ܟܠܲܝܗܝ ܐܵܢܝܼ ܕܲܚܝܹܐ ܠܗ݇ܘܿܢ ܓܲܘ ܢܸܡܪܘܿܕ: ܐܸܢ ܡܫܝܼܚܵܝܹ̈ܐ ܕܲܚܝܹܐ ܠܗ݇ܘܿܢ ܬܚܘܿܬ ܡܲܥܒ̇ܕܵܢܘܼܬܐ ܕܕܲܝܪܵܐ: ܐܲܘ ܥܲܪ̈ܒ݂ܵܝܹܐ ܡܼܢ ܦܸܢ̈ܝܵܬ݂ܐ ܡܫܲܚܠܦܹ̈ܐ ܕܢܸܡܪܘܿܕ: ܡܗܘܼܝܡܸܢܘܼܢ ܒܐܝܼܬܘܼܬܐ ܕܐܵܗܵܐ ܚܠܵܠܵܐ (ܐܘܼܪܚܵܐ ܕܲܬܚܘܿܬ ܐܲܪܥܵܐ): ܘܐܝܼܡܲܢ ܕܐܝܼܬ ܗ݇ܘܵܐ ܚܕܵܐ ܚܦܝܼܪܬܐ ܙܥܘܿܪܬܐ: ܟܹܐ ܚܵܫܒ݂ܝܼ ܗ݇ܘܵܘ ܕܝܼܠܵܗ̇ ܬܲܪܥܵܐ ܕܲܚܠܵܠܵܐ ݂ ܘܗܵܕܟ݂ܵܐ ܗܘܼܡܵܣܵܐ ܕܫܘܼܚܠܵܦܵܐ ܕܐ݇ܣܘܼܪ̈ܵܝܹܐ ܠܲܡܫܝܼܚܵܝܘܼܬܐ ܘܲܒܢܵܝܬܐ ܕܗܵܢܵܐ ܕܲܝܪܵܐ: ܦܝܼܫܠܹܗ ܡܫܘܼܢܝܵܐ ܡܼܢ ܕܵܪܵܐ ܠܕܵܪܵܐ ݂

ܐܵܗܵܐ ܫܲܘܦܵܐ (ܩܲܒ݂ܪܵܐ) ܝܲܬܝܼܪ ܡܼܢ ܕܲܝܪܵܐ ܝܠܹܗ: ܒܗܿܝ ܕܠܵܐ ܝܠܹܗ ܒܲܠܚܘܿܕ ܕܘܼܟܬܐ ܠܲܨܠܘܿܬܐ ܐܲܝܟ݂ ܕܒܐܝܼܡܵܪܵܐ ܝܠܹܗ ܦܝܼܝܹܗ: ܐܸܠܵܐ ܝܼܠܹܗ ܐܵܦ ܩܲܒ݂ܪܵܐ ܘܕܘܼܟܬܐ ܠܚܲܓܵܐ (ܣܵܥܘܿܪܘܼܬ݂ ܕܘܼܟܬܐ ܩܲܕܝܼܫܬܐ) ݂ ܠܦܘܼܬ݂ ܡܣܲܦܝܵܢܘܼܬܐ ܕܘܼܟܬܵܢܵܝܬܐ: ܟܹܐ ܣܵܥܹܪ (ܐܵܬܹܐ) ܠܩܲܒ݂ܪܵܐ ܕܡܵܪܝ ܒܸܗܢܵܡ ܡܸܢܝܵܢܵܐ ܡܼܢ ܡܘܼܫܠܡܵܢܹ̈ܐ ܘܕܵܣܢܵܝܹ̈ܐ: ܘܲܦܪܝܼܫܵܐܝܼܬ ܢܸܫܹ̈ܐ ܠܒܵܥܘܼܬܐ (ܛܠܵܒܬܐ) ܕܲܡܪܲܚܡܵܢܘܼܬܐ ܡܼܢ ܩܲܕܝܼܫܵܐ ܠܦܸܪܝܘܼܬܐ ܘܲܠܫܲܡܝܼܢܘܼܬܐ: ܘܲܠܥܹܠ̈ܠܵܬ݂ܐ (ܦܹܐܪܹ̈ܐ) ܕܚܲܩܠܵܬ݂ܐ ܘܩܸܢܝܵܢܹ̈ܐ ܘܡܲܝܬܲܝܬܐ ܕܫܲܒ݂ܪܹ̈ܐ ݂ ܒܲܚܕܵܐ ܕܘܼܟܬܐ ܪܵܒܵܐ ܩܘܼܪܒܵܐ ܡܼܢ ܩܲܒ݂ܪܵܐ: ܚܙܹܐ ܠܹܗ ܓ̰ܵܐܢ ܡܘܿܪܝܼܣ ܦܝܼܝܹܗ ܐܲܘ ܣܝܼܡܠܹܗ ܚܲܕ ܪܸܥܝܵܢܵܐ ܐ݇ܚܪܹܢܵܐ ܕܐܵܡܹܪ: ܐܝܼܬ ܚܲܕ ܬܸܠܵܐ ܡܬܘܼܪܨܵܐ ܒܐܝܼܕܵܐ ܡܟܲܣܹܐ ܠܲܚܕܵܐ ܥܹܕܬܐ ܡܼܢ ܙܲܒ݂ܢܵܐ ܫܲܪܘܵܝܵܐ ܛܵܒ݂ ܥܲܬܝܼܩܵܐ: ܘܐܸܢ ܐܵܗܵܐ ܪܸܥܝܵܢܵܐ ܫܲܪܝܼܪܵܐ ܝܠܹܗ: ܒܸܕ ܗܵܘܝܵܐ ܗܵܕܹܐ ܥܹܕܬܐ: ܗܵܝ ܥܹܕܬܐ ܝܲܬܝܼܪ (ܒܸܫ) ܥܲܬܝܼܩܬܐ ܕܓܲܘ ܥܝܼܪܵܐܩ ݂

ܥܲܠ ܡܸܬܚܵܐ ܕܪܵܒܵܐ ܕܵܪܹ̈ܐ: ܒܸܕ ܕܵܟ݂ܪܲܚ ܠܥܲܡܠܹ̈ܐ ܕܚܘܼܕܵܬ݂ܵܐ ܐܲܘ ܬܘܼܪܵܨܵܐ ܕܥܹܕܬܐ: ܘܡܲܕܒܚܵܐ: ܘܨܲܠܡܹ̈ܐ ܒܹܝܬ (ܒܹܝܢ) ܫܸܢܹ̈ܐ (1164 ـ 1295) ܠܡܵܪܲܢ: ܗ: ܕ: ܕܵܪܵܐ ܬܠܵܬܲܥܣܝܼܪܵܝܵܐ (ܕܵܪܵܐ ܕܲܗܒ݂ܵܢܵܝܵܐ ܩܵܐ ܡܲܘܨܸܠ ܘܩܵܐ ܡܵܪܝ ܒܸܗܢܵܡ ܐܲܝܟܵܐ ܕܪ̈ܲܒܵܢܹܐ ܟܹܐ ܐܵܙܠ݇ܝܼ ܗ݇ܘܵܘ ܠܡܸܨܪܹܝܢ ܘܕܵܥܪܝܼ ܗ݇ܘܵܘ) ݂ ܐܵܦ ܒܸܕ ܕܵܟ݂ܪܲܚ ܠܪܸ̈ܥܝܵܢܹܐ ܕܲܠܩܘܼܒ݂ܠܵܝܹ̈ܐ ܥܲܠ ܚܘܼܝܵܕܵܐ ܥܲܡ ܪܗܘܿܡܹܐ ܡܼܢ ܕܵܪܵܐ ܫܬܲܥܣܝܼܪܵܝܵܐ: ܘܲܢܩܵܠܵܐ (ܫܘܼܢܵܝܵܐ) ܕܲܣܪ̈ܝܼܛܵܬ݂ܐ ܠܕܲܝܪܵܐ ܪܲܒܵܐ ܕܐ݇ܣܘܼܪ̈ܝܵܝܹܐ ܐܲܪ̈ܬܘܿܕܘܿܟܣܵܝܹܐ (ܕܲܝܪܵܐ ܕܙܲܥܦܲܪܵܐܢ: ܟܘܼܪܟܡܵܐ) ܒܡܲܥܠܵܢܵܐ ܕܲܡܕܝܼܢ݇ܬܐ ܕܡܵܪܕܝܼܢ (ܡܸܪ̈ܕܝܼܢ: ܚܸܣܢܹ̈ܐ) ܒܬܲܝܡܢܐ ܕܬܘܼܪܟܝܼܵܐ ܕܝܲܘܡܵܢܵܐ ݂ ܘܲܒܫܲܢ݇ܬܐ ܕ 1839 ܦܝܼܫܠܹܗ ܕܲܝܪܵܐ ܕܡܵܪܝ ܒܸܗܢܵܡ ܟܠܵܢܵܐܝܼܬ ܬܒ݂ܝܼܥܵܐ ܠܩܵܬ݂ܘܿܠܝܼܩܵܝܹ̈ܐ: ܕܠܵܐ ܚܘܼܦܵܛܹ̈ܐ ܪ̈ܲܒܵܢܵܝܹܐ ܚܫܝܼܚܹ̈ܐ ܠܡܲܕܟ݂ܘܿܪܹܐ: ܐܝܼܢܵܐ ܥܲܡ ܐܲܡܝܼܢܘܼܬ݂ ܣܘܼܩܒܵܠܵܐ ܕܣܵܥܘܿܪ̈ܘܵܬ݂ܐ ܕܣܵܥܘܿܪܹ̈ܐ (ܚܲܓܵܝܹ̈ܐ) ܡܸܬܡܲܕܢܚܵܢܹ̈ܐ ݂

ܕܵܪܵܐ ܕܥܸܣܪܝܼܢ ܡܫܲܪܹܐ ܒܥܲܡܠܵܐ ܦܪܝܼܫܵܐ ܠܚܘܼܕܵܬ݂ܵܐ ܕܕܘܼܟܵܐ: ܟܲܕ ܙܝܼܕܠܗ݇ܘܿܢ ܫܘܼܓ݂݇ܠܵܢܹ̈ܐ ܕܢܵܛܘܿܪܘܼܬ݂ ܒܸܢܝܵܢܵܐ ܒܲܬܠܵܬܝܼܢܵܬ݂ܐ ܕܕܵܪܵܐ ܕܲܥܒ݂ܲܪ ܬܚܘܿܬ ܫܘܼܠܛܵܢܵܐ ܕܡܵܪܝ ܐܲܦܪܵܡ: ܡܸܫܬܲܐܠܵܢܵܐ ܥܒ݂ܝܼܪܵܐ ܕܕܲܝܪܵܐ ܕܲܦܪܸܣܠܹܗ ܡܸܢܝܵܢܵܐ ܪܲܒܵܐ ܡܼܢ ܟܘܼܪ̈ܵܣܹܐ (ܒܲܝܪܘܼܬ 1954: ܘܒܲܓ݂ܕܵܕ ܒܫܲܢ݇ܬܐ ܕ 1964): ܘܥܲܡܠܹ̈ܐ ܐ݇ܚܪܹ̈ܢܹܐ ܒܘܼܕ ܬܲܫܥܝܼܬܐ ܕܗܵܢ ܕܲܝܪܵܐ (ܬܲܫܥܝܼܬܐ ܕܕܲܝܪܵܐ ܕܡܵܪܝ ܒܸܗܢܵܡ: ܡܲܘܨܸܠ ܒܫܲܢ݇ܬܐ ܕ 1951) ݂ ܘܒܘܼܕ ܨܲܠܡܹ̈ܐ ܘܩܲܕܝܼܫܹ̈ܐ ܐܵܢܝܼ ܕܩܲܡ ܡܫܲܬܐܸܣܝܼ ܠܹܗ ܕܲܝܪܵܐ: ܒܸܚܒ݂ܵܫܵܐ ܚܲܝܹ̈ܐ ܕܐܲܡܝܼܪܹ̈ܐ ܪ̈ܲܒܹܐ ܒܸܗܢܵܡ ܘܚܵܬܹܗ ܣܵܪܵܐ (ܡܲܘܨܸܠ 1949) ݂ ܘܲܒܫܲܢ݇ܬܐ ܕ 1986 ܦܝܼܫܠܹܗ ܚܬܝܼܡܵܐ ܚܘܼܕܵܬܵܐ ܐ݇ܚܵܪܵܝܵܐ ܠܫܲܦܪܲܢܬܐ ܕܟܠܵܗ̇ ܕܘܼܟܬܐ ݂ ܠܗܵܫܵܐ ܛܥܝܼܢܵܐ ܝܠܹܗ ܕܲܝܪܵܐ ܕܡܵܪܝ ܒܸܗܢܵܡ ܡܫܲܒܚܵܐ ܒܥܲܬܝܼܪܘܼܬ݂ ܕܡܘܼܬܹܗ ܡܲܚܵܪܵܝܬܐ: ܢܝܼܫܵܢܩܹ̈ܐ ܕܥܲܡܠܹ̈ܐ ܕܚܘܼܕܵܬ݂ܐ ܕܦܝܼܫܠܗ݇ܘܿܢ ܥܒ݂ܝܼܕܹ̈ܐ ܒܫܲܢ݇ܬܐ ܕ 1164: ܥܲܠ ܓܘܼܕܵܢܹ̈ܐ ܘܥܲܠ ܬܲܪ̈ܥܵܢܹܐ ݂ ܘܥܲܠ ܗܲܝܟܠܹ̈ܐ (ܡܲܠܒܵܢܹ̈ܐ) ܕܬܲܪ̈ܥܵܢܹܐ ܘܲܣܩܘܿܦܝܵܬܲܝܗܝ: ܐܝܼܬ ܫܸܡܵܢܹ̈ܐ ܕܕܵܒ݂ܚܵܢܹ̈ܐ ܘܡܲܩܪܸ̈ܒ݂ܵܢܹܐ ܕܢܸܕܪܹ̈ܐ: ܘܫܸܡܵܢܹ̈ܐ ܕܐܲܡܵܢܹ̈ܐ ܕܗܿܘ ܙܲܒ݂ܢܵܐ ݂ ܒܸܕ ܦܵܝܫܵܐ ܡܘܼܩܪܸܒ݂ܬܐ ܚܕܵܐ ܡܲܘܕܥܵܢܘܼܬܐ ܦܪܝܼܫܬܐ ܠܐܵܗܵܐ ܒܸܢܝܵܢܵܐ ܐܲܪܕܸܟ݂ܠܵܝܵܐ: ܘܲܠܣܸܩܠܹ̈ܐ ܕܐܝܼܬ ܓܵܘܹܗ ܓܲܘ ܐܵܗܵܐ ܡܹܐܡܪܵܐ ݂ ܘܥܲܡ ܚܒ݂ܲܠ: ܗܵܢܵܐ ܒܸܢܝܵܢܵܐ ܡܫܲܒܚܵܐ ܘܡܸܬܪܲܫܡܵܢܵܐ: ܦܝܼܫܠܹܗ ܢܝܼܫܵܐ ܠܕܵܥܹܫ ܐܝܼܡܲܢ ܕܲܟܒ݂ܸܫܠܗ݇ܘܿܢ ܠܗܵܕܹܐ ܦܢܝܼܬܐ ܒܹܝܬ ܬܲܡܘܼܙ 2014 ܠܬܸܫܪܝܼܢ ܬܪܲܝܵܢܵܐ 2016 ݂ ܡܘܼܫܠܡܵܢܹ̈ܐ ܡܟܲܬ̇ܡܹ̈ܐ (ܫܸܚܬܵܢܹ̈ܐ) ܡܘܼܚܪܸܒ݂ ܠܗ݇ܘܿܢ ܠܢܸܩܫܹ̈ܐ ܘܣܸܩܠܹ̈ܐ ܕܐܝܼܬ ܗ݇ܘܵܐ ܓܵܘܵܐ ܕܕܲܝܪܵܐ ܘܒܲܪܵܝܹܗ: ܒܸܚܒ݂ܵܫܵܐ ܨܠܝܼܒ݂ܵܢܹ̈ܐ ܘܨܲܠܡܹ̈ܐ ܘܚܲܕܟܡܵܐ ܪ̈ܲܩܡܹܐ ܦܪ̈ܝܼܫܹܐ ܕܣܵܗܕܝܼ ܗ݇ܘܵܘ ܘܝܵܗܒ݂ܝܼ ܗ݇ܘܵܘ ܛܘܼܦ̮ܣܵܐ ܘܬܲܦܢܟ݂ܵܐ ܥܲܠ ܚܕܵܐ ܡܢܵܬ݂ܐ ܡܼܢ ܒܸܢܝܵܢܵܐ ܡܲܚܵܪܵܝܵܐ ܘܐܲܡܢܵܝܵܐ ܕܪܵܒܵܐ ܕܵܪܹ̈ܐ ݂

ܩܸܛܥܵܐ ܪܹܫܵܝܵܐ ܘܒܵܪܘܿܝܵܐ ܕܕܲܝܪܵܐ ܕܡܵܪܝ ܒܸܗܢܵܡ: ܝܼܠܹܗ ܚܕܵܐ ܓܠܝܼܦܬܐ ܪܲܒܬܐ ܕܦܝܼܫܠܵܗ̇ ܢܩܝܼܫܬܐ ܒܚܲܕ ܐܸܣܟܹܝܡܵܐ ܛܵܒ݂ ܫܲܦܝܼܪܵܐ: ܕܟܹܐ ܪܵܡܹܙ ܠܡܵܪܝ ܒܸܗܢܵܡ ܟܲܕ ܗܿܘ ܝܬܝܼܒ݂ܵܐ ܥܲܠ ܣܘܼܣܵܐ: ܘܲܦܠܵܫܵܐ ܥܲܡ ܣܵܛܵܢܵܐ ݂ ܒܐܝܼܡܵܪܵܐ ܝܠܹܗ ܓ̰ܵܐܢ ܦܝܼܝܹܗ: ܕܐܵܗܵܐ ܩܸܛܥܵܐ ܡܬܘܼܪܨܵܐ ܡܼܢ ܓܹܨܵܐ ܕܡܘܼܬܒ݂ܵܐ ܝܠܹܗ ܓܲܘ ܓܘܼܕܵܐ: ܦܝܼܫܠܹܗ ܓܠܝܼܦܵܐ ܘܲܢܩܝܼܫܵܐ ܒܣܘܿܓ݂ܐܵܐ ܓܲܘ ܕܵܪܵܐ ܚܲܡܫܵܥܣܝܼܪܵܝܵܐ ܐܲܘ ܓܲܘ ܚܲܕ ܙܲܒ݂ܢܵܐ ܥܒ݂ܝܼܪܵܐ ݂ ܐܵܗܵܐ ܩܸܛܥܵܐ ܦܝܼܫܠܹܗ ܡܘܼܚܪܸܒ݂ܵܐ ܓܡܝܼܪܵܐܝܼܬ ܒܝܲܕ ܕܵܥܹܫ: ܐܲܝܟ݂ ܕܦܝܼܫܠܹܗ ܡܘܼܚܪܸܒ݂ܵܐ ܨܲܠܡܵܐ ܕܣܵܪܵܐ ܕܝܼܗ݇ܘܵܐ ܥܲܠ ܓܘܼܕܵܐ ܕܒܲܪܩܘܼܒ݂ܠ ݂

ܗܿܘ ܓܸܕܫܵܐ ܒܸܫ ܣܸܪܝܵܐ ܝܼܗ݇ܘܵܐ ܡܲܦܩܲܥܬܐ ܬܵܠܚܵܢܬܐ ܕܩܲܒ݂ܪܵܐ ܕܒܸܗܢܵܡ ܘܣܵܪܵܐ ܒܝܲܪܚܵܐ ܕܐܵܕܵܪ 2015: ܕܕܵܥܪܵܐ ܬܲܫܥܝܼܬܹܗ ܠܫܲܢ݇ܬܐ ܕ 1300: ܘܲܚܪܵܒ݂ܵܐ ܘܲܬܒ݂ܵܪ̈ܵܬ݂ܵܐ ܕܲܡܟܲܣܘܿܝܹܐ ܝܠܲܝܗܝ ܠܩܲܒ݂ܪܵܐ: ܗܵܫܵܐ ܠܵܐ ܝܵܗܒ݂ܝܼ ܠܲܢ ܡܨܵܝܬܐ ܕܝܵܕܥܲܚ ܩܵܐܹܡܹܗ ܘܐܲܝܟܲܢܵܝܘܼܬܹܗ ݂ ܐܝܼܢܵܐ ܘܵܠܹܐ ܕܝܵܕܥܲܚ ܡܵܐ ܒܪܹܐ ܠܹܗ ܒܲܨܠܝܼܒ݂ܵܐ ܟܹܐܦܵܝܵܐ ܐܵܪܸܡܢܵܝܵܐ (ܒܠܸܫܵܢܵܐ ܐܵܪܸܡܢܵܝܵܐ: ܚܵܬܫܟܵܪ) ܕܦܝܼܫܵܐ ܝܗ݇ܘܵܐ ܡܘܼܬܒ݂ܵܐ ܓܲܘ ܓܘܼܕܵܐ ܕܩܲܒ݂ܪܵܐ ܥܲܠ ܝܲܡܝܼܢܹܗ ݂ ܐܵܗܵܐ ܣܸܩܠܵܐ ܟܹܐܦܵܝܵܐ: ܓܵܠܹܐ ܘܣܵܗܹܕ ܥܲܠ ܡܙܝܼܓܘܼܬ݂ܐ ܡܥܲܩܲܕܬܐ ܕܲܡܕܝܼܢܵܝܘܼܬܐ ܥܲܡ ܪܘܼܚܵܢܵܝܘܼܬ݂ܐ: ܗܵܝ ܕܡܵܨܝܵܐ ܕܟܵܢܫܵܐ ܘܦܵܪܫܵܐ ܒܹܝܬ ܥܹ̈ܕܵܬ݂ܐ ܘܬܲܘܕܝܼܵܬ݂ܐ ܕܒܹܝܬ݂ ܢܲܗܪ̈ܝܼܢ ܘܐܵܣܝܵܐ ܙܥܘܿܪܬܐ ܘܐܵܪܡܝܼܢܝܵܐ ݂

ܩܵܐܹܡ ܐܲܘ ܙܢܵܐ ܕܦܝܼܫܠܹܗ ܚܸܙܝܵܐ ܩܲܒ݂ܪܵܐ ܕܡܵܪܝ ܒܸܗܢܵܡ ܒܚܘܼܬܵܡܵܐ ܕ 2016: ܐܝܼܡܲܢ ܕܲܥܪܸܩܠܗ݇ܘܿܢ ܚܲܝܠܵܘܵܬ݂ܐ ܕܐܘܼܚܕܵܢܵܐ ܡܘܼܫܠܡܵܢܵܐ: ܝܼܗ݇ܘܵܐ ܚܲܕ ܩܵܐܹܡ ܪܗܝܼܒ݂ܵܝܵܐ ܘܲܒܥܲܝܢܵܐ ܕܥܸܕܵܢܵܐ ܐܵܦ ܫܲܝܢܵܝܵܐ ݂ ܘܐܵܦܸܢ ܕܟܠ ܡܸܢܕܝܼ ܡܘܼܒܝܸܢܹܗ ܬܠܝܼܚܵܐ ܘܠܵܐ ܡܸܬܬܲܪܨܵܢܵܐ: ܐܲܝܟ݂ ܕܚܵܫܒ݂ܲܚ ܡܼܢ ܚܙܵܝܬܐ ܩܲܕܡܵܝܬܐ ܘܡܼܢ ܨܘܼܪ̈ܵܬ݂ܐ (ܨܘܼܪ̈ܝܵܬ݂ܐ) ܕܡܲܦܩܲܥܬܐ ܕܲܓܕܸܫܠܵܗ̇ ܒܐܵܕܵܪ 2015: ܐܝܼܢܵܐ ܥܲܡ ܚܪܵܒ݂ܵܐ ܘܲܬܒ݂ܵܪ̈ܵܬ݂ܵܐ ܡܸܬܡܲܨܝܵܢܝܼܬܐ ܝܠܵܗ̇ ܢܛܵܪܬܐ ܘܲܡܦܲܪܲܩܬܐ ܕܚܲܕܟܡܵܐ ܐܸܣܛܘܼܟ݂ܣܹ̈ܐ ܝܵܪ̈ܬܘܼܬܵܢܵܝܹܐ ܐܵܢܲܢܩܵܝܹ̈ܐ ݂ ܡܵܨܹܝܚ ܕܲܡܦܲܠܓ݂ܲܚ ܠܹܗ ܒܸܢܝܵܢܵܐ ܠܐܲܪܒܲܥ ܡ̈ܢܵܘܵܬ݂ܐ: ܒܸܢܝܵܢܵܐ ܕܡܲܥܠܵܢܵܐ ܕܝܼܗ݇ܘܵܐ ܬܠܝܼܚܵܐ ܓܡܝܼܪܵܐܝܼܬ ܠܗܲܠ ܐܸܣܵܐ: ܡܲܥܒ̇ܪܹ̈ܐ ܕܲܥܒ݂ܵܪܬܐ ܬܠܝܼܚܹ̈ܐ ܡܢܵܬܵܐܝܼܬ: ܐܝܼܢܵܐ ܡܲܨܝܵܐ ܠܲܥܒ݂ܵܕܵܐ ܬܘܼܪܵܨܵܐ ܘܚܘܼܕܵܬ݂ܵܐ ܓܵܘܲܝܗܝ: ܩܘܼܒܬܐ ܕܥܹܕܬܐ ܢܦܝܼܠܬܐ ܝܠܵܗ̇: ܘܐܵܦ ܩܸܫܬܐ ܦܬܝܼܚܬܐ ܠܨܲܘܒܵܐ ܕܡܲܥܒ̇ܪܹ̈ܐ: ܘܲܒܚܲܪܬܐ ܚܲܕ ܐܵܘܵܢܵܐ ܙܥܘܿܪܵܐ ܡܵܪܹܐ ܩܘܼܒܹ̇̈ܐ ܚܵܝܘܿܪܹ̈ܐ ܥܲܠ ܥܹܕܬܐ: ܚܕܵܐ ܡܢܵܬܐ ܡܸܢܵܗ̇ ܬܠܝܼܚܬܐ: ܐܝܼܢܵܐ ܡܲܨܝܵܐ ܠܬܘܼܪܵܨܵܐ ܕܲܡܢܵܬ݂ܐ ܐܸܣܵܝܬܐ ܡܸܢܵܗ̇ ݂ ܘܪܵܒܵܐ ܡܼܢ ܒܸܢܝܵܢܹ̈ܐ ܦܲܪ̈ܙܠܵܝܹܐ ܕܐܝܼܬ ܗ݇ܘܵܐ ܓܵܘܲܝܗܝ ܡܵܐܢܹ̈ܐ ܡܸܬܦܲܩܥܵܢܹ̈ܐ: ܠܵܐ ܦܩܸܥܠܗ݇ܘܿܢ: ܘܲܫܒ݂ܸܩܠܗ݇ܘܿܢ ܠܚܲܕ ܡܸܢܝܵܢܵܐ ܛܵܒ݂ܵܐ ܡܼܢ ܓܘܼܕܵܢܹ̈ܐ ܕܥܹܕܬܐ ܠܵܐ ܬܠܝܼܚܹ̈ܐ ݂

ܫܘܼܬܐܵܣܵܐ ܕܐܲܚܘܼܬܐ ܓܲܘ ܥܝܼܪܵܐܩ ܦܣܸܩܠܹܗ ܕܲܡܫܲܪܹܐ ܒܬܘܼܪܵܨܵܐ ܘܚܘܼܕܵܬ݂ܐ ܕܩܲܒ݂ܪܵܐ: ܢܲܩܝܼܦܵܐܝܼܬ (ܚܲܕ ܪܹܫܵܐ) ܒܵܬܲܪ ܚܘܼܪܵܪܵܐ ܕܕܲܝܪܵܐ ݂ ܣܘܼܥܪ̈ܵܢܹܐ ܩܲܕܡܵܝܹ̈ܐ ܠܲܫܩܵܠܵܐ ܕܲܚܪ̈ܵܒ݂ܹܐ ܘܒܸܢܝܵܢܹ̈ܐ ܬܠܝܼܚܹ̈ܐ ܡܫܘܼܪܹܐ ܠܵܗ̇ ܒܲܚܙܝܼܪܵܢ 2017 ݂ ܘܩܲܛܝܼܢܵܐܝܼܬ ܦܪܸܫܠܹܗ ܘܦܣܸܩܠܹܗ ܫܘܼܬܐܵܣܵܐ ܕܐܲܚܘܼܬܐ ܠܡܵܐ ܕܡܸܬܡܲܨܝܵܢܝܼܬܐ ܝܠܵܗ̇: ܒܡܲܕܥܲܪܬܐ ܕܲܡܢܵܬܐ ܪܲܒܬܐ ܡܼܢ ܡܸܢܕܝܼܵܢܹ̈ܐ ܓܠܝܼܦܹ̈ܐ ܕܚܵܫܒ݂ܲܚ ܗ݇ܘܵܘ ܕܲܛܠܝܼܩܹ̈ܐ ܝܢܵܐ ܘܠܲܝܬ ܡܨܵܝܬܵܐ ܠܡܲܕܥܘܿܪܲܝܗܝ ݂ ܘܗܿܘ ܡܸܢܕܝܼ ܠܵܐ ܣܦܝܼܪܵܐ ܘܠܵܐ ܐܵܬܹܐ ܗ݇ܘܵܐ ܠܒܵܠܵܐ: ܝܼܗ݇ܘܵܐ ܐܲܢܹܐ ܓܠܝܼ̈ܦܵܬ݂ܐ ܕܦܝܼܫܬܐ ܝܗ݇ܘܵܐ ܚܫܝܼܒ݂ܬܐ ܕܲܬܠܝܼܚܹ̈ܐ ܝܢܵܐ ܘܲܚܪ̈ܝܼܒ݂ܹܐ ܒܥܸܠܬܵܐ ܕܲܦܩܵܥܬܐ: ܠܵܐ ܝܗ݇ܘܵܘ ܓܠܝܼܦܹ̈ܐ ܒܚܲܕ ܦܸܨܠܵܐ ܫܲܦܝܼܪܵܐ ܐܲܝܟ݂ ܓܠܝܼ̈ܦܵܬ݂ܐ ܕܝܼܗ݇ܘܵܘ ܓܲܘ ܕܲܝܪܵܐ ݂ ܘܡܼܢ ܒܵܬܲܪ ܕܲܬܠܵܚܬܐ ܕܚܲܕܟܡܵܐ ܡ̈ܢܵܘܵܬ݂ܐ ܥܲܣܩܹ̈ܐ ܘܩܸܢܛܵܝܹ̈ܐ: ܘܲܦܪܝܼܫܵܐܝܼܬ ܡܲܥܒ̇ܪܹ̈ܐ: ܟܹܐܦܹ̈ܐ ܕܒܸܢܝܵܢܵܐ ܩܲܕܡܵܝܵܐ ܦܝܼܫܠܗ݇ܘܿܢ ܡܘܼܬܒ݂ܹܐ ܘܲܣܕܝܼܪܹ̈ܐ ܒܦܲܠܓܘܼܬ݂ ܟܵܢܘܿܢ ܬܪܲܝܵܢܵܐ 2018 ݂ ܘܓܵܘܵܢܵܐܝܼܬ ܬܘܼܪܵܨܵܐ ܕܒܸܢܝܵܢܵܐ ܐܲܡܝܼܢܵܝܵܐ ܝܠܹܗ: ܥܲܡ ܚܕܵܐ ܡܢܵܬܐ ܬܟܝܼܠܬܐ ܥܲܠ ܒܨܵܝܵܐ ܡܐܲܫܛܪܵܐ: ܘܡܵܐܢܹ̈ܐ ܡܘܼܦܠܸܚܹ̈ܐ ܗܲܪ ܐܵܢܝܼ ܝܢܵܐ ܕܦܝܼܫܹܐ ܝܗ݇ܘܵܘ ܡܘܼܦܠܸܚܹ̈ܐ ܓܲܘ ܒܸܢܝܵܢܵܐ ܥܲܬܝܼܩܵܐ: ܠܸܒ݂ܢܹ̈ܐ ܕܛܝܼܢܵܐ ܡܦܲܚܪܹ̈ܐ ܒܫܸܡܫܵܐ: ܫܩܝܼܠܹܐ ܝܗ݇ܘܵܘ ܡܼܢ ܒܵܬܹ̈ܐ ܬܠܝܼܚܹ̈ܐ ܕܓܲܘ ܒܲܟ݂ܕܹܝܕܹܐ: ܘܨܘܼܪܬܐ ܕܩܘܼܒ̇ܬܐ ܕܦܝܼܫܠܵܗ̇ ܪܫܝܼܡܬܐ ܚܲܕܬܵܐܝܼܬ: ܠܵܐ ܝܠܵܗ̇ ܐܲܟ݂ܘܵܬ݂ ܩܘܼܒܬܐ ܕܕܲܥܒ݂ܲܪ ܕܫܲܢ݇ܬܐ ܕ 2014 ݂

ܘܒܲܫܪܵܪܵܐ: ܐܵܗܵܐ ܐܸܣܟܹܝܡܵܐ ܐܬܹܐ ܠܹܗ ܡܼܢ ܪܘܼܟܵܒ݂ܵܐ ܕܩܘܼܒܹ̈ܐ (ܩܘܼܒܵܬ݂ܵܐ): ܘܗܵܝ ܐ݇ܚܵܪܵܝܬܐ ܕܲܡܟܘܼܣܹܝܬܐ ܝܠܵܗ̇ ܒܟܹܐܦܹ̈ܐ: ܕܵܥܹܪ ܣܝܼܩܘܿܡܵܗ̇ ܠܫܲܢ݇ܬܐ ܕ1980: ܘܐܵܗܵܐ ܡܘܼܥܒ݂ܸܕ ܠܹܗ ܕܗܵܘܹܐ ܫܘܼܚܠܵܦܵܐ ܒܐܸܣܟܹܝܡܵܐ ܩܲܕܡܵܝܵܐ ܡܼܢ ܚܲܕ ܓܹܒܵܐ: ܘܡܼܢ ܗܿܘ ܓܹܒܵܐ ܐ݇ܚܪܹܢܵܐ ܡܘܼܛܥܸܢܹܗ ܛܲܥܢܵܐ ܝܲܩܘܼܪܵܐ ܠܟܠܹܗ ܒܸܢܝܵܢܵܐ ݂ ܡܵܕܹܝܢ ܪܸܥܝܵܢܵܐ ܡܓܘܼܒܝܵܐ ܕܬܘܼܪܵܨܵܐ: ܗܘܹܐ ܠܹܗ ܡܲܕܥܲܪܬܵܐ ܠܗܵܘ ܐܸܣܟܹܝܡܵܐ (ܫܸܟܠܵܐ) ܕܐܝܼܬ ܗ݇ܘܵܐ ܒܫܲܢ݇ܬܐ ܕ 1920: ܘܒܲܚܕܵܐ ܩܘܼܒܬܐ ܒܲܪܵܝܬܐ: ܘܲܚܕܵܐ ܐ݇ܚܹܪܬܐ ܒܸܫ ܙܥܘܿܪܬܐ ܡܸܢܵܗ̇ ܡܼܢ ܓܵܘܵܐ ݂ ܐܵܗܵܐ ܥܸܠܬܵܐ (ܨܒ݂ܘܼܬܐ) ܦܝܼܫܠܵܗ̇ ܫܪܝܼܬܐ ܒܡܲܦܠܲܚܬܐ ܕܚܲܕ ܐܸܣܟܹܝܡܵܐ ܒܬܲܪܬܹܝܢ ܩ̈ܘܼܒܵܬ݂ܐ ܒܲܚܕܵܕܹ̈ܐ ݂ ܒܸܢܝܵܢܵܐ ܕܡܲܥܠܵܢܵܐ ܒܸܕ ܦܵܐܹܫ ܒܸܢܝܵܐ ܡܼܢ ܐܸܣܹ̈ܐ: ܕܦܝܼܫܠܗ݇ܘܿܢ ܚܸܙܝܹܐ ܘܓܸܠܝܹ̈ܐ ܡܼܢ ܒܵܬܲܪ ܢܲܩܕܘܼܬܐ (ܬܲܡܲܙܬܐ) ܕܕܘܼܟܵܐ ݂ ܘܐܝܼܬ ܗ݇ܘܵܐ ܝܲܨܝܼܦܘܼܬܐ ܪܲܒܬܐ ܐܵܦ ܠܲܢܛܵܪܵܐ ܘܠܲܡܬܲܪܘܿܨܹܐ ܐܸܣܛܘܼܟ݂ܣܹ̈ܐ ܡܓܲܠܦܹ̈ܐ (ܡܢܘܼܩܫܹ̈ܐ) ܕܦܝܼܫܠܗ݇ܘܿܢ ܡܘܼܬܒ݂ܹܐ ܒܕܘܼܟܵܢܹ̈ܐ ܡܫܲܚܠܦܹ̈ܐ ܕܓܲܘ ܥܹܕܬܐ: ܘܐܵܗܵܐ ܣܘܼܥܪܵܢܵܐ (ܥܲܡܠܵܐ: ܫܘܼܓ݂݇ܠܵܐ) ܒܸܢܝܵܢܵܝܵܐ ܦܝܼܫܠܹܗ ܡܬܘܼܡܸܡܵܐ ܒܝܲܕ ܚܲܕ ܝܲܗܠܵܐ ܦܪܲܢܣܵܝܵܐ ܡܸܬ݂ܕܝܼܠܵܢܵܐ ܒܚܘܼܕܵܬ݂ ܒܸܢܝܵܢܹ̈ܐ ݂