ܐܝܼܬܘܼܬ݂ܐ ܕܐ݇ܣܘܼܪ̈ܵܝܹܐ ܩܵܬ݂ܘܿܠܝܼܩܵܝܹ̈ܐ ܓܲܘ ܒܲܓ݂ܕܵܕ ܒܸܕܥܵܪܵܐ ܝܠܵܗ̇ ܠܕܵܪܵܐ ܕ(19): ܐܸܠܵܐ ܟܢܘܼܫܝܵܐ ܕܐ݇ܣܘܼܪ̈ܵܝܹܐ ܩܵܬ݂ܘܿܠܝܼܩܵܝܹ̈ܐ ܫܲܪܝܼܪܵܐܝܼܬ ܡܫܲܪܘܿܝܹܐ ܝܠܹܗ ܒܫܘܼܪܵܝ ܕܵܪܵܐ ܕܥܸܣܪܝܼܢ ܡܼܢ ܒܵܬܲܪ ܦܪܵܡܬܐ ܕܲܡܫܝܼܚܵܝܹ̈ܐ: ܐܵܪܸ̈ܡܢܵܝܵܐ ܘܐܵܬܘܿܪ ـ ܟܲܠܕܵܝܹ̈ܐ ܒܓܘܼܢܚܵܐ ܕܲܩܛܵܠ ـ ܥܲܡܵܐ (ܦܲܪ̈ܡܵܢܹܐ ܕܣܲܝܦܘܿ) ܒܝܲܕ ܫܘܼܠܛܵܢܵܐ ܥܘܼܬ݂ܡܵܬܵܢܵܝܵܐ ܒܫܸܢܹ̈ܐ ܕ 1915 ـ 1917 ݂ ܘܡܼܢ ܓܹܒܵܐ ܐ݇ܚܪܢܵܐ: ܡܸܢܝܵܢܵܐ ܪܲܒܵܐ ܕܐ݇ܣܘܼܪ̈ܵܝܹܐ ܩܵܬ݂ܘܿܠܝܼܩܵܝܹ̈ܐ ܕܫܘܼܬܐܸܣܹ̈ܐ ܝܗ݇ܘܵܘ ܓܲܘ ܓܲܪܒܝܵܐ: ܓܲܘ ܦܢܝܼܬܐ ܕܢܝܼܢܘܹܐ: ܘܝܲܘܡܵܢܵܐ ܓܲܘ ܟܘܼܪܕܸܣܬܵܐܢ ܕܥܝܼܪܵܐܩ: ܫܒܸܩܠܗ݇ܘܿܢ ܠܡܵܬܘܵܬܲܝܗܝ ܘܲܡܫܘܼܢܹܐ ܠܗ݇ܘܿܢ ܠܒܲܓ݂ܕܵܕ: ܐܲܝܟܵܐ ܕܦܝܼܫܠܗ݇ܘܿܢ ܓܪ̈ܝܼܫܹܐ ܒܚܲܝܹ̈ܐ ܕܲܡܕܝܼܢܵܝܘܼܬ݂ܐ: ܕܐܝܼܬ ܒܲܝܗܝ ܛܘܼܘܵܪܵܐ ܐܸܩܢܘܿܡܝܼܵܝܵܐ ݂

ܒܦܲܠܓܵܐ ܩܲܕܡܵܝܵܐ ܡܢ ܕܵܪܵܐ ܕܥܸܣܪܝܼܢ ܘܬܲܚܘܼܒܵܐܝܼܬ ܒܫܲܢ݇ܬܐ ܕ1942: ܡܫܘܼܬܐܸܣܠܵܗ̇ ܡܲܪܥܝܼܬܐ ܩܲܕܡܵܝܬܐ ܕܐ݇ܣܘܼܪ̈ܝܵܝܹܐ ܩܵܬ݂ܘܿܠܝܼܩܵܝܹ̈ܐ ܓܲܘ ܒܲܓ݂ܕܵܕ: ܒܲܦܢܝܼܬܐ ܡܫܝܼܚܵܝܬܐ ܥܲܬܝܼܩܬܐ ܓܲܘ (ܥܲܩܕܸܠܢܲܨܵܪܵܐ) ݂ ܘܡܼܢ ܥܸܕܵܢܵܐ ܠܥܸܕܵܢܵܐ ܐܵܬܹܐ ܗ݇ܘܵܐ ܐܲܦܸܣܩܘܿܦܵܐ ܕܡܲܘܨܸܠ ܠܲܡܩܲܕܘܿܫܹܐ ܐ݇ܪ̈ܵܙܹܐ ݂ ܒܫܲܢ݇ܬܐ ܕ1952: ܦܝܼܫܠܹܗ ܣܝܼܡܵܐ ܚܲܕ ܐܲܦܸܣܩܘܿܦܵܐ ܩܵܐ ܐ݇ܣܘܼܪ̈ܝܵܝܹܐ ܩܵܬ݂ܘܿܠܝܼܩܵܝܹ̈ܐ ܠܡܲܓܡܘܿܪܹܐ ܣܢܝܼ̈ܩܘܵܬ݂ܐ ܕܲܟܢܘܼܫܝܵܐ ܕܲܡܫܘܼܪܹܐ ܠܹܗ ܒܸܙܝܵܕܵܐ ܓܲܘ ܒܲܓ݂ܕܵܕ ݂ ܘܝܲܬܝܼܪ ܠܥܹܕܬܐ ܕܡܵܪܬܐ ܕܫܘܼܘܙܵܒ݂ܵܐ ܕܦܝܼܫܠܵܗ̇ ܒܢܝܼܬܐ ܒܫܲܢ݇ܬܐ ܕ 1952: ܦܝܼܫܠܵܗ̇ ܒܢܝܼܬܐ ܚܕܵܐ ܥܹܕܬܐ ܐ݇ܚܪܬܐ ܩܵܐ ܐ݇ܣܘܼܪ̈ܵܝܹܐ ܩܵܬ݂ܘܿܠܝܼܩܵܝܹ̈ܐ: ܒܫܸܡ ܥܹܕܬܐ ܕܩܲܕܝܼܫܵܐ ܝܲܘܣܸܦ ܓܲܘ ܦܢܝܼܬܐ ܕ(ܡܲܢܨܘܼܪ): ܘܚܲܪܬܐ ܐܵܦ ܥܹܕܬܐ ܕܡܵܪܝ ܒܸܗܢܵܡ ܦܝܼܫܠܵܗ̇ ܒܢܝܼܬܐ ܒܫܲܢ݇ܬܐ ܕ 1982 ݂ ܟܢܝܼܫܵܐܝܼܬ ܐܝܼܬ ܐܲܪܒܥܵܐ ܥܹܕܵܬ̈ܐ ܦܪ̈ܝܼܫܹܐ ܠܐ݇ܣܘܼܪ̈ܵܝܹܐ ܩܵܬ݂ܘܿܠܝܼܩܵܝܹ̈ܐ ܓܲܘ ܒܲܓ݂ܕܵܕ: ܘܥܹܕܬܐ ܕܡܵܪܬܐ ܕܫܘܼܘܙܵܒ݂ܵܐ: ܝܼܠܵܗ̇ ܗܿܝ ܒܸܫ ܦܪܝܼܫܬܐ ܓܵܘܲܝܗܝ ݂

ܦܝܼܫܠܵܗ̇ ܒܢܝܼܬܐ ܥܹܕܬܐ ܩܲܕܡܵܝܬܐ ܕܡܵܪܬܐ ܕܫܘܼܘܙܵܒ݂ܵܐ ܒܫܲܢ݇ܬܐ ܕ1952: ܘܲܒܫܘܼܪܵܝܵܐ ܚܕܵܐ ܐܵܘܵܢܵܐ ܦܫܝܼܛܬܐ ܝܗ݇ܘܵܐ ܡܼܢ ܩܕܵܡ ܒܸܢܝܵܢܵܐ ܕܥܹܕܬܐ ܕܝܲܘܡܵܢܵܐ ܒܫܲܢ݇ܬܐ ܕ1968: ܡܼܢ ܒܵܬܲܪ ܬܠܵܬ ܫܸܢܹ̈ܐ ܕܦܸܠܚܵܢܵܐ ݂ ܘܦܝܼܫܠܵܗ̇ ܗܿܝ ܥܹܕܬܐ ܩܲܕܡܵܝܬܐ (ܐܵܘܵܢܵܐ) ܕܘܼܟܵܐ ܕܒܘܼܝܵܐܵܐ ܒܥܸܕܵܢܹ̈ܐ ܕܚܲܫܹ̈ܐ ܘܐܸܒ݂ܠܹ̈ܐ ݂

ܐܵܢܲܢܩܵܝܬܐ ܝܗ݇ܘܵܐ ܒܢܵܝܬܐ ܕܥܹܕܬܐ ܕܡܵܪܬܐ ܕܫܘܼܘܙܵܒ݂ܵܐ: ܥܲܠ ܕܡܸܢܝܵܢܵܐ ܪܲܒܵܐ ܡܼܢ ܝܼܩܪ̈ܵܬ݂ܐ ܡܫܝܼܚܵܝܵܬ݂ܐ: ܘܡܸܢܲܝܗܝ ܐ݇ܣܘܼܪ̈ܵܝܹܐ ܩܵܬ݂ܘܿܠܝܼܩܵܝܹ̈ܐ: ܡܫܘܼܢܹܐ ܠܗ݇ܘܿܢ ܡܼܢ ܗܿܝ ܦܢܝܼܬܐ ܩܲܕܝܼܡܬܐ ܘܲܚܒ݂ܝܼܨܬܐ ܒܥܵܡܘܿܪܹ̈ܐ ܓܲܘ ܒܹܝܬ ܦܲܠܓܵܐ ܕܲܡܕܝܼܢ݇ܬܐ: ܠܲܚܕܵܐ ܦܢܝܼܬܐ ܚܕܲܬܐ ܕ(ܟܲܪܵܕܵܐ): ܦܢܝܼܬܐ ܡܕܝܼܢܵܝܬܐ ܘܓܵܪܫܵܢܬܐ: ܕܦܝܼܫܠܵܗ̇ ܕܪܝܼܓ݂ܵܐܝܼܬ ܩܸܢܛܪܘܿܢ ܠܚܲܝܹ̈ܐ ܕܲܟܢܘܼܫܝܵܐ ܕܐ݇ܣܘܼܪ̈ܝܵܝܹܐ ܩܵܬ݂ܘܿܠܝܼܩܵܝܹ̈ܐ ݂

ܦܝܼܫܠܵܗ̇ ܣܝܼܡܬܐ ܥܹܕܬܐ ܕܡܵܪܬܐ ܕܫܘܼܘܙܵܒ݂ܵܐ ܦܪܝܼܫܬܐ ܠܡܲܪܝܲܡ ܒܬܘܼܠܬܐ (ܝܸܡܵܐ ܕܝܼܫܘܿܥ ܡܫܝܼܚܵܐ): ܒܝܲܘܡܵܐ ܕ(7) ܒܝܲܪܚܵܐ ܕܐܵܕܵܪ ܫܲܢ݇ܬܐ 1968: ܒܝܲܕ ܡܲܛܪܵܢ ܝܘܿܚܲܢܵܐ ܒܵܟܘܿܣ: ܐܲܦܸܣܩܘܿܦܵܐ ܕܐ݇ܣܘܼܪ̈ܵܝܹܐ ܩܵܬ݂ܘܿܠܝܼܩܵܝܹ̈ܐ ܓܲܘ ܒܲܓ݂ܕܵܕ: ܘܲܒܛܘܼܝܵܒ݂ܵܐ ܕܐܲܦܸܣܩܘܿܦܹ̈ܐ ܕܟܠܲܝܗܝ ܫܲܪ̈ܒ݂ܵܬ݂ܐ ܡܫܝܼ̈ܚܵܝܵܬ݂ܐ ܓܲܘ ܐܵܪܸܫܟ݂ܵܝܬܐ ܥܝܼܪܵܩܵܝܬܐ ݂ ܦܝܼܫܠܹܗ ܡܣܲܟܡܵܐ (مصمم) ܒܸܢܝܵܢܵܐ ܕܥܹܕܬܐ ܒܝܲܕ ܡܲܚܵܪܵܐ ܐܵܪܕܸܟ݂ܠܵܝܵܐ ܦܘܿܠܘܿܢܵܝܵܐ (ܟܵܦܟܵܐ): ܒܥܘܼܕܪܵܢܵܐ ܕܡܲܟܬܒ݂ܵܐ ܕܪܘܿܡܵܝܵܐ ܕܡܲܚܵܪܘܼܬ݂ܐ ܩܵܐ ܣܘܼܟܵܡܹ̈ܐ ܐܘܼܡܵܢܵܝܹ̈ܐ (التصاميم الفنية) ݂ ܘܫܘܼܓ݂ܠܵܢܹ̈ܐ ܕܲܒܢܵܝܬܐ ܘܲܡܕܲܒܪܵܢܘܼܬܐ ܕܥܲܡܠܵܐ ܦܝܼܫܠܗ݇ܘܿܢ ܡܘܼܪ̈ܗܛܹܐ ܒܝܲܕ ܦܝܼܟܬܘܿܪ ܬܲܒܘܼܢܝܼ ܘܥܲܕܢܵܐܢ ܣܵܐܓ̰ܸܕ ݂

ܠܓܵܗܵܐ ܩܲܕܡܵܝܬܐ: ܡܵܨܹܝܚ ܕܡܸܣܬܲܟܠܲܚ (ܕܵܪܟܲܚ) ܚܘܼܫܵܒ݂ܵܐ ܕܣܘܼܟܵܡܵܐ ܕܡܲܚܵܪܵܐ ܐܵܪܕܸܟ݂ܠܵܝܵܐ: ܐܲܝܟܵܐ ܕܡܲܒܝܸܢܵܐ ܗܵܕܹܐ ܥܹܕܬܐ ܐܲܝܟ݂ ܩܵܪܒܵܐ (قارب): ܘܨܠܝܼܒ݂ܵܐ ܝܼܠܹܗ ܥܵܕܼܪܵܐ ܕܲܩܠܵܥܵܐ (صاري الشراع) ܒܐܸܣܟܹܝܡܵܐ ܕܩܸܫܬܐ ݂ ܠܐܲܟ݂ܵܐ ܓܠܝܼܬܐ ܝܠܵܗ̇ ܪܸܡܙܵܝܘܼܬ݂ܐ ܕܐܹܘܲܢܓܲܠܝܼܘܿܢ: ܥܹܕܬܐ / ܟܵܬܸܕܪܵܐܝܼܵܐ ܕܡܵܪܬܐ ܕܫܘܼܘܙܵܒ݂ܵܐ: ܝܼܠܵܗ̇ ܒܛܘܼܦ̮ܣܵܐ ܕܩܵܪܒܵܐ ܕܛܵܥܹܢ ܠܲܡܗܘܼܡܢܹ̈ܐ: ܐܲܝܟ݂ ܩܵܪܒܵܐ ܕܛܵܥܹܢ ܗ݇ܘܵܐ ܠܝܼܫܘܿܥ ܥܲܡ ܬܲܠܡܝܼܕܹ̈ܗ: ܘܐܲܝܟ݂ ܕܓܵܕܹܡ ܐܲܒ݂ܸܐ ܦܝܼܝܘܿܣ ܩܵܫܵܐ[1]: ܘܐܵܡܹܪ: ” ܥܹܕܬܲܢ: ܝܼܠܵܗ̇ ܗܿܝ ܩܵܪܒܵܐ ܕܥܵܡܹܩ ܓܲܘ ܝܲܡܵܐ ܕܥܵܠܡܵܐ ” ݂

_______

[1] ܩܲܝܘܼܡܵܐ ܐܲܦܸܣܩܘܿܦܵܝܵܐ ܕܐ݇ܣܘܼܪ̈ܝܵܝܹܐ ܩܵܬ݂ܘܿܠܝܼܩܵܝܹ̈ܐ ܓܲܘ ܒܲܓ݂ܕܵܕ: ܘܟܵܗܢܵܐ ܕܥܹܕܬܐ ܕܩܲܕܝܼܫܵܐ ܝܲܘܣܸܦ ܓܲܘ (ܡܲܢܨܘܼܪ) ݂

ܚܕܵܐ ܡܼܢ ܨܦܵܚܝܵܬܹ̈ܐ ܒܸܫ ܟܘܼܡܹ̈ܐ ܘܒܲܪܒ̇ܪ̈ܵܝܹܐ ܕܐܬܹܐ ܠܗ݇ܘܿܢ ܒܪܹܫ ܡܫܝܼܚܵܝܹ̈ܐ ܕܥܝܼܪܵܐܩ: ܝܼܗ݇ܘܵܐ ܒܝܘܿܡ 31 ܒܬܸܫܪܝܼܢ ܩܲܕܡܵܝܵܐ ܒܫܲܢ݇ܬܐ ܕ2010: ܓܲܘ ܥܹܕܬܐ ܕܡܵܪܬܐ ܕܫܘܼܘܙܵܒ݂ܵܐ ݂ ܟܲܕ ܩܝܼܡܠܹܗ ܚܲܕ ܝܲܗܠܵܐ ܡܼܢ 5 ـ 15 ܣܲܘܦܵܢܹ̈ܐ[1] (متطرفين)ܢܲܩܝܼܦܹ̈ܐ ܠܐܘܼܚܕܵܢܐ ܐܸܣܠܵܡܵܝܵܐ ܓܲܘ ܥܝܼܪܵܐܩ (ܕܵܥܹܫ): ܒܲܥܒ݂ܵܕܬܐ ܕܗܵܕܹܐ ܨܦܵܚܬܐ ܕܲܩܛܸܠܠܵܗ̇ ܠـ(47) ܦܲܪ̈ܨܘܿܦܹܐ (ܫܲܒ݂ܪܹ̈ܐ ܘܢܸܫܹ̈ܐ ܘܓܲܒ݂ܪܹ̈ܐ ܒܲܝܢܵܬܲܝܗܝ ܬܪܹܝܢ ܟܵܗܢܹ̈ܐ: ܬ݂ܵܐܹܪ ܥܲܒܕܘܿܠܠܵܐ ܘܘܲܣܝܼܡ ܨܲܒܝܼܗ) ݂ ܫܠܲܕܹ̈ܐ ܣܕܝܼܩܹ̈ܐ ܢܬ݂ܝܼܪܹ̈ܐ ܝܗ݇ܘܵܘ ܥܲܠ ܐܲܪܥܵܐ ܒܟܠ ܕܘܼܟܬܐ: ܘܓܘܼܕܵܢܹ̈ܐ ܡܸܠܝܹ̈ܐ ܝܗ݇ܘܵܘ ܒܸܙܥܹ̈ܐ ܕܓܘܼܠܠܹ̈ܐ: ܘܐܲܬ݂ܪܹ̈ܐ ܕܲܦܩܵܥܝܵܬ݂ܐ ݂ ܚܲܕ ܓܘܼܢܚܵܐ ܝܗ݇ܘܵܐ ܕܠܵܐ ܐܵܬܹܐ ܠܲܡܗܲܝܡܘܿܢܹܐ[2] ݂

ܣܗܸܕܠܹܗ ܥܲܠ ܗܵܕܹܐ ܢܚܵܪܬܐ ܟܵܗܢܵܐ ܦܝܼܝܘܿܣ ܩܵܫܵܐ: ܩܲܝܘܼܡܵܐ ܐܲܦܸܣܩܘܿܦܵܝܵܐ ܠܐ݇ܣܘܼܪ̈ܝܵܝܹܐ ܩܵܬ݂ܘܿܠܝܼܩܵܝܹ̈ܐ: ܟܲܕ ܝܼܗ݇ܘܵܐ ܗܿܘ ܩܲܕܡܵܝܵܐ ܕܲܥܒܸܪܹܗ ܠܥܹܕܬܐ ܒܵܬܲܪ ܥܒ݂ܵܪܬܐ ܕܚܲܝܠܵܘܵܬ݂ܐ ܕܕܲܪܵܪܘܼܬ݂ ܪܗܝܼܒ݂ܘܼܬ݂ܐ (مكافة الارهاب) ݂ ܫܩܸܠܠܹܗ ܨܘܼܪ̈ܵܬ݂ܐ ܩܵܐ ܟܠܲܝܗܝ ܫܠܲܕܹ̈ܐ ܡܬܝܼܚܹ̈ܐ ܘܲܫܛܝܼܚܹ̈ܐ ܥܲܠ ܐܲܪܥܵܐ ܕܥܹܕܬܐ: ܚܲܕ ܒܪܹܫ ܗܿܘ ܐ݇ܚܪܢܵܐ ݂

ܗܵܕܹܐ ܨܦܵܚܬܐ ܫܒܸܩܠܵܗ̇ ܕܦܵܪܣܵܐ ܥܝܼܪܘܼܬܐ ܥܲܠ ܫܲܘܝܘܼܬ݂ ܟܠܹܗ ܥܵܠܡܵܐ: ܒܸܡܢܕܝܼ ܕܲܒܪܵܝܵܐ ܠܹܗ ܒܪܹܫ ܡܫܝܼܚܵܝܹ̈ܐ ܕܥܝܼܪܵܐܩ ܡܼܢ ܣܸܪܝܘܼܬ݂ܐ ܘܲܓܙܵܡܵܐ ܘܲܪܕܘܼܦܝܵܐ: ܥܲܠ ܐܝܼܕܲܝ̈ ܫܸܚܬܵܢܹ̈ܐ ܕܣܝܼܥܵܬ݂ܐ ܘܡܝܼܠܝܼ̈ܫܝܵܬ݂ܐ ܐܸܣܠܵܡܵܝܹ̈ܐ ݂

_______

[1] ܡܸܢܝܵܢܵܐ ܬܪܝܼܨܵܐ ܕܗܵܢ ܝܲܗܠܵܐ ܡܙܲܝܢܵܐ ܠܵܐ ܝܠܹܗ ܦܝܼܫܵܐ ܝܼܕܝܼܥܵܐ: ܒܗܿܝ ܕܲܡܨܹܐ ܠܹܗ ܚܲܕ ܡܸܢܝܵܢܵܐ ܡܸܢܲܝܗܝ ܕܥܵܪܹܩ ܒܥܸܕܵܢ ܡܓܲܠܝܘܼܬ݂ܐ ܕܲܨܠܝܼܦܹ̈ܐ (إجلاء الجرحى) ݂

[2] ܨܵܝܹܪ ܘܨܲܠܡܸܢ ܟܵܗܢܵܐ ܦܝܼܝܘܿܣ ܩܵܫܵܐ ܠܲܪ̈ܦܵܦܹܐ ܕܩܲܡ ܚܵܝܹܐ ܠܗ݇ܘܿܢ ܓܲܘ ܚܲܕ ܟܬܵܒ݂ܵܐ ܣܝܼܡܵܐ ܓܲܘ (666) ܦܵܬܘܵܬ݂ܐ: ܕܲܡܫܘܼܟܸܢܹܗ ܠܦܵܦܵܐ ܒܸܢܹܝܕܸܟܬ ܕ(16) ܒܝܘܿܡ 16 ܒܟܵܢܘܿܢ ܬܪܲܝܵܢܵܐ 2012 ݂

ܡܼܢ ܗܿܝ ܥܸܕܵܢܵܐ ܕܓܘܼܢܚܵܐ: ܦܝܼܫܠܵܗ̇ ܡܚܘܼܕܲܬ݂ܬܐ ܥܹܕܬܐ ܕܡܵܪܬܐ ܕܫܘܼܘܙܵܒ݂ܵܐ: ܘܲܡܣܘܼܩܲܠܬܐ ܟܲܕ ܒܸܣܥܵܝܵܐ ܠܲܙܟܵܝܵܐ ܥܲܠ ܐܲܬ݂ܪܹ̈ܐ ܟܘܼܡܹ̈ܐ ܕܓܘܼܢܚܵܐ ݂ ܙܟܵܝܬܐ ܥܲܠ ܓܘܼܢܚܵܐ ܠܵܐ ܝܠܹܗ ܣܘܼܟܵܠܵܗ̇ ܢܫܵܝܬܵܗ̇ ܕܓܘܼܢܚܵܐ ݂  ܨܲܠܡܵܐ ܕܕܘܼܟ݂ܪܵܢܵܐ ܦܝܼܫܠܹܗ ܡܫܘܼܬܐܸܣܵܐ ܓܲܘ ܐܵܘܵܢܵܐ ܒܩܘܼܪܒܵܐ ܕܥܹܕܬܐ: ܐܲܝܟܵܐ ܕܡܲܨܝܵܐ ܕܦܵܝܫܝܼ ܚܸܙܝܹ̈ܐ ܡܵܐܢܹ̈ܐ ܡܟܲܬܡܹ̈ܐ ܕܦܝܼܫܠܗ݇ܘܿܢ ܡܘܼܦܠܚܹ̈ܐ ܒܥܸܕܵܢ ܣܓ݂ܵܕܬܐ ܘܲܨܠܘܿܬܐ ܘܥܲܒ̇ܝܼܕܘܼܬ݂ܐ ܓܲܘ ܥܹܕܬܐ: ܘܐܵܦ ܡܲܨܝܵܐ ܕܦܵܝܫܵܐ ܚܙܝܼܬܐ ܚܲܕܟܡܵܐ ܡܼܢ ܕܟ݂ܵܪܹ̈ܐ ܕܟܵܗܢܹ̈ܐ ܬ݂ܵܐܹܪ ܥܲܒܕܘܿܠܠܵܐ ܘܘܲܣܝܼܡ ܨܲܒܝܼܗ ݂

ܫܲܪܝܼܪܵܐܝܼܬ: ܒܸܢܝܵܢܵܐ ܕܥܹܕܬܐ ܚܲܕܬܐ ܡܲܒܝܘܿܢܹܐ ܝܠܹܗ ܚܲܕܬܐ ܡܚܲܕܬܐ ܓܡܝܼܪܵܐܝܼܬ ݂ ܘܦܘܼܣܩܵܢܵܐ ܕܲܥܡܘܼܪܝܵܐ ܕܒܸܢܝܵܢܵܐ ܕܥܹܕܬܐ: ܦܝܼܫܠܹܗ ܫܩܝܼܠܵܐ ܡܼܢ ܪܹܫ ܐܲܦܸܣܩܘܿܦܹ̈ܐ ܕܒܲܓ݂ܕܵܕ ܡܲܬܲܝ ܫܵܒܵܐ ܡܲܬܘܿܟܵܐ: ܘܫܘܼܓ݂ܠܵܐ ܦܝܼܫܠܹܗ ܝܗܝܼܒ݂ܵܐ ܠܡܸܫܬܲܐܠܵܢܘܼܬܐ ܕܡܲܚܵܪܵܐ ܙܝܼܵܐܕ ݂ ܘܡܲܛܪܵܢ ܡܵܪܝ ܝܲܘܣܵܦ ܡܲܢܨܘܼܪ ܥܲܒܵܐ ܦܝܼܫܠܹܗ ܪܫܝܼܡܵܐ ܪܹܫ ܐܲܦܸܣܩܘܿܦܹ̈ܐ ܕܒܲܓ݂ܕܵܕ ܒܐܵܕܵܪ 2011: ܘܦܝܼܫܠܹܗ ܚܵܝܘܿܪܵܐ ܠܲܡܚܲܕܲܬ݂ܬܐ ܕܒܸܢܝܵܢܵܐ ݂ ܘܲܗܘܹܐ ܠܹܗ ܙܘܼܝܵܚܵܐ ܕܦܘܼܬܵܚܵܐ ܕܥܹܕܬܐ ܚܕܲܬܐ ܒܝܘܿܡ 14 ܒܟܵܢܘܿܢ ܩܲܕܡܵܝܵܐ 2012: ܒܛܘܼܝܵܒ݂ܵܐ ܕܟܠܲܝܗܝ ܦܵܛܪܝܼܵܪ̈ܟܹܐ ܕܲܡܫܝܼܚܵܝܹ̈ܐ ܕܡܲܕܢܚܵܐ ݂

ܡܟܲܣܹܐ ܩܲܝܣܵܐ ܠܟܠܲܝܗܝ ܥܲܡܘܼܕܹ̈ܐ ܘܓܘܼܕܵܢܹ̈ܐ ܓܵܘܵܝܹ̈ܐ: ܘܫܸܡܵܢܹ̈ܐ ܕܣܵܗܕܹ̈ܐ ܦܝܼܫܠܗ݇ܘܿܢ ܚܦܝܼܪܹ̈ܐ ܥܲܠ ܩܲܝܣܵܐ ܒܬܸܪܘܲܝܗܝ ܓܹܒܵܢܹ̈ܐ ܕܗܲܝܟܠܵܐ ܕܥܹܕܬܐ ݂ ܘܒܲܗܪܵܐ ܟܝܵܢܵܝܵܐ ܕܡܵܛܹܐ ܒܐܘܼܪܚܵܐ ܕܟܵܘܵܬ݂̈ܐ ܡܵܪ̈ܲܝ ܓܲܘܢܹ̈ܐ ܡܫܲܚܠܦܹ̈ܐ: ܝܵܗܒ݂ܝܼ ܠܕܘܼܟܵܐ ܚܲܕ ܫܘܼܦܪܵܐ ܡܸܬܕܲܡܪܵܢܵܐ ݂ ܘܐܵܦ ܩܲܢܕܝܼܠܹ̈ܐ ܪ̈ܲܒܹܐ ܡܵܠܝܼ ܠܐܘܼܦܩܹ̈ܐ ܕܥܲܝܢܵܐ: ܘܝܵܗܒ݂ܝܼ ܠܕܘܼܟܵܐ ܫܘܼܦܪܵܐ ܬܡܝܼܗܵܐ ܝܲܬܝܼܪ ܘܝܲܬܝܼܪ ݂ ܒܪܹܫ ܡܲܕܒܚܵܐ: ܩܸܛܪܵܐ ܓܵܘܵܝܵܐ ܡܲܚܙܹܐ ܩܠܵܥܵܐ ܕܩܵܪܒܵܐ ܒܲܪܵܝܵܐ ݂

ܡܵܐ ܕܲܒܪܹܐ ܠܹܗ: ܠܵܐ ܝܗ݇ܘܵܐ ܢܝܼܫܵܢܩܵܐ ܥܲܠ ܡܚܲܝܕܘܼܬܐ ܕܥܝܼܪ̈ܵܩܵܝܹܐ ݂ ܠܲܝܬ ܡܸܢܕܝܼ ܕܫܵܒܹܩܠܲܢ ܕܝܵܕܥܲܚ ܥܸܠܬܐ ܐܲܘ ܬܘܼܢܝܼܬܐ ܕܗܵܕܹܐ ܨܦܵܚܬܐ: ܐܵܪܵܐ ܐܵܢܲܢܩܵܝܬܐ ܝܗ݇ܘܵܐ ܫܦܵܟ݂ܬܐ ܕܕܸܡܵܐ ܕܲܕܒ݂ܝܼܚܲܝ̈ ܢܲܦ̮ܫܵܐ: ܕܦܵܐܹܫ ܚܫܝܼܒ݂ܵܐ ܐܲܝܟ݂ ܪܸܡܙܵܐ ܠܲܡܚܝܼܠܘܼܬ݂ ܡܫܝܼܚܵܝܘܼܬ݂ܐ ܒܗܵܢܵܐ ܐܲܬ݂ܪܵܐ ؟ ܚܲܕ ܒܘܼܩܵܪܵܐ ܝܠܹܗ ܕܠܵܐ ܡܨܹܝܚ ܕܝܵܗܒܲܚܠܹܗ ܦܘܼܢܵܝܵܐ ݂

ܐܵܬܵܐ ܝܼܚܝܼܕܵܝܬܐ ܠܗܵܢܵܐ ܢܲܗܪܵܐ ܕܸܡܵܝܵܐ: ܝܼܠܵܗ̇ ܚܲܕ ܣܸܪܛܵܐ ܫܝܼܫܵܝܵܐ ܡܬܝܼܚܵܐ ܥܲܠ ܐܲܪܥܵܐ ܠܬܲܚܬ ܒܡܲܕܒܚܵܐ ܡܫܲܪܘܿܝܹܐ ܡܼܢ ܗܲܝܟܠܵܐ ܘܒܸܚܬܵܡܵܐ ܒܐܵܐܲܪ ܕܥܹܕܬܐ ݂

ܡܼܢ ܩܕܵܡ ܨܦܵܚܬܐ ܕ 31 ܒܬܸܫܪܝܼܢ ܩܲܕܡܵܝܵܐ 2010: ܠܵܐ ܫܲܝܢܘܼܬ݂ܐ: ܦܪܸܣܠܵܗ̇ ܘܙܝܼܕܠܵܗ̇ ܓܲܘ ܐܲܬ݂ܪܵܐ: ܘܥܲܡ ܗܵܕܹܐ ܐܝܼܬ ܗ݇ܘܵܐ 5000 ܚܲܡܫܵܐ ܐܲܠܦܹ̈ܐ ܝܼܩܪ̈ܵܬ݂ܐ ܐܵܬܝܼ ܗ݇ܘܵܘ ܥܝܵܕܵܐܝܼܬ ܠܥܹܕܬܐ ܕܡܵܪܬܐ ܕܫܘܼܘܙܵܒ݂ܵܐ: ܘܫܲܒ݂ܥܵܐ ܐܲܠܦܹ̈ܐ ܠܥܹܕܬܐ ܕܡܵܪܝ ܒܸܗܢܵܡ: ܘܬܪܹܝܢ ܐܲܠܦܹ̈ܐ ܠܥܹܕܬܐ ܕܩܲܕܝܼܫܵܐ ܝܲܘܣܸܦ ݂ ܘܲܟܢܝܼܫܵܐܝܼܬ ܡܵܨܹܝܚ ܕܡܵܢܹܝܚ (14000) ܝܼܩܪ̈ܵܬ݂ܐ ܡܼܢ ܐ݇ܣܘܼܪ̈ܵܝܹܐ ܩܵܬ݂ܘܿܠܝܼܩܵܝܹ̈ܐ ܓܲܘ ܒܲܓ݂ܕܵܕ[1] ݂

ܡܼܢ ܥܸܕܵܢ ܨܦܵܚܬܐ: ܠܵܐ ܟܠܹܐ ܠܹܗ ܬܪܵܥܵܐ (ܓ̰ܪܵܝܵܐ ܕܕܸܡܵܐ: النزيف) ܕܝܼܡܘܿܓ݂ܪܵܦܵܝܵܐ ݂ ܘܒܫܲܢ݇ܬܐ ܕ2018: ܠܲܝܬ ܝܲܬܝܼܪ ܡܼܢ (1000) ܝܼܩܪ̈ܵܬ݂ܐ ܕܐܵܬܝܼ ܗ݇ܘܵܘ ܠܐܲܢܲܝ ܬܠܵܬ ܥܹܕܵܬܵܐ ܢܲܩܝܼܦܹ̈ܐ ܠܐ݇ܣܘܼܪ̈ܝܵܝܹܐ ܩܵܬ݂ܘܿܠܝܼܩܵܝܹ̈ܐ ܕܓܲܘ ܒܲܓ݂ܕܵܕ ݂

ܗܵܢܵܐ ܥܪܘܼܩܝܵܐ ܒܥܸܠܬܐ ܕܲܙܕܘܿܥܬܐ: ܥܕܲܡܵܐ ܠܝܲܘܡܵܢܵܐ ܩܵܐܹܡ ܝܠܹܗ: ܘܲܙܕܘܿܥܬܐ ܠܗܵܫܵܐ ܦܵܝܫܵܢܬܐ ܝܠܵܗ̇ ݂ ܨܦܵܚܬܐ ܕܲܗܘܹܐ ܠܵܗ̇ ܓܲܘ ܥܹܕܬܐ ܕܡܵܪܬܐ ܕܫܘܼܘܙܵܒ݂ܵܐ: ܝܼܠܵܗ̇ ܚܕܵܐ ܡܲܛܪܘܿܦܝܼܬܐ (صدمة) ܕܠܵܐ ܐܵܬܝܵܐ ܠܡܲܢܫܘܿܝܹܐ: ܘܪܵܒܵܐ ܒܸܫ ܚܲܝܠܵܢܬܐ ܝܠܵܗ̇ ܡܼܢ ܚܲܕ ܚܲܫܵܐ ܐܲܘ ܓܘܼܢܚܵܐ ܕܠܵܐ ܐܵܬܹܐ ܠܨܲܠܡܲܢܬܐ ݂

_______

[1] ܡܲܒܘܼܥܵܐ: ܟܵܗܢܵܐ ܦܝܼܝܘܿܣ ܩܵܫܵܐ ݂

ܥܲܠ ܩܸܛܪܵܐ ܕܐܝܼܬ݂ ܒܪܹܫ ܡܲܕܒܚܵܐ ܓܲܘ ܠܸܒܵܐ ܕܥܹܕܬܐ: ܡܵܨܹܝܚ ܕܚܵܙܹܝܚ ܨܘܼܪܬܐ ܕܡܵܪܬܐ ܡܲܪܝܲܡ ܒܬܘܼܠܬܐ (ܡܵܪܬܐ ܕܫܘܼܘܙܵܒ݂ܵܐ) ܒܲܬܪܹܝܢ ܐܝܼܕܵܬ݂ܐ ܦܬܝܼܚܹܵܐ ܐܲܝܟ݂ ܡܵܐܢܵܐ: ܐܲܝܟܵܐ ܕܛܵܥܢܵܐ ܠܲܒܪܘܿܢܵܐ ܦܵܪܘܿܩܵܐ ܝܼܫܘܿܥ ܡܫܝܼܚܵܐ ܓܲܘ ܠܸܒܵܗ̇ ݂ ܗܵܢܵܐ ܥܲܡܠܵܐ ܠܵܐ ܚܙܹܐ ܠܹܗ ܚܪܵܒ݂ܵܐ ܒܥܸܕܵܢ ܨܦܵܚܬܐ ܕܝܘܿܡ 31 ܒܬܸܫܪܝܼܢ ܩܲܕܡܵܝܵܐ 2010: ܕܚܲܕܟܡܵܐ ܚܵܫܒ݂ܝܼ ܠܹܗ ܬܸܕܡܘܿܪܬܐ ݂ ܝܼܠܵܗ̇ ܚܕܵܐ ܨܘܼܪܬܐ ܕܲܪܫܝܼܡܵܐ ܠܹܗ ܟܵܗܢܵܐ ܟܲܠܕܵܝܵܐ ܡܝܼܟ݂ܵܐܹܝܠ ܐܘܿܦܝܼ ܓܲܘ ܪܗܘܿܡܵܐ ܒܫܲܢ݇ܬܐ ܕ1904 ݂ ܗܵܕܹܐ ܨܘܼܪܬܐ ܡܣܘܼܩܲܠܬܐ ܝܗ݇ܘܵܐ ܘܲܡܐܘܼܛܲܪܬܐ ܒܲܚܕܵܐ ܥܸܕܵܢܵܐ ܡܼܢ ܥܸܕܵܢܵܬܹ̈ܐ: ܠܚܲܕ ܡܼܢ ܡܲܕܒܚܹ̈ܐ ܓܹܒܵܝܹ̈ܐ ܕܥܹܕܬܐ ܕܐ݇ܣܘܼܪ̈ܵܝܹܐ ܩܵܬ݂ܘܿܠܝܼܩܵܝܹ̈ܐ ܒܲܦܢܝܼܬܐ ܥܲܬܝܼܩܬܐ ܒܒܲܓ݂ܕܵܕ ـ ܥܲܩܕܸܠܢܲܨܵܪܵܐ ݂ ܘܐܵܦ ܡܵܨܹܝܚ ܕܚܵܙܹܝܚ ܓܲܘ ܩܘܼܒܬܐ ܕܐܝܼܬ ܒܪܹܫܵܐ ܘܦܲܠܓܵܐ ܕܥܹܕܬܐ: ܚܲܕ ܠܘܼܚܵܐ ܡܼܢ ܦܲܚܵܪܵܐ ܕܦܸܣܦܣܵܐ (خزف الفسيفساء): ܕܡܵܬܹܠ ܡܬܲܘܘܲܓܬܐ ܕܲܒܬܘܼܠܬܐ ܛܥܝܼܢܬܐ ܡܲܠܟܵܐ ܙܥܘܿܪܵܐ ܓܲܘ ܕܪܵܥܵܗ̇ ݂  ܗܵܢܵܐ ܠܘܼܚܵܐ ܦܝܼܫܠܹܗ ܪܫܝܼܡܵܐ ܒܝܲܕ ܚܲܕ ܐܲܡܵܢܵܐ ܡܲܫܠܡܵܢܵܐ ܒܫܲܢ݇ܬܐ ܕ1994 ݂

ܒܲܚܕܵܐ ܐܲܪܥܵܐ ܠܕܸܦܢܵܐ ܕܥܹܕܬܐ ܕܡܵܪܬܐ ܕܫܘܼܘܙܵܒ݂ܵܐ: ܐܝܼܬ ܚܲܕܟܡܵܐ ܩܲܒ݂ܪ̈ܵܘܵܬ݂ܐ ܠܟܵܗܢܹ̈ܐ ܘܲܡܫܲܡܫܵܢܹ̈ܐ ܕܥܹܕܬܐ: ܘܡܸܢܲܝܗܝ ܩܲܒ݂ܪ̈ܵܘܵܬ݂ܐ ܕܲܬܪܹܝܢ ܟܵܗܢܹ̈ܐ ܕܦܝܼܫܠܗ݇ܘܿܢ ܩܛܝܼܠܹ̈ܐ ܒܝܘܿܡ 31 ܒܬܸܫܪܝܼܢ ܩܲܕܡܵܝܵܐ 2010 ݂

ܩܲܒ݂ܪ̈ܵܘܵܬ݂ܐ ܐ݇ܚܪ̈ܢܹܐ ܕܐܝܼܬ ܗ݇ܘܵܐ ܥܲܠ ܓܹܒܵܢܹ̈ܐ ܕܕܵܪܬܐ ܕܥܹܕܬܐ: ܗܵܫܵܐ ܡܟܲܣܝܹ̈ܐ (ܡܟܘܼܣܝܹ̈ܐ) ܝܠܲܝܗܝ ܒܥܸܠܝܼܬܐ (شُرفة) ܪܨܝܼܦܬܐ: ܘܥܲܠ ܓܘܼܕܵܐ ܬܲܝܡܢܵܝܵܐ ܕܥܹܕܬܐ ܦܝܼܫܠܗ݇ܘܿܢ ܡܘܼܬܒܹ̈ܐ ܟܹܐܦܲܝ̈ ܩܝܵܡܵܐ ݂

ܒܝܲܘܡܵܐ ܕܫܲܒܬܐ 10 ܒܲܫܒ݂ܵܛ 2018: ܡܙܘܼܝܸܚܠܗ݇ܘܿܢ ܐ݇ܣܘܼܪ̈ܵܝܹܐ ܩܵܬ݂ܘܿܠܝܼܩܵܝܹ̈ܐ ܓܲܘ ܒܲܓ݂ܕܵܕ ܒܝܲܘܡܵܐ ܬܹܒܹܝܠܵܝܵܐ ܕܲ(ܡܪܝܼܥܵܐ) ܓܲܘ ܥܹܕܬܐ ܕܡܵܪܬܐ ܕܫܘܼܘܙܵܒ݂ܵܐ ݂ ܙܘܼܝܵܚܵܐ ܩܛܸܪܹܗ ܒܪܹܫܵܢܘܼܬ݂ܐ ܕܡܵܪܝ ܝܲܘܣܸܦ ܡܲܢܨܘܼܪ ܥܲܒܵܐ: ܪܹܫ ܐܲܦܸܣܩܘܿܦܹ̈ܐ ܕܐ݇ܣܘܼܪ̈ܝܵܝܹܐ ܩܵܬ݂ܘܿܠܝܼܩܵܝ݂̈ܐ ݂ ܘܙܘܼܝܵܚܵܐ ܕܡܝܼܪܵܐ ܝܗ݇ܘܵܐ: ܒܗܲܝܡܵܢܘܼܬ݂ܐ ܪܵܦܘܿܬ݂ܬܵܐ (نابضة) ܒܚܲܝܹ̈ܐ: ܘܲܒܒܲܪ̈ܣܲܡܝܵܬ݂ܐ ܢܦܝܼܩܹ̈ܐ ܒܲܫܦܝܼܟ݂ܘܼܬ݂ܐ: ܘܲܒܚܲܝܹ̈ܐ ܡܸܬܚܲܕܬܵܢܹ̈ܐ ݂ ܐܲܝܟ݂ ܕܐܸܢ ܠܲܝܬ ܡܸܢܕܝܼ ܕܡܲܚܘܹܐ ܐܲܘ ܓܵܠܹܐ ܕܚܲܕ ܡܸܢܕܝܼ ܣܸܪܝܵܐ ܒܸܪܝܵܐ ܝܠܹܗ ܠܐܲܟ݂ܵܐ ݂

ܘܥܲܡ ܗܵܕܹܐ ܘܲܒܥܸܕܵܢ ܙܘܼܝܵܚܵܐ ܕܦܝܼܫܠܹܗ ܩܛܝܼܪܵܐ ܒܐܝܼܩܵܪܵܐ ܘܪܵܡܘܼܬ݂ܐ ܓܡܝܼܪܬܐ: ܫܩܸܠܠܗ݇ܘܿܢ ܡܗܘܼܡܢܹ̈ܐ ܘܐܵܢܝ݇ ܡܪ̈ܝܼܥܹܐ (ܟܪ̈ܝܼܗܹܐ) ܩܲܕܡܵܐܝܼܬ: ܒܘܼܪܸܟܬܐ ܒܲܣܝܵܡܬܐ (ܡܲܬܲܒ݂ܬܐ) ܕܙܲܝܬܐ ܡܩܲܕܲܫܬܐ ܥܲܠ ܓܒ݂ܝܼܢܲܝܗܝ ݂ ܒܚܘܼܬܵܡܵܐ ܕܩܘܼܪܒܵܢܵܐ ܩܲܕܝܼܫܵܐ ܓܲܘ ܥܹܕܬܐ: ܦܝܼܫܠܵܗ̇ ܡܓܘܼܒܲܝܬܐ (ܡܲܠܟ̇ܬܐ ܕܲܟܪ̈ܝܼܗܹܐ) ݂

ܒܫܲܢ݇ܬܐ ܕ 2017: ܡܲܠܟ̇ܬܐ ܝܼܗ݇ܘܵܐ ܚܕܵܐ ܐܲܢ݇ܬ̇ܬ݂ܐ ܥܠܲܝܡܬܐ ܫܸܡܵܗ̇ ܢܘܼܪ (ܘܗܵܢܵܐ ܫܸܡܵܐ ܣܘܼܟܵܠܹܗ ܒܠܸܫܵܢܵܐ ܥܲܪܒ݂ܵܝܵܐ ܝܼܠܹܗ: ܒܲܗܪܵܐ): ܘܗܿܝ ܐܝܼܬ ܠܵܗ̇ ܚܲܕ ܡܲܪܥܵܐ ܐܲܡܝܼܢܵܐ ܕܠܵܐ ܡܵܨܝܵܐ ܕܓ̰ܵܘܓ̰ܵܐ ݂ ܘܲܒܗܵܕܹܐ ܫܲܢ݇ܬܐ ܦܝܼܫܠܹܗ ܢܩܝܼܠܵܐ ܬܵܓ݂ܵܐ ܕܲܡܣܲܩܸܠ ܗ݇ܘܵܐ ܦܵܬܵܗ̃ ܡܒܘܼܪܣܲܡܬܐ ܠܡܲܠܟܬܐ ܚܕܲܬܐ: ܘܐܵܦ ܗܿܝ ܐܝܼܬ ܠܵܗ̇ ܚܕܵܐ ܥܸܠܬܐ ܦܲܓ݂ܪܵܢܵܝܬܐ ܘܢܲܦ̮ܵܢܵܝܬܐ ݂

ܚܲܕ ܪܦܵܦܵܐ ܕܠܵܐ ܐܵܬܹܐ ܠܲܢܫܵܝܵܐ ܓܲܘ ܒܲܓ݂ܕܵܕ: ܐܲܝܟܵܐ ܕܲܡܫܝܼܚܵܝܹ̈ܐ ܐܲܡܝܼܢܹ̈ܐ ܠܲܝܗܝ ܒܲܪܚܵܫܬܐ ܥܲܠ ܗܿܘ ܚܲܒ݂ܠܵܐ ܩܡܝܼܛܵܐ ܘܲܡܬܝܼܚܵܐ ܒܹܝܬ ܬܪܹܝܢ ܢܲܗܪܹ̈ܐ ݂