ܫܸܪܫܵܐ ܕܐܝܼܬܘܼܬܐ ܐܵܪܸܡܢܵܝܬܐ ܓܲܘ ܡܝܼܙܘܿܦܘܿܬܵܡܝܵܐ (ܐܲܬ݂ܪܵܐ ܕܒܹܝܬ ܢܲܗܖ̈ܝܼܢ): ܒܸܕܥܵܪܵܐ ܝܠܹܗ ܠܕܵܖܹ̈ܐ ܥܲܬܝܼܩܹ̈ܐ ݂ ܡܼܢ ܕܵܪܵܐ ܩܲܕܡܵܝܵܐ ܩ ݂ ܡ: ܐܲܕܝܵܒܝܼܢ (ܘܐܵܦ ܐܲܪܒܵܐܝܼܠܠܘܿ/ ܐܲܪܒܸܠ ܕܝܲܘܡܵܢܵܐ): ܝܼܗ݇ܘܵܐ ܚܕܵܐ ܡܢܵܬ݂ܐ ܡܼܢ ܡܲܠܟܘܼܬܐ ܐܵܪܸܡܢܵܝܬܐ ܒܙܲܒ݂ܢܵܐ ܕܕܝܼܟܪܵܐܢ (ܬܪܲܝܵܢܵܐ) ܪܲܒܵܐ ݂ ܐܲܕܝܵܒܝܼܢ ܝܼܗ݇ܘܵܐ ܡܢܵܬܐ ܬܲܝܡܢܵܝܬܐ ܕܐܵܪܡܝܼܢܝܵܐ: ܕܦܝܼܫܠܵܗ̇ ܒܲܫܢܵܬ݂ 301: ܗܿܘ ܐܲܬ݂ܪܵܐ ܡܫܝܼܚܵܝܵܐ ܩܲܕܡܵܝܵܐ ܓܲܘ ܬܲܫܥܝ݂ܬܐ ݂ ܘܲܟܒܲܪ ܚܕܵܐ ܬܦܵܩܬܐ ܒܪܹܐ ܠܵܗ̇ ܚܕܵܖ̈ܲܝ 328 ـ 329 ܒܲܝܢܵܬ݂ ܬܪܹܝܢ ܫܲܠܝܼܛܹ̈ܐ ܕܝܼܗ݇ܘܵܘ ܠܚܘܿܕܲܝܗܝ ܡܫܝܼܚܵܝܹ̈ܐ ܒܗܿܘ ܙܲܒ݂ܢܵܐ: ܒܹܝܬ ܐܸܡܦܪܵܛܘܿܪܵܐ ܪܗܘܿܡܵܝܵܐ ܩܸܣܛܲܢܛܝܼܢ ܩܲܕܡܵܝܵܐ: ܘܐܵܪܸܡܢܵܝܵܐ ܬܪܝܼܕܲܝܬ ܬܠܝܼܬܵܝܵܐ ݂ ܡܫܘܼܪܸܪܹܗ ܩܸܣܛܲܢܛܝܼܢ ܩܲܕܡܵܝܵܐ ܠܕܲܘܪܵܐ ܕܲܬܪܝܼܕܲܝܬ ܬܠܝܼܬܵܝܵܐ ܓܲܘ ܡܲܫܚܲܕܬܐ ܕܡܲܕܢܚܵܐ ݂ ܘܗܵܕܟ݂ܵܐ ܡܫܲܘܬܘܿܦܹܐ ܝܠܲܝܗܝ ܡܣܲܒ݂ܖ̈ܵܢܹܐ (ܡܲܫܚܸܕܵܢܹ̈ܐ) ܐܵܖܸ̈ܡܢܵܝܹܐ ܒܡܲܫܚܲܕܬܐ ܕܐܲܬ݂ܪܵܐ ܕܒܹܝܬ ܢܲܗܖ̈ܝܼܢ ܘܡܲܠܟܘܼܬ݂ܐ ܣܵܣܵܢܵܝܬܐ: ܐܲܝܟ݂ ܕܡܲܕܟ݂ܘܿܪܹܐ ܝܠܹܗ ܡܬܲܫܥܝܼܬܵܢܵܐ ܝܲܘܢܵܝܵܐ ܣܘܿܙܡܝܼܢ ܚܕܵܖ̈ܲܝ ܫܲܢ݇ܬܐ ܕ402 ݂ ” ܒܚܲܪܬ݂ܐ ܒܲܝܢܵܬ݂ ܥܲܡܡܹ̈ܐ ܫܒ݂ܵܒܹ̈ܐ: ܙܝܼܕܠܵܗ̇ ܗܲܝܡܵܢܘܼܬܐ ܒܲܚܕܵܐ ܨܘܼܪܬܐ ܪܲܒܬܐ: ܘܲܡܛܘܼܘܸܪܵܗ̇ ܗܲܝܡܵܢܘܼܬܐ ܘܲܪܒܹܐ ܠܵܗ̇ ܒܚܲܕ ܕܲܪܓ݂ܵܐ ܪܲܒܵܐ: ܘܚܵܫܒܸܢ ܕܦܵܖ̈ܣܵܝܹܐ ܚܦܸܩܠܗ݇ܘܿܢ ܠܲܡܫܝܼܚܵܝܘܼܬܐ ܒܡܸܨܥܵܝܘܼܬܐ ܕܐ݇ܚܝܵܢܘܼܬ݂ܐ ܐܵܢܲܢܩܵܝܬܐ ܕܐܝܼܬ ܗ݇ܘܵܐ ܠܗ݇ܘܿܢ ܥܲܡ ܐܘܿܣܪܘܿܘܹܝܢ (ܖ̈ܗܘܿܡܵܢܵܝܹܐ)^[1] ܘܐܵܖܸ̈ܡܢܵܝܹܐ”^[2] ݂

ܒܕܵܪܵܐ ܫܒܲܥܣܝܼܪܵܝܵܐ: ܚܲܕܟܡܵܐ ܟܢܘܼܫܝܹ̈ܐ ܐܵܖܸ̈ܡܢܵܝܹܐ ܚܲܕܬܹ̈ܐ: ܫܟܸܢܘܼܢ ܒܐܲܬ݂ܪܵܐ ܕܒܹܝܬ݂ ܢܲܗܖ̈ܝܼܢ ܡܼܢ ܒܵܬܲܪ ܨܦܵܚܬܐ ܥܲܠ ܒܲܓ݂ܕܵܕ ܒܝܲܕ ܫܵܐܗ ܦܵܪܣܵܝܵܐ (ܥܲܒܵܐܣ ܩܲܕܡܵܝܵܐ) ܒܫܲܢ݇ܬܐ ܕ1623 ݂ ܒܫܸܢܹ̈ܐ ܩܲܕܡܵܝܹ̈ܐ ܡܼܢ ܕܵܪܵܐ ܫܒܲܥܣܝܼܪܵܝܵܐ: ܡܲܠܟܵܐ ܦܵܪܣܵܝܵܐ ܡܫܘܼܢܹܐ ܠܹܗ ܠܥܵܡܘܿܖܹ̈ܐ ܐܵܖܸ̈ܡܢܵܝܹܐ ܡܼܢ ܕܓ̰ܘܼܓ݂ܵܐ (ܡܕܝܼܢ݇ܬܐ ܐܵܪܸܡܢܵܝܬܐ ܥܲܬܝܼܩܬܐ ܓܲܘ ܢܵܚܝܼܬܸܫܝܼܦܵܐܢ ܥܲܠ ܣܸܦܬܐ ܓܲܪܒܝܵܝܬܐ ܕܢܲܗܪܵܐ ܕܐܵܪܵܟܸܣ) ݂ ܘܗܵܕܟ݂ܐ ܦܝܼܫܠܗ݇ܘܿܢ ܡܘܼܬܒܹ̈ܐ (12000) ܐܲܠܦܹ̈ܐ ܐܵܖܸ̈ܡܢܵܝܹܐ ܓܲܘ (ܕܓ̰ܘܼܓ݂ܵܐ) ܚܕܲܬܐ: ܩܘܼܪܒܵܐ ܕܐܲܨܦܵܗܵܢ: ܠܲܡܫܲܘܬܘܿܦܹܐ ܒܛܘܼܘܵܪܵܐ ܕܐܵܪܸܫܟ݂ܵܝܬܐ ܚܕܲܬܐ ܕܐܸܡܦܪܵܛܘܿܪܘܼܬܐ ܦܵܪܣܵܝܬܐ ܨܘܿܦܵܝܬܐ (الصوفية) ݂ ܘܐܝܼܡܲܢ ܕܡܝܼܬ ܠܹܗ ܫܵܐܗ: ܚܝܹܐ ܠܗ݇ܘܿܢ ܐܵܖܸ̈ܡܢܵܝܹܐ ܓܲܘ ܐܲܬ݂ܪܵܐ ܕܦܵܪܹܣ ܚܲܕ ܙܲܒ݂ܢܵܐ ܬܚܘܿܬ݂ ܪܕܘܼܦܝܵܐ ݂ ܪܵܒܵܐ ܡܸܢܲܝܗܝ ܡܫܘܼܢܹܐ ܠܗ݇ܘܿܢ ܠܐܲܬ݂ܪܵܐ ܕܒܹܝܬ ܢܲܗܖ̈ܝܼܢ: ܘܲܫܟܸܢܘܼܢ ܓܲܘ ܒܲܨܪܵܐ (ܬܲܝܡܢܵܐ ܕܥܝܼܪܵܐܩ ܕܝܲܘܡܵܢܵܐ): ܟܲܕ ܚܙܸܩܠܗ݇ܘܿܢ ܚܲܕܟܡܵܐ ܐ݇ܚܖ̈ܵܢܹܐ ܠܥܲܕ (ܠܗܲܠ) ܕܲܡܛܹܐ ܠܗ݇ܘܿܢ ܠܗܸܢܕܘܿ ݂

ܟܒ݂ܘܼܫܝܵܐ ܐܲܘ ܟܒ݂ܵܫܬܐ ܕܒܲܓ݂ܕܵܕ ܒܫܲܢ݇ܬܐ ܕ1638 ܒܝܲܕ ܫܲܠܝܼܛܵܐ ܥܘܼܬ݂ܡܵܢܵܝܵܐ ܡܘܼܪܵܐܕ ܪܒ݂ܝܼܥܵܝܵܐ: ܒܥܘܼܕܪܵܢܵܐ ܕܦܵܠܚܹ̈ܐ (جنود) ܐܵܖܸ̈ܡܢܵܝܹܐ ܥܘܼܬ݂ܡܵܢܵܝܹ̈ܐ: ܡܗܘܼܕܹܐ ܠܵܗ̇ ܠܲܥܡܵܪܬܵܐ ܘܲܫܟܵܢܬܐ ܚܕܲܬܐ ܕܐܵܖܸ̈ܡܢܵܝܹܐ ܓܲܘ ܒܲܓ݂ܕܵܕ ݂ ܒܟܠܹܗ ܡܸܬܚܵܐ ܕܫܘܼܠܛܵܢܵܐ ܕܥܘܼܬ݂ܡܵܢܵܝܹ̈ܐ ܘܲܠܗܲܠ ܢܦܵܠܬܐ ܕܐܸܡܦܪܵܛܘܿܪܘܼܬܐ ܒܫܘܼܪܵܝ ܕܵܪܵܐ ܕܥܸܣܪܝܼܢ: ܡܛܘܼܘܸܪܘܼܢ ܐܵܖܸ̈ܡܢܵܝܹܐ ܫܘܼܬܐܵܣܲܝܗܝ: ܠܕܲܪܓ݂ܵܐ ܕܦܝܼܫܠܹܗ ܚܫܝܼܒ݂ܵܐ ܡܸܢܝܵܢܲܝܗܝ ܒܫܘܼܪܵܝܵܐ ܕܕܵܪܵܐ ܬܫܲܥܣܝܼܪܵܝܵܐ ܩܘܼܪܒܵܐ ܠـ (90000) ܐܲܠܦܹ̈ܐ ܢܸܫܡܹ̈ܐ ܓܲܘ ܥܝܼܪܵܐܩ^[3] ݂

ܐܲܒܝܼܕܘܼܬܐ ܟܢܘܼܫܝܵܝܬܐ (ܩܛܵܠ ـ ܥܲܡܵܐ: الإبادة الجماعية) ܕܐܵܖܸ̈ܡܢܵܝܹܐ ܒܫܲܢ݇ܬܐ ܕ1915 ـ 1917: ܝܼܗ݇ܘܵܐ ܚܲܕ ܡܲܒܘܼܥܵܐ ܐܵܢܲܢܩܵܝܵܐ ܘܪܹܫܵܝܵܐ ܠܬܲܘܬܵܒ݂ܘܼܬܐ ܘܲܥܪܵܩܵܐ ܕܐܵܖܸ̈ܡܢܵܝܹܐ ܠܐܲܬ݂ܪܵܐ ܕܒܹܝܬ ܢܲܗܖ̈ܝܼܢ ܕܥܝܼܪܵܐܩ ݂ ܐܲܢܲܝ ܓܲܠܘܵܝܹ̈ܐ (ܬܲܘܬܵܒܹ̈ܐ): ܦܝܼܫܠܗ݇ܘܿܢ ܡܘܼܥܖܸ̈ܩܹܐ ܡܼܢ ܗܹܘܦܲܖ̈ܟܝܼܹܐ ܡܲܕܢܚܵܝܹ̈ܐ ܕܐܸܡܦܪܵܛܘܿܪܘܼܬܐ ܡܼܢ ܓܲܪܒܝܵܐ (ܕܝܵܪܒܲܟܲܪ): ܥܲܠ ܝܘܼܪܟ݂ܵܐ ܕܢܲܗܪܵܐ ܕܕܸܩܠܵܬ: ܘܥܲܠ ܡܲܥܪܒ݂ܵܐ ܕ(ܪܹܫ ܥܲܝܢܵܐ) ܥܲܠ ܝܘܼܪܟ݂ܵܐ ܕܣܸܟܬܐ ܦܲܪܙܠܵܝܬܐ ܡܼܢ ܡܕܝܼܢ݇ܬܐ ܕ(ܚܲܠܲܒ) ܠܒܲܓ݂ܕܵܕ ݂ ܘܐܵܦ ܡܼܢ ܡܕܝܼܢ݇ܬܐ ܕ(ܒ݂ܵܐܢ) ܓܵܘܵܐ ܓܲܘ ܐܲܬ݂ܪܵܐ ܕܦܵܪܹܣ: ܡܛܹܐ ܠܗ݇ܘܿܢ ܐܲܢܲܝ ܐܵܖܸ̈ܡܢܵܝܹܐ ܡܘܼܥܖܸ̈ܩܹܐ ܠܚܲܕܟܡܵܐ ܦܸܢܝܵܬ݂̈ܐ ܐܲܝܟ݂ ܙܵܟ݂ܘܿ: ܘܗܵܘܪܝܼܣܟ: ܘܐܲܦܙܲܪܘܿܓ݂ (ܐܲܦܙܲܪܘܼܟ): ܘܐܵܦ ܠܡܲܘܨܸܠ ܘܟܲܪܟܘܼܟ ݂ ܘܲܒܗܵܢܵܐ ܨܹܝܕ: ܐܵܢܲܢܩܵܝܬܐ ܝܠܵܗ̇ ܕܟ݂ܵܪܬܐ ܕܲܚܕܵܐ ܚܲܠܲܩܬܐ ܡܲܪܝܼܪܬܐ ܘܐܘܼܠܨܵܢܵܝܬܐ: ܒܟܵܢܘܿܢ ܬܪܲܝܵܢܵܐ ܕܫܲܢ݇ܬܐ ܕ1916: ܘܓܲܘ ܬܲܪܬܹܝܢ ܠܲܝ̈ܠܵܘܵܬ݂ܐ ܒܲܠܚܘܿܕ: ܦܝܼܫܠܗ݇ܘܿܢ ܩܛܝܼܠܹ̈ܐ (15000) ܐܲܠܦܹ̈ܐ ܐܵܖܸ̈ܡܢܵܝܹܐ ܡܘܼܥܖܸ̈ܩܹܐ ܠܡܲܘܨܸܠ ܘܦܸܢ̈ܝܵܬ݂ܐ ܕܒܲܫܒ݂ܵܒ݂ܘܼܬ݂ܵܗ̇ (ܚܵܕܹܪܘܵܢܵܗ̇): ܘܦܝܼܫܠܗ݇ܘܿܢ ܐܣܝܼܖܹ̈ܐ ܟܠ ܥܸܣܪܵܐ ܦܲܖ̈ܨܘܿܦܹܐ ܡܸܚܕܵܕܹ̈ܐ: ܘܲܡܖ̈ܘܼܦܝܹܐ ܓܲܘ ܢܲܗܪܵܐ ܕܕܸܩܠܵܬ ݂ ܘܐܵܦ ܚܫܝܼܚܬܐ ܝܠܵܗ̇ ܠܡܲܕܟ݂ܘܿܪܹܐ: ܕܲܩܕܵܡ ܗܵܢܵܐ ܓܘܼܢܚܵܐ ܒܝܘܿܡ (10) ܒܝܲܪܚܵܐ ܕܲܚܙܝܼܪܵܢ ܒܫܲܢ݇ܬܐ ܕ1915: ܡܫܘܼܕܸܪܹܗ ܩܲܢܨܠܵܐ (القنصل) ܐܲܠܡܵܢܵܝܵܐ ܓܲܘ ܡܲܘܨܸܠ (ܗܘܿܠܸܫܬܵܝܸܢ) ܠܐܝܼܙܓܲܕܵܐ ܕܐܲܬ݂ܪܹܗ ܒܲܪܩܝܼܬܐ (برقية) ܕܒܐܝܼܬܵܝܵܐ ܝܠܵܗ̇:” 614 ܐܵܖܸ̈ܡܢܵܝܹܐ (ܓܲܒ݂ܖܹ̈ܐ ܘܢܸܫܹ̈ܐ ܘܫܲܒ݂ܖܹ̈ܐ) ܕܦܝܼܫܠܗ݇ܘܿܢ ܛܖ̈ܝܼܕܹܐ ܡܼܢ ܕܝܼܵܪܒܲܟܲܪ: ܘܡܘܼܥܖܸ̈ܩܹܐ ܒܚܲܝܠܵܐ ܠܡܲܘܨܸܠ: ܦܝܼܫܠܗ݇ܘܿܢ ܩܛܝܼܠܹ̈ܐ ܒܐܘܼܪܚܵܐ: ܟܲܕ ܦܝܵܫܵܐ ܝܗ݇ܘܵܘ ܢܩܝܼܠܹ̈ܐ ܒܛܵܝܘܿܦܹ̈ܐ (طوافات) ܓܲܘ ܢܲܗܪܵܐ ܕܕܸܩܠܵܬ ݂ ܒܐܸܬܡܵܠܝ: ܛܵܝܘܿܦܹ̈ܐ ܡܛܹܐ ܠܗ݇ܘܿܢ ܣܦܝܼܩܹ̈ܐ: ܘܡܼܢ ܩܕܵܡ ܝܲܘܡܵܢܹ̈ܐ: ܛܥܝܼܢܵܐ ܝܗ݇ܘܵܐ ܢܲܗܪܵܐ ܕܕܸܩܠܵܬ: ܫܠܲܕܹ̈ܐ ܘܲܕܖ̈ܵܥܹܐ ܐ݇ܢܵܫܵܝܹ̈ܐ”^[4] ݂

ܝܲܘܡܵܢܵܐ: ܣܘܿܓ݂ܐܵܐ ܕܐܵܖܸ̈ܡܢܵܝܹܐ ܕܥܝܼܪܵܐܩ ܝܼܠܲܝܗܝ ܡܼܢ ܡܦܲܨܝܹ̈ܐ (ܦܖ̈ܝܼܩܹܐ: من الناجين) ܡܼܢ ܦܲܖ̈ܡܵܢܹܐ (ܦܘܼܣܩܵܢܹ̈ܐ ܖ̈ܘܼܫܡܵܝܹܐ ܡܼܢ ܫܘܼܠܛܵܢܵܐ ܥܘܼܬ݂ܡܵܢܵܝܵܐ) ܕܲܩܛܵܠ ـ ܥܲܡܵܐ ܕܣܲܝܦܘܿ ܕܫܲܢ݇ܬܐ ܕ1915 ݂ ܘܦܝܼܫܹ̈ܐ ܝܠܲܝܗܝ ܡܘܼܢܫܝܼܹܐ ܡܼܢ ܓܹܒܵܐ ܦܘܿܠܝܼܛܝܼܩܵܝܵܐ: ܐܸܠܵܐ ܝܼܕܝܼܥܹ̈ܐ ܝܠܲܝܗܝ ܒܚܘܼܒܲܝܗܝ ܩܵܐ ܐܲܬ݂ܪܵܐ: ܘܲܒܚܘܼܒܲܝܗܝ ܠܛܘܼܘܵܪܵܐ ܕܐܲܝܟܲܢܵܝܘܼܬܲܝܗܝ ܝܘܼܠܦܵܢܵܝܬܐ ܘܲܟܢܘܼܫܝܵܝܬܐ ܘܬܲܘܕܝܼܬܵܢܵܝܬܐ ݂

ܘܐܵܖܸ̈ܡܢܵܝܹܐ ܕܥܝܼܪܵܐܩ ܒܣܘܿܓ݂ܐܲܝܗܝ: ܝܼܠܲܝܗܝ ܡܼܢ ܗܲܕܵܡܹ̈ܐ ܕܥܹܕܬܐ ܐܵܪܸܡܢܵܝܬܐ ܫܠܝܼܚܵܝܬܐ (ܕܝܼܠܵܗ̇ ܚܕܵܐ ܥܹܕܬܐ ܫܪܝܼܬܐ: ܡܼܢ ܡܲܘܠܵܕܵܗ̇ ܐܲܘ ܫܘܼܬܐܵܣܵܗ̇ ܒܫܲܢ݇ܬܐ ܕ301): ܘܐܝܼܬ ܚܲܕܟܡܵܐ ܡܸܢܲܝܗܝ ܕܝܼܠܲܝܗܝ ܗܲܕܵܡܹ̈ܐ ܘܲܡܗܘܼܡܢܹ̈ܐ ܕܥܹܕܬܐ ܩܵܬ݂ܘܿܠܝܼܩܵܝܬܐ^[5]: ܘܚܲܕܟܡܵܐ ܐ݇ܚܹܖ̈݇ܢܹܐ ܗܲܕܵܡܹ̈ܐ ܝܠܲܝܗܝ ܕܚܲܕ ܟܢܘܼܫܝܵܐ ܙܥܘܿܪܵܐ ܕܥܹܕܬܐ ܐܹܘܲܢܓܲܠܵܝܬܐ ݂

ܡܼܢ ܒܵܬܲܪ ܡܲܢܦܲܠܬܐ ܕܛܲܟܣܵܐ ܕܨܲܕܵܐܡ ܚܘܼܣܲܝܢ ܒܫܲܢ݇ܬܐ ܕ2003: ܣܪܹܐ ܠܹܗ ܩܵܐܹܡ ܕܐܲܬ݂ܪܵܐ ܠܚܲܕ ܕܲܪܓ݂ܵܐ ܪܲܒܵܐ: ܘܐܵܦ ܣܝܼ̈ܥܵܬ݂ܐ ܐܸܣܠܵܡܵܝܹ̈ܐ ܕܡܵܦܝܵܐ ܕܲܗܘܹܐ ܠܗ݇ܘܿܢ ܕܲܠܩܘܼܒ݂ܠ ܡܫܝܼܚܵܝܹ̈ܐ: ܗܘܹܐ ܠܹܗ ܢܝܼܫܲܝܗܝ ܐܵܦ ܐܵܖܸ̈ܡܢܵܝܹܐ ܥܝܼܖ̈ܵܩܵܝܹܐ ܘܥܹܕܵܬܲܝܗܝ ݂ ܒܝܘܿܡ 1 ܒܐܵܒ 2004: ܨܦܸܚܠܗ݇ܘܿܢ ܒܡܲܦ̈ܩܵܥܵܬ݂ܐ ܥܲܠ ܟܵܬܸܕܪܵܐܝܼܐ ܩܵܬ݂ܘܿܠܝܼܩܵܝܬܐ ܐܵܪܸܡܢܵܝܬܐ (ܣܲܝܕܵܐ ܐܲܠܘܲܪܕܝܼܵܐ) ܓܲܘ ܒܲܓ݂ܕܵܕ ܒܡܲܫܪܝܼܬܐ ܕ(ܐܲܠܟܲܪܵܕܵܐ) ݂ ܘܚܲܪܬܐ ܨܦܸܚܠܗ݇ܘܿܢ ܐܵܦ ܥܲܠ ܚܕܵܐ ܥܹܕܬܐ ܐܵܪܸܡܢܵܝܬܐ ܐ݇ܚܹܪ݇ܬܐ ܓܲܘ ܡܲܘܨܸܠ ܕܝܼܗ݇ܘܵܐ ܒܛܲܘܪܵܐ ܕܒܸܢܝܵܢܵܐ ܒܝܘܿܡ 4 ܒܟܵܢܘܿܢ ܩܲܕܡܵܝܵܐ 2004 ݂ ܩܘܼܪܒܵܒܵܐ ܕܥܸܣܪܝܼܢ ܫܸܢܹ̈ܐ: ܗܘܹܐ ܠܵܗ̇ ܡܲܦܠܲܛܬܐ ܘܲܥܪܵܩܵܐ ܪܲܒܵܐ ܕܐܵܖܸ̈ܡܢܵܝܹܐ ܡܼܢ ܥܝܼܪܵܐܩ ܟܖ̈ܝܼܟ݂ܐ ܒܥܸܢܦܵܐ ܘܲܛܠܘܼܡܝܵܐ ݂ ܡܼܢ ܩܕܵܡ 2003: ܡܸܢܝܵܢܵܐ ܕܐܵܖܸ̈ܡܢܵܝܹܐ ܓܲܘ ܥܝܼܪܵܐܩ: ܡܵܛܹܐ ܗ݇ܘܵܐ ܠـ (25000) ܐܲܠܦܹ̈ܐ ܢܸܫܡܹ̈ܐ: ܐܸܠܵܐ ܝܲܘܡܵܢܵܐ ܪܵܡܙܝܼ ܦܵܩܘܿܕܹ̈ܐ ܘܥܲܠܠܵܢܹ̈ܐ ܕܲܟܢܘܼܫܝܵܐ ܠـ (10000) ܠܥܲܕ (13000) ܐܲܠܦܹ̈ܐ ܐܵܖܸ̈ܡܢܵܝܹܐ ܐܝܼܬ ܦܝܵܫܵܐ ܓܲܘ ܥܝܼܪܵܐܩ: ܦܲܠܓܲܝܗܝ ܗܵܠܵܐ ܟܹܐ ܚܵܝܝܼ ܓܲܘ ܒܲܓ݂ܕܵܕ ݂ ܘܦܵܝܫܵܢܵܐ ܚܵܝܝܼ ܓܲܘ ܟܘܼܪܕܸܣܬܵܐܢ ܕܥܝܼܪܵܐܩ: ܘܟܲܪܟܘܼܟ: ܘܣܘܼܠܲܝܡܵܢܝܼܵܐ: ܘܐܵܦ ܓܲܘ ܒܲܨܪܵܐ: ܘܠܲܝܬ ܦܝܵܫܵܐ ܐܵܖܸ̈ܡܢܵܝܹܐ ܓܲܘ ܡܲܘܨܸܠ ݂

__________

[1] ܐܘܿܣܪܘܿܘܹܝܢ (ܖ̄ܗܘܿܡܵܢܵܝܹܐ): ܝܼܠܲܝܗܝ ܥܵܡܘܿܖܹ̈ܐ ܕ(ܐܲܕܝܼܣܵܐ): ܕܝܼܠܵܗ̇ ܚܕܵܐ ܡܕܝܼܢ݇ܬܐ ܟܲܒܝܼܪܬܐ ܡܼܢ ܕܵܖܹ̈ܐ ܩܲܕܝܼܡܵܝܹ̈ܐ: ܡܼܢ ܩܕܵܡ ܕܦܵܝܫܵܐ ܗ݇ܘܵܐ ܚܲܕ ܡܼܢ ܡܲܒܘܼܥܹ̈ܐ ܖܹ̈ܫܵܝܹܐ ܠܲܦܪܵܣܵܐ ܡܫܝܼܚܵܝܘܼܬܐ ݂ ܠܦܘܼܬ݂ ܝܘܼܒܵܠ̈ܐ ܐܵܖܸ̈ܡܢܵܝܹܐ: ܡܲܠܟܵܐ ܕܐܲܕܝܼܣܵܐ ܘܐܵܪܡܝܼܢܝܵܐ (ܐܲܒ݂ܓܲܪ ܚܡܝܼܫܵܝܵܐ): ܒܥܹܐ ܠܹܗ ܕܲܡܩܲܒܸܠ ܠܲܡܫܝܼܚܵܐ ܓܲܘ ܡܲܠܟܘܼܬܹܗ: ܘܲܡܫܘܼܕܸܪܹܗ ܐܸܠܹܗ ܚܕܵܐ ܐܸܓܲܪܬܐ ܒܗܵܢܵܐ ܡܠܘܿܐܵܐ ݂ ܡܫܝܼܚܵܐ ܠܵܐ ܐܬܹܐ ܠܹܗ ܠ(ܐܲܕܝܼܣܵܐ): ܐܸܠܵܐ ܚܲܕ ܡܼܢ ܬܲܠܡܝܼܕܲܘܗ̈ܝ (ܐܲܕܲܝ) ݂ ܒܵܬܲܪܟܸܢ ܦܝܼܫܠܵܗ̇ ܩܪܝܼܬܐ ܐܲܕܝܼܣܵܐ ܒܫܸܡ: (ܐܘܿܪܦܵܐ): ܘܡܼܢ ܫܲܢ݇ܬܐ ܕ1984: ܦܝܼܫܠܵܗ̇ ܩܪܝܼܬܐ (ܣܵܢܠܝܼ ܐܘܿܪܦܵܐ ܓܲܘ ܬܘܼܪܟܝܼܵܐ) ݂

[2] ܚܙܝܼ: ܐܵܪܡܝܼܢܝܵܐ: ܐܲܛܠܲܣ ܕܬܲܫܥܝܼܬܐ: ܦ 22 ܘܡܵܦܵܐ ܦ 23: ܛܲܒ݂ܥܵܐ ܕܡܲܒܘܼܥܹ̈ܐ ܡܼܢ ܐܵܪܡܝܼܢܝܵܐ 2017 ݂

[3] ܡܲܒܘܼܥܵܐ: ܐܝܼܙܓܲܕܘܼܬܐ ܐܵܪܸܡܢܵܝܬܐ ܓܲܘ ܒܲܓ݂ܕܵܕ ݂

[4] ܚܙܝܼ: ܐܲܒܝܼܕܘܼܬ݂ܐ ܕܥܵܖ̈ܘܿܩܹܐ ܐܵܖܸ̈ܡܢܵܝܹܐ ܥܘܼܬ݂ܡܵܢܵܝܹ̈ܐ ܓܲܘ ܡܲܫܖ̈ܝܵܬ݂ܐ ܕܐܲܣܝܼܖܹ̈ܐ ܓܲܘ ܣܘܼܪܝܵܐ ܘܒܹܝܬ ܢܲܗܖ̈ܝܼܢ: ܡܸܢܝܵܢܵܐ ܕܝܼܠܵܢܵܝܵܐ ܡܼܢ ܡܓ݂ܠܬܐ (ܬܲܫܥܝܼܬܐ ܕܵܪܵܝܬܐ ܕܐܵܪܸܡܝܼܢܝܵܐ): ܡܢܵܬ݂ܐ 2: 1998: ܪܝܼܡܘܿܢܕ ܐܹܝܟ̰ ܟܝܼܦܘܿܪܟܝܵܐܢ: ܦ 15 ݂

[5] ܡܼܢ ܡܲܘܬܒ݂ܵܐ ܐܸܠܟܸܬܪܘܿܢܵܝܵܐ ܕܐܝܼܙܓܲܕܘܼܬܐ ܐܵܪܸܡܢܵܝܬܐ ܓܲܘ ܥܝܼܪܵܐܩ: ܡܵܨܹܝܚ ܕܩܵܪܹܝܚ ܡܵܐ ܕܒܐܝܼܬܵܝܵܐ ܝܠܹܗ: ܒܫܲܢ݇ܬܐ ܕ 1914: ܡܸܢܝܵܢܵܐ ܕܐܵܖܸ̈ܡܢܵܝܹܐ ܝܼܗ݇ܘܵܐ (300) ܦܲܖ̈ܨܘܿܦܹܐ ݂ ܒܵܬܲܪ ܦܠܵܫܵܐ ܬܹܒܹܝܠܵܝܵܐ ܩܲܕܡܵܝܵܐ ܠܥܲܕ 2003: ܦܝܼܫܠܗ݇ܘܿܢ (3000) ܦܲܖ̈ܨܘܿܦܹܐ ݂ ܒܝܲܘܡܵܢܵܐ ܐܝܼܬ ܩܘܼܪܒܵܐ ܠـ 200 ـ 250 ܝܼܩܖ̈ܵܬ݂ܐ ݂ ܐܵܖܸ̈ܡܢܵܝܹܐ ܩܵܬ݂ܘܿܠܝܼܩܵܝܹ̈ܐ ܐܝܼܬ ܠܗ݇ܘܿܢ ܬܲܪܬܹܝܢ ܥܹܕܵܬ̈ܐ: ܗܿܝ ܩܲܕܡܵܝܬܐ ܒܫܸܡ (ܣܲܝܕܵܐ ܐܲܠܘܲܪܕܝܼܵܐ) ܦܝܼܫܠܵܗ̇ ܒܢܝܼܬܐ ܒܫܲܢ݇ܬܐ ܕ 1844: ܘܗܿܝ ܕܬܲܪܬܹܝܢ ܒܫܸܡ (ܠܸܒܵܐ ܕܝܼܫܘ݁ܥ ܩܲܕܝܼܫܵܐ) ܕܦܝܼܫܠܵܗ̇ ܒܢܝܼܬܐ ܒܫܲܢ݇ܬܐ ܕ 1937 ݂ ܒܫܲܢ݇ܬܐ ܕ 1997 ܦܝܼܫܠܵܗ ܡܚܘܼܕܲܬ݂ܬܐ ܥܹܕܬܐ ܐܸܣܵܝܬܐ ܕܐܵܖܸ̈ܡܢܵܝܹܐ ܩܵܬ݂ܘܿܠܝܼܩܵܝܹ̈ܐ ܕܝܼܠܵܗ̇ ܡܼܢ ܥܹܕܵܬ̈ܐ ܛܵܒ݂ ܖ̈ܲܒܹܐ ܕܓܲܘ ܒܲܓ݂ܕܵܕ ݂ ܘܡܲܛܪܵܢ ܥܲܡܵܢܘܼܐܹܝܠ ܕܵܒܲܓ݂ܝܵܐܢ: ܝܼܠܹܗ ܪܹܫ ܐܲܦܸܣܩܘܿܦܹ̈ܐ ܕܐܵܖܸ̈ܡܢܵܝܹܐ ܩܵܬ݂ܘܿܠܝܼܩܵܝܹ̈ܐ ܓܲܘ ܥܝܼܪܵܐܩ ݂

ܒܫܲܢ݇ܬܐ ܕ1914: ܡܸܢܝܵܢܵܐ ܕܐܵܖܸ̈ܡܢܵܝܹܐ ܩܵܬ݂ܘܿܠܝܼܩܵܝܹ̈ܐ ܓܲܘ ܥܝܼܪܵܐܩ ܝܼܗ݇ܘܵܐ 300 ܢܸܫܡܹ̈ܐ ݂ ܒܹܝܬ ܚܘܼܬܵܡܵܐ ܕܲܦܠܵܫܵܐ ܬܹܒܹܝܠܵܝܵܐ ܩܲܕܡܵܝܵܐ ܠܲܢܦܵܠܬܐ ܕܛܲܟ݂ܣܵܐ ܒܲܥܬ݂ܵܝܵܐ ܒܫܲܢ݇ܬܐ ܕ2003: ܡܛܹܐ ܠܹܗ ܡܸܢܝܵܢܵܐ ܕܲܒܢܲܝ̈ ܫܲܪܒܬܐ ܐܵܪܸܡܢܵܝܬܐ ܩܵܬ݂ܘܿܠܝܼܩܵܝܬܐ ܠ 3000 ܦܲܖ̈ܨܘܿܦܹܐ ݂ ܐܝܼܢܵܐ ܡܼܢ ܗܿܘ ܙܲܒ݂ܢܵܐ: ܒܨܸܪܹܗ ܡܸܢܝܵܢܲܝܗܝ ܒܥܸܠܬܐ ܕܠܲܝܬܵܝܘܼܬ݂ ܫܲܝܢܵܐ ܘܲܪܕܘܼܦܝܵܐ ܕܲܡܫܝܼܚܵܝܹ̈ܐ ݂ ܒܫܲܢ݇ܬܐ ܕ2012: ܐܝܼܬ ܗ݇ܘܵܐ 1650 ܦܲܖ̈ܨܘܿܦܹܐ ܡܼܢ ܐܵܖܸ̈ܡܢܵܝܹܐ ܩܵܬ݂ܘܿܠܝܼܩܵܝܹ̈ܐ ܡܘܼܥܡܸܕܹ̈ܐ ܓܲܘ ܥܝܼܪܵܐܩ (ܒܲܓ݂ܕܵܕ)[1] ݂

ܦܝܼܫܠܵܗ̇ ܡܫܘܼܬܐܲܣܬܐ ܡܲܪܥܝܼܬܐ ܕܐܵܖܸ̈ܡܢܵܝܹܐ ܩܵܬ݂ܘܿܠܝܼܩܵܝܹ̈ܐ ܓܲܘ ܒܲܓ݂ܕܵܕ ܒܣܝܼܩܘܿܡ 29 ܒܲܚܙܝܼܪܵܢ 1954: ܐܲܝܟܵܐ ܕܐܝܼܬ ܗ݇ܘܵܐ ܒܸܚܝܵܝܵܐ ܓܲܘ ܥܝܼܪܵܐܩ ܐܲܠܦܵܝܹ̈ܐ ܕܐܵܖܸ̈ܡܢܵܝܹܐ ܩܵܬ݂ܘܿܠܝܼܩܵܝܹ̈ܐ ݂ ܗܵܕܹܐ ܡܲܪܥܝܼܬܐ ܝܼܠܵܗ̇ ܬܚܘܿܬ ܫܘܼܠܛܵܢܵܐ ܕܦܵܛܪܝܼܵܪܟܘܼܬܐ ܕ(ܟܝܼܠܝܼܟܝܵܐ) ܕܐܵܖܸ̈ܡܢܵܝܹܐ ܩܵܬ݂ܘܿܠܝܼܩܵܝܹ̈ܐ: ܩܸܢܛܪܘܿܢܵܗ̇ ܝܼܠܹܗ ܓܲܘ (ܒܙܘܿܡܡܵܪ) ܒܠܸܒ݂ܢܵܢ ݂

ܐܝܼܬ ܓܲܘ ܒܲܓ݂ܕܵܕ ܬܲܪܬܹܝܢ ܥܹܕܵܬܐ ܬܵܒܥܹ̈ܐ ܠܥܹܕܬܐ ܕܐܵܖܸ̈ܡܢܵܝܹܐ ܩܵܬ݂ܘܿܠܝܼܩܵܝܹ̈ܐ ܓܲܘ ܥܝܼܪܵܐܩ: ܟܵܬܸܕܪܵܐܝܼܵܐ ܕܡܵܪܬܐ ܢܵܪܝܼܟ (ܡܵܪܬܐ ܕܗܲܒܵܒܹ̈ܐ): ܘܟܵܬܸܕܪܵܐܝܼܵܐ ܥܲܬܝܼܩܬܐ ܕܠܸܒܵܐ ܕܝܼܫܘܿܥ ݂

ܦܝܼܫܠܹܗ ܟܘܼܪܣܝܵܐ ܕܪܹܫܵܢܵܐ ܕܥܹܕܬܐ ܕܐܵܖܸ̈ܡܢܵܝܹܐ ܩܵܬ݂ܘܿܠܝܼܩܵܝܹ̈ܐ ܓܲܘ ܥܝܼܪܵܐܩ: ܣܦܝܼܩܵܐ ܡܼܢ ܝܲܘܡܵܐ ܕܡܲܘܬܐ ܕܪܹܫ ܐܲܦܸܣܩܘܿܦܹ̈ܐ ܐܝܼܡܵܢܘܼܐܹܝܠ ܕܵܒܵܓ݂ܝܵܐܢ ܒܝܲܘܡܵܐ ܕ13 ܒܐܝܼܠܘܿܠ 2018 ݂

__________

[1] Source: http://boowiki.info/art/dioceses-catholiques-en-irak/archieparchie-de-bagdad-des-armeniens.html#goto-2

ܦܝܼܫܬܐ ܝܠܵܗ̇ ܝܼܕܝܼܥܬܐ ܕܐܝܼܬ ܥܹܕܬܐ ܕܐܵܖܸ̈ܡܢܵܝܹܐ ܩܵܬ݂ܘܿܠܝܼܩܵܝܹ̈ܐ ܓܲܘ ܒܲܓ݂ܕܵܕ ܡܼܢ ܫܲܢ݇ܬܐ ܕ1844 ݂ ܦܝܼܫܠܹܗ ܡܘܼܬܒ݂ܵܐ ܟܹܐܦ ܫܘܼܬܐܵܣܵܐ ܠܥܹܕܬܐ ܕܠܸܒܵܐ ܕܝܼܫܘܿܥ ܕܐܵܖܸ̈ܡܢܵܝܹܐ ܩܵܬ݂ܘܿܠܝܼܩܵܝܹ̈ܐ ܓܲܘ ܒܲܓ݂ܕܵܕ ܒܫܲܢ݇ܬܐ ܕ1937: ܘܦܝܼܫܠܵܗ̇ ܣܝܼܡܬܐ ܒܝܲܕ ܡܲܛܪܵܢ ܠܝܼܘܝܼܣ ܒܲܛܵܢܝܵܐܢ ܒܝܲܘܡܵܐ ܕ(3) ܒܢܝܼܣܵܢ 1938 ݂

ܦܝܼܫܠܵܗ̇ ܒܢܝܼܬܐ ܥܹܕܬܐ ܒܛܲܝܒܘܼܬܐ ܕܦܘܼܖ̈ܥܵܢܹܐ ܕܐܲܚ̈ܘܵܬܐ (ܚܵܬܘܵܬ̈ܐ): ܡܝܼܢܵܐ: ܘܬܹܝܪܝܼܙܝܵܐ ܘܦܹܝܪܓ̰ܝܼܢܵܐ: ܒܢܵܬܐ ܕ(ܐܲܢܛܘܿܢ ܟܲܣܦܲܪܚܵܐܢ) ݂

ܦܝܼܫܠܹܗ ܥܒ݂ܝܼܕܵܐ ܙܘܼܝܵܚܵܐ ܒܪܵܒܵܐ ܦܘܼܖ̈ܣܹܐ ܐܵܢܲܢܩܵܝܹ̈ܐ ܓܲܘ ܗܵܕܹܐ ܥܹܕܬܐ: ܒܫܲܢ݇ܬܐ ܕ2012 ܗܘܹܐ ܠܹܗ ܙܘܼܝܵܚܵܐ ܕܕܘܼܟ݂ܪܵܢܵܐ ܕ(75) ܫܸܢܹ̈ܐ ܥܲܠ ܫܘܼܬܐܵܣܵܗ̇ ݂ ܗܵܕܹܐ ܥܹܕܬܐ ܐܝܼܬ ܠܵܗ̇ ܬܲܫܥܝܼܬܐ ܥܲܬܝܼܪܬܐ ܘܝܲܪܝܼܟ݂ܬܐ ܠܪܵܒܵܐ ܕܘܼܟ݂ܖ̈ܵܢܹܐ: ܘܲܠܗܵܫܵܐ ܢܛܝܼܪܬܐ ܝܠܵܗ̇ ܠܚܘܼܦܵܛܵܗ̇ ܐܵܦܸܢ ܕܐܝܼܬ ܟܵܬܸܕܪܵܐܝܼܵܐ ܕܡܵܪܬܐ ܢܵܪܝܼܟ(ܡܵܪܬܐ ܕܗܲܒܵܒܹ̈ܐ) ܒܲܫܒ݂ܵܒ݂ܘܼܬܵܗ̇: ܘܡܲܦܠܲܚܬܵܗ̇ ܒܐܲܡܝܼܢܘܼܬ݂ܐ ܡܼܢ ܝܘܿܡ ܦܘܼܬܵܚܵܗ̇ ܒܫܲܢ݇ܬܐ ܕ1998 ݂

ܒܨܲܦܪܵܐ ܕܟܠ ܝܲܘܡܵܐ ܕܲܥܪܘܼܒ݂ܬܐ: ܐܝܼܬ ܙܘܼܝܵܚܵܐ ܒܩܘܼܕܵܫܵܐ ܐܲܠܵܗܵܝܵܐ ܓܲܘ ܥܹܕܬܐ ܕܠܸܒܵܐ ܕܝܼܫܘܿܥ ܕܐܵܖܸ̈ܡܢܵܝܹܐ ܩܵܬ݂ܘܿܠܝܼܩܵܝܹ̈ܐ: ܘܐܝܼܬ ܪܵܒܵܐ ܚܘܼܦܵܛܹ̈ܐ ܓܲܘ ܡܲܪܥܝܼܬܐ ܠܲܢܛܵܪܵܐ ܕܗܵܢ ܒܸܢܝܵܢܵܐ ܥܲܬܝܼܩܵܐ ݂

ܦܝܼܫܠܵܗ̇ ܒܢܝܼܬܐ ܥܹܕܬܐ ܕܠܸܒܵܐ ܕܝܼܫܘܿܥ ܕܐܵܖܸ̈ܡܢܵܝܹܐ ܩܵܬ݂ܘܿܠܝܼܩܵܝܹ̈ܐ ܒܝܲܕ ܡܲܚܵܪܵܐ ܘܲܡܣܲܟܡܵܢܵܐ (مصمم) (ܓ̰ܘܼܙܹܝܦ ܣܝܼܪܘܿܒ ܣܝܼܣܠܝܵܐܢ) ݂

 ܠܵܐ ܚܵܒܹܫ ܗܵܢ ܒܸܢܝܵܢܵܐ ܠܕܝܼܠܵܝܵܬܐ ܕܡܲܚܵܪܘܼܬܐ ܐܵܪܸܡܢܵܝܬܐ ܝܘܼܒܵܠܵܝܬܐ ܩܲܕܝܼܫܬܐ: ܒܗܿܝ ܕܝܼܠܵܗ̇ ܚܕܵܐ ܥܹܕܬܐ ܒܢܝܼܬܐ ܥܲܠ ܐܸܣܟܹܝܡܵܐ ܡܲܥܪܒ݂ܵܝܵܐ ܡܵܪܹܐ ܣܘܼܟܵܡܵܐ ܒܵܙܝܼܠܝܼܟܵܝܵܐ: ܡܵܛܹܐ ܝܘܼܪܟ݂ܵܗ̇ ܠ(22) ܡܝܼܬܖܹ̈ܐ ܘܦܸܬ݂ܘܵܗ̇ ܠ(10) ܡܝܼܬܖܹ̈ܐ ݂ ܦܝܼܫܠܹܗ ܡܘܼܦܠܸܚܵܐ ܐܵܓ݂ܘܿܪܵܐ ܛܝܼܢܵܝܵܐ ܓܲܘ ܒܸܢܝܵܢܵܐ: ܘܐܵܗܵܐ ܡܲܝܕܘܿܥܹܐ ܝܠܹܗ ܠܗܝܼܵܝܘܼܬܐ ܕܗܵܢ ܒܸܢܝܵܢܵܐ ܥܝܼܪܵܩܵܝܵܐ: ܘܒܲܝܬܵܝܘܼܬܹܗ ܠܐܲܬ݂ܪܵܐ ܕܒܹܝܬ ܢܲܗܖ̈ܝܼܢ: ܘܐܝܼܬ ܗ݇ܘܵܐ ܝܲܨܝܼܦܘܼܬܐ ܒܣܸܩܠܵܐ ܘܲܢܛܝܼܪܘܼܬܐ ܕܗܵܕܹܐ ܥܹܕܬܐ ܒܚܲܕ ܙܢܵܐ ܓܡܝܼܪܵܐ ݂

ܥܹܕܬܐ ܕܠܸܒܵܐ ܕܝܼܫܘܿܥ ܕܐܵܖܸ̈ܡܢܵܝܹܐ ܩܵܬ݂ܘܿܠܝܼܩܵܝܹ̈ܐ: ܦܪܝܼܫܬܐ ܝܠܵܗ̇ ܘܡܸܬܪܲܫܡܵܢܬܐ ܒܣܘܼܟܵܡܵܗ̇ ܥܝܼܩܵܐ ܘܨܲܘܝܵܐ (النحيل) ݂ ܡܝܼܛܘܿܦܵܗ̇ (واجهتها) ܫܲܦܝܼܪܵܐ ܝܠܹܗ: ܘܡܵܪܹܐ ܥܲܡܘܼܕܹ̈ܐ ܘܬܵܓܹ̈ܐ ܥܲܠ ܬܪܹܝܢ ܫܲܘܝܹ̈ܐ: ܡܣܘܼܩܲܠܬܐ ܝܠܵܗ̇ ܒܨܘܼܒܵܬܹ̈ܐ ܕܲܨܠܝܼܒ݂ܵܢܹ̈ܐ ܬܠܝܼܬܲܝ̈ ܒܘܼܥܕܹ̈ܐ ݂ ܒܪܹܫ ܡܲܥܠܵܢܵܐ: ܬܚܘܿܬ ܚܲܕ ܨܲܠܡܵܐ ܬܠܝܼܬܲܝ̈ ܒܘܼܥܕܹ̈ܐ: ܐܝܼܬ ܚܕܵܐ ܩܘܼܒܬܐ ܒܪܹܫ ܬܲܪܥܵܐ ܡܲܠܟܵܝܵܐ ܕܚܵܒܹܫ ܠܓܘܼܫܡܵܐ ܟܬܝܼܒ݂ܵܐ ܐܲܝܟ݂ ܕܫܘܼܟܵܢܵܐ ܕܐܵܗܵܐ ܒܸܢܝܵܢܵܐ: ܕܦܝܼܫܠܹܗ ܓܠܝܼܦܵܐ ܥܲܠ ܟܹܐܦܵܐ ܒܲܬܪܹܝܢ ܠܸܫܵܢܹ̈ܐ: ܐܵܪܸܡܢܵܝܵܐ ܘܥܲܪܒ݂ܵܝܵܐ ݂ ܘܐܝܼܬ ܚܕܵܐ ܨܸܒܬܐ ܕܟܹܐ ܡܣܲܩܠܵܐ ܠܲܡܢܵܬܐ ܥܠܵܝܬܐ ܕܗܵܢ ܡܝܼܛܘܿܦܵܐ: ܘܢܵܦܹܠ ܒܘܼܪܓܵܐ ܕܢܵܩܘܿܫܵܐ ܒܪܹܫ ܐ݇ܓܵܪܹܐ ܕܥܹܕܬܐ: ܘܥܵܠܹܐ ܠܹܗ ܚܲܕ ܨܠܝܼܒ݂ܵܐ ܬܠܝܼܬܲܝ̈ ܒܘܼܥܕܹ̈ܐ ݂

ܐܝܼܬ ܠܵܗ̇ ܥܹܕܬܐ ܬܠܵܬܵܐ ܡܲܥܠܵܢܹ̈ܐ: ܚܲܕ ܡܲܥܠܵܢܵܐ ܠܲܩܕܵܡܵܐ ܘܲܬܪܹܝܢ ܠܓܹܒܵܢܹ̈ܐ ݂ ܘܐܝܼܬ ܒܪܹܫ ܥܹܕܬܐ ܚܕܵܐ ܩܘܼܒܬܐ: ܘܲܦܪܝܼܫܵܐ ܝܠܹܗ ܗܲܝܟܠܵܐ ܡܼܢ ܡܲܥܒܖܹ̈ܐ ܓܹܒܵܢܵܝܹ̈ܐ: ܕܐܝܼܬ ܠܗ݇ܘܿܢ ܥܲܡܘܼܕܹ̈ܐ ܫܝܼܫܵܝܹ̈ܐ ܕܡܝܼܖܹ̈ܐ ܡܵܖ̈ܲܝ ܬܵܓܹ̈ܐ ݂ ܦܪܝܼܫܵܐ ܝܠܹܗ ܩܘܼܕܵܫ ܩܘܼܕܫܹܐ ܡܼܢ ܗܲܝܟܠܵܐ ܕܥܹܕܬܐ ܒܡܸܨܥܵܝܘܼܬܐ ܕܚܲܕ ܦܪܲܩܛܹܣܵܐ (حاجز) ܐܲܘ ܣܸܬܪܵܐ ܩܲܝܣܵܝܵܐ ݂ ܦܝܼܫܠܹܗ ܡܣܲܟܡܵܐ ܡܲܕܒܚܵܐ ܕܪܝܼܡܵܐ ܝܠܹܗ ܡܼܢ ܫܲܘܝܘܼܬ݂ ܐܲܪܥܵܐ ܡܼܢ ܫܝܼܫܵܐ (رخام): ܐܝܼܬ ܓܵܘܹܗ ܨܲܠܡܵܐ ܕܡܵܪܲܢ ܝܼܫܘܿܥ ܡܫܝܼܚܵܐ ܒܵܠܹܗ ܠܓܘܼܕܵܐ ܕܓܸܢܝܵܢܵܐ ܦܲܠܓܘܿ ܚܘܼܕܪܵܢܵܝܵܐ ݂ ܘܡܲܥܒܖܹ̈ܐ ܓܹܒܵܢܵܝܹ̈ܐ ܚܵܝܪܝܼ ܥܲܠ ܬܪܹܝܢ ܐܵܘܵܢܹ̈ܐ ܢܙܝܼܖܹ̈ܐ ܘܲܖ̈ܫܝܼܡܹܐ ܠܩܲܕܝܼܫܵܐ ܝܲܘܣܸܦ: ܘܡܲܪܝܲܡ ܒܬܘܼܠܬܐ ݂ ܒܸܢܝܵܢܵܐ ܦܝܼܫܵܐ ܝܠܹܗ ܡܣܲܩܠܵܐ ܝܠܹܗ: ܘܟܹܐ ܗܵܘܹܐ ܠܹܗ ܢܛܝܼܪܘܼܬܐ ܓܡܝܼܪܬܐ ݂

ܘܐܝܼܬ ܚܕܵܪ ܥܹܕܬܐ ܕܠܸܒܵܐ ܕܝܼܫܘܿܥ ܕܐܵܖܸ̈ܡܢܵܝܹܐ ܩܵܬ݂ܘܿܠܝܼܩܵܝܹ̈ܐ: ܩܲܒ݂ܖ̈ܵܘܵܬܐ ܕܲܡܗܘܼܡܢܹ̈ܐ: ܘܡܸܢܲܝܗܝ ܩܲܒ݂ܪܵܐ ܕܐܲܒ݂ܵܐ ܒܘܿܓ݂ܘܿܣ ܣܲܪܓܝܼܣ: ܘܲܡܗܘܼܡܢܹ̈ܐ ܕܲܡܫܘܼܬܸܦܠܗ݇ܘܿܢ ܓܲܘ ܒܸܢܝܵܢܵܐ ܕܥܹܕܬܐ ݂