ݇ܣܘܼܪ̈ܵܝܹܐ ܐܲܪ̈ܬ݂ܘܿܕܘܿܟܣܵܝܹܐ: ܘܚܲܕ ܟܘܼܢܵܫܵܐ ܪܵܒܵܐ ܙܥܘܿܪܵܐ ܡܼܢ ܐܵܪܸ̈ܡܢܵܝܹܐ ܐܲܪ̈ܬ݂ܘܿܕܘܿܟܣܵܝܹܐ ݂ ܐܸܠܵܐ ܗܿܝ ܡܕܝܼܢ݇ܬܐ ܕܦܝܼܫܬܐ ܝܗ݇ܘܵܐ ܚܫܝܼܒ݂ܬܐ ܕܝܼܠܵܗ̇ ܡܫܝܼܚܵܝܬܐ ܟܠܵܢܵܐܝܼܬ ܡܼܢ ܩܕܵܡ ܫܲܢ݇ܬܐ ܕ 1980: ܚܙܹܐ ܠܵܗ̇ ܡܛܵܝܬܐ ܕܥܸܣܪ̈ܵܝܹܐ ܕܝܼܩܪ̈ܵܬ݂ܐ ܡܲܫܠܡܵܢܹ̈ܐ: ܐܲܝܟ݂ ܚܲܕ ܩܵܐܹܡ ܡܼܢ ܦܘܿܠܝܼܛܝܼܩܝܼ ܕܬܲܥܪܲܒܬܐ (تعريب) ܕܫܸܛܚܵܐ ܕܢܝܼܢܘܹܐ ܕܲܥܒ݂ܝܼܕܵܐ ܠܹܗ ܨܲܕܵܐܡ ܚܘܼܣܲܝܢ ݂

ܬܲܫܥܝܼܬܐ ܕܫܘܼܬܐܵܣܵܐ ܕܥܹܕܬܐ ܠܵܐ ܝܠܵܗ̇ ܦܝܼܫܬܐ ܝܼܕܝܼܥܬܐ: ܐܝܼܢܵܐ ܥܲܡ ܗܵܕܹܐ: ܟܹܐ ܦܵܝܫܵܐ ܚܫܝܼܒ݂ܬܐ ܗܿܝ ܥܹܕܬܐ ܩܲܕܡܵܝܬܐ ܕܦܝܼܫܠܵܗ̇ ܒܢܝܼܬܐ ܓܲܘ ܒܲܟ݂ܕܹܝܕܹܐ ܠܦܘܼܬ݂ ܗܘܼܡܵܣܵܐ ܘܫܘܿܥܝܼܬܐ ܕܡܝܼܪܬܐ ܕܓ̰ܵܐܢ ܕܝܼܠܵܐܢ[1]: ܘܒܸܕ ܦܵܝܫܵܐ ܠܦܘܼܬ݂ ܪܸܥܝܵܢܵܐ ܕܓ̰ܵܐܢ ܡܘܿܪܝܼܣ ܦܝܼܝܹܗ: ܚܕܵܐ ܡܼܢ ܥܹܕܵܬ݂̈ܐ ܕܐ݇ܣܘܼܪ̈ܵܝܹܐ ܐܲܪ̈ܬ݂ܘܿܕܘܿܟܣܵܝܹܐ ܛܵܒ݂ ܥܲܬܝܼܩܹ̈ܐ ܕܓܲܘ ܡܕܝܼܢ݇ܬܐ ݂ ܘܬܲܫܥܝܼܬܵܢܵܐܝܼܬ: ܘܡܼܢ ܒܵܬܲܪ ܕܚܲܕ ܐܸܫܛܵܪܵܐ ܡܬܲܚܪܵܐ ܕܐܝܼܬ ܓܲܘ ܚܕܵܐ ܣܪܝܼܛܬܐ ܬܲܘܕܝܼܬܵܢܵܝܬܐ ܒܫܲܢ݇ܬܐ ܕ 1582[2]: ܐܵܡܪܵܐ ܡܝܲܩܲܪܬܐ ܢܵܪܡܝܼܢ ܥܲܠܝܼ ܐܲܡܝܼܢ: ܠܦܘܼܬ݂ ܚܲܕ ܢܸܩܫܵܐ ܕܡܵܬܹܚ ܥܲܠ ܓܘܼܕܵܐ ܕܬܲܪܥܵܐ: ܡܚܘܼܕܸܬ ܠܹܗ ܐܲܦܸܣܩܘܿܦܵܐ ܥܘܿܝܣ[3] ܒܸܢܝܵܢܵܐ ܕܥܹܕܬܐ ܒܫܲܢ݇ܬܐ ܕ 1744: ܘܦܝܼܫܠܵܗ̇ ܡܪܘܼܡܲܡܬܐ ܡܢܵܬܵܐܝܼܬ ܒܫܲܢ݇ܬܐ ܕ 1843 [4] ݂

_______

[1] ܐܲܫܘܿܪ ܡܫܝܼܚܵܝܬܐ: ܓ̰ܵܐܢ ܡܘܿܪܝܼܣ ܦܝܼܝܹܗ: ܒܲܝܪܘܼܬ 1965: ܦ 458 ݂

[2] ܝܵܬ݂ ܡܲܒܘܼܥܵܐ: ܦ 459 ݂

[3] ܕܵܟܹܪ ܓ̰ܵܐܢ ܦܝܼܝܹܗ ܕܐܲܦܸܣܩܘܿܦܵܐ ܥܘܿܝܣ ܩܵܐܪܨ ܝܼܗ݇ܘܵܐ ܪܵܥܝܵܐ ܕܕܲܝܪܵܐ ܕܡܵܪܝ ܒܸܗܢܵܡ: ܘܦܝܼܫܠܹܗ ܡܛܘܼܡܪܵܐ ܐܲܟ݂ܐ: ܘܐܵܦ ܝܼܗ݇ܘܵܐ ܪܹܫܵܐ ܕܲܡܕܝܢ݇ܬܐ ܕܒܲܟ݂ܕܹܝܕܹܐ ݂

[4] ܥܹܕܵܬ݂ܐ ܘܕܲܝܪܹ̈ܐ ܕܓܲܘ ܟܘܼܪܕܸܣܬܵܐܢ ܕܥܝܼܪܵܐܩ ܩܕܵܡ ܘܒܵܬܲܪ ܐܸܣܠܵܐܡ: ܡܲܒܘܼܥܵܐ ܥܒ݂ܝܼܪܵܐ: ܦ 187 ݂

ܐܘܼܪܚܵܐ ܕܲܡܛܵܝܵܐ ܠܥܹܕܬܐ: ܝܼܠܵܗ̇ ܡܼܢ ܥܵܠܘܿܠܵܐ ܕܡܼܢ ܓܹܒܵܐ ܕܓܲܪܒܝܵܐ: ܒܡܸܨܥܵܝܘܼܬܐ ܕܚܲܕ ܬܲܪܥܵܐ ܚܲܕܬܐ ܡܵܪܹܐ ܫܡܵܛܬܐ ܙܥܘܿܪܬܐ ݂ ܒܲܥܒ݂ܵܪܬܐ ܠܒܸܢܝܵܢܵܐ ܬܲܘܕܝܼܬܵܢܵܝܵܐ: ܒܸܕ ܚܵܙܹܝܚ ܕܥܹܕܬܐ ܕܩܲܕܝܼܫܹ̈ܐ ܣܲܪܓܝܼܣ ܘܒܵܟܘܿܣ ܙܥܘܿܪܬܐ ܝܠܵܗ̇ ݂ ܘܥܹܕܬܐ ܡܣܘܼܩܲܠܬܐ ܝܠܵܗ̇ ܒܲܚܕܵܐ ܕܵܪܬܐ ܪܵܒܵܐ ܟܲܒܝܼܪܬܐ ܠܨܲܘܒܵܐ ܕܡܲܕܢܚܵܐ: ܐܸܢ ܠܵܐ ܝܠܵܗ̇ ܒܸܫ ܪܲܒܬܐ ܡܼܢ ܥܹܕܬܐ[1] ݂ ܡܼܢ ܒܲܪܵܐ: ܦܝܼܫܠܵܗ̇ ܡܪܘܼܡܲܡܬܐ ܗܵܕܹܐ ܥܹܕܬܐ ܥܲܬܝܼܩܬܐ ܒܡܲܦܠܲܚܬܐ ܕܡܵܐܢܹ̈ܐ ܚܲܕܬܹ̈ܐ ܘܫܸܡܢܬܐ ܘܫܲܪܟܵܐ ܕܡܸܢܕܝܼܵܢܹ̈ܐ ܟܹܐܦܵܝܹ̈ܐ ܚܘܵܪܹ̈ܐ: ܒܚܘܼܫܵܚܹ̈ܐ ܕܲܫܒ݂ܝܼܠܹ̈ܐ ܚܲܕܬܹ̈ܐ ܕܲܪܡܵܡܵܐ (ترميم) ܕܕܵܥܪܝܼ ܠܚܘܼܬܵܡܵܐ ܕܕܵܪܵܐ ܕܥܸܣܪܝܼܢ ݂

ܓܵܘܵܐ ܕܥܹܕܬܐ ܘܥܲܠ ܡܝܼܛܘܿܦܵܐ (واجهة) ܬܲܝܡܢܵܝܵܐ ܕܒܸܢܝܵܢܵܐ: ܘܒܲܥܒ݂ܵܪܬܐ ܐܲܘ ܦܣܵܥܬܐ ܕܬܲܪ̈ܥܵܢܹܐ ܦܪ̈ܝܼܫܹܐ ܠܓܲܒ݂ܪܹ̈ܐ ܘܢܸܫܹ̈ܐ: ܒܸܕ ܚܵܙܹܝܚ ܕܥܹܕܬܐ ܝܼܠܵܗ̇ ܒܨܘܼܪܬܐ ܕܫܲܬ݂ܐܸܣܬܐ (قاعدة) ܚܒ݂ܝܼܫܬܐ ܬܠܵܬܵܐ ܗܲܝܟܠܹ̈ܐ ܘܐܲܪܒܥܵܐ ܐܵܐܲܪܹ̈ܐ ܐܲܪ̈ܕܸܟ݂ܠܵܝܹܐ: ܘܥܲܠ ܝܲܡܝܼܢܵܐ ܕܫܲܬ݂ܐܸܣܬܐ ܐܝܼܬ ܚܲܕ ܗܲܝܟܠܵܐ ܕܥܵܠܹܐ ܠܹܗ ܚܕܵܐ ܩܘܼܒܬܐ ݂

ܝܼܠܹܗ ܚܲܕ ܒܸܢܝܵܢܵܐ ܬܲܦܢܟ݂ܵܝܵܐ ܠܥܹܕܵܬ݂̈ܐ ܐ݇ܣܘܼܪ̈ܝܵܝܵܬ݂ܐ ܐܲܪ̈ܬ݂ܘܿܕܘܿܟܣܵܝܵܬܐ ܡܲܥܪ̈ܒ݂ܵܝܵܬ݂ܐ ܘܐܵܬܘܿܪ̈ܵܝܵܬܐ ܩܵܬ݂ܘܿܠܝܼ̈ܩܵܝܵܬܐ: ܦܪܝܼܫܵܐܝܼܬ ܩܕܘܿܫ ܩܘܼܕܫܹ̈ܐ ܡܨܲܘܒܵܐ ܠܡܲܕܢܚܵܐ ݂ ܒܦܲܠܓܵܐ ܐܝܼܬ ܡܲܕܒܚܵܐ ܪܹܫܵܝܵܐ ܡܸܬܕܲܪܓ݂ܵܢܵܐ: ܘܥܲܠ ܓܹܒܵܢܹ̈ܗ ܩܲܒ݂ܪܵܐ (ܒܹܝܬ ܣܵܗܕܵܐ) ܓܲܘ ܓܲܪܒܝܵܐ: ܘܓܘܼܪܢܵܐ ܕܡܲܥܡܘܿܕܝܼܬܐ (ܒܹܝܬ ܡܲܥܡܘܿܕܝܼܬܐ) ܓܲܘ ܬܲܝܡܢܵܐ ݂

ܦܵܐܹܫ ܦܪܝܼܫܵܐ ܗܲܝܟܠܵܐ ܘܲܬܪܹܝܢ ܫܩܵܩܘܿܢܹ̈ܐ ܡܼܢ ܡܲܕܒܚܵܐ ܡܩܲܕܫܵܐ ܒܲܬܠܵܬܐ ܬܲܪ̈ܥܵܢܹܐ ܓܠܝܼܦܹ̈ܐ ݂ ܘܐܸܣܩܘܿܦܬܐ ܕܬܲܪܥܵܐ ܡܩܲܕܫܵܐ ܕܓܲܘ ܦܲܠܓܵܐ: ܡܣܲܩܸܠܠܵܗ̇ ܚܲܕ ܨܠܝܼܒ݂ܵܐ ܬܠܝܼܬܲܝ̈ ܙܲܘܝܵܬ݂ܐ ܥܵܠܹܐ ܠܹܗ ܩܸܫܬܐ ܒܲܬܠܵܬܵܐ ܒܘܼܥܕܹ̈ܐ[2] ݂ ܘܐܵܦ ܒܸܕ ܚܵܙܹܝܚ ܣܘܼܟܵܡܹ̈ܐ (تصاميم) ܡܸܢ ܣܝܼܪܵܡܝܼܟ ܘܦܲܚܵܪܵܐ ܣܝܼܩܘܿܡܲܝܗܝ ܩܵܪܹܐ ܕܵܪܵܐ ܚܲܡܫܲܥܣܝܼܪܵܝܵܐ ܐܲܘ ܫܬܲܥܣܝܼܪܵܝܵܐ: ܐܲܝܟܵܐ ܕܦܝܼܫܠܗ݇ܘܿܢ ܫܟܝܼܚܹ̈ܐ ܡܼܢ ܩܕܵܡ ܡܲܚܪܲܒ݂ܬܐ ܕ (ܕܵܥܹܫ) ܠܓܘܼܕܵܢܹ̈ܐ ܕܥܹܕܬܐ: ܘܐܲܢܲܝ ܣܘܼܟܵܡܹ̈ܐ ܝܼܠܲܝܗܝ ܡܼܢ (ܛܘܼܦ̮ܣܹ̈ܐ ܒܵܨܘܿܪܹ̈ܐ ܕܐܝܼܬ ܒܲܠܚܘܿܕ ܓܲܘ ܬܲܪܬܹܝܢ ܥܹܕܵܬ݂̈ܐ ܓܲܘ ܒܲܟ݂ܕܹܝܕܹܐ)[3] ݂

_______

[1] ܢܘܼܗܵܪܵܐ ܕܦܘܿܠܝܼܢ ܒܘܿܫܵܝܲܪ (ܡܝܼܙܘܿܦܘܿܬܵܡܝܵܐ) ܒܚܘܼܬܵܡ ܟܵܢܘܿܢ ܩܲܕܡܵܝܵܐ 2017 ݂

[2] ܥܹܕܵܬ݂ܐ ܘܕܲܝܪܹ̈ܐ ܕܓܲܘ ܟܘܼܪܕܸܣܬܵܐܢ ܕܥܝܼܪܵܐܩ: ܡܲܒܘܼܥܵܐ ܥܒ݂ܝܼܪܵܐ: ܦ 187 ݂

[3] ܝܵܬ݂ ܡܲܒܘܼܥܵܐܲ ܦ 188 ݂

ܡܲܒܝܘܿܢܹܐ ܥܹܕܬܐ ܕܩܲܕܝܼܫܹ̈ܐ ܣܲܪܓܝܼܣ ܘܒܵܟܘܿܣ ܕܦܝܼܫܠܗ̇ ܡܘܼܚܪܲܒ݂ܬܐ ܒܝܲܕ (ܕܵܥܹܫ): ܠܵܐ ܚܙܹܐ ܠܵܗ̇ ܚܲܕ ܙܲܘܥܵܐ ܡܼܢ ܝܘܿܡ ܚܘܼܪܵܪܵܗ̇[1]: ܘܲܦܪܝܼܫܵܐܝܼܬ ܒܵܨܘܿܪܵܐ ܡܼܢ (150) ܝܼܩܪ̈ܵܬ݂ܐ ܐ݇ܣܘܼܪ̈ܝܵܝܹܐ ܐܲܪ̈ܬ݂ܘܿܕܘܿܟܣܵܝܹܐ ܕܥܸܪܘܼܢ ܠܲܦܢܝܼܬܐ[2]: ܘܲܠܗܵܫܵܐ ܠܲܝܬ ܪܵܥܝܵܐ ܠܲܒܢܲܝ̈ ܗܵܕܹܐ ܡܲܪܥܝܼܬܐ ݂

ܡܼܢ ܩܕܵܡ ܥܒ݂ܵܪܬܐ ܠܥܹܕܬܐ: ܕܵܪܬܐ ܕܥܹܕܬܐ ܟܹܐ ܡܲܚܙܵܐ ܘܓܵܠܝܵܐ ܠܕܲܪܓ݂ܵܐ ܘܫܲܘܝܘܼܬܐ ܕܲܚܪܵܒ݂ܵܐ: ܓܲܘ ܦܲܠܓܵܐ ܕܕܵܪܬܐ: ܠܗܵܫܵܐ ܐܝܼܠܵܢܵܐ ܕܙܲܝܬܐ ܡܵܪ̈ܲܝ ܬܵܩܹ̈ܐ ܩܝܼܢܹ̈ܐ ܩܵܐܹܡ ܝܠܵܗ̇: ܐܝܼܢܵܐ ܐܲܪܥܵܐ ܘܡܵܐ ܕܐܝܼܬ ܓܵܘܵܗ̇ ܦܝܼܫܠܵܗ̇ ܡܘܼܚܪܲܒ݂ܬܐ ܒܟܵܢܘܿܢ ܬܪܲܝܵܢܵܐ 2018: ܐܲܝܟܵܐ ܕܚܵܙܹܝܚ ܚܪܵܒ݂ܵܐ ܒܟܠ ܓܹܒܵܐ: ܘܡܸܢܕܝܼܵܢܹ̈ܐ ܡܒܘܼܪ̈ܒܸܙܹܐ ܡܼܢ ܟܠܲܝܗܝ ܐܵܕܫܹ̈ܐ ݂ ܒܸܕ ܚܵܙܹܝܚ ܚܲܕ ܕܲܪܓ݂ܵܐ ܡܼܢ ܚܸܠܵܐ ܕܐܸܬܝܵܐ ܝܠܹܗ ܡܼܢ ܥܲܠܥܵܠܹ̈ܐ ܕܲܦܢܝܼܬܐ ݂

ܒܵܬܲܪ ܨܠܵܝܬܐ ܬܠܵܬܵܐ ܦܵܣܘܿܥܝܵܬ݂ܐ ܒܡܸܨܥܵܝܘܼܬܐ ܕܲܚܕܵܐ ܣܸܒܸ̇ܠܬܐ (ܣܸܡܲܠܬܐ) ܫܝܼܫܵܝܬܐ ܡܟܘܿܣܹܝܬܐ ܒܲܬܒ݂ܵܪ̈ܵܬ݂ܐ (حطام)ܩܝܼܕܹ̈ܐ: ܒܸܕ ܡܲܒܝܸܢܵܐ ܥܹܕܬܐ ܓܡܝܼܪܵܐܝܼܬ ܒܓܲܘܢܵܗ̇ ܟܘܿܡܵܐ: ܘܗܿܝ ܪܵܒܵܐ ܚܪܝܼܒ݂ܬܐ ܝܠܵܗ̇ ܒܥܸܠܬܐ ܕܪܵܒܵܐ ܝܘܼܩܕܵܢܹ̈ܐ: ܐܲܝܟܵܐ ܕܲܦܩܝܼܥܵܐ ܝܠܹܗ ܫܝܼܫܵܐ ܠܐܲܟ݂ܵܐ ܘܬܵܡܵܐ ܬܚܘܿܬ ܡܲܥܒ̇ܕܵܢܘܼܬܐ ܕܲܫܚܘܿܢܬܐ ݂ ܘܚܲܪܬܐ ܢܦܵܠܬܵܐ ܕܒܵܬܲܝ̈ ܓܲܙܵܐ ܦܲܪ̈ܙܠܵܝܹܐ ܕܡܲܟܬܒ݂ܵܐ ܕܥܹܕܬܐ ܥܲܠ ܐܲܪܥܵܐ: ܐܲܝܟܵܐ ܕܲܟܢܝܼܫܹ̈ܐ ܝܠܲܝܗܝ ܟܘܼܪ̈ܣܵܘܵܬ݂ܐ ܦܲܪ̈ܙܠܵܝܹܐ ܦܠܝܼܡܹ̈ܐ ܥܲܡ ܚܲܕܟܡܵܐ ܡܵܐܢܹ̈ܐ ܕܚܵܫܘܿܒܹ̈ܐ ܫܡܝܼܛܹ̈ܐ ܘܲܬܒ݂ܝܼܪܹ̈ܐ ݂

ܘܟܲܕ ܐܵܙܲܠܚ ܠܨܘܿܒ ܗܲܝܟܠܵܐ: ܡܵܨܹܝܚ ܕܚܵܙܹܝܚ ܚܲܕ ܒܲܗܪܵܐ ܩܲܠܝܼܠܵܐ ܐܵܬܝܵܢܵܐ ܡܼܢ ܟܵܘܵܬ݂̈ܐ ܕܩܘܼܒܬܐ: ܘܵܠܹܐ ܕܐܵܣܩܲܚ ܬܲܪܬܹܝܢ ܦܵܣܘܿܥܝܵܬ݂ܐ ܠܲܡܛܵܝܵܐ ܠܡܲܕܒܚܵܐ ܕܲܦܪܝܼܫܵܐ ܝܠܹܗ ܠܩܘܼܕܵܫܵܐ ܐܲܠܵܗܵܝܵܐ ݂ ܘܡܼܢ ܛܵܒ݂ ܓܲܕܵܐ: ܠܵܐ ܦܝܼܫܠܹܗ ܬܒ݂ܝܼܪܵܐ ܗܿܘ ܬܲܪܥܵܐ ܡܩܲܕܫܵܐ ܓܠܝܼܦܵܐ ܒܨܘܼܒܵܬܹ̈ܐ (زخارف) ܥܲܬܝܼܩܹ̈ܐ: ܐܸܠܵܐ ܟܠܲܝܗܝ ܢܸܩܫܹ̈ܐ ܡܒܲܝܢܹ̈ܐ: ܡܟܘܿܣܝܹ̈ܐ ܝܠܲܝܗܝ ܒܚܲܕ ܕܲܪܓ݂ܵܐ ܡܢ ܚܸܠܵܐ (الغبار) ܘܩܸܛܡܵܐ ܒܥܸܠܬܐ ܕܝܘܼܩܕܵܢܹ̈ܐ ݂

ܠܒܲܪ ܡܼܢ ܗܵܢܵܐ ܬܲܪܥܵܐ: ܡܵܨܹܝܚ ܕܚܵܙܹܝܚ ܠܡܲܕܒܚܵܐ ܪܹܫܵܝܵܐ ܡܬܘܼܪܨܵܐ ܡܼܢ ܟܹܐܦܵܐ ݂ ܘܓܲܘ ܡܲܥܒܪܵܐ ܕܗܲܝܟܠܵܐ ܕܥܲܠ ܝܲܡܝܼܢܵܐ: ܦܝܼܫܠܵܗ̇ ܡܘܼܚܪܸܒ݂ܬܐ ܚܕܵܐ ܡܢܵܬܐ ܡܼܢ ܓܘܼܕܵܐ ܕܝܼܠܹܗ ܥܲܠ ܝܲܡܝܼܢܵܐ ܕܡܲܕܒܚܵܐ: ܘܬܵܡܵܐ ܝܠܵܗ̇ ܕܘܼܟܬܐ ܕܲܢܛܵܪܵܐ ܠܘܼܚܹ̈ܐ ܦܲܚܵܪ̈ܵܝܹܐ ܡܓܲܘܢܹ̈ܐ: ܐܵܢܝܼ ܕܲܡܛܲܦܣܝܼ ܠܨܠܝܼܒ݂ܵܢܹ̈ܐ ܡܼܢ ܕܵܪܵܐ ܬܪܲܥܣܝܼܪܵܝܵܐ ݂ ܟܒܲܪ ܠܗܵܫܵܐ ܕܡܝܼܟ݂̈ܐ ܝܠܲܝܗܝ ܬܚܘܿܬ ܚܲܪ̈ܒ݂ܵܬ݂ܐ (أنقاض) ܒܥܸܕܵܢ ܣܵܥܘܿܪܘܼܬܐ ܕ (ܡܝܼܙܘܿܦܘܿܬܵܡܝܵܐ)[3]: ܘܟܵܐ ܬܝܼ ܐܘܿ[4] ܒܟܵܢܘܿܢ ܬܪܲܝܵܢܵܐ ܒܫܲܢ݇ܬܐ ܕ 2018 ݂

_______

[1] ܢܘܼܗܵܪܵܐ ܕܦܘܿܠܝܼܢ ܒܘܿܫܵܝܲܪ: ܡܲܒܘܼܥܵܐ ܥܒ݂ܝܼܪܵܐ: ܚܘܼܬܵܡ ܟܵܢܘܼܢ ܐ 2017 ݂

[2] ܝܵܬ݂ ܡܲܒܘܼܥܵܐ ݂

[3] ܦܘܿܠܝܼܢ ܒܘܿܫܵܝܲܪ ݂

[4] ܐܲܣܬܪܝܼܕ ܪܘܿܕܘܿ ܕܝܼ ܫܵܬܢܵܐܝܼ ݂