ܫܸܪܫܵܐ ܕܐܝܼܬܘܼܬܐ ܐܵܪܸܡܢܵܝܬܐ ܓܲܘ ܡܝܼܙܘܿܦܘܿܬܵܡܝܵܐ (ܐܲܬ݂ܪܵܐ ܕܒܹܝܬ ܢܲܗܖ̈ܝܼܢ): ܒܸܕܥܵܪܵܐ ܝܠܹܗ ܠܕܵܖܹ̈ܐ ܥܲܬܝܼܩܹ̈ܐ ݂ ܡܼܢ ܕܵܪܵܐ ܩܲܕܡܵܝܵܐ ܩ ݂ ܡ: ܐܲܕܝܵܒܝܼܢ (ܘܐܵܦ ܐܲܪܒܵܐܝܼܠܠܘܿ/ ܐܲܪܒܸܠ ܕܝܲܘܡܵܢܵܐ): ܝܼܗ݇ܘܵܐ ܚܕܵܐ ܡܢܵܬ݂ܐ ܡܼܢ ܡܲܠܟܘܼܬܐ ܐܵܪܸܡܢܵܝܬܐ ܒܙܲܒ݂ܢܵܐ ܕܕܝܼܟܪܵܐܢ (ܬܪܲܝܵܢܵܐ) ܪܲܒܵܐ ݂ ܐܲܕܝܵܒܝܼܢ ܝܼܗ݇ܘܵܐ ܡܢܵܬܐ ܬܲܝܡܢܵܝܬܐ ܕܐܵܪܡܝܼܢܝܵܐ: ܕܦܝܼܫܠܵܗ̇ ܒܲܫܢܵܬ݂ 301: ܗܿܘ ܐܲܬ݂ܪܵܐ ܡܫܝܼܚܵܝܵܐ ܩܲܕܡܵܝܵܐ ܓܲܘ ܬܲܫܥܝ݂ܬܐ ݂ ܘܲܟܒܲܪ ܚܕܵܐ ܬܦܵܩܬܐ ܒܪܹܐ ܠܵܗ̇ ܚܕܵܖ̈ܲܝ 328 ـ 329 ܒܲܝܢܵܬ݂ ܬܪܹܝܢ ܫܲܠܝܼܛܹ̈ܐ ܕܝܼܗ݇ܘܵܘ ܠܚܘܿܕܲܝܗܝ ܡܫܝܼܚܵܝܹ̈ܐ ܒܗܿܘ ܙܲܒ݂ܢܵܐ: ܒܹܝܬ ܐܸܡܦܪܵܛܘܿܪܵܐ ܪܗܘܿܡܵܝܵܐ ܩܸܣܛܲܢܛܝܼܢ ܩܲܕܡܵܝܵܐ: ܘܐܵܪܸܡܢܵܝܵܐ ܬܪܝܼܕܲܝܬ ܬܠܝܼܬܵܝܵܐ ݂ ܡܫܘܼܪܸܪܹܗ ܩܸܣܛܲܢܛܝܼܢ ܩܲܕܡܵܝܵܐ ܠܕܲܘܪܵܐ ܕܲܬܪܝܼܕܲܝܬ ܬܠܝܼܬܵܝܵܐ ܓܲܘ ܡܲܫܚܲܕܬܐ ܕܡܲܕܢܚܵܐ ݂ ܘܗܵܕܟ݂ܵܐ ܡܫܲܘܬܘܿܦܹܐ ܝܠܲܝܗܝ ܡܣܲܒ݂ܖ̈ܵܢܹܐ (ܡܲܫܚܸܕܵܢܹ̈ܐ) ܐܵܖܸ̈ܡܢܵܝܹܐ ܒܡܲܫܚܲܕܬܐ ܕܐܲܬ݂ܪܵܐ ܕܒܹܝܬ ܢܲܗܖ̈ܝܼܢ ܘܡܲܠܟܘܼܬ݂ܐ ܣܵܣܵܢܵܝܬܐ: ܐܲܝܟ݂ ܕܡܲܕܟ݂ܘܿܪܹܐ ܝܠܹܗ ܡܬܲܫܥܝܼܬܵܢܵܐ ܝܲܘܢܵܝܵܐ ܣܘܿܙܡܝܼܢ ܚܕܵܖ̈ܲܝ ܫܲܢ݇ܬܐ ܕ402 ݂ ” ܒܚܲܪܬ݂ܐ ܒܲܝܢܵܬ݂ ܥܲܡܡܹ̈ܐ ܫܒ݂ܵܒܹ̈ܐ: ܙܝܼܕܠܵܗ̇ ܗܲܝܡܵܢܘܼܬܐ ܒܲܚܕܵܐ ܨܘܼܪܬܐ ܪܲܒܬܐ: ܘܲܡܛܘܼܘܸܪܵܗ̇ ܗܲܝܡܵܢܘܼܬܐ ܘܲܪܒܹܐ ܠܵܗ̇ ܒܚܲܕ ܕܲܪܓ݂ܵܐ ܪܲܒܵܐ: ܘܚܵܫܒܸܢ ܕܦܵܖ̈ܣܵܝܹܐ ܚܦܸܩܠܗ݇ܘܿܢ ܠܲܡܫܝܼܚܵܝܘܼܬܐ ܒܡܸܨܥܵܝܘܼܬܐ ܕܐ݇ܚܝܵܢܘܼܬ݂ܐ ܐܵܢܲܢܩܵܝܬܐ ܕܐܝܼܬ ܗ݇ܘܵܐ ܠܗ݇ܘܿܢ ܥܲܡ ܐܘܿܣܪܘܿܘܹܝܢ^[1] ܘܐܵܖܸ̈ܡܢܵܝܹܐ”^[2] ݂

ܒܕܵܪܵܐ ܫܒܲܥܣܝܼܪܵܝܵܐ: ܚܲܕܟܡܵܐ ܟܢܘܼܫܝܹ̈ܐ ܐܵܖܸ̈ܡܢܵܝܹܐ ܚܲܕܬܹ̈ܐ: ܫܟܸܢܘܼܢ ܒܐܲܬ݂ܪܵܐ ܕܒܹܝܬ݂ ܢܲܗܖ̈ܝܼܢ ܡܼܢ ܒܵܬܲܪ ܨܦܵܚܬܐ ܥܲܠ ܒܲܓ݂ܕܵܕ ܒܝܲܕ ܫܵܐܗ ܦܵܪܣܵܝܵܐ (ܥܲܒܵܐܣ ܩܲܕܡܵܝܵܐ) ܒܫܲܢ݇ܬܐ ܕ1623 ݂ ܒܫܸܢܹ̈ܐ ܩܲܕܡܵܝܹ̈ܐ ܡܼܢ ܕܵܪܵܐ ܫܒܲܥܣܝܼܪܵܝܵܐ: ܡܲܠܟܵܐ ܦܵܪܣܵܝܵܐ ܡܫܘܼܢܹܐ ܠܹܗ ܠܥܵܡܘܿܖܹ̈ܐ ܐܵܖܸ̈ܡܢܵܝܹܐ ܡܼܢ ܕܓ̰ܘܼܓ݂ܵܐ (ܡܕܝܼܢ݇ܬܐ ܐܵܪܸܡܢܵܝܬܐ ܥܲܬܝܼܩܬܐ ܓܲܘ ܢܵܚܝܼܬܸܫܝܼܦܵܐܢ ܥܲܠ ܣܸܦܬܐ ܓܲܪܒܝܵܝܬܐ ܕܢܲܗܪܵܐ ܕܐܵܪܵܟܸܣ) ݂ ܘܗܵܕܟ݂ܐ ܦܝܼܫܠܗ݇ܘܿܢ ܡܘܼܬܒܹ̈ܐ (12000) ܐܲܠܦܹ̈ܐ ܐܵܖܸ̈ܡܢܵܝܹܐ ܓܲܘ (ܕܓ̰ܘܼܓ݂ܵܐ) ܚܕܲܬܐ: ܩܘܼܪܒܵܐ ܕܐܲܨܦܵܗܵܢ: ܠܲܡܫܲܘܬܘܿܦܹܐ ܒܛܘܼܘܵܪܵܐ ܕܐܵܪܸܫܟ݂ܵܝܬܐ ܚܕܲܬܐ ܕܐܸܡܦܪܵܛܘܿܪܘܼܬܐ ܦܵܪܣܵܝܬܐ ܨܘܿܦܵܝܬܐ (الصوفية) ݂ ܘܐܝܼܡܲܢ ܕܡܝܼܬ ܠܹܗ ܫܵܐܗ: ܚܝܹܐ ܠܗ݇ܘܿܢ ܐܵܖܸ̈ܡܢܵܝܹܐ ܓܲܘ ܐܲܬ݂ܪܵܐ ܕܦܵܪܹܣ ܚܲܕ ܙܲܒ݂ܢܵܐ ܬܚܘܿܬ݂ ܪܕܘܼܦܝܵܐ ݂ ܪܵܒܵܐ ܡܸܢܲܝܗܝ ܡܫܘܼܢܹܐ ܠܗ݇ܘܿܢ ܠܐܲܬ݂ܪܵܐ ܕܒܹܝܬ ܢܲܗܖ̈ܝܼܢ: ܘܲܫܟܸܢܘܼܢ ܓܲܘ ܒܲܨܪܵܐ (ܬܲܝܡܢܵܐ ܕܥܝܼܪܵܐܩ ܕܝܲܘܡܵܢܵܐ): ܟܲܕ ܚܙܸܩܠܗ݇ܘܿܢ ܚܲܕܟܡܵܐ ܐ݇ܚܖ̈ܵܢܹܐ ܠܥܲܕ (ܠܗܲܠ) ܕܲܡܛܹܐ ܠܗ݇ܘܿܢ ܠܗܸܢܕܘܿ ݂

ܟܒ݂ܘܼܫܝܵܐ ܐܲܘ ܟܒ݂ܵܫܬܐ ܕܒܲܓ݂ܕܵܕ ܒܫܲܢ݇ܬܐ ܕ1638 ܒܝܲܕ ܫܲܠܝܼܛܵܐ ܥܘܼܬ݂ܡܵܢܵܝܵܐ ܡܘܼܪܵܐܕ ܪܒ݂ܝܼܥܵܝܵܐ: ܒܥܘܼܕܪܵܢܵܐ ܕܦܵܠܚܹ̈ܐ (جنود) ܐܵܖܸ̈ܡܢܵܝܹܐ ܥܘܼܬ݂ܡܵܢܵܝܹ̈ܐ: ܡܗܘܼܕܹܐ ܠܵܗ̇ ܠܲܥܡܵܪܬܵܐ ܘܲܫܟܵܢܬܐ ܚܕܲܬܐ ܕܐܵܖܸ̈ܡܢܵܝܹܐ ܓܲܘ ܒܲܓ݂ܕܵܕ ݂ ܒܟܠܹܗ ܡܸܬܚܵܐ ܕܫܘܼܠܛܵܢܵܐ ܕܥܘܼܬ݂ܡܵܢܵܝܹ̈ܐ ܘܲܠܗܲܠ ܢܦܵܠܬܐ ܕܐܸܡܦܪܵܛܘܿܪܘܼܬܐ ܒܫܘܼܪܵܝ ܕܵܪܵܐ ܕܥܸܣܪܝܼܢ: ܡܛܘܼܘܸܪܘܼܢ ܐܵܖܸ̈ܡܢܵܝܹܐ ܫܘܼܬܐܵܣܲܝܗܝ: ܠܕܲܪܓ݂ܵܐ ܕܦܝܼܫܠܹܗ ܚܫܝܼܒ݂ܵܐ ܡܸܢܝܵܢܲܝܗܝ ܒܫܘܼܪܵܝܵܐ ܕܕܵܪܵܐ ܬܫܲܥܣܝܼܪܵܝܵܐ ܩܘܼܪܒܵܐ ܠـ (90000) ܐܲܠܦܹ̈ܐ ܢܸܫܡܹ̈ܐ ܓܲܘ ܥܝܼܪܵܐܩ^[3] ݂

ܐܲܒܝܼܕܘܼܬܐ ܟܢܘܼܫܝܵܝܬܐ (ܩܛܵܠ ـ ܥܲܡܵܐ: الإبادة الجماعية) ܕܐܵܖܸ̈ܡܢܵܝܹܐ ܒܫܲܢ݇ܬܐ ܕ1915 ـ 1917: ܝܼܗ݇ܘܵܐ ܚܲܕ ܡܲܒܘܼܥܵܐ ܐܵܢܲܢܩܵܝܵܐ ܘܪܹܫܵܝܵܐ ܠܬܲܘܬܵܒ݂ܘܼܬܐ ܘܲܥܪܵܩܵܐ ܕܐܵܖܸ̈ܡܢܵܝܹܐ ܠܐܲܬ݂ܪܵܐ ܕܒܹܝܬ ܢܲܗܖ̈ܝܼܢ ܕܥܝܼܪܵܐܩ ݂ ܐܲܢܲܝ ܓܲܠܘܵܝܹ̈ܐ (ܬܲܘܬܵܒܹ̈ܐ): ܦܝܼܫܠܗ݇ܘܿܢ ܡܘܼܥܖܸ̈ܩܹܐ ܡܼܢ ܗܹܘܦܲܖ̈ܟܝܼܹܐ ܡܲܕܢܚܵܝܹ̈ܐ ܕܐܸܡܦܪܵܛܘܿܪܘܼܬܐ ܡܼܢ ܓܲܪܒܝܵܐ (ܕܝܵܪܒܲܟܲܪ): ܥܲܠ ܝܘܼܪܟ݂ܵܐ ܕܢܲܗܪܵܐ ܕܕܸܩܠܵܬ: ܘܥܲܠ ܡܲܥܪܒ݂ܵܐ ܕ(ܪܹܫ ܥܲܝܢܵܐ) ܥܲܠ ܝܘܼܪܟ݂ܵܐ ܕܣܸܟܬܐ ܦܲܪܙܠܵܝܬܐ ܡܼܢ ܡܕܝܼܢ݇ܬܐ ܕ(ܚܲܠܲܒ) ܠܒܲܓ݂ܕܵܕ ݂ ܘܐܵܦ ܡܼܢ ܡܕܝܼܢ݇ܬܐ ܕ(ܒ݂ܵܐܢ) ܓܵܘܵܐ ܓܲܘ ܐܲܬ݂ܪܵܐ ܕܦܵܪܹܣ: ܡܛܹܐ ܠܗ݇ܘܿܢ ܐܲܢܲܝ ܐܵܖܸ̈ܡܢܵܝܹܐ ܡܘܼܥܖܸ̈ܩܹܐ ܠܚܲܕܟܡܵܐ ܦܸܢܝܵܬ݂̈ܐ ܐܲܝܟ݂ ܙܵܟ݂ܘܿ: ܘܗܵܘܪܝܼܣܟ: ܘܐܲܦܙܲܪܘܿܓ݂ (ܐܲܦܙܲܪܘܼܟ): ܘܐܵܦ ܠܡܲܘܨܸܠ ܘܟܲܪܟܘܼܟ ݂ ܘܲܒܗܵܢܵܐ ܨܹܝܕ: ܐܵܢܲܢܩܵܝܬܐ ܝܠܵܗ̇ ܕܟ݂ܵܪܬܐ ܕܲܚܕܵܐ ܚܲܠܲܩܬܐ ܡܲܪܝܼܪܬܐ ܘܐܘܼܠܨܵܢܵܝܬܐ: ܒܟܵܢܘܿܢ ܬܪܲܝܵܢܵܐ ܕܫܲܢ݇ܬܐ ܕ1916: ܘܓܲܘ ܬܲܪܬܹܝܢ ܠܲܝ̈ܠܵܘܵܬ݂ܐ ܒܲܠܚܘܿܕ: ܦܝܼܫܠܗ݇ܘܿܢ ܩܛܝܼܠܹ̈ܐ (15000) ܐܲܠܦܹ̈ܐ ܐܵܖܸ̈ܡܢܵܝܹܐ ܡܘܼܥܖܸ̈ܩܹܐ ܠܡܲܘܨܸܠ ܘܦܸܢ̈ܝܵܬ݂ܐ ܕܒܲܫܒ݂ܵܒ݂ܘܼܬ݂ܵܗ̇ (ܚܵܕܹܪܘܵܢܵܗ̇): ܘܦܝܼܫܠܗ݇ܘܿܢ ܐܣܝܼܖܹ̈ܐ ܟܠ ܥܸܣܪܵܐ ܦܲܖ̈ܨܘܿܦܹܐ ܡܸܚܕܵܕܹ̈ܐ: ܘܲܡܖ̈ܘܼܦܝܹܐ ܓܲܘ ܢܲܗܪܵܐ ܕܕܸܩܠܵܬ ݂ ܘܐܵܦ ܚܫܝܼܚܬܐ ܝܠܵܗ̇ ܠܡܲܕܟ݂ܘܿܪܹܐ: ܕܲܩܕܵܡ ܗܵܢܵܐ ܓܘܼܢܚܵܐ ܒܝܘܿܡ (10) ܒܝܲܪܚܵܐ ܕܲܚܙܝܼܪܵܢ ܒܫܲܢ݇ܬܐ ܕ1915: ܡܫܘܼܕܸܪܹܗ ܩܲܢܨܠܵܐ (القنصل) ܐܲܠܡܵܢܵܝܵܐ ܓܲܘ ܡܲܘܨܸܠ (ܗܘܿܠܸܫܬܵܝܸܢ) ܠܐܝܼܙܓܲܕܵܐ ܕܐܲܬ݂ܪܹܗ ܒܲܪܩܝܼܬܐ (برقية) ܕܒܐܝܼܬܵܝܵܐ ܝܠܵܗ̇:” 614 ܐܵܖܸ̈ܡܢܵܝܹܐ (ܓܲܒ݂ܖܹ̈ܐ ܘܢܸܫܹ̈ܐ ܘܫܲܒ݂ܖܹ̈ܐ) ܕܦܝܼܫܠܗ݇ܘܿܢ ܛܖ̈ܝܼܕܹܐ ܡܼܢ ܕܝܼܵܪܒܲܟܲܪ: ܘܡܘܼܥܖܸ̈ܩܹܐ ܒܚܲܝܠܵܐ ܠܡܲܘܨܸܠ: ܦܝܼܫܠܗ݇ܘܿܢ ܩܛܝܼܠܹ̈ܐ ܒܐܘܼܪܚܵܐ: ܟܲܕ ܦܝܵܫܵܐ ܝܗ݇ܘܵܘ ܢܩܝܼܠܹ̈ܐ ܒܛܵܝܘܿܦܹ̈ܐ (طوافات) ܓܲܘ ܢܲܗܪܵܐ ܕܕܸܩܠܵܬ ݂ ܒܐܸܬܡܵܠܝ: ܛܵܝܘܿܦܹ̈ܐ ܡܛܹܐ ܠܗ݇ܘܿܢ ܣܦܝܼܩܹ̈ܐ: ܘܡܼܢ ܩܕܵܡ ܝܲܘܡܵܢܹ̈ܐ: ܛܥܝܼܢܵܐ ܝܗ݇ܘܵܐ ܢܲܗܪܵܐ ܕܕܸܩܠܵܬ: ܫܠܲܕܹ̈ܐ ܘܲܕܖ̈ܵܥܹܐ ܐ݇ܢܵܫܵܝܹ̈ܐ”^[4] ݂

ܝܲܘܡܵܢܵܐ ܣܘܿܓ݂ܐܵܐ ܕܐܵܖܸ̈ܡܢܵܝܹܐ ܕܥܝܼܪܵܐܩ ܝܼܠܲܝܗܝ ܡܼܢ ܡܦܲܨܝܹ̈ܐ (ܦܖ̈ܝܼܩܹܐ: من الناجين) ܡܼܢ ܦܲܖ̈ܡܵܢܹܐ (ܦܘܼܣܩܵܢܹ̈ܐ ܖ̈ܘܼܫܡܵܝܹܐ ܡܼܢ ܫܘܼܠܛܵܢܵܐ ܥܘܼܬ݂ܡܵܢܵܝܵܐ) ܕܲܩܛܵܠ ـ ܥܲܡܵܐ ܕܣܲܝܦܘܿ ܕܫܲܢ݇ܬܐ ܕ1915 ݂ ܘܦܝܼܫܹ̈ܐ ܝܠܲܝܗܝ ܡܘܼܢܫܝܼܹܐ ܡܼܢ ܓܹܒܵܐ ܦܘܿܠܝܼܛܝܼܩܵܝܵܐ: ܐܸܠܵܐ ܝܼܕܝܼܥܹ̈ܐ ܝܠܲܝܗܝ ܒܚܘܼܒܲܝܗܝ ܩܵܐ ܐܲܬ݂ܪܵܐ: ܘܲܒܚܘܼܒܲܝܗܝ ܠܛܘܼܘܵܪܵܐ ܕܐܲܝܟܲܢܵܝܘܼܬܲܝܗܝ ܝܘܼܠܦܵܢܵܝܬܐ ܘܲܟܢܘܼܫܝܵܝܬܐ ܘܬܲܘܕܝܼܬܵܢܵܝܬܐ ݂

ܘܐܵܖܸ̈ܡܢܵܝܹܐ ܕܥܝܼܪܵܐܩ ܒܣܘܿܓ݂ܐܲܝܗܝ: ܝܼܠܲܝܗܝ ܡܼܢ ܗܲܕܵܡܹ̈ܐ ܕܥܹܕܬܐ ܐܵܪܸܡܢܵܝܬܐ ܫܠܝܼܚܵܝܬܐ (ܕܝܼܠܵܗ̇ ܚܕܵܐ ܥܹܕܬܐ ܫܪܝܼܬܐ: ܡܼܢ ܡܲܘܠܵܕܵܗ̇ ܐܲܘ ܫܘܼܬܐܵܣܵܗ̇ ܒܫܲܢ݇ܬܐ ܕ301): ܘܐܝܼܬ ܚܲܕܟܡܵܐ ܡܸܢܲܝܗܝ ܕܝܼܠܲܝܗܝ ܗܲܕܵܡܹ̈ܐ ܘܲܡܗܘܼܡܢܹ̈ܐ ܕܥܹܕܬܐ ܩܵܬ݂ܘܿܠܝܼܩܵܝܬܐ^[5]: ܘܚܲܕܟܡܵܐ ܐ݇ܚܹܖ̈݇ܢܹܐ ܗܲܕܵܡܹ̈ܐ ܝܠܲܝܗܝ ܕܚܲܕ ܟܢܘܼܫܝܵܐ ܙܥܘܿܪܵܐ ܕܥܹܕܬܐ ܐܹܘܲܢܓܲܠܵܝܬܐ ݂

ܡܼܢ ܒܵܬܲܪ ܡܲܢܦܲܠܬܐ ܕܛܲܟܣܵܐ ܕܨܲܕܵܐܡ ܚܘܼܣܲܝܢ ܒܫܲܢ݇ܬܐ ܕ2003: ܣܪܹܐ ܠܹܗ ܩܵܐܹܡ ܕܐܲܬ݂ܪܵܐ ܠܚܲܕ ܕܲܪܓ݂ܵܐ ܪܲܒܵܐ: ܘܐܵܦ ܣܝܼ̈ܥܵܬ݂ܐ ܐܸܣܠܵܡܵܝܹ̈ܐ ܕܡܵܦܝܵܐ ܕܲܗܘܹܐ ܠܗ݇ܘܿܢ ܕܲܠܩܘܼܒ݂ܠ ܡܫܝܼܚܵܝܹ̈ܐ: ܗܘܹܐ ܠܹܗ ܢܝܼܫܲܝܗܝ ܐܵܦ ܐܵܖܸ̈ܡܢܵܝܹܐ ܥܝܼܖ̈ܵܩܵܝܹܐ ܘܥܹܕܵܬܲܝܗܝ ݂ ܒܝܘܿܡ 1 ܒܐܵܒ 2004: ܨܦܸܚܠܗ݇ܘܿܢ ܒܡܲܦ̈ܩܵܥܵܬ݂ܐ ܥܲܠ ܟܵܬܸܕܪܵܐܝܼܐ ܩܵܬ݂ܘܿܠܝܼܩܵܝܬܐ ܐܵܪܸܡܢܵܝܬܐ (ܣܲܝܕܵܐ ܐܲܠܘܲܪܕܝܼܵܐ) ܓܲܘ ܒܲܓ݂ܕܵܕ ܒܡܲܫܪܝܼܬܐ ܕ(ܐܲܠܟܲܪܵܕܵܐ) ݂ ܘܚܲܪܬܐ ܨܦܸܚܠܗ݇ܘܿܢ ܐܵܦ ܥܲܠ ܚܕܵܐ ܥܹܕܬܐ ܐܵܪܸܡܢܵܝܬܐ ܐ݇ܚܹܪ݇ܬܐ ܓܲܘ ܡܲܘܨܸܠ ܕܝܼܗ݇ܘܵܐ ܒܛܲܘܪܵܐ ܕܒܸܢܝܵܢܵܐ ܒܝܘܿܡ 4 ܒܟܵܢܘܿܢ ܩܲܕܡܵܝܵܐ 2004 ݂ ܩܘܼܪܒܵܒܵܐ ܕܥܸܣܪܝܼܢ ܫܸܢܹ̈ܐ: ܗܘܹܐ ܠܵܗ̇ ܡܲܦܠܲܛܬܐ ܘܲܥܪܵܩܵܐ ܪܲܒܵܐ ܕܐܵܖܸ̈ܡܢܵܝܹܐ ܡܼܢ ܥܝܼܪܵܐܩ ܟܖ̈ܝܼܟ݂ܐ ܒܥܸܢܦܵܐ ܘܲܛܠܘܼܡܝܵܐ ݂ ܡܼܢ ܩܕܵܡ 2003: ܡܸܢܝܵܢܵܐ ܕܐܵܖܸ̈ܡܢܵܝܹܐ ܓܲܘ ܥܝܼܪܵܐܩ: ܡܵܛܹܐ ܗ݇ܘܵܐ ܠـ (25000) ܐܲܠܦܹ̈ܐ ܢܸܫܡܹ̈ܐ: ܐܸܠܵܐ ܝܲܘܡܵܢܵܐ ܪܵܡܙܝܼ ܦܵܩܘܿܕܹ̈ܐ ܘܥܲܠܠܵܢܹ̈ܐ ܕܲܟܢܘܼܫܝܵܐ ܠـ (10000) ܠܥܲܕ (13000) ܐܲܠܦܹ̈ܐ ܐܵܖܸ̈ܡܢܵܝܹܐ ܐܝܼܬ ܦܝܵܫܵܐ ܓܲܘ ܥܝܼܪܵܐܩ: ܦܲܠܓܲܝܗܝ ܗܵܠܵܐ ܟܹܐ ܚܵܝܝܼ ܓܲܘ ܒܲܓ݂ܕܵܕ ݂ ܘܦܵܝܫܵܢܵܐ ܚܵܝܝܼ ܓܲܘ ܟܘܼܪܕܸܣܬܵܐܢ ܕܥܝܼܪܵܐܩ: ܘܟܲܪܟܘܼܟ: ܘܣܘܼܠܲܝܡܵܢܝܼܵܐ: ܘܐܵܦ ܓܲܘ ܒܲܨܪܵܐ: ܘܠܲܝܬ ܦܝܵܫܵܐ ܐܵܖܸ̈ܡܢܵܝܹܐ ܓܲܘ ܡܲܘܨܸܠ ݂

__________

[1] ܐܘܿܣܪܘܿܘܹܝܢ: ܝܼܠܲܝܗܝ ܥܵܡܘܿܖܹ̈ܐ ܕ(ܐܲܕܝܼܣܵܐ): ܕܝܼܠܵܗ̇ ܚܕܵܐ ܡܕܝܼܢ݇ܬܐ ܟܲܒܝܼܪܬܐ ܡܼܢ ܕܵܖܹ̈ܐ ܩܲܕܝܼܡܵܝܹ̈ܐ: ܡܼܢ ܩܕܵܡ ܕܦܵܝܫܵܐ ܗ݇ܘܵܐ ܚܲܕ ܡܼܢ ܡܲܒܘܼܥܹ̈ܐ ܖܹ̈ܫܵܝܹܐ ܠܲܦܪܵܣܵܐ ܡܫܝܼܚܵܝܘܼܬܐ ݂ ܠܦܘܼܬ݂ ܝܘܼܒܵܠ̈ܐ ܐܵܖܸ̈ܡܢܵܝܹܐ: ܡܲܠܟܵܐ ܕܐܲܕܝܼܣܵܐ ܘܐܵܪܡܝܼܢܝܵܐ (ܐܲܒ݂ܓܲܪ ܚܡܝܼܫܵܝܵܐ): ܒܥܹܐ ܠܹܗ ܕܲܡܩܲܒܸܠ ܠܲܡܫܝܼܚܵܐ ܓܲܘ ܡܲܠܟܘܼܬܹܗ: ܘܲܡܫܘܼܕܸܪܹܗ ܐܸܠܹܗ ܚܕܵܐ ܐܸܓܲܪܬܐ ܒܗܵܢܵܐ ܡܠܘܿܐܵܐ ݂ ܡܫܝܼܚܵܐ ܠܵܐ ܐܬܹܐ ܠܹܗ ܠ(ܐܲܕܝܼܣܵܐ): ܐܸܠܵܐ ܚܲܕ ܡܼܢ ܬܲܠܡܝܼܕܲܘܗ̈ܝ (ܐܲܕܲܝ) ݂ ܒܵܬܲܪܟܸܢ ܦܝܼܫܠܵܗ̇ ܩܪܝܼܬܐ ܐܲܕܝܼܣܵܐ ܒܫܸܡ: (ܐܘܿܪܦܵܐ): ܘܡܼܢ ܫܲܢ݇ܬܐ ܕ1984: ܦܝܼܫܠܵܗ̇ ܩܪܝܼܬܐ (ܣܵܢܠܝܼ ܐܘܿܪܦܵܐ ܓܲܘ ܬܘܼܪܟܝܼܵܐ) ݂

[2] ܚܙܝܼ: ܐܵܪܡܝܼܢܝܵܐ: ܐܲܛܠܲܣ ܕܬܲܫܥܝܼܬܐ: ܦ 22 ܘܡܵܦܵܐ ܦ 23: ܛܲܒ݂ܥܵܐ ܕܡܲܒܘܼܥܹ̈ܐ ܡܼܢ ܐܵܪܡܝܼܢܝܵܐ 2017 ݂

[3] ܡܲܒܘܼܥܵܐ: ܐܝܼܙܓܲܕܘܼܬܐ ܐܵܪܸܡܢܵܝܬܐ ܓܲܘ ܒܲܓ݂ܕܵܕ ݂

[4] ܚܙܝܼ: ܐܲܒܝܼܕܘܼܬ݂ܐ ܕܥܵܖ̈ܘܿܩܹܐ ܐܵܖܸ̈ܡܢܵܝܹܐ ܥܘܼܬ݂ܡܵܢܵܝܹ̈ܐ ܓܲܘ ܡܲܫܖ̈ܝܵܬ݂ܐ ܕܐܲܣܝܼܖܹ̈ܐ ܓܲܘ ܣܘܼܪܝܵܐ ܘܒܹܝܬ ܢܲܗܖ̈ܝܼܢ: ܡܸܢܝܵܢܵܐ ܕܝܼܠܵܢܵܝܵܐ ܡܼܢ ܡܓ݂ܠܬܐ (ܬܲܫܥܝܼܬܐ ܕܵܪܵܝܬܐ ܕܐܵܪܸܡܝܼܢܝܵܐ): ܡܢܵܬ݂ܐ 2: 1998: ܪܝܼܡܘܿܢܕ ܐܹܝܟ̰ ܟܝܼܦܘܿܪܟܝܵܐܢ: ܦ 15 ݂

[5] ܡܼܢ ܡܲܘܬܒ݂ܵܐ ܐܸܠܟܸܬܪܘܿܢܵܝܵܐ ܕܐܝܼܙܓܲܕܘܼܬܐ ܐܵܪܸܡܢܵܝܬܐ ܓܲܘ ܥܝܼܪܵܐܩ: ܡܵܨܹܝܚ ܕܩܵܪܹܝܚ ܡܵܐ ܕܒܐܝܼܬܵܝܵܐ ܝܠܹܗ: ܒܫܲܢ݇ܬܐ ܕ 1914: ܡܸܢܝܵܢܵܐ ܕܐܵܖܸ̈ܡܢܵܝܹܐ ܝܼܗ݇ܘܵܐ (300) ܦܲܖ̈ܨܘܿܦܹܐ ݂ ܒܵܬܲܪ ܦܠܵܫܵܐ ܬܹܒܹܝܠܵܝܵܐ ܩܲܕܡܵܝܵܐ ܠܥܲܕ 2003: ܦܝܼܫܠܗ݇ܘܿܢ (3000) ܦܲܖ̈ܨܘܿܦܹܐ ݂ ܒܝܲܘܡܵܢܵܐ ܐܝܼܬ ܩܘܼܪܒܵܐ ܠـ 200 ـ 250 ܝܼܩܖ̈ܵܬ݂ܐ ݂ ܐܵܖܸ̈ܡܢܵܝܹܐ ܩܵܬ݂ܘܿܠܝܼܩܵܝܹ̈ܐ ܐܝܼܬ ܠܗ݇ܘܿܢ ܬܲܪܬܹܝܢ ܥܹܕܵܬ̈ܐ: ܗܿܝ ܩܲܕܡܵܝܬܐ ܒܫܸܡ (ܣܲܝܕܵܐ ܐܲܠܘܲܪܕܝܼܵܐ) ܦܝܼܫܠܵܗ̇ ܒܢܝܼܬܐ ܒܫܲܢ݇ܬܐ ܕ 1844: ܘܗܿܝ ܕܬܲܪܬܹܝܢ ܒܫܸܡ (ܠܸܒܵܐ ܕܝܼܫܘ݁ܥ ܩܲܕܝܼܫܵܐ) ܕܦܝܼܫܠܵܗ̇ ܒܢܝܼܬܐ ܒܫܲܢ݇ܬܐ ܕ 1937 ݂ ܒܫܲܢ݇ܬܐ ܕ 1997 ܦܝܼܫܠܵܗ ܡܚܘܼܕܲܬ݂ܬܐ ܥܹܕܬܐ ܐܸܣܵܝܬܐ ܕܐܵܖܸ̈ܡܢܵܝܹܐ ܩܵܬ݂ܘܿܠܝܼܩܵܝܹ̈ܐ ܕܝܼܠܵܗ̇ ܡܼܢ ܥܹܕܵܬ̈ܐ ܛܵܒ݂ ܖ̈ܲܒܹܐ ܕܓܲܘ ܒܲܓ݂ܕܵܕ ݂ ܘܡܲܛܪܵܢ ܥܲܡܵܢܘܼܐܹܝܠ ܕܵܒܲܓ݂ܝܵܐܢ: ܝܼܠܹܗ ܪܹܫ ܐܲܦܸܣܩܘܿܦܹ̈ܐ ܕܐܵܖܸ̈ܡܢܵܝܹܐ ܩܵܬ݂ܘܿܠܝܼܩܵܝܹ̈ܐ ܓܲܘ ܥܝܼܪܵܐܩ ݂

ܦܝܼܫܠܵܗ̇ ܒܢܝܼܬܐ ܟܵܬܸܕܪܵܐܝܼܵܐ ܕܩܲܕܝܼܫܵܐ ܟܪܝܼܟܘܿܪ ܒܲܝܢܵܬ݂ ܫܲܢ݇ܬܐ ܕ1954 ܠܫܲܢ݇ܬܐ ܕ1957: ܒܲܚܕܵܐ ܕܘܼܟܬܐ ܪܘܝܼܚܬܐ ܢܲܩܦܝܼܬܐ ܠܥܹܕܬܐ ܐܵܪܸܡܢܵܝܬܐ: ܘܐܝܼܬ ܚܲܕ ܒܹܝܬ ܩܘܼܒ݂ܪܵܐ ܪܲܒܵܐ ܕܐܵܖܸ̈ܡܢܵܝܹܐ ܡܫܘܼܬܐܸܣܵܐ ܒܫܲܢ݇ܬܐ ܕ1904: ܐܲܝܟܵܐ ܕܟܹܐ ܚܵܒ݂ܟ݂ܝܼ (ܚܵܒ݂ܛܝܼ) ܒܹܝܬ ܩܘܼܒ݂ܖܹ̈ܐ ܥܲܬܝܼܩܹ̈ܐ ܘܕܵܖ̈ܵܝܹܐ ݂

ܦܝܼܫܠܵܗ̇ ܒܢܝܼܬܐ ܗܵܕܹܐ ܟܵܬܸܕܪܵܐܝܼܵܐ ܒܛܲܝܒܘܼܬܐ ܕܦܘܼܖ̈ܥܵܢܹܐ ܕܲܬܪܹܝܢ ܡܼܢ ܐܵܖ̈ܡܢܵܝܹܐ ܕܵܒ݂ܚܵܢܹܐ: ܣܝܼܡܘܿܢ ܡ ݂ ܓ݂ܵܪܝܼܒܝܵܐܢ: ܘܟܵܠܘܿܣܬ ܓܘܿܠܒܸܢܟܝܵܐܢ ݂

ܒܡܸܬܚܵܐ ܕܕܵܪܵܐ ܕܥܸܣܪܝܼܢ: ܦܝܼܫܠܗ݇ܘܿܢ ܒܸܢܝܹ̈ܐ ܒܸܢܝܵܢܹ̈ܐ ܐ݇ܚܖ̈ܵܢܹܐ ܕܪܝܼܓ݂ܵܐܝܼܬ ܓܲܘ ܓܝܼܓ݂ܠܵܐ ܬܲܘܕܝܼܬܵܢܵܝܵܐ ܒܲܫܒ݂ܵܒ݂ܘܼܬܐ ܕܟܵܬܸܕܪܵܐܝܼܵܐ ܘܒܹܝܬ ܩܘܼܒ݂ܪܵܐ: ܐܲܝܟܵܐ ܕܚܵܙܹܝܚ ܡܲܕܪܲܫܬܐ: ܘܐܵܘܵܢܵܐ: ܘܲܬܪܹܝܢ ܨܲܠܡܹ̈ܐ ܕܟ݂ܵܖ̈ܵܝܹܐ ܦܖ̈ܝܼܫܹܐ ܩܵܐ ܣܵܗܕܹ̈ܐ ܕܐܲܒܝܼܕܘܼܬܐ ܟܢܘܼܫܝܵܝܬܐ ܕܐܵܖܸ̈ܡܢܵܝܹܐ: ܘܐܵܦ ܚܲܕ ܒܹܝܬ ܥܲܬܝܼܩܵܬܐ ܪܲܒܵܐ ܕܦܝܼܫܠܹܗ ܦܬܝܼܚܵܐ ܒܝܲܪܚܵܐ ܕܬܸܫܪܝܼܢ ܬܪܲܝܵܢܵܐ ܕܫܲܢ݇ܬܐ ܕ1997 ݂

ܠܦܘܼܬ݂ ܝܘܼܒܵܠܹ̈ܐ: ܩܝܼܡܠܹܗ ܫܠܝܼܚܵܐ ܒܲܪܬ݂ܘܿܠܡܵܘܸܣ ܘܲܫܠܝܼܚܵܐ ܬܵܕܝܘܿܣ ܒܡܲܫܚܲܕܬܐ ܕܐܵܖܸ̈ܡܢܵܝܹܐ: ܘܲܡܫܲܬܐܲܣܬܐ ܕܣܝܼܥܵܬ̈ܐ ܡܫܝܼܚܵܝܵܬ̈ܐ ܐܵܖܸ̈ܡܢܵܝܵܬܐ ܩܲܕܡܵܝܹ̈ܐ: ܐܝܼܢܵܐ ܟܪܝܼܟܘܿܪ ܩܲܝܨܵܪܵܝܵܐ ܗܿܘ ܝܠܹܗ ܕܲܡܫܘܼܬܐܸܣܠܹܗ ܠܥܹܕܬܐ ܐܵܪܸܡܢܵܝܬܐ ܒܫܲܢ݇ܬܐ ܕ301: ܘܗܵܕܟ݂ܵܐ ܦܝܼܫܠܵܗ̇ ܐܵܪܸܡܝܼܢܝܵܐ ܗܵܝ ܡܲܠܟܘܼܬܐ ܩܲܕܡܵܝܬܐ ܓܲܘ ܡܸܬܥܲܡܪܵܢܝܼܬܐ ܕܲܚܦܸܩܠܵܗ̇ ܠܲܡܫܝܼܚܵܝܘܼܬܐ ݂

ܟܹܐ ܪܵܡܹܙ ܬܘܼܢܵܝܵܐ ܫܘܼܬܐܵܣܵܝܵܐ ܕܡܲܠܟܵܐ ܕܐܵܪܡܝܼܢܝܵܐ ܬܪܝܼܕܲܝܬ ܪܒ݂ܝܼܥܵܝܵܐ: ܕܦܝܼܫܠܹܗ ܪܸܥܝܵܐ ܡܼܢ ܐܸܡܦܪܵܛܘܿܪܵܐ ܪܗܘܿܡܵܢܵܝܵܐ ܕܲܩܠܕܝܵܢܘܿܣ: ܪܵܕܘܿܦܵܐ ܪܲܒܵܐ ܕܲܡܫܝܼܚܵܝܹ̈ܐ: ܕܲܢܦܸܠܠܹܗ ܒܚܘܼܒܵܐ ܕܲܚܕܵܐ ܡܫܝܼܚܵܝܬܐ ܪܗܘܿܡܵܢܵܝܬܐ ܒܬܘܼܠܬܐ ܫܸܡܵܗ̇ (ܗܪܝܼܒܣܹܝܡܹܗ): ܕܲܡܚܹܐ ܠܵܗ̇ ܒܹܝܬ ܓܲܘܣܵܐ ܠܐܵܪܡܝܼܢܝܵܐ ܗܵܝ ܘܥܲܡܵܗ̇ ܒܪܹܫܵܢܘܼܬܐ ܕܪܹܫܵܢܬܐ ܕܕܲܝܪܵܐ (ܓ݂ܵܝܵܢܹܗ) ݂ ܟܠܹܐ ܠܵܗ̇ (ܗܪܝܼܒܣܹܝܡܹܗ) ܕܐܝܼܬ ܗ݇ܘܵܐ ܠܵܗ̇ ܚܲܕ ܫܘܼܦܪܵܐ ܚܵܪܘܿܦܵܐ ܕܲܠܩܘܼܒ݂ܠ ܡܲܠܟܵܐ (ܬܪܝܼܕܲܝܬ): ܘܡܼܢ ܚܲܪܝܼܦܘܼܬ݂ ܟܲܪܒܹܗ: ܩܝܼܡܠܹܗ ܒܙܘܼܠܗܵܙܵܗ̇ ܗܵܝ ܘܥܲܡܵܗ̇ ܠܥܲܕ ܡܲܘܬܐ ݂

ܒܵܬܲܪ ܣܵܗܕܘܼܬܐ ܕܐܲܪܒܥܝܼܢ ܒܬܘܼܠܵܬܵܐ ܡܫܝܼܚܵܝܵܬ̈ܐ: ܡܪܸܥܠܹܗ ܬܪܝܼܕܲܝܬ ܒܚܲܕ ܡܲܪܥܵܐ ܩܸܢܛܵܝܵܐ: ܠܵܐ ܡܨܹܐ ܠܗ݇ܘܿܢ ܐܵܣܝܹ̈ܐ ܘܲܡܓܘܿܠܵܝܹ̈ܐ ܕܲܡܒܲܣܡܝܼܠܹܗ ݂ ܒܗܵܝ ܥܸܕܵܢܐ ܐܝܼܬ ܗ݇ܘܵܐ ܠܘܵܬ݂ ܚܵܬܐ ܕܡܲܠܟܵܐ: ܚܲܕ ܚܸܠܡܵܐ ܘܚܸܙܘܵܐ ܕܲܟܪܝܼܟܘܿܪ ܠܚܘܿܕܹܗ ܡܵܨܝܵܢܵܐ ܝܠܹܗ ܕܥܵܠܹܒ݂ (ܩܵܪܹܡ) ܥܲܠ ܗܵܕܹܐ ܒܝܼܫܘܼܬ݂ ܡܲܪܥܵܐ ݂

ܦܝܼܫܠܹܗ ܝܼܠܝܼܕܵܐ ܟܪܝܼܟܘܿܪ ܩܘܼܪܒܵܐ ܠܫܲܢ݇ܬܐ ܕ257: ܘܝܼܠܹܗ ܚܲܕ ܡܫܝܼܚܵܝܵܐ ܘܗܲܕܵܡܵܐ ܓܲܘ ܒܹܝܬ ܕܝܼܢܵܐ: ܘܢܵܟܘܿܪܵܐ (الرافض)ܠܚܲܢܦܘܼܬܐ ܕܬܪܝܼܕܲܝܬ ݂ ܘܐܵܦ ܡܛܘܼܫܹܐ ܠܹܗ ܠܡܲܠܟܵܐ ܐܵܪܸܡܢܵܝܵܐ ܕܝܼܠܹܗ ܒܪܘܿܢܵܐ ܕ(ܐܵܢܵܓ݂): ܩܵܛܘܿܠܵܐ ܕ(ܚܘܿܣܪܘܿܦ) ܒܵܒܵܐ ܕܬܪܝܼܕܲܝܬ ݂ ܦܝܼܫܠܹܗ ܡܪܘܼܦܝܵܐ ܓܲܘ ܚܕܵܐ ܚܸܦܲܪܬܐ ܥܲܡܘܼܩܬܐ (ܚܘܿܪ ܦܝܼܪܵܦ): ܘܡܘܼܓܡܸܪܹܗ ܠܚܲܝܘܼܬܹܗ ܓܵܘܵܗ̇ ܒܬܸܕܡܘܼܪܬܐ ܠܡܸܬܚܵܐ ܕ(13) ܫܸܢܹ̈ܐ: ܚܲܪܬܐ ܦܝܼܫܠܹܗ ܡܦܘܼܠܛܵܐ ܡܼܢ ܚܸܦܲܪܬܹܗ (ܒܹܝܬ ܐܲܣܝܼܪܘܼܬܹܗ): ܐܲܝܟܵܐ ܕܩܝܼܡܠܹܗ ܒܐܵܣܝܘܼܬܐ (شفاء) ܕܲܬܪܝܼܕܲܝܬ ܗܿܘ ܕܲܩܒܸܠܠܹܗ ܠܡܲܥܡܘܿܕܝܼܬܐ ܘܣܝܼܡܵܐ ܠܹܗ (فرضها) ܓܲܘ ܡܲܠܟܘܼܬܹܗ ݂

ܦܝܼܫܠܹܗ ܩܲܕܝܼܫܵܐ ܟܪܝܼܟܘܿܪ ܡܸܬܒܲܗܪܵܢܵܐ: ܩܵܬ݂ܘܿܠܝܼܩܵܐ ܩܲܕܡܵܝܵܐ ܓܲܘ ܥܹܕܬܐ ܐܵܪܸܡܢܵܝܬܐ ݂ ܘܐܝܼܬ ܗ݇ܘܵܐ ܠܹܗ ܪܸܥܝܵܢܵܐ ܕܲܡܫܲܚܠܲܦܬܐ ܕܕܘܼܟܵܐ ܕܟܵܬܸܕܪܵܐܝܼܵܐ ܕ(ܐܝܼܬܫܡܵܕܙܝܼܢ): ܕܝܼܠܹܗ ܣܘܼܟܵܠܵܗ̇ ܐܵܬܘܼܬܵܐܝܼܬ: “ܒܪܘܿܢܵܐ ܝܼܚܝܼܕܵܝܵܐ ܢܚܝܼܬ݂ܐ ܡܢ ܫܡܲܝܵܐ”: ܕܦܝܼܫܠܹܗ ܩܸܢܛܪܘܿܢ ܕܗܵܕܹܐ ܥܹܕܬܐ ܫܪܝܼܬܐ ݂

ܘܦܝܼܫܠܹܗ ܒܸܢܝܵܐ ܕܲܝܪܵܐ ܕ(ܚܘܿܪ ܦܝܼܪܵܦ) ܒܪܹܫ ܗܵܝ ܚܸܦܲܪܬܐ ܥܲܡܘܼܩܬܐ ܕܦܝܼܫܠܹܗ ܕܒ݂ܝܼܩܵܐ (ܥܸܪܝܵܐ) ܓܵܘܵܗ̇ ܟܪܝܼܟܘܿܪ ݂ ܢܵܦܹܠ ܗܵܢܵܐ ܕܲܝܪܵܐ ܠܣܸܦܬܐ ܕܛܘܼܪܵܐ ܕ(ܐܵܪܵܪܵܬ) ܒܐܲܬ݂ܪܵܐ ܕܐܵܪܡܝܼܢܝܵܐ: ܒܪܸܚܩܵܝܘܼܬܐ ܕܲܚܕܵܐ ܫܵܥܬܐ ܠܬܲܝܡܢܵܐ ܕܐܵܪܸܫܟ݂ܵܝܬܐ (ܝܲܪܝܼܒ݂ܵܐܢ) ݂

ܢܵܦܠܵܐ ܟܵܬܸܕܪܵܐܝܼܵܐ ܕܣܘܼܪܸܦ ܟܪܝܼܟܘܿܪ ܠܘܿܣܵܒ݂ܘܿܪܝܼܬܸܫ ܕܝܼܠܵܗ̇ ܢܲܩܝܼܦܬܐ ܠܥܹܕܬܐ ܫܠܝܼܚܵܝܬܐ ܐܵܪܸܡܢܵܝܬܐ: ܓܲܘ ܚܕܵܐ ܦܢܝܼܬܐ ܬܲܘܕܝܼܬܵܢܵܝܬܐ ܟܪܝܼܟ݂ܬܐ ܒܚܲܕ ܫܘܼܪܵܐ ܪܵܡܵܐ ݂

ܝܼܠܵܗ̇ ܥܹܕܬܐ ܒܲܕܡܘܼܬ݂ ܚܲܕ ܒܸܢܝܵܢܵܐ ܫܡܸܢܬܵܝܵܐ ܥܲܓ݂ܪܵܐ (ضخم) ܡܟܘܼܣܝܵܐ ܒܚܲܕ ܕܲܪܓ݂ܵܐ ܡܼܢ ܨܒ݂ܵܥܵܐ (ܫܝܼܪܵܐ) ܡܵܪܹܐ ܓܲܘܢܵܐ ܫܲܟ̇ܪܵܝܵܐ: ܐܝܼܢܵܐ ܡܢܵܬܐ ܬܲܚܬܵܝܬܐ ܡܟܘܼܣܲܝܬܐ ܝܗ݇ܘܵܐ ܒܟܹܐܦܹ̈ܐ ܡܼܢ ܝܵܬ ܓܲܘܢܵܐ ܘܲܡܨܲܒܬܹ̈ܐ (مزخرفة) ܒܲܨܠܝܼܒ݂ܵܢܹ̈ܐ ܐܵܖܸ̈ܡܢܵܝܹܐ ݂ ܗܵܕܹܐ ܟܵܬܸܕܪܵܐܝܼܵܐ ܦܪܝܼܫܬܐ ܝܠܵܗ̇ ܒܲܚܕܵܐ ܦܵܬܐ ܒܲܪܵܝܬܐ ܪܲܒܬܐ ܡܣܘܼܩܲܠܬܐ: ܐܝܼܢܵܐ ܡܼܢ ܓܵܘܵܐ ܐܝܼܬ ܣܦܵܩܹ̈ܐ ܫܲܦܝܼܖܹ̈ܐ: ܘܟܹܐ ܡܛܲܦܣܵܐ ܚܲܕ ܬܲܦܢܟ݂ܵܐ ܪܹܫܵܝܵܐ ܠܡܲܚܵܪܘܼܬܐ ܐܵܪܸܡܢܵܝܬܐ ܡܩܘܼܕܲܫܬܐ: ܘܝܼܠܵܗ̇ ܡܣܘܟܲܡܬܐ ܥܲܠ ܐܸܣܟܹܝܡܵܐ ܕܲܨܠܝܼܒ݂ܵܐ (ܟܹܐ ܡܲܒܝܸܢܝܼ ܕܖ̈ܵܥܹܐ ܕܲܨܠܝܼܒ݂ܵܐ ܡܼܢ ܒܲܪܵܐ) ݂ ܒܲܠܚܘܿܕ ܡܵܪܹܐ ܚܲܕ ܓܸܢܝܵܢܵܐ ܡܼܢ ܓܹܒܵܐ ܕܡܲܕܢܚܵܐ ܘܡܵܪܹܐ ܣܘܟܵܡܵܐ ܝܘܼܪܟ݂ܵܢܵܝܵܐ (ܥܲܠ ܣܲܪܢܵܐ ܡܲܕܢܚܵܝܵܐ ـ ܡܲܥܪܒ݂ܵܝܵܐ ܕܲܨܠܝܼܒ݂ܵܐ ܘܒܸܫ ܝܲܪܝܼܟ݂ܵܐ ܡܼܢ ܣܸܡܵܠܵܝܵܐ ـ ܬܲܝܡܢܵܝܵܐ): ܘܐܝܼܬ ܠܵܗ̇ ܚܕܵܐ ܩܘܼܒܬܐ ܡܵܖ̈ܲܬ ܬܡܲܢܝܵܐ ܐܸܠܥܹ̈ܐ ܘܥܵܠܹܐ ܠܵܗ̇ ܚܕܵܐ ܟܘܿܣܝܼܬܐ ܢܘܼܪܵܢܵܝܬܐ: ܘܚܲܕ ܨܠܝܼܒ݂ܵܐ ܦܲܪܙܠܵܝܵܐ ܐܵܪܸܡܢܵܝܵܐ ݂

ܡܼܢ ܩܕܵܡ ܥܒ݂ܵܪܵܐ ܠܥܹܕܬܐ: ܘܡܼܢ ܓܹܒܵܐ ܕܡܲܥܪܒ݂ܵܐ: ܐܝܼܬ ܒܘܼܪܓܵܐ ܕܢܵܩܘܿܫܵܐ ܪܲܒܵܐ ܕܝܼܠܹܗ ܡܟܲܘܢܵܐ ܡܼܢ ܬܠܵܬܐ ܫܲܘܝܹ̈ܐ ܡܵܖ̈ܲܝ ܚܕܵܐ ܩܘܼܒܬܐ ܡܲܢܕܘܼܪܬܵܢܵܝܬܐ ܒܲܬܡܵܢܝܵܐ ܐܸܠܥܹ̈ܐ: ܥܵܠܹܐ ܠܵܗ̇ ܚܲܕ ܨܠܝܼܒ݂ܵܐ ܚܸܦܪܵܝܵܐ (معدني) ܐܵܪܸܡܢܵܝܵܐ ݂ ܒܓܵܘܵܐ: ܐܝܼܬ ܚܲܕ ܒܹܐܡܵܐ ܪܲܒܵܐ ܦܪܝܼܫܵܐ ܠܓܘܼܕܵܐ ܕܙܲܡܵܖܹ̈ܐ: ܘܟܹܐ ܚܵܝܹܪ ܥܲܠ ܩܘܼܕܵܫ ܩܘܼܕܫܹܐ ܕܐܝܼܬ ܒܪܹܫܹܗ ܚܲܕ ܠܘܼܚܵܐ ܓܘܼܕܵܢܵܝܵܐ ܠܡܲܥܡܘܿܕܝܼܬܐ ܕܡܵܪܲܢ ܝܼܫܘܿܥ ܡܫܝܼܚܵܐ ܒܝܲܕ ܝܘܿܚܲܢܵܢ ܡܲܥܡܕܵܢܵܐ ݂ ܘܐܝܼܬ ܚܲܕ ܣܸܬܪܵܐ ܕܦܵܪܹܫ ܗܲܝܟܠܵܐ ܕܥܹܕܬܐ ܡܼܢ ܩܘܼܕܵܫ ܩܘܼܕܫܹܐ: ܕܐܝܼܬ ܠܹܗ ܚܕܵܐ ܡܢܵܬܐ ܬܲܚܬܵܝܬܐ ܦܬܝܼܚܬܐ ܩܵܐ ܡܗܘܼܡܢܹ̈ܐ ܡܸܛܠ ܫܲܘܬܵܦܘܼܬܐ ܓܲܘ ܩܘܼܪܒܵܢܵܐ: ܘܚܲܕ ܒܹܐܡܵܐ ܠܥܸܠ ܦܪܝܼܫܵܐ ܩܵܐ ܟܵܗܢܹ̈ܐ ܘܫܲܡܵܫܹ̈ܐ ݂ ܒܐܵܗܵܐ ܐܲܛܪܵܐ: ܒܸܕ ܣܵܟܹܪ ܣܸܬܪܵܐ: ܐܲܝܟܵܐ ܕܝܼܠܹܗ ܡܲܕܒܚܵܐ ܝܲܪܝܼܟ݂ܵܐ ܘܪܵܡܵܐ ܘܲܡܕܲܪܓ݂ܵܐ ܒܲܙܢܵܐ ܩܸܫܬܵܝܵܐ: ܡܟܘܼܣܝܵܐ ܒܫܝܼܫܵܐ ܘܲܡܣܲܩܠܵܐ ܒܨܘܼܪܬܐ ܕܡܵܪܬܝ ܡܲܪܝܲܡ ܘܫܲܒ݂ܪܵܐ ܝܼܫܘܿܥ: ܘܥܵܠܹܐ ܒܪܹܫܵܗ̇ ܬܠܵܬ ܩܘܼܒܵܬܐ ܙܥܘܿܖܹ̈ܐ ݂ ܘܐܝܼܬ ܒܵܬܲܪ ܡܲܕܒܚܵܐ ܪܹܫܵܝܵܐ: ܚܲܕ ܡܲܥܒܪܵܐ ܕܡܵܬܹܚ ܥܲܠ ܝܘܼܪܟ݂ܵܐ ܕܓܸܢܝܵܢܵܐ ݂ ܘܥܲܠ ܬܪܲܝܗܘܿܢ ܓܹܒܵܢܹ̈ܐ ܕܡܲܕܒܚܵܐ ܘܡܼܢ ܓܹܒܵܐ ܕܣܸܡܵܠܵܐ: ܐܝܼܬ ܐܵܘܵܢܵܐ ܕܡܲܥܡܘܿܕܝܼܬܐ: ܐܝܼܢܵܐ ܒܹܝܬ ܝܵܩܘܿܢ ܢܵܦܹܠ ܥܲܠ ܓܹܒܵܐ ܕܝܲܡܝܼܢܵܐ ݂ ܚܲܪܬܐ ܓܘܼܕܵܢܹ̈ܐ ܡܣܘܼܩܠܹ̈ܐ ܝܢܵܐ ܒܚܲܕܟܡܵܐ ܠܘܼܚܹ̈ܐ ܫܸܖ̈ܫܵܝܹܐ ܘܲܡܐܲܨܚܹ̈ܐ ݂ ܘܐܝܼܬ ܐܸܫܬܐ ܒܸܖ̈ܩܹܐ ܖ̈ܲܒܹܐ: ܝܵܗܒ݂ܝ ܠܗܲܝܟܠܵܐ ܕܥܹܕܬܐ ܒܲܗܪܵܐ ܕܲܣܢܝܼܩܬܐ ܝܠܵܗ̇ ܥܵܠܠܹܗ ݂

ܒܒܲܪܵܐ: ܐܝܼܬ ܬܪܹܝܢ ܨܲܠܡܹ̈ܐ ܕܟ݂ܵܖ̈ܵܝܹܐ ܦܖ̈ܝܼܫܹܐ ܠܣܵܗܕܹ̈ܐ ܕܐܲܒܝܼܕܘܼܬܐ ܟܢܘܼܫܝܵܝܬܐ ܕܐܵܖܸ̈ܡܢܵܝܹܐ: ܒܦܲܠܓܵܐ ܕܟܠܚܲܕ ܡܸܢܲܝܗܝ ܐܝܼܬ (ܚܵܬܸܫܟܵܐܪ) ܪܲܒܵܐ (ܨܠܝܼܒ݂ܵܐ ܐܵܪܸܡܢܵܝܵܐ ܟܹܐܦܵܝܵܐ ܐܝܼܬ ܥܲܠܠܹܗ ܢܸܩܫܹ̈ܐ ܩܲܛܝܼܢܹ̈ܐ) ݂ ܚܵܒܹܫ ܨܲܠܡܵܐ ܕܟ݂ܵܪܵܝܵܐ ܩܲܕܡܵܝܵܐ ܕܦܝܼܫܠܹܗ ܒܸܢܝܵܐ ܒܫܲܢ݇ܬܐ ܕ1990: ܥܲܠ ܫܠܲܕܹ̈ܐ ܕܣܵܗܕܹ̈ܐ ܫܩܝܼܠܹ̈ܐ ܡܼܢ (ܕܲܝܪ ܙܘܿܪ ܒܣܘܼܪܝܼܵܐ): ܘܐܝܼܬ ܒܲܠܩܘܼܒ݂ܠܹܗ ܨܲܠܡܵܐ ܕܟ݂ܵܪܵܝܵܐ ܬܪܲܝܵܢܵܐ ܕܦܝܼܫܠܹܗ ܒܸܢܝܵܐ ܒܫܲܢ݇ܬܐ ܕ2015: ܒܕܘܼܟ݂ܪܵܢܵܐ ܕܲܥܒ݂ܵܪܬܐ ܕܡܵܐܐ ܫܸܢܹ̈ܐ ܥܲܠ ܩܛܵܠܥܲܡܵܐ ܕܐܵܖܸ̈ܡܢܵܝܹܐ ݂

ܓܲܘ ܒܸܢܝܵܢܵܐ ܕܲܢܦܝܼܠܵܐ ܝܠܹܗ ܒܬܲܝܡܢܵܐ ܕܥܹܕܬܐ: ܐܝܼܬ ܚܲܕ ܐܵܘܵܢܵܐ ܪܲܒܵܐ: ܐܝܼܬ ܓܵܘܹܗ (100) ܠܘܼܚܹ̈ܐ ܕܪܲܫܵܡܵܐ (ܐܲܢܬܪܵܢܝܼܟ ܐܘܿܗܵܢܝܼܣܝܵܐܢ) ݂ ܓܵܠܝܼ ܐܲܢܲܝ ܣܘܼܥܖ̈ܵܢܹܐ ܩܵܐܹܡܵܝܹ̈ܐ ܡܸܬܬܲܡܗܵܢܹ̈ܐ ܕܦܝܼܫܠܗ݇ܘܿܢ ܡܬܘܼܖ̈ܨܹܐ ܒܲܠܚܘܿܕ ܓܲܘ ܬܲܪܬܹܝܢ ܫܸܢܹ̈ܐ: ܓܵܠܝܼ ܠܕܲܪܓܵܐ ܘܲܟܡܵܝܘܼܬܐ ܕܓܘܼܢܚܹ̈ܐ ܕܦܝܼܫܠܗ݇ܘܿܢ ܥܒ݂ܝܼܕܹ̈ܐ ܒܥܸܕܵܢ ܐܲܒܝܼܕܘܼܬܐ ܕܐܵܖܸ̈ܡܢܵܝܹܐ: ܒܐܘܼܚܕܵܢܹ̈ܐ ܡܲܕܢܚܵܝܹ̈ܐ ܕܐܸܡܦܪܵܛܘܿܪܘܼܬܐ ܥܘܼܬ݂ܡܵܢܵܝܬܐ ܒܲܝܢܲܝ ܫܲܢ݇ܬܐ ܕ1915 ܘ 1917 ݂

ܡܼܢ ܫܲܢ݇ܬܐ ܕ1980: ܦܵܐܹܫ ܚܫܝܼܒ݂ܵܐ ܡܲܛܪܵܢ ܐܲܦܵܟ ܐܵܣܵܕܘܿܪܝܵܐܢ[1]: ܪܹܫ ܐܲܦܸܣܩܘܿܦܹ̈ܐ ܕܥܹܕܬܐ ܫܠܝܼܚܵܝܬܐ ܐܵܪܸܡܢܵܝܬܐ ܓܲܘ ܥܝܼܪܵܐܩ ݂ ܚܫܝܼܚܵܐ ܝܠܹܗ ܐܵܗܵܐ ܫܲܝܢܵܐ ܘܫܸܠܝܘܼܬܐ ܕܐܝܼܬ ܓܲܘ ܥܹܕܬܐ ܐܵܪܸܡܢܵܝܬܐ: ܕܟܵܠܹܝܚ ܩܕܵܡܵܐ ܕܡܲܛܪܵܢ ܒܐܝܼܩܵܪܵܐ ܒܗܵܢ ܐܲܬ݂ܪܵܐ ܕܲܚܙܹܐ ܠܹܗ ܪܵܒܵܐ ܫܓ݂ܘܼܫܝܹ̈ܐ ܘܓܘܼܢܚܹ̈ܐ: ܒܗܿܝ ܕܲܚܙܹܐ ܠܹܗ ܐܲܘ ܥܒܸܪܹܗ ܡܲܛܪܵܢ ܐܲܦܵܟ ܐܵܣܵܕܘܿܪܝܵܐܢ ܒܟܠܲܝܗܝ ܡܲܚܘܵܬܐ ܕܵܖ̈ܵܝܹܐ ܕܲܗܘܹܐ ܠܗ݇ܘܿܢ ܒܥܝܼܪܵܐܩ: ܐܲܝܟ݂ ܬܠܵܬܐ ܦܠܵܫܹ̈ܐ ܕܒܲܪܩܵܩܵܐ: ܢܦܵܠܬܐ ܕܨܲܕܵܐܡ ܚܘܼܣܲܝܢ: ܟܒ݂ܘܿܫܝܵܐ ܐܵܡܹܝܪܟܵܝܵܐ: ܚܨܵܪܵܐ ܐܵܡܹܝܪܟܵܝܵܐ: ܓܸܠܝܵܢܵܐ ܕܡܵܦܝܹ̈ܐ ܐܸܣܠܵܡܵܝܹ̈ܐ ܘܲܪܕܘܼܦܝܲܝܗܝ ܠܲܡܫܝܼܚܵܝܹ̈ܐ ܕܥܝܼܪܵܐܩ: ܘܲܫܒ݂ܵܩܲܝܗܝ ܐܲܠܝܼܨܹ̈ܐ ܠܬܲܘܬܵܒ݂ܘܼܬܐ ܘܲܥܪܵܩܵܐ ܠܒܲܪ ܡܼܢ ܐܲܬ݂ܪܵܐ ݂

__________

[1] ܝܼܗ݇ܘܵܐ ܒܪܹܫ ܦܘܼܠܚܵܢܹܗ ܒܥܸܕܵܢ ܣܵܥܘܿܪܘܼܬܐ ܕܝܲܗܠܵܐ ܕ(ܡܝܼܙܘܿܦܘܿܬܵܡܝܵܐ) ܒܲܫܒ݂ܵܛ ـ ܐܵܕܵܪ 2018 ݂