ܠܲܝܬ ܚܘܼܫܒܵܢܵܐ ܡܬܲܟܠܵܐ ܒܘܼܕ ܥܵܡܘܿܪܹ̈ܐ ܕܗܵܕܹܐ ܡܕܝܼܢ݇ܬܐ (ܘܲܒܗܵܢܵܐ ܐܲܬ݂ܪܵܐ): ܒܥܸܠܬܐ ܕܲܩܪ̈ܵܒ݂ܹܐ (ܦܠܵܫܹ̈ܐ) ܕܲܗܘܹܐ ܠܗ݇ܘܿܢ ܒܵܬܲܪ ܚܕܵܕܹ̈ܐ: ܘܡܸܬܙܝܼܥܵܢܘܼܬ݂ܐ (ܓ̰ܘܵܓ̰ܬܐ) ܐܲܡܝܼܢܵܝܬܐ ܕܥܵܡܘܿܪܹ̈ܐ ݂ ܘܥܲܡ ܗܵܕܹܐ: ܡܵܨܹܝܚ ܕܐܵܡܪܲܚ ܕܠܵܐ ܒܵܨܘܿܪܵܐ ܡܼܢ (40) ܐܲܠܦܹ̈ܐ ܠـ (50) ܐܲܠܦܹ̈ܐ ܦܲܪ̈ܨܘܿܦܹܐ: ܟܹܐ ܚܵܝܝܼ ܗ݇ܘܵܘ ܓܲܘ ܒܲܟ݂ܕܹܝܕܹܐ ܡܼܢ ܩܕܵܡ ܨܦܵܚܬܐ ܕܛܘܼܟܵܣܵܐ ܕܐܘܼܚܕܵܢܵܐ ܐܸܣܠܵܡܵܝܵܐ (ܕܵܥܹܫ) ݂ ܚܲܕܟܡܵܐ ܚܘܼܫܒܵܢܹ̈ܐ: ܟܒܲܪ ܐܝܼܬ ܡܲܙܝܲܕܬܐ ܓܵܘܲܝܗܝ: ܕܡܲܡܛܝܼ ܠܡܸܢܝܵܢܵܐ ܐܲܘ ܚܘܼܫܒܵܢܵܐ ܕܒܲܟ݂ܕܹܝܕܹܐ ܠـ (70) ܐܲܠܦܹ̈ܐ ܦܲܪ̈ܨܘܿܦܹܐ ݂ ܘܐܵܢܲܢܩܵܝܬܐ ܝܠܵܗ̇ ܡܬܲܘܣܲܦܬܐ (ܡܲܙܝܲܕܬܐ) ܕܐܲܠܦܵܝܹ̈ܐ (ܒܹܝܬ (5) ܐܲܠܦܹ̈ܐ ܠـ (13) ܐܲܠܦܹ̈ܐ) ܕܥܵܪ̈ܘܿܩܹܐ ܡܫܝܼܚܵܝܹ̈ܐ: ܕܦܝܼܫܠܗ݇ܘܿܢ ܡܘܼܥܪܸ̈ܩܹܐ ܡܼܢ ܕܘܼܟܵܢܲܝܗܝ ܩܛܝܼܪܵܐܝܼܬ (ܒܲܪܕܘܼܦܝܵܐ ܘܚܲܝܠܵܐ): ܘܐܵܢܝܼ ܐܬܹܐ ܠܗ݇ܘܿܢ ܡܼܢ ܒܲܓ݂ܕܵܕ ܘܡܲܘܨܸܠ: ܘܲܡܛܹܐ ܠܗ݇ܘܿܢ ܠܒܲܟ݂ܕܹܝܕܹܐ ܡܼܢ ܫܲܢ݇ܬܐ ܕ 2013 : ܐܲܝܟܵܐ ܕܦܝܼܫܠܗ݇ܘܿܢ ܒܸܢܝܹܐ ܡܲܫܪ̈ܝܵܬܐ ܐܲܡܝܼܢܵܝܹ̈ܐ ܠܚܲܝܘܼܬܲܝܗܝ ݂

ܘܡܵܐ ܕܝܼܠܹܗ ܩܵܐܹܡ ܕܥܵܡܘܿܪܹ̈ܐ ܕܲܡܕܝܼܢ݇ܬܐ: ܩܘܼܪܒܵܐ ܠـ (90) ܓܲܘ ܐܸܡܵܐ (ܡܵܐܐ) ܡܼܢ ܥܵܡܘܿܪܹ̈ܐ ܕܒܲܟ݂ܕܹܝܕܹܐ ܝܗ݇ܘܵܘ ܡܼܢ ܐ݇ܣܘܼܪ̈ܵܝܹܐ ܩܵܬ݂ܘܿܠܝܼܩܵܝܹ̈ܐ: ܘܲܡܢܵܬܐ ܐ݇ܚܹܪܬܐ ܦܠܝܼܓ݂ܬܐ ܝܠܵܗ̇ ܒܲܝܢܵܬ݂ ܐ݇ܣܘܼܪ̈ܵܝܹܐ ܟܲܠܕܵܝܹ̈ܐ ܘܐ݇ܣܘܼܪ̈ܵܝܹܐ ܐܲܪ̈ܬܘܿܕܘܿܟܣܵܝܹܐ: ܘܐܝܼܬ ܬܘܼܒ݂ ܚܕܵܐ ܡܢܵܬܐ ܪܵܒܵܐ ܙܥܘܿܪܬܐ ܡܼܢ ܐܲܪܸ̈ܡܢܵܝܹܐ ܐܲܪ̈ܬ݂ܘܿܕܘܿܟܣܵܝܹܐ ݂ ܐܝܼܢܵܐ ܗܵܝ ܡܕܝܼܢ݇ܬܐ ܕܚܒ݂ܝܼܫܵܐܝܼܬ ܦܝܼܫܬܐ ܝܼܗ݇ܘܵܐ ܚܫܝܼܒ݂ܬܐ ܡܕܝܼܢ݇ܬܐ ܡܫܝܼܚܵܝܬܐ ܡܼܢ ܩܕܵܡ ܫܲܢ݇ܬܐ ܕ 1980: ܚܙܹܐ ܠܵܗ̇ ܡܛܵܝܬܐ ܕܥܸܣܪ̈ܵܝܹܐ ܕܝܼܩܪ̈ܵܬ݂ܐ ܡܘܼܫܸܠܡܵܢܹ̈ܐ: ܠܦܘܼܬ݂ ܦܘܿܠܝܼܛܝܼܩܝܼ ܕܡܲܥܪܲܒ݂ܬܐ (ܥܒ݂ܵܕܬܐ ܕܐ݇ܢܵܫܹ̈ܐ ܥܲܪ̈ܒ݂ܵܝܹܐ ܒܚܲܝܠܵܐ) ܕܫܸܛܚܵܐ ܕܢܝܼܢܘܹܐ ܕܲܥܒܼܸܕ ܠܹܗ ܨܲܕܵܐܡ ܗܘܿܣܲܝܢ ݂

ܟܹܐ ܕܵܥܹܪ ܫܸܡܵܐ ܕܩܲܪܲܩܘܿܫ ܕܝܼܠܹܗ ܡܘܼܦܠܚܵܐ ܒܝܲܘܡܵܢܵܐ ܠܡܸܠܬܐ (ܚܲܒ̇ܪܵܐ) ܕܩܲܪܲܩܘܿܫ ܬܘܼܪܟܵܝܵܐ: ܕܣܘܼܟܵܠܵܗ̇ ܝܼܠܹܗ: ܛܲܝܪܵܐ ܐܘܼܟܵܡܵܐ (ܟܘܼܡܵܐ) ݂ ܐܝܼܢܵܐ ܫܸܡܵܐ ܥܲܬܝܼܩܵܐ ܘܫܸܪܫܵܝܵܐ ܕܲܡܕܝܼܢ݇ܬܐ: ܝܼܠܹܗ ܒܲܟ݂ܕܹܝܕܹܐ ܕܐܸܬܝܵܐ ܝܠܹܗ ܡܼܢ (ܒܹܝܬ) ܫܹܝܡܵܝܬܐ: (ܘܟ݂ܕܹܝܕܵܕ) ܦܵܪܣܵܝܬܐ: ܕܦܵܐܹܫ ܣܘܼܟܵܠܵܐ ܟܢܝܼܫܵܐܝܼܬ: ܕܘܼܟܬܐ ܐܲܘ ܡܲܫܟܢܵܐ ܕܩܲܡ ܡܲܩܪܸܒ݂ ܠܹܗ ܐܲܠܵܗܵܐ [1] ݂

[1] ܓ̰ܵܐܢ ܡܵܪܝܼ ܡܝܼܪܝܼܓ݂ܘܿ: ܡܲܕܢܚܵܐ ܡܫܝܼܚܵܝܵܐ ܓܲܘ ܐܸܡܦܪܵܛܘܿܪܘܿܬܐ ܡܘܼܫܸܠܡܵܢܬܐ: ܟܘܼܢܵܫܵܐ ܕܣܬܘܿܕܝܵܐ ܐܵܪܵܒܝܼܟܵܐ: ܐܲܨܲܚܬܐ ܕܦܵܪܝܼܣ 2005 ݂

ܠܦܘܼܬ݂ ܡܣܲܦܝܵܢ̈ܘܵܬ݂ܐ: ܥܒ݂ܵܪܬܐ ܕܲܡܫܝܼܚܵܝܘܼܬܐ ܠܫܸܛܚܵܐ ܕܢܝܼܢܘܹܐ ܘܲܡܕܝܼܢ݇ܬܐ ܕܒܲܟ݂ܕܹܝܕܹܐ (ܩܲܪܲܩܘܿܫ): ܕܵܥܪܵܐ ܠܚܘܼܬܵܡ ܕܵܪܵܐ ܪܒ݂ܝܼܥܵܝܵܐ ܐܲܘ ܫܘܼܪܵܝ ܚܡܝܼܫܵܝܵܐ ݂ ܘܚܲܬܝܼܬܵܐܝܼܬ ܘܲܠܦܘܼܬ݂ ܡܲܒܘܼܥܹ̈ܐ: ܡܲܫܚܲܕܬܐ ܡܫܘܼܪܹܐ ܠܵܗ̇ ܓܵܘܵܗ̇ ܒܕܵܪܵܐ ܫܒ݂ܝܼܥܵܝܵܐ ݂ ܒܫܘܼܪܵܝܵܐ ܡܵܬܐ ܢܸܣܛܘܿܪܢܵܝܬܐ ܝܗ݇ܘܵܐ[1]: ܒܚܲܪܬܐ ܩܘܼܪܒܵܐ ܠـ (615): ܦܝܼܫܠܵܗ̇ ܐܲܪ̈ܬ݂ܘܿܕܘܿܟܣܵܝܬܐ[2]: ܘܒܕܵܪܵܐ ܕ (11) ܘ (12) ܪܵܒܵܐ ܡܼܢ ܡܫܝܼܚܵܝܹ̈ܐ ܕܲܡܕܝܼܢ݇ܬܐ ܕ (ܬܸܟܪܝܼܬ) ܫܒ݂ܸܩܠܗ݇ܘܿܢ ܠܲܡܕܝܼܢ݇ܬܲܝܗܝ ܡܼܢ ܒܵܬܲܪ ܕܦܝܼܫܠܗ݇ܘܿܢ ܡܐܲܠܨܹ̈ܐ (ܡܲܓ̰ܒܘܿܪ) ܕܦܵܝܫܝܼ ܡܘܼܫܸܠܡܵܢܹ̈ܐ: ܘܲܫܟܸܢܘܼܢ ܒܓܲܘ ܒܲܟ݂ܕܹܝܕܹܐ ݂ ܒܫܲܢ݇ܬܐ ܕ 1743: ܩܝܼܡܠܗ݇ܘܿܢ ܚܲܝܠܵܘܵܬܐ ܕܢܵܕܹܪ ܫܵܗܒܲܚܨܵܪܵܐ (ܟܪܵܟ݂ܵܐ) ܕܲܦܢܝܼܬܐ ܕܒܲܟ݂ܕܹܝܕܹܐ ܘܲܢܗܵܒܬܵܗ̇ ܘܡܲܚܪܲܒ݂ܬܐ ܕܥܹܕܵܬܵܗ̇ ݂ ܒܚܲܪܬܐ ܚܙܹܐ ܠܗ݇ܘܿܢ ܐ݇ܢܵܫܹ̈ܐ ܕܡܵܬܐ ܒܹܝܬ݂ ܓܲܘܣܵܐ ܓܲܘ ܡܕܝܼܢ݇ܬܐ ܕܡܲܘܨܸܠ: ܐܲܝܟܵܐ ܕܲܡܫܘܼܬܸܦܠܗ݇ܘܿܢ ܒܣܘܼܬܵܪܵܐ ܥܲܠ ܡܕܝܼܢ݇ܬܐ[3]: ܘܲܒܚܘܼܬܵܡܵܐ ܕܕܵܪܵܐ ܕ (18) ܦܝܼܫܠܵܗ̇ ܡܵܬܐ ܕܒܲܟ݂ܕܹܝܕܹܐ ܩܵܬ݂ܘܿܠܝܼܩܵܝܬܐ ݂

ܘܝܲܘܡܵܢܵܐ ܐܝܼܬ ܓܲܘ ܡܵܬܐ ܪܵܒܵܐ ܥܹ̈ܕܵܬ݂ܵܐ ܥܲܬܝܼܩܹ̈ܐ: ܕܐ݇ܣܘܼܪ̈ܵܝܹܐ ܐܲܪ̈ܬ݂ܘܿܕܘܿܟܣܵܝܹܐ ܘܐ݇ܣܘܼܪ̈ܵܝܹܐ ܩܵܬ݂ܘܿܠܝܼܩܵܝܹ̈ܐ: ܕܦܝܼܫܠܗ݇ܘܿܢ ܡܘܼܚܪ̈ܒ݂ܹܐ ܘܲܡܫܘܼܚܬܸܢܹ̈ܐ ܘܣܠܝܼܒܹ̈ܐ ܒܝܲܕ ܛܘܼܟܵܣܵܐ ܡܘܼܫܸܠܡܵܢܵܐ ܕ ܕܵܥܹܫ ܒܡܸܬܚܵܐ ܕܲܟܒ݂ܵܫܬܲܝܗܝ ܠܲܡܕܝܼܢ݇ܬܐ ܠܡܸܬܚܵܐ ܕ (24) ܝܲܪ̈ܚܹܐ ݂ ܐܝܼܢܵܐ ܒܪܹܫ ܟܠܹܗ ܐܵܗܵܐ ܚܪܵܒ݂ܵܐ: ܚܲܕܟܡܵܐ ܡܼܢ ܐܲܢܹܐ ܥܹ̈ܕܵܬ݂ܐ ܠܝܲܘܡܵܢܵܐ ܡܨܵܝܵܐ ܝܢܵܐ ܕܟܵܠܝܼ ܓܲܘ ܦܵܬܐ ܕܨܵܦܘܿܚܹ̈ܐ ܘܗܵܘܝܼ ܐܲܡܝܼܢܵܝܹ̈ܐ ܘܣܲܗܵܕܹ̈ܐ ܥܲܠ ܕܲܥܒ݂ܲܪ ܒܲܥܝܼܕܵܐ ݂

[1] NDA ܥܹܕܬܐ ܕܡܲܕܢܚܵܐ ݂

[2] NDA ܐ݇ܣܘܼܪ̈ܵܝܹܐ ܐܲܪ̈ܬ݂ܘܿܕܘܿܟܣܵܝܬܐ

[3] ܓ̰ܵܐܢ ܡܵܪܝܼ ܡܝܼܪܝܼܓ݂ܘܿ: ܡܲܕܢܚܵܐ ܡܫܝܼܚܵܝܵܐ ܓܲܘ ܐܸܡܦܪܵܛܘܿܪܘܿܬܐ ܡܘܼܫܸܠܡܵܢܬܐ: ܟܘܼܢܵܫܵܐ ܕܣܬܘܿܕܝܵܐ ܐܵܪܵܒܝܼܟܵܐ: ܐܲܨܲܚܬܐ ܕܦܵܪܝܼܣ 2005 ݂

ܡܼܢ ܒܲܝܢܵܬ݂ ܟܠܵܝ̈ ܐܲܢܹܐ ܒܸܢܝܵܢܹ̈ܐ: ܗܵܝ ܥܹܕܬܐ ܒܸܫ ܪܸܡܙܵܝܬܐ: ܝܼܠܵܗ̇ ܥܹܕܬܐ ܕܲܒܬܘܼܠܬܐ (ܛܲܥܢܵܐ ܕܲܟ݂ܝܵܐ): ܫܒ݂ܘܿܩ ܡܼܢ ܬܲܪܬܹܝܢ ܡܼܢ ܥܹ̈ܕܵܬܵܗ̇ ܕܒܲܟ݂ܕܹܝܕܹܐ ܕܦܵܝܫܝܼ ܩܸܪ̈ܝܹܐ ܦܫܝܼܛܵܐܝܼܬ: ܥܲܬܝܼܩܬܐ ܘܲܚܕܲܬܐ ݂ ܢܵܦܠܵܐ ܥܹܕܬܐ ܕܲܒܬܘܼܠܬܐ ܓܲܘ ܩܸܢܛܪܘܿܢ ܕܒܲܟ݂ܕܹܝܕܹܐ ܥܲܬܝܼܩܬܐ: ܘܡܸܬܡܲܨܝܵܢܬܐ ܝܠܵܗ̇ ܠܲܡܛܵܝܵܐ ܐܸܠܵܗ̇ ܒܐܘܼܪܚܵܐ ܕܚܲܕ ܥܵܠܘܿܠܵܐ (ܓ̰ܲܕܵܐ) ܙܥܘܿܪܵܐ ܕܟܹܐ ܝܵܪܹܡ ܒܲܣܝܼܡܵܐܝܼܬ ݂ ܘܒܸܕ ܥܵܒ݂ܹܪ ܒܲܪܢܵܫܵܐ ܠܐܵܗܵܐ ܒܸܢܝܵܢܵܐ ܬܲܘܕܝܼܬܵܢܵܝܵܐ ܒܐܘܼܪܚܵܐ ܕܥܹܕܬܐ ܕܲܒܬܘܼܠܬܐ ܚܕܲܬܐ: ܕܲܡܫܘܼܪܹܐ ܠܹܗ ܒܸܢܝܵܢܵܐ ܒܫܲܢ݇ܬܐ ܕ 1932 ܘܲܓܪܸܫܠܹܗ ܠܗܲܠ ܫܲܢ݇ܬܐ ܕ 1948 ܐܲܝܟܵܐ ܕܦܝܼܫܠܵܗ̇ ܣܝܼܡܬܐ ܩܵܢܘܿܢܵܐܝܼܬ ݂ ܐܸܣܟܹܝܡܵܐ ܕܒܸܢܝܵܢܵܗ̇ ܓܵܪܹܫ ܠܚܸܙܘܵܐ ܕܒܲܪܢܵܫܵܐ: ܘܦܵܝܫܵܐ ܚܫܝܼܒ݂ܬܐ ܥܹܕܬܐ ܕܲܒܬܘܼܠܬܐ ܚܕܲܬܐ ܗܵܝ ܥܹܕܬܐ ܐ݇ܣܘܼܪܝܵܝܬܐ ܩܵܬ݂ܘܿܠܝܼܩܵܝܬܐ ܒܸܫ ܪܲܒܬܐ ܘܟܲܒܝܼܪܬܐ ܓܲܘ ܡܲܕܢܚܵܐ ܡܸܨܥܵܝܬܐ ܒܝܘܼܪܟ݂ܘܼܬܐ ܕ (54) ܡܝܼܬܪܹ̈ܐ: ܘܦܸܬܝܘܼܬܐ ܕ (24) ܡܝܼܬܪܹ̈ܐ ݂ ܘܝܼܠܵܗ̇ ܫܘܼܒ݂ܗܵܪܵܐ ܘܐܝܼܩܵܪܵܐ ܕܥܵܡܘܿܪܹ̈ܐ ܕܒܲܟ݂ܕܹܝܕܹܐ: ܠܵܐ ܒܲܠܚܘܿܕ ܒܥܸܠܬܐ ܕܫܲܘܦܵܗ̇ ܪܵܡܵܐ: ܐܸܠܵܐ ܒܦܘܼܠܚܵܢܵܐ ܕܟܠܲܝܗܝ ܥܵܡܘܿܪ̈ܵܗ̇ ܒܡܸܬܚܵܐ ܕ (16) ܫܸܢܹ̈ܐ ܡܼܢ ܒܢܵܝܬܵܗ̇ ݂ ܩܲܒܵܐ ܐܲܘ ܩܘܼܒ̇ܬܐ ܕܥܹܕܬܐ ܪܲܒܬܵܐ ܘܡܸܬܚܲܙܝܵܢܝܼܬܐ ܡܼܢ ܪܘܼܚܩܵܐ ܟܹܐ ܥܵܠܹܐ ܠܵܗ̇ ܚܲܕ ܨܠܝܼܒ݂ܵܐ: ܘܒܘܼܪܓܵܐ ܡܪܲܒܥܵܐ ܕܢܵܩܘܿܫܵܐ ܕܝܼܠܹܗ ܒܪܹܫ ܬܲܪܥܵܐ ܪܹܫܵܝܵܐ: ܒܝܵܬܹܗ ܝܼܠܹܗ ܪܸܡܙܵܐ ܠܥܵܡܘܿܪܹ̈ܐ ܕܲܡܕܝܼܢ݇ܬܐ: ܚܵܒ݂ܹܫ ܗ݇ܘܵܐ ܥܲܠ ܚܕܵܐ ܫܵܥܬܐ ܟܲܒܝܼܪܬܐ ܘܲܩܪܝܼܫܬܐ: ܘܲܒܟܠ ܓܹܒܵܐ ܡܼܢ ܐܲܪܒܲܥ ܓܹܒܵܢܹ̈ܗ ܕܒܘܼܪܓܵܐ ܐܝܼܬ ܨܠܝܼܒ݂ܵܐ ݂

ܚܵܒ݂ܫܵܐ ܥܹܕܬܐ ܚܕܲܬܐ ܕܲܒܬܘܼܠܬܐ ܬܠܵܬܐ ܡܲܥܒ̇ܪܹ̈ܐ (ܐܘܼܪ̈ܚܵܬ݂ܐ): ܘܗܵܝ ܟܹܐ ܣܵܡܟ݂ܵܐ (ܟܵܠܝܵܐ) ܥܲܠ (22) ܥܲܡܘܼܕܹ̈ܐ ܪ̈ܲܒܹܐ ܡܬܘܼܪܨܹܐ ܡܼܢ ܫܝܼܫܵܐ (ܡܲܪܡܲܪ) ܕܡܲܘܨܸܠ ݂ ܡܲܥܒ̇ܪܵܐ ܪܹܫܵܝܵܐ ܘܩܸܢܛܪܘܿܢܵܝܵܐ ܕܝܼܠܹܗ ܒܸܫ ܪܘܝܼܚܵܐ ܒܲܬܠܵܬܐ ܓܵܗܹ̈ܐ ܡܼܢ ܡܲܥܒ̇ܪܹ̈ܐ ܓܹܒܵܢܵܝܹ̈ܐ: ܡܒܲܗܪܵܐ ܝܠܹܗ (ܡܒܘܼܗܪܸܢܵܐ) ܒܬܘܼܪ̈ܲܝܹܐ (ܒܸܪ̈ܩܹܐ) ܪܵܒܵܐ ܟܲܒܝܼܪܹ̈ܐ: ܗܵܫܵܐ ܟܝܼܡܹ̈ܐ ܝܢܵܐ ܒܥܸܠܬܐ ܕܝܘܼܩܕܵܢܵܐ ܕܲܥܒ݂ܸܕ ܠܹܗ ܕܵܥܹܫ ݂ ܓܲܘܢܵܐ ܕܒܸܢܝܵܢܵܐ ܡܼܢ ܓܵܘܵܐ ܪܵܒܵܐ ܚܘܵܪܵܐ ܝܗ݇ܘܵܐ: ܡܼܢ ܩܕܵܡ ܕܟܵܪܹܟ݂ ܗ݇ܘܵܐ ܓܲܘܢܵܐ ܟܘܼܡܵܐ ܥܲܠ ܓܘܼܕܵܢܹ̈ܐ ܘܥܲܠ ܩܪܵܫܵܐ ܘܲܦܪܝܼܫܵܐܝܼܬ ܗܵܝ ܩܘܼܒ̇ܬܐ ܫܲܦܝܼܪܬܐ: ܒܥܸܠܬܐ ܕܢܘܼܪܵܐ ܡܕܲܒܪܵܐ ܕܦܝܼܫܠܹܗ ܥܒ݂ܝܼܕܵܐ ܒܝܲܕ ܡܘܼܫܠܡܵܢܹ̈ܐ ܕܕܵܥܹܫ ܐܵܢܝ ܕܲܡܛܘܼܦܹܐ ܠܗ݇ܘܿܢ ܢܘܼܪܵܐ ܒܟܘܼܪ̈ܣܵܘܵܬ݂ܐ ܘܲܣܦܵܩܹ̈ܐ ܡܼܢ ܩܕܵܡ ܥܪܵܩܬܲܝܗܝ ݂ ܐܲܬ݂ܪܹ̈ܐ (ܢܝܼܫܵܢܩܹ̈ܐ) ܕܗܵܢܵܐ ܝܘܼܩܕܵܢܵܐ ܪܲܒܵܐ: ܘܲܨܦܵܚܬܐ ܕܲܥܒ݂ܝܼܕ ܒܝܲܕ ܡܘܼܫܠܡܵܢܹ̈ܐ ܕܕܵܥܹܫ: ܗܲܠ ܗܵܕܝܼܵܐ ܓܸܠܝܹܐ ܝܢܵܐ ݂ ܐܝܼܡܲܢ ܕܩܵܪܒ݂ܲܚ ܠܩܸܢܛܪܘܿܢ ܘܲܠܡܲܕܒܚܵܐ: ܒܸܕ ܡܲܒܝܸܢ ܘܒܚܲܕ ܦܸܨܠܵܐ ܪܵܒܵܐ ܣܸܪܝܵܐ ܚܪܵܒ݂ܵܐ ܕܲܟܪܝܼܟ݂ܵܐ ܝܠܹܗ ܒܥܲܡܘܼܕܹ̈ܐ ܕܫܝܼܫܵܐ ܕܐܝܼܬ ܓܲܘ ܥܹܕܬܐ ܒܥܸܠܬܐ ܕܫܲܚܝܼܢܘܼܬܐ ݂ ܘܪܵܒܵܐ ܡܼܢ ܐܲܢܹܐ ܥܲܡܘܼܕܹ̈ܐ ܦܝܼܫܠܗ݇ܘܿܢ ܡܟܲܬ̇ܡܹ̈ܐ (ܡܫܘܼܚܬܸܢܹ̈ܐ) ܒܲܟܬܝܼ̈ܒ݂ܵܬ݂ܐ ܕܡܘܼܫܠܸܡܵܢܹ̈ܐ: ܕܩܵܝܬ݂ܝܼ ܠܐܝܼܩܵܪܵܐ ܕܲܡܫܝܼܚܵܝܹ̈ܐ ݂ ܒܚܘܼܬܵܡܵܐ ܕܡܲܥܒ̇ܪܵܐ ܩܸܢܛܪܘܿܢܵܝܵܐ ܪܲܒܵܐ: ܡܵܨܹܐ ܐ݇ܢܵܫܵܐ ܕܡܵܛܹܐ ܡܼܢ ܒܵܬܲܪ ܚܲܕܟܡܵܐ ܦܵܣܘܿܥܝܵܬ݂ܐ ܠܡܲܕܒܚܵܐ ܫܝܼܫܵܝܵܐ ܕܦܝܼܫܠܹܗ ܡܘܼܚܪܸܒ݂ܵܐ ܒܝܲܕ ܐܵܢܝܼ ܕܲܫܓ݂ܝܼܠܹ̈ܐ ܝܗ݇ܘܵܘ ܘܝܼܬܝܼܒ݂ܹ̈ܐ ܓܲܘ ܥܹܕܬܐ: ܘܡܘܼܚܠܸܦ ܠܗ݇ܘܿܢ ܒܚܲܕ ܡܲܕܒܚܵܐ ܩܲܝܣܵܝܵܐ ݂ ܒܸܕ ܚܵܙܹܝܚ ܒܵܬܪܹܗ ܗܿܘ ܡܲܕܒܚܵܐ ܫܝܼܫܵܝܵܐ ܥܲܬܝܼܩܵܐ ܢܛܝܼܪܵܐ ܒܝܲܕ ܚܕܵܐ ܡܲܛܲܠܬܐ ܒܦܸܨܠܵܐ ܕܚܕܵܐ ܩܸܫܬܐ: ܘܐܵܦ ܒܸܕ ܚܵܙܹܝܚ ܠܗܲܝܟܠܵܐ ܡܟܲܬ̇ܡܵܐ (ܟܬ݂ܝܼܡܵܐ) ݂ ܘܒܸܕ ܚܵܙܹܝܚ ܥܲܠ ܩܘܼܒ̇ܬܐ ܒܲܪܵܝܬܐ ܕܐܵܗܵܐ ܩܸܫܬܐ: ܚܲܕܟܡܵܐ ܓܠܝܼ̈ܦܵܬܐ ܒܦܸܨܠܵܐ ܕܛܲܪ̈ܦܹܐ ܕܐܝܼܠܵܢܵܐ: ܘܐܵܗܵܐ ܚܲܕ ܐܸܣܟܹܝܡܵܐ ܝܠܹܗ ܪܵܒܵܐ ܥܝܵܕܵܝܵܐ ܒܓܲܘ ܥܹ̈ܕܵܬ݂ܐ ܕܫܸܛܚܵܐ ܕܢܝܼܢܘܹܐ ݂ ܐܝܼܡܲܢ ܕܦܝܼܫܠܵܗ̇ ܡܚܘܼܪܸܪܬܐ ܒܲܟ݂ܕܹܝܕܹܐ ܒܬܸܫܪܝܼܢ ܩܲܕܡܵܝܵܐ ܒܫܲܢ݇ܬܐ 2016: ܣܪ̈ܝܼܩܵܬ݂ܐ ܕܙܲܝܢܹ̈ܐ ܒܙܝܼܩܹ̈ܐ ܝܗ݇ܘܵܘ ܘܲܢܬ݂ܝܼܪܹ̈ܐ ܥܲܠ ܐܲܪܥܵܐ ݂ ܒܥܸܕܵܢ ܟܒ݂ܘܼܫܝܵܐ ܕܲܦܢܝܼܬܐ: ܥܹܕܬܐ ܦܝܼܫܠܵܗ̇ ܡܘܼܦܠܸܚܬܐ ܐܲܝܟ݂ ܩܸܢܛܪܘܿܢ ܕܦܵܩܘܿܕܘܼܬ݂ܐ: ܘܬܘܼܪܵܨܵܐ ܕܙܲܝܢܹ̈ܐ ݂

ܟܲܕ ܒܸܫܒ݂ܵܩܵܐ ܠܥܹܕܬܐ: ܓܲܘ ܚܘܼܬܵܡ ܡܲܥܒ̇ܪܵܐ ܕܝܲܡܝܼܢܵܐ ܕܥܹܕܬܐ ܕܲܒܬܘܼܠܬܐ ܚܕܲܬܐ: ܒܸܕ ܡܵܛܹܝܚ ܠܕܵܪܬܐ ܓܵܘܵܝܬܐ ܟܲܒܝܼܪܬܐ ܕܚܵܒ݂ܫܵܐ ܒܹܝܬ݂ ܩܒ݂ܘܼܪܵܐ: ܘܗܵܕܹܐ ܕܵܪܬܐ ܦܝܼܫܠܵܗ̇ ܩܸܢܛܪܘܿܢ ܠܡܲܦܠܲܚܬܐ ܘܡܲܠܗܲܒ݂ܬܐ (ܡܲܠܒ݂ܲܚܬܐ) ܕܢܘܼܪܵܐ ݂ ܒܦܲܠܓܵܐ ܕܥܹܕܬܐ: ܘܬܸܫܥܵܐ ܝܲܪ̈ܚܹܐ ܡܼܢ ܒܵܬܲܪ ܚܘܼܪܵܪܵܐ: ܡܵܨܹܐ ܒܲܪܢܵܫܵܐ ܕܚܵܙܹܐ ܠܩܸܛܡܵܐ ܕܲܒܪܹܐ ܠܹܗ ܡܼܢ ܝܘܼܩܕܵܢܵܐ ܕܲܟܬܵܒ݂ܹ̈ܐ ܘܡܵܐܢܹ̈ܐ ܛܲܟܣܵܝܹ̈ܐ ݂ ܚܲܕܟܡܵܐ ܥܲܡܘܼܕܹ̈ܐ ܒܲܪ̈ܵܝܹܐ ܒܙܝܼܥܹ̈ܐ ܒܓܘܼܠܠܹ̈ܐ ܕܙܲܝܢܵܐ ܫܵܒ݂ܩܝܼ ܠܲܢ ܕܚܵܙܹܝܚ ܠܐܲܛܪܵܐ ܦܲܪܙܠܵܝܵܐ ݂ ܘܐܝܼܬ ܓܲܘ ܕܵܪܬܐ ܪܵܒܵܐ ܬܵܘܵܢܹ̈ܐ: ܘܥܲܠ ܣܸܡܵܠܵܐ ܐܝܼܬ ܒܹܝܬ ܨܠܘܿܬܐ ܦܪܝܼܫܵܐ ܩܵܐ ܒܬܘܼܠܬܐ: ܘܥܲܠ ܝܲܡܝܼܢܵܐ ܐܝܼܬ ܚܲܕ ܨܲܠܡܵܐ ܢܣܝܼܟ݂ܵܐ ܒܕܘܼܡܝܵܐ ܫܸܪܫܵܝܵܐ ܕܐܝܼܬ ܓܲܘ ܓܸܦܵܐ ܕ (ܠܘܿܪܕ) ܘܥܹܕܬܐ ܕ (ܣܵܐܢ ܕܘܿܡܲܢܝܼܟ) ݂

ܡܸܬܡܲܨܝܵܢܝܼܬܐ ܝܠܵܗ̇ ܠܲܡܛܵܝܵܐ ܠܥܹܕܬܐ ܥܲܬܝܼܩܬܐ ܕܲܒܬܘܼܠܬܐ: ܕܝܼܠܵܗ̇ ܠܕܸܦܢܵܐ ܕܥܹܕܬܐ ܚܕܲܬܐ: ܒܐܘܼܪܚܵܐ ܕܥܸܣܪ̈ܵܝܹܐ ܕܦܵܣܘܿܥܝܵܬܹ̈ܐ: ܚܵܒ݂ܫܵܐ ܬܠܵܬܐ ܡܲܥܒ̇ܪܹ̈ܐ ܘܬܠܵܬܐ ܡܲܕܒܚܹ̈ܐ ܡܫܲܚܠܦܹ̈ܐ: ܘܡܼܢ ܒܵܬܲܪ ܡܚܲܕܲܬ݂ܬܐ ܕܥܹܕܬܐ ܥܲܬܝܼܩܬܐ ܕܲܒܬܘܼܠܬܐ ܪܵܒܵܐ ܓܵܗܹ̈ܐ: ܘܲܦܪܝܼܫܵܐܝܼܬ ܒܫܲܢ݇ܬܐ ܕ 1745: ܒܵܬܲܪ ܕܦܝܼܫܠܵܗ̇ ܡܘܼܩܸܕܬܐ ܓܲܘ ܦܠܵܫܵܐ ܕܢܵܕܹܪ ܫܵܗ ܦܵܪܣܵܝܵܐ: ܗܿܘ ܕܡܘܼܩܸܕ ܠܹܗ ܒܗܿܘ ܙܲܒ݂ܢܵܐ ܠܲܟܬܵܒ݂ܹ̈ܐ ܕܐܝܼܬ ܗ݇ܘܵܘ ܓܵܘܵܗ̇ ݂ ܐܝܼܬ ܚܲܕ ܢܸܩܫܵܐ ܛܵܥܹܢ ܣܝܼܩܘܿܡܵܐ ܕ 1832 ܡܼܢ ܙܲܒ݂ܢܵܐ ܝܲܘܢܵܝܵܐ ܕܝܼܠܹܗ 1521 ܡܫܝܼܚܵܝܵܐ: ܘܦܝܼܫܠܹܗ ܚܸܙܝܵܐ ܣܝܼܩܘܿܡܵܐ ܒܸܫ ܥܲܬܝܼܩܵܐ ܡܼܢ ܩܕܵܡ ܚܲܕܟܡܵܐ ܫܸܢܹ̈ܐ ܓܲܘ ܬܵܘܵܢܵܐ ܕܒܹܝܬ ܩܒ݂ܘܼܪܵܐ ݂ ܘܡܼܢ ܒܝܼܫܘܼܬ ܓܲܕܵܐ: ܦܝܼܫܠܹܗ ܬܠܝܼܚܵܐ ܓܘܼܕܵܐ ܕܦܵܪܹܫ ܐܵܗܵܐ ܬܵܘܵܢܵܐ ܡܼܢ ܒܹܝܬ ܨܠܘܿܬܐ: ܩܵܝܹܡ̈ܝܵܬ݂ܐ ܕܩܲܒ݂ܪ̈ܵܘܵܬ݂ܐ ܕܐܝܼܬ ܗ݇ܘܵܘ ܦܝܼܫܠܗ݇ܘܿܢ ܬܠܝܼܚܹ̈ܐ: ܘܲܟܬܸܒ݂ ܠܹܗ ܓ̰ܵܐܢ ܡܘܿܪܝܼܣ ܦܝܼܝܹܗ ܒܫܲܢ݇ܬܐ ܕ 1961[1] : ܟܲܕ ܡܲܘܣܘܿܦܹܐ (ܡܲܙܝܘܿܕܹܐ): ܚܲܕ ܡܼܢ ܩܲܒ݂ܪ̈ܵܘܵܬ݂ܐ ܝܼܗ݇ܘܵܐ ܠܚܲܕ ܟܵܗܢܵܐ ܕܡܝܼܬ ܠܹܗ ܒܫܲܢ݇ܬܐ ܕ 616 ܗܸܓܪܵܝܬܐ (1219 ܡܫܝܼܚܵܝܬܐ): ܘܐܵܗܵܐ ܣܝܼܩܘܿܡܵܐ ܡܲܝܕܘܥܲܢ ܝܠܹܗ ܒܥܲܬܝܼܩܘܼܬܐ ܕܥܹܕܬܐ ܕܲܒܬܘܼܠܬܐ ݂ ܘܐܵܦܸܢ ܕܦܝܼܫܠܵܗ̇ ܣܠܝܼܒܬܐ ܥܹܕܬܐ ܒܝܲܕ ܡܘܼܫܠܡܵܢܹ̈ܐ ܕܵܥܹܫܵܝܹ̈ܐ: ܐܝܼܢܵܐ ܠܗܵܫܵܐ ܦܝܵܫܵܐ ܝܢܵܐ ܚܲܕܟܡܵܐ ܐܸܣܛܘܼܟ݂ܣܹ̈ܐ ܪܵܒܵܐ ܥܲܬܝܼܩܹ̈ܐ: ܡܸܢܲܝܗܝ ܓܘܼܪܢܵܐ ܥܲܬܝܼܩܵܐ ܕܡܲܥܡܘܿܕܝܼܬܐ ܕܝܼܠܹܗ ܓܠܝܼܦܵܐ ܒܐܸܣܟܹܝܡܵܐ ܐܲܘ ܒܦܸܨܠܵܐ ܫܬܝܼܬܵܝܵܐ ݂

[1] ܓ̰ܵܐܢ ܡܘܿܪܝܼܣ ܦܝܼܝܹܗ: ܒܲܟܬܵܒ݂ܹܗ ܐܵܫܘܿܪ ܡܫܝܼܚܵܝܬܐ: ܦ 447 ـ 448 ݂