ܬܲܫܥܝܼܬܐ ܕܲܡܫܝܼܚܵܝܘܼܬܐ ܓܲܘ ܥܵܡܹܝܕܝܼܵܐ ܘܓܲܘ ܡܵܬܘܵܬܐ ܐ݇ܚܖܹ̈ܢܹܐ ܕܓܲܘ ܦܢܝܼܬܐ: ܕܵܡܝܵܢܬܐ ܝܠܵܗ̇: ܐܝܼܬܘܼܬܐ ܩܲܕܝܼܡܬܐ ܕܫܲܒ݂ܛܵܐ ܝܗܘܼܕܵܝܵܐ: ܚܲܪܬܐ ܣܘܼܒܵܪܵܐ ܒܲܡܫܝܼܚܵܝܘܼܬܐ ܒܐܘܼܪܚܵܐ ܕܡܵܪܝ ܬܐܘܿܡܵܐ ܫܠܝܼܚܵܐ ( ܪܵܒܵܐ ܡܸܬܗܲܘܝܵܢܝܼܬܐ ܝܠܵܗ̇ ܕܝܼܠܹܗ ܬܵܐܕܵܘܸܣ ܝܼܕܝܼܥܵܐ ܓܲܘ ܐܹܘܲܢܓܲܠܝܼܘܿܢܹ̈ܐ ܒܝܲܗܘܼܕܵܐ): ܘܡܵܪܝ ܐܲܕܲܝ ܘܡܵܪܝ ܡܵܐܪܝܼ ݂ ܦܝܼܫܠܹܗ ܝܼܕܝܼܥܵܐ ܕܵܪܵܐ ܡܫܝܼܚܵܝܵܐ ܪܒ݂ܝܼܥܵܝܵܐ ܒܲܩܖ̈ܵܝܵܬܐ ܣܲܓܝܼܐܹ̈ܐ: ܘܬܘܼܢܵܝܹ̈ܐ ܥܲܡܡܵܝܹ̈ܐ ܕܲܡܬܲܢܝܼ ܠܚܲܝܹ̈ܐ ܕܣܵܗܕܹ̈ܐ ܕܦܝܼܫܠܗ݇ܘܿܢ ܖ̈ܕܝܼܦܹܐ ܒܝܲܕ ܡܲܠܟܵܐ ܦܵܪܣܵܝܵܐ ܫܵܒܘܼܪ ܬܪܲܝܵܢܵܐ ݂ ܘܓܲܘ ܗܵܢ ܡܸܬܚܵܐ ܝܲܪܝܼܟ݂ܵܐ ܡܼܢ ܡܫܝܼܚܵܝܘܼܬܐ ܒܟ݂ܝܼܪܵܝܬܐ: ܦܝܼܫܠܗ݇ܘܿܢ ܓܲܠܝܹ̈ܐ ܩܸܠܵܝܵܬ̈ܐ ܘܦܝܼܫܠܗ݇ܘܿܢ ܦܖ̈ܝܼܣܹܐ ܕܘܼܟܵܢܹ̈ܐ ܕܲܣܓ݂ܵܕܵܐ: ܘܲܕܪܝܼܓܵܐܝܼܬ ܦܝܼܫܠܗ݇ܘܿܢ ܡܫܘܼܬܐܸܣܹ̈ܐ ܥܹܕܵܬ̈ܐ ܘܕܲܝܖܹ̈ܐ ܐ݇ܣܘܼܖ̈ܝܵܝܹܐ ݂

ܓܲܘ ܡܸܬܚܵܐ ܕܗܵܠܹܝܢ ܕܵܖܹ̈ܐ ܝܲܖ̈ܝܼܟ݂ܐ ܠܥܲܕ ܢܦܵܠܬܐ ܕܐܸܡܦܪܵܛܘܿܪܘܼܬܐ ܥܘܼܬ݂ܡܵܢܵܝܬܐ: ܖ̈ܵܓ݂ܘܿܠܹܐ ܘܛܘܼܖ̈ܵܢܹܐ ܕܒܹܝܬ ܢܲܗܖ̈ܝܼܢ ܚܒ݂ܝܼܨܹ̈ܐ ܝܗ݇ܘܵܘ ܘܲܟܖ̈ܝܼܟ݂ܐ ܒܗܲܝܡܵܢܘܼܬܐ ܡܫܝܼܚܵܝܬܐ: ܘܝܼܗ݇ܘܵܘ ܒܹܝܬ ܓܲܘܣܵܐ ܠܥܹܕܬܐ ܕܡܲܕܢܚܵܐ ݂

ܕܵܪܵܐ ܕ(17) ܘܲܦܪܝܼܫܵܐܝܼܬ ܕܵܪܵܐ ܕ(18): ܝܼܗ݇ܘܵܐ ܟܲܗܝܼܢܵܐ ܩܵܐ ܫܘܼܕܵܖܹ̈ܐ ܩܵܬ݂ܘܿܠܝܼܩܵܝܹ̈ܐ: ܘܫܘܼܢܵܝܵܐ ܕܲܡܗܘܼܡܢܹ̈ܐ ܡܼܢ ܥܹܕܬܐ ܕܡܲܕܢܚܵܐ ܠܥܹܕܬܐ ܟܲܠܕܵܝܬܐ ݂ ܘܥܵܡܹܝܕܝܼܵܐ ܒܚܲܕ ܝܲܘܡܵܐ ܝܼܗ݇ܘܵܐ ܩܸܢܛܪܘܿܢ ܐܵܢܲܢܩܵܝܵܐ ܠܡܲܪܥܝܼܬܐ ܕܟܲܠܕܵܝܹ̈ܐ ܓܲܘ ܦܸܢܝܵܬ̈ܐ ܕܙܵܟ݂ܘܿ ܘܥܲܩܪܵܐ ݂ ܫܲܢ݇ܬܐ ܕ1850: ܦܝܼܫܠܗ݇ܘܿܢ ܡܦܲܠܓ݂ܹ̈ܐ ܠܲܬܠܵܬܐ ܐܲܦܸܣܩܘܿܦܵܝܵܬܐ ܦܖ̈ܝܼܫܹܐ ܚܕܵܐ ܡܼܢ ܗܿܝ ܐ݇ܚܹܪܬܐ[1] ݂

ܡܫܘܼܚܠܸܦܠܵܗ̇ ܐܵܕܫܵܢܵܝܘܼܬܐ ܬܲܘܕܝܼܬܵܢܵܝܬܐ ܘܐܘܼܡܬܵܢܵܝܬܐ ܠܗܸܢܝܵܢܵܐ ܕܩܘܼܖ̈ܕܵܝܹܐ ܒܚܘܼܬܵܡܵܐ ܕܕܵܪܵܐ ܕ(19): ܘܫܘܼܪܵܝܵܐ ܕܕܵܪܵܐ ܕ(20): ܡܼܢ ܒܵܬܲܪ ܦܲܖ̈ܡܵܢܹܐ ܕ(ܣܲܝܦܘܿ)[2]: ܕܦܝܼܫܠܗ݇ܘܿܢ ܥܒ݂ܝܼܕܹ̈ܐ ܥܲܠ ܡܫܝܼܚܵܝܹ̈ܐ ܒܝܲܕ ܐܸܡܦܪܵܛܘܿܪܘܼܬܐ ܥܘܼܬ݂ܡܵܢܵܝܬܐ: ܘܠܵܐ ܗܘܹܐ ܠܗ݇ܘܿܢ ܐܲܝܟܲܢ̈ܘܵܬܲܝܗܝ ܛܵܒܹ̈ܐ ܘܒܲܣܝܼܡܹ̈ܐ ܬܚܘܿܬ ܫܘܼܠܛܵܢܵܐ ܥܝܼܪܵܩܵܝܵܐ ܒܵܬܲܪ ܦܪܵܫܬܐ ܕܥܝܼܪܵܐܩ ܡܼܢ ܬܘܼܪܟܝܼܵܐ ܥܘܼܬ݂ܡܵܢܵܝܬܐ ܡܼܢ ܫܲܢ݇ܬܐ ܕ1921 ݂

ܒܲܝܢܲܝ 1961 ܘ 1991: ܦܠܵܫܹ̈ܐ ܐܲܡܝܼܢܵܝܹ̈ܐ ܒܲܝܢܵܬ݂ ܛܲܟ݂ܣܵܐ ܥܝܼܪܵܩܵܝܵܐ ܘ(ܦܹܫܡܲܪܓܵܐ) ܩܘܼܪܕܵܝܬܐ ܥܒܸܕܠܗ݇ܘܿܢ ܡܲܥܒܕܵܢܘܼܬܐ ܒܚܲܕ ܕܲܪܓ݂ܵܐ ܪܲܒܵܐ ܥܲܠ ܟܢܘܼܫܝܹ̈ܐ ܡܫܝܼܚܵܝܹ̈ܐ ܘܥܲܠ ܝܵܪܬܘܼܬܲܝܗܝ ݂  ܓܲܘ ܗܹܘܦܲܪܟܝܼܵܐ ܕܢܘܼܗܲܕܪܵܐ: ܐܲܝܟܵܐ ܕܟܹܐ ܢܵܦܠܵܐ ܥܵܡܹܝܕܝܼܵܐ: “ܙܲܒ݂ܢܵܐ ܕܨܲܕܵܐܡ ܡܘܼܝܬܹܐ ܠܹܗ ܦܠܵܛܹ̈ܐ ܠܵܐ ܒܲܣܝܼܡܹ̈ܐ ܩܵܐ ܟܢܘܼܫܝܵܐ ܡܫܝܼܚܵܝܵܐ ܕܓܲܘ ܟܘܼܪܕܸܣܬܵܐܢ ݂ ܦܝܼܫܠܹܗ ܡܵܐ ܕܦܝܼܫܠܹܗ ܩܸܪܝܵܐ ܒܢܵܛܘܿܪܵܐ ܕܲܡܫܝܼܚܵܝܹ̈ܐ ܓܲܘ ܒܲܓ݂ܕܵܕ ܘܒܲܨܪܵܐ: ܘܲܡܫܝܼܚܵܝܹ̈ܐ ܕܟܘܼܪܕܸܣܬܵܐܢ ݂ ܦܝܼܫܠܗ݇ܘܿܢ ܡܘܼܚܖܸ̈ܒܹܐ ܥܸܣܖ̈ܵܝܹܐ ܕܥܹܕܵܬ̈ܐ ܥܲܬܝܼܩܹ̈ܐ: ܕܝܼܗ݇ܘܵܘ ܣܲܗܵܕܹ̈ܐ ܕܲܠܝܼܠܹ̈ܐ ܘܲܒܨܝܼܖܹ̈ܐ ܠܫܸܖ̈ܫܹܐ ܘܘܲܖ̈ܝܼܕܹܐ ܕܲܡܫܝܼܚܵܝܘܼܬܐ ݂ ܐܵܦ ܦܝܼܫܠܗ݇ܘܿܢ ܬܠܝܼܚܹ̈ܐ ܥܸܣܖ̈ܵܝܹܐ ܕܡܵܬܘܵܬܐ ܕܲܡܫܝܼܚܵܝܹ̈ܐ: ܘܲܡܫܲܢܲܝܬܐ ܘܲܡܫܲܚܠܲܦܬܐ ܕܥܵܡܘܿܖ̈ܲܝܗܝ ݂ ܡܵܐ ܕܦܵܐܹܫ ܘܨܵܦܹܐ ܕܲܥܬܝܼܕ ܕܟܘܼܪܕܸܣܬܵܐܢ: ܘܐܵܦܸܢ ܕܐܝܼܬ ܚܲܕܟܡܵܐ ܢܘܼܣܵܝܹ̈ܐ ܣܵܝܘܿܡܹ̈ܐ ܒܣܘܼܥܖ̈ܵܢܹܐ ܕܡܲܥܡܲܪܬܐ ܘܒܸܢܝܵܢܵܐ: ܐܸܠܵܐ ܐܝܼܬ ܚܲܕ ܡܸܢܕܝܼ ܕܦܝܼܫܠܹܗ ܛܸܫܝܵܐ ܠܥܵܠܲܡ: ܕܠܲܝܬ ܡܸܢܕܝܼ ܕܡܲܕܥܸܪ ܠܟܘܼܪܕܸܣܬܵܐܢ ܐܲܠܦܵܝܹ̈ܐ ܕܲܡܫܝܼܚܵܝܹ̈ܐ ܕܲܥܪܸܩܠܗ݇ܘܿܢ ܠܡܲܥܪܒ݂ܵܐ: ܘܗܵܫܵܐ ܫܟܸܢܘܼܢ ܓܲܘ ܐܘܿܪܘܿܦܵܐ ܐܲܘ ܓܲܘ ܥܵܠܡܵܐ ܚܲܕܬܐ”[3] ݂ ܘܲܣܛܲܪ ܡܼܢ ܡܲܚܪܲܒ݂ܬܐ ܕܝܵܪܬܘܼܬܐ:”ܦܝܼܫܠܗ݇ܘܿܢ ܡܦܘܼܩܥܹ̈ܐ (100) ܥܹܕܵܬ̈ܐ (ܪܲܩܡܵܐ ܫܲܪܝܼܪܵܐ ܝܲܬܝܼܪ ܪܵܡܵܐ ܡܼܢ ܗܵܕܹܐ ܒܪܵܒܵܐ): ܘܡܲܚܪܲܒ݂ܬܐ ܘܡܲܩܲܕܬܐ ܒܨܝܼܪܵܐܝܼܬ ܬܪܹܝܡܐܵܐ ܢܸܩܫܹ̈ܐ ܐܲܘ ܟܬܝܼ̈ܒ݂ܵܬܐ ܐܲܘ ܣܖ̈ܝܼܛܵܬܐ”[4]: ܘܝܼܠܹܗ ܚܲܕ ܚܘܼܣܪܵܢܵܐ ܠܝܼܕܲܥܬܐ ܘܲܡܫܲܢܲܝܬܵܗ̇ ܠܕܵܖܹ̈ܐ ܘܝܘܼܒܵܠܹ̈ܐ ܐܵܬܘܿܝܹ̈ܐ ݂ ܡܛܹܐ ܠܵܗ̇ ܫܝܵܦܬܐ ܕܗܝܼܵܝܘܼܬܐ ܠܕܲܪܓ݂ܵܗ̇ ܥܸܠܵܝܵܐ: ܥܲܡ ܬܠܵܚܵܐ ܘܡܲܚܪܘܿܒܹܐ ܠܪܵܒܵܐ ܒܵܬܲܝ ܐܲܖ̈ܟܹܐ ܕܕܲܝܖܹ̈ܐ ܘܡܲܖ̈ܥܝܵܬܐ: ܐܲܝܟ݂ ܕܝܼܗ݇ܘܵܐ ܩܵܐܹܡ ܕܲܒܪܹܐ ܠܹܗ ܓܲܘ ܥܵܡܹܝܕܝܼܵܐ ݂

__________

[1] ܚܙܝܼ:(ܥܹܕܬܐ ܟܲܠܕܵܝܬܐ ܩܵܬ݂ܘܿܠܝܼܩܵܝܬܐ: ܒܹܝܬ ܐܸܬܡܵܠܝ ܘܐܸܕܝܘܿܡ) ݂ ܚܲܕ ܩܸܛܥܵܐ ܡܼܢ ܦܪܵܣܬܐ ܫܲܢ݇ܬܵܝܬܐ ܠܲܟܬܵܒ݂ܵܐ ܐܲܦܸܣܩܘܿܦܵܝܵܐ ܩܵܬ݂ܘܿܠܝܼܩܵܝܵܐ 1914: ܐܲܒ݂ܵܐ ܓ̰ܘܼܙܹܝܦ ܬܘܼܦܲܢܟܲܓ̰ܝܼ ܕܥܹܕܬܐ ܟܲܠܕܵܝܬܐ ܓܲܘ ܡܵܪܕܝܼܢ: ܦ 70 ݂

[2] ܫܸܡܵܐ ܐ݇ܣܘܼܪܝܵܝܵܐ ܠܐܲܒܝܼܕܘܼܬܐ ܟܢܘܼܫܝܵܝܬܐ ܕܐܵܬܘܿܖ̈ܵܝܹܐ ܟܲܠܕܵܝܹ̈ܐ ܐ݇ܣܘܼܖ̈ܝܵܝܹܐ ܒܝܲܕ ܐܸܡܦܪܵܛܘܿܪܘܼܬܐ ܥܘܼܬ݂ܡܵܢܵܝܬܐ ܒܫܸܢܹ̈ܐ 1915 ـ 1918 ݂

[3] ܚܙܝܼ: (ܟܬܵܒ݂ܵܐ ܟܘܿܡܵܐ ܕܨܲܕܵܐܡ ܚܘܼܣܲܝܢ): ܟܪܝܼܣ ܟܘܿܬܣܫܝܼܪܵܐ 2005: ܦ 398 ݂

[4] ܚܙܝܼ: ܢܸܩܫܹ̈ܐ ܐ݇ܣܘܼܖ̈ܝܵܝܹܐ: ܡܢܵܬܐ 2: ܐܲܡܝܼܪ ܚܲܪܵܐܩ: ܐܵܟܵܕܝܼܡܝܵܐ ܕܣܸܦܪܵܝܘܼܬܐ 2010: ܦ 533 ݂

ܡܵܪܬܝ ܫܡܘܿܢܝܼ ܐܝܼܬ ܠܵܗ̇ ܚܲܕ ܫܲܘܦܵܐ ܐܵܢܲܢܩܵܝܵܐ ܓܲܘ ܟܬܵܒ݂ܵܐ ܕܣܵܗܕܹ̈ܐ ܕܥܹܕܬܐ ܕܡܲܕܢܚܵܐ: ܫܲܪܒܵܐ ܐܲܘ ܫܘܿܥܝܼܬܐ ܕܩܲܕܝܼܫܬܐ ܡܵܪܬܝ ܫܡܘܿܢܝܼ ܘܫܲܒ݂ܥܵܐ ܒܢܘܿܢܵܗ̇: ܝܼܕܝܼܥܬܐ ܝܠܵܗ̇ ܠܘܵܬ݂ ܡܗܘܼܡܢܹ̈ܐ ܕܗܵܕܹܐ ܥܹܕܬܐ ܒܐܲܬ݂ܪܵܐ ܕܒܹܝܬ ܢܲܗܖ̈ܝܼܢ ݂

ܐܬܹܐ ܠܵܗ̇ ܫܘܿܥܝܼܬܐ ܕܣܵܗܕܘܼܬܐ ܕܗܵܕܹܐ ܝܼܩܲܪܬܐ ܝܗܘܼܕܵܝܬܐ ܒܦܵܣܘܿܩܵܐ ܕܫܲܒ݂ܥܵܐ ܡܼܢ ܣܸܦܪܵܐ ܬܪܲܝܵܢܵܐ ܕܡܲܩܒ݂ܵܝܹ̈ܐ: ܒܙܲܒ݂ܢܵܐ ܕܡܲܠܟܵܐ ܐܲܢܛܝܼܟ݂ܘܿܣ ܪܒ݂ܝܼܥܵܝܵܐ ܐܝܼܦܝܼܓ݂ܵܢܘܿܣ: ܒܗܿܝ ܕܝܗܘܼܕܵܝܹ̈ܐ ܟܹܐ ܡܝܲܩܪܝܼ ܗ݇ܘܵܘ ܩܵܢܘܿܢܹ̈ܐ ܕܐܲܠܵܗܵܐ ܘܲܡܗܘܼܝܡܸܢܘܼܢ ܒܲܩܝܵܡܬܐ ܘܚܲܝܹ̈ܐ ܥܵܠܡܝܼܢܵܝܹ̈ܐ ܡܼܢ ܩܕܵܡ ܡܫܝܼܚܵܝܘܼܬܐ ܒܲܬܪܹܝܢ ܕܵܪܹ̈ܐ ݂ ܦܝܼܫܠܗ݇ܘܿܢ ܕܒ݂ܝܼܩܹ̈ܐ ܫܲܒ݂ܥܵܐ ܐ݇ܚܘܿܢܵܘܵܬ݂ܐ ܥܲܡ ܝܸܡܲܝܗܝ: ܘܦܝܼܫܠܗ݇ܘܿܢ ܥܸܨܝܹ̈ܐ ܕܐܵܟ݂ܠܝܼ ܒܸܣܪܵܐ ܕܲܚܙܘܼܪܵܐ[1]: ܘܟܲܕ ܠܵܐ ܩܒܸܠܠܗ݇ܘܿܢ: ܦܝܼܫܠܗ݇ܘܿܢ ܣܵܗܕܹ̈ܐ ܚܲܕ ܒܵܬܲܪ ܗܿܘ ܐ݇ܚܹܪ݇ܢܵܐ ܘܲܩܕܵܡ ܥܲܝܢܹ̈ܐ ܕܝܸܡܲܝܗܝ ݂ ܗܿܘ ܩܲܕܡܵܝܵܐ ܦܝܼܫܠܹܗ ܡܙܘܼܠܗܸܙܵܐ ܚܲܝܠܵܢܵܐܝܼܬ ܘܲܡܪܘܼܦܝܵܐ ܓܲܘ ܢܘܼܪܵܐ [2] ݂ ܘܲܒܪܹܫ ܟܠܹܗ ܐܵܗܵܐ ܐܘܼܠܨܵܢܵܐ: ܡܵܪܬܝ ܫܡܘܿܢܝܼ ܝܸܡܲܝܗܝ ܟܹܐ ܝܵܗܒ݂ܵܐ ܗ݇ܘܵܐ ܠܗ݇ܘܿܢ ܠܒ݂ܝܼܒ݂ܘܼܬܐ ܠܲܦܝܵܫܵܐ ܫܲܪܝܼܖܹ̈ܐ ܘܡܸܬܩܲܘܝܵܢܹ̈ܐ ܒܢܵܡܘܿܣܐ ܕܡܵܪܝܵܐ: ܘܠܵܐ ܙܵܕܥܝܼ ܡܼܢ ܡܲܘܬܐ ݂ ܘܝܗܸܒ݂ ܠܵܗ̇ ܠܸܒܵܐ ܩܵܐ ܒܪܘܿܢܵܗ̇ ܙܥܘܿܪܵܐ ܕܠܵܐ ܙܵܕܹܥ ܡܼܢ ܓ̰ܲܠܵܕܹ̈ܐ: ܟܲܕ ܒܐܝܼܡܵܪܵܐ ܐܸܠܹܗ: ܗܘܝܼ ܠܒ݂ܝܼܒ݂ܵܐ ܘܲܩܒܘܿܠ ܠܹܗ ܡܲܘܬܵܐ ܕܐܵܦ ܐܲܢ݇ܬ ܡܵܛܹܝܬ ܠܐܲܚܘܿܢܘܵܬܘܼܟ݂: ܕܐܵܬ݂ܝܵܢ ܘܚܵܙܝܵܢܘܼܟ݂ ܥܲܡ ܐܲܚܘܿܢܘܵܬܘܼܟ݂ ܓܲܘ ܫܡܲܝܵܐ [3] ݂

__________

[1] ܚܙܝܼ: (ܟܬܵܒ݂ܵܐ ܩܲܕܝܼܫܵܐ ܠܦܘܼܬ݂ ܬܲܫܥܝܼܬܐ): ܓ̰ܵܐܢ ܒܘܿܬܵܐܢ: ܛܲܒ݂ܥܵܐ ܕܠܘܿܟܠܵܒ: ܚܙܝܼܪܵܢ 2000: ܦ 616 ݂

[2] ܝܵܬ ܡܲܒܘܼܥܵܐ: ܦ 616 ݂

[3] ܡܲܒܘܼܥܵܐ ܥܒ݂ܝܼܪܵܐ: ܦ 617 ݂ ܚܲܕ ܦܸܣܩܵܐ ܡܼܢ (ܡܲܩܒ݂ܵܝܹ̈ܐ ܬܪܲܝܵܢܵܐ) 7 : 29 ݂

ܢܵܦܠܵܐ ܥܹܕܬܐ ܕܡܵܪܬܝ ܫܡܘܿܢܝܼ ܕܓܲܘ ܐܵܪܵܕܸܢ ܓܲܘ ܚܕܵܐ ܕܵܪܬܐ ܐܲܘ ܡܫܘܼܚܬܐ (مساحة) ܥܹܕܬܵܢܵܝܬܐ: ܐܝܼܬ ܓܵܘܵܗ̇ ܚܕܵܐ ܓܲܢܬܐ ܙܥܘܿܪܬܐ ܕܐܝܼܬ ܓܵܘܵܗ̇ ܐܝܼܠܵܢܹ̈ܐ ܕܦܹܐܖܹ̈ܐ ݂

ܦܝܼܫܠܵܗ̇ ܡܚܘܼܕܲܬ݂ܬܐ ܥܹܕܬܐ ܒܫܲܢ݇ܬܐ ܕ1935: ܒܙܲܒ݂ܢܐ ܕܦܵܦܵܐ ܦܝܼܝܘܿܣ ܕ(11): ܘܲܒܥܸܕܵܢܵܐ ܕܦܵܛܪܝܼܵܪܟܵܐ ܕܒܵܒܸܠ ܥܲܠ ܟܲܠܕܵܝܹ̈ܐ ܝܲܘܣܸܦ ܥܲܡܲܢܘܼܐܹܝܠ ܬܪܲܝܵܢܵܐ: ܘܐܵܦܸܣܩܘܿܦܵܐ ܦܪܲܢܣܝܼܣ ܕܵܘܝܼܕ ܡܼܢ ܡܲܪܥܝܼܬܐ ܕܐܵܪܵܕܸܢ: ܕܬܵܒܥܵܐ ܠܵܗ̇ ܡܵܬܐ ܕܐܵܪܵܕܸܢ ݂

ܥܹܕܬܐ ܕܡܵܪܬܝ ܫܡܘܿܢܝܼ: ܝܼܠܵܗ̇ ܚܲܕ ܒܸܢܝܵܢܵܐ ܡܬܘܼܪܨܵܐ ܘܒܸܢܝܵܐ ܡܼܢ ܟܹܐܦܹ̈ܐ ܟܝܵܢܵܝܹ̈ܐ: ܐܝܼܢܵܐ ܬܠܝܼܚܬܐ ܝܠܵܗ̇ ܒܚܲܕ ܙܢܵܐ ܓܲܠܝܵܐ ݂ ܠܫܲܦܝܼܪܘܼܬ݂ ܓܲܕܵܐ ܦܝܼܫܠܗ݇ܘܿܢ ܢܩܝܼܫܹ̈ܐ ܨܘܼܒܵܬܵܐ (زخارف) ܥܲܠ ܟܹܐܦܹ̈ܐ ܒܝܲܕ ܡܝܲܩܪܵܐ (ܐܲܡܝܼܪ ܚܲܪܵܐܩ): ܐܲܝܟܵܐ ܕܦܝܼܫܠܹܗ ܬܸܢܝܵܐ ܬܘܼܪܵܨܵܗ̇ ܘܡܲܥܡܲܪܬܵܗ̇ ܒܵܬܲܪܟܸܢ ݂

ܬܲܪܥܵܐ ܡܐܲܛܪܵܐ ܡܵܖ̈ܲܝ ܩܸܛܖܹ̈ܐ ܐܲܘ ܩܸܫܬܵܬܐ ܦܲܠܓܘܿ ܚܘܼܕܖ̈ܵܢܵܝܹܐ ܥܲܠ ܦܵܬܐ ܕܣܸܡܵܠܵܐ ܕܒܸܢܝܵܢܵܐ: ܦܵܐܹܫ ܚܫܝܼܒ݂ܵܐ ܚܲܕ ܡܼܢ ܩܸܛܥܹ̈ܐ ܐܵܖ̈ܕܸܟ݂ܠܵܝܹܐ ܐ݇ܚܵܖ̈ܝܹܐ ܓܲܠܝܹ̈ܐ ܡܼܢ ܥܸܕܵܢܵܐ ܕܦܝܼܫܠܹܗ ܬܸܢܝܵܐ ܒܸܢܝܵܢܵܐ ݂ ܟܹܐܦ ܫܘܼܬܐܵܣܵܐ ܕܩܸܛܪܵܐ: ܢܩܝܼܪܵܐ ܝܠܹܗ ܘܲܢܩܝܼܫܵܐ ܒܚܲܕ ܨܠܝܼܒܵܐ ܟܹܐܦܵܝܵܐ ܐܵܬܘܿܪܵܝܵܐ ݂ ܘܲܠܗܵܫܵܐ ܢܸܩܫܹ̈ܐ ܡܢܘܼܩܫܹ̈ܐ ܒܠܸܫܵܢܵܐ ܐ݇ܣܘܼܪܝܵܝܵܐ: ܓܲܠܝܹ̈ܐ ܝܢܵܐ ܡܢܵܬܵܐܝܼܬ ܥܲܠ ܥܲܡܘܼܕܹ̈ܐ ܘܩܸܫܬܵܬܐ ݂ ܘܐܝܼܬ ܒܪܹܫ ܗܵܢܵܐ ܬܲܪܥܵܐ ܚܲܕ ܠܘܼܚܵܐ ܫܝܼܫܵܝܵܐ ܪܒܵܐ ܚܪܝܼܒ݂ܵܐ ܘܬܠܝܼܚܵܐ: ܚܵܒܹܫ ܢܸܩܫܹ̈ܐ ܐ݇ܣܘܼܖ̈ܝܵܝܹܐ ݂

ܒܥܸܕܵܢܐ ܐ݇ܚܵܪܵܝܬܐ: ܦܝܼܫܠܹܗ ܒܸܢܝܵܐ ܚܲܕ ܐܵܘܵܢܵܐ ܙܥܘܿܪܵܐ ܒܲܠܩܘܼܒ݂ܠ ܓܘܼܕܵܐ ܕܣܸܡܵܠܵܐ ܡܲܕܢܚܵܝܵܐ ܕܥܹܕܬܐ ܕܡܵܪܬܝ ܫܡܘܿܢܝܼ ݂

ܒܸܕ ܥܵܒ݂ܪܸܬ ܠܥܹܕܬܐ ܒܐܘܼܪܚܵܐ ܕܚܲܕ ܬܲܪܥܵܐ ܒܦܲܠܓܵܐ ܕܦܵܬܐ ܬܲܝܡܢܵܝܬܐ ܕܒܸܢܝܵܢܵܐ ݂ ܦܝܼܫܠܵܗ̇ ܒܢܝܼܬܐ ܥܹܕܬܐ ܕܡܵܪܬܝ ܫܡܘܿܢܝܼ ܡܼܢ ܬܪܹܝܢ ܐܵܘܵܢܹ̈ܐ ܫܲܘܝܹ̈ܐ ܡܵܖ̈ܲܝ ܚܲܕ ܗܲܝܟܠܵܐ: ܦܵܪܹܫ ܒܲܝܢܵܬܲܝܗܝ ܚܲܕ ܓܘܼܕܵܐ: ܘܡܵܛܝܼ ܠܲܚܕܵܕܹ̈ܐ ܒܡܸܨܥܵܝܘܼܬܐ ܕܚܲܕ ܬܲܪܥܵܐ ܡܩܲܛܪܵܐ ܦܲܠܓܘܿ ܚܘܼܕܪܵܢܵܝܵܐ: ܐܝܼܬ ܒܪܹܫܲܝܗܝ ܩܘܼܒܵܬ̈ܐ ܡܲܢܕܘܼܖ̈ܬܵܢܵܝܹܐ ܦܲܠܓܘܿ ܚܘܼܕܖ̈ܵܢܵܝܹܐ ݂ ܟܠ ܐܵܘܵܢܵܐ ܐܝܼܬ ܠܹܗ ܡܲܕܒܚܵܐ ܕܝܵܬܹܗ: ܦܵܪܹܫ ܡܼܢ ܗܲܝܟܠܵܐ ܒܚܲܕ ܬܲܪܥܵܐ ܡܲܠܟܵܝܵܐ ܡܬܘܼܪܨܵܐ ܡܼܢ ܟܹܐܦܹ̈ܐ ܟܝܵܢܵܝܹ̈ܐ ܡܟܲܣܹܐ ܠܪܵܡܘܼܬܐ ܕܟܠܹܗ ܒܸܢܝܵܢܵܐ ݂ ܡܸܬܗܲܘܝܵܢܝܼܬܐ ܝܠܵܗ̇ ܕܦܝܼܫܠܵܗ̇ ܡܘܼܦܠܲܚܬܐ ܡܫܘܼܚܬܐ ܐܲܘ ܐܵܘܵܢܵܐ ܩܲܕܡܵܝܵܐ ܐܲܝܟ݂ ܡܲܥܠܵܢܵܐ: ܘܐܵܘܵܢܵܐ ܬܪܲܝܵܢܵܐ ܐܲܝܟ݂ ܥܹܕܬܐ ݂ ܘܐܝܼܬ ܚܲܕ ܠܘܼܚܵܐ ܥܲܠܠܹܗ ܢܸܩܫܵܐ ܕܒܘܼܝܵܐܵܐ ܒܠܸܫܵܢܵܐ ܐ݇ܣܘܼܪܝܵܝܵܐ ܘܥܲܪܒ݂ܵܝܵܐ: ܐܝܼܩܵܪܵܐ ܠܐܲܦܸܣܩܘܿܦܵܐ ܦܪܲܢܣܝܼܣ ܕܵܘܝܼܕ: ܐܲܦܸܣܩܘܿܦܵܐ ܕܡܲܪܥܝܼܬܐ ܕܥܵܡܹܝܕܝܼܵܐ: ܕܦܝܼܫܠܹܗ ܝܼܠܝܼܕܵܐ ܒܐܵܪܵܕܸܢ ܒܬܸܫܪܝܼܢ ܩܲܕܡܵܝܵܐ ܫܲܢ݇ܬܐ ܕ1870: ܘܢܝܼܚܠܹܗ ܒܬܸܫܪܝܼܢ ܩܲܕܡܵܝܵܐ ܕܫܲܢ݇ܬܐ ܕ1939 ݂