ܦܝܼܫܠܵܗ̇ ܡܘܼܫܚܸܕܬܐ ܡܕܝܼܢ݇ܬܐ ܕܒܲܟ݂ܕܹܝܕܹܐ ܒܲܡܫܝܼܚܵܝܘܼܬܐ ܐܲܝܟ݂ ܕܲܒܣܘܿܓ݂ܐܵܐ: ܒܕܵܪܵܐ ܫܒ݂ܝܼܥܵܝܵܐ ـ ܘܚܲܕܟܡܵܐ ܟܹܐ ܐܵܡܪܝܼ ܒܚܘܼܬܵܡ ܕܵܪܵܐ ܪܒ݂ܝܼܥܵܝܵܐ ـ ܘܦܝܼܫܠܵܗ̇ ܩܸܢܛܪܘܿܢ ܪܹܫܵܝܵܐ ܠܥܹܕܬܐ ܐ݇ܣܘܼܪܝܵܝܬܐ ܐܲܪܬ݂ܘܿܕܘܿܟܣܵܝܬܐ ܡܼܢ ܩܕܵܡ ܫܘܼܢܵܝܵܐ ܠܩܵܬ݂ܘܿܠܝܼܩܵܝܘܼܬ݂ܐ ܒܕܵܪܵܐ ܕ (18) ݂ ܗܵܢܵܐ ܗܘܼܡܵܣܵܐ ܐܲܪܬ݂ܘܿܕܘܿܟܣܵܝܵܐ ܥܲܬܝܼܩܵܐ: ܡܸܬܓܲܫܡܵܢܵܐ ܝܠܹܗ ܒܝܲܘܡܵܢܵܐ ܒܥܹܕܬܐ ܕܡܵܪܝ ܓܝܼܘܲܪܓܝܼܣ ܓܲܘ ܒܲܟ݂ܕܹܝܕܹܐ (ܩܲܪܲܩܘܿܫ) ݂

ܦܝܼܫܠܵܗ̇ ܡܫܘܼܬܐܸܣܬܐ ܥܹܕܬܐ ܥܲܬܝܼܩܬܐ ܕܡܵܪܝ ܓܝܼܘܲܪܓܝܼܣ ܐܲܝܟ݂ ܕܐܡܸܪܲܢ ܒܕܵܪܵܐ ܫܒ݂ܝܼܥܵܝܵܐ: ܘܡܲܒܘܼܥܵܐ ܝܼܚܝܼܕܵܝܵܐ ܕܡܲܕܟ݂ܘܿܪܹܐ ܝܠܹܗ ܠܗܵܕܹܐ ܡܲܘܕܥܵܢܘܼܬܐ: ܝܼܠܹܗ ܡܝܼܛܪܵܦܘܿܠܹܝܛܵܐ (ܡܲܛܪܵܐܢ) ܦܲܘܠܘܿܣ ܒܸܗܢܵܐܡ ܓܲܘ ܕܪܵܫܹܗ ܕܫܲܢ݇ܬܐ ܕ 1949 ܥܲܠ ܥܹ̈ܕܵܬ݂ܵܐ ܝܲܥܩܘܿܒܵܝܵܬ݂ܐ (ܐ݇ܣܘܼܝܵܝܬܐ ܐܲܪܬ݂ܘܿܕܘܿܟܣܵܝܬܐ) ܓܲܘ ܒܲܟ݂ܕܹܝܕܹܐ (ܩܲܪܲܩܘܿܫ) ݂ ܘܒܚܲܪܬܵܐ ܕܟ݂ܝܼܪܵܐ ܠܹܗ ܒܲܚܒ݂ܝܼܫܵܬ݂ܐ ܕܚܲܕ ܟܬܵܒ݂ܵܐ ܦܪܝܼܫܵܐ ܒܲܨܠܵܘܵܬ݂ܐ ܕܫܲܢ݇ܬܐ ܕ 1270 ݂ ܒܕܵܪܵܐ ܕ (18): ܥܒ݂ܸܪܵܗ̇ ܩܵܬ݂ܘܿܠܝܼܩܵܝܘܼܬ݂ܐ ܚܲܝܠܵܢܵܐܝܼܬ ܓܲܘ ܫܸܛܚܵܐ ܕܢܝܼܢܘܹܐ: ܘܲܦܪܝܼܫܵܐܝܼܬ ܓܲܘ ܒܲܟ݂ܕܹܝܕܹܐ ݂ ܘܲܩܢܹܐ ܠܗ݇ܘܿܢ ܐ݇ܣܘܼܪ̈ܵܝܹܐ ܕܲܡܫܘܼܢܹܐ ܠܗ݇ܘܿܢ ܠܩܵܬ݂ܘܿܠܝܼܩܵܝܘܼܬ݂ܐ ܠܲܦܣܵܣܵܐ ܕܲܒܢܵܝܬܐ ܕܚܲܕ ܡܲܕܒܚܵܐ ܓܲܘ ܥܹܕܬܐ ܕܡܵܪܝ ܓܝܼܘܲܪܓܝܼܣ ݂ ܘܥܹܕܬܐ ܥܗܝܼܕܬܐ ܦܝܼܫܠܵܗ̇ ܡܚܘܼܕܸܬ݂ܬܐ ܒܫܲܢ݇ܬܐ ܕ 1866: ܘܲܠܗܵܫܵܐ ܡܲܒܝܘܿܢܹܐ ܝܠܲܝܗܝ ܒܘܼܥ̈ܕܵܗ̇ ܓܲܠܝܵܐܝܼܬ ܒܕܵܪܵܐ ܕܥܸܣܪܝܼܢ: ܘܡܵܐ ܕܐܝܼܬ ܐܸܕܝܘܿܡ ܡܼܢ ܒܸܢܝܵܢܵܐ ܠܲܝܬ̇ ܠܹܗ ܐ݇ܚܝܵܢܘܼܬ݂ܐ ܒܗܵܘ ܡܸܢܕܝܼ ܕܐܝܼܬ݂ ܗ݇ܘܵܐ ܒܫܲܒ݂ܥܝܼܢܵܬ݂ܐ ݂ ܡܼܢ ܙܲܒ݂ܢܵܐ ܕܲܒܢܵܝܬܐ ܕܥܹܕܬܐ ܚܕܲܬܐ: ܦܝܼܫܠܵܗ̇ ܚܫܝܼܒ݂ܬܐ ܗܵܝ ܥܲܬܝܼܩܬܐ ܐܲܝܟ݂ ܚܲܕ ܒܸܢܝܵܢܵܐ ܪܵܒܵܐ ܦܫܝܼܛܵܐ ܡܬܘܼܪܨܵܐ ܡܼܢ ܥܲܦܪܵܐ ܘܡܼܢ ܓܹܨܵܐ ܘܲܫܡܸܢܬܐ ܦܲܪܙܠܵܝܬܐ ݂ ܥܹܕܬܐ ܕܡܵܪܝ ܓܝܼܘܲܪܓܝܼܣ ܕܒܲܟ݂ܕܹܝܕܹܐ: ܝܼܠܵܗ̇ ܚܕܵܐ ܥܹܕܬܐ ܢܘܼܟ݂ܪܵܝܬܐ ܕܚܵܒ݂ܫܵܐ ܬܠܵܬܐ ܩܲܒܼܪ̈ܵܘܵܬܐ ܙܥܘܿܪܹ̈ܐ ܚܲܕ ܒܵܬܲܪ ܗܿܘ ܐ݇ܚܹܪ݇ܢܵܐ: ܘܡܵܐ ܕܲܦܝܵܫܵܐ ܝܠܹܗ ܡܸܢܵܗ̇ ܠܝܲܘܡܵܢܵܐ: ܒܸܪܡܵܙܵܐ ܝܠܹܗ ܠܫܘܼܒ݂ܚܵܐ ܕܝܵܪܬܘܼܬܵܗ̇ ݂

ܠܗܵܫܵܐ (ܠܗܵܠܵܐ) ܚܵܒ݂ܫܵܐ ܥܹܕܬܐ ܕܡܵܪܝ ܓܝܼܘܲܪܓܝܼܣ ܠܲܬܪܹܝܢ ܟܬܝܼ̈ܒܵܬܐ ܕܘܼܟ݂ܪ̈ܵܢܵܝܹܐ: ܐܵܡܹܪ ܓ̰ܵܐܢ ܡܘܿܪܝܼܣ ܦܝܼܝܹܗ ܐܝܼܡܲܢ ܕܲܥܒ݂ܸܕ ܠܹܗ ܣܵܥܘܿܪܘܼܬ݂ܐ ܐܸܠܵܗ̇ ܒܕܵܪܵܐ ܥܒ݂ܝܼܪܵܐ: ܚܕܵܐ ܡܼܢ ܟܬ݂ܝܼܒ݂ܵܬܐ ܐܵܡܪܵܐ ܠܲܢ ܒܘܼܕ ܡܲܪܥܵܐ ܕܫܲܪܥܘܼܛܵܐ ܕܲܫܪܹܐ ܠܹܗ ܓܲܘ ܒܲܟ݂ܕܹܝܕܹܐ ܒܫܲܢ݇ܬܐ ܕ 1773 ܠܡܵܪܲܢ: ܗܿܘ ܕܲܩܛܸܠ ܠܹܗ ܠܟܠܲܝܗܝ ܐ݇ܢܵܫܹ̈ܐ ܕܒܲܟ݂ܕܹܝܕܹܐ ܝܲܬ̇ܝܼܪ ܚܲܣܝܼܪ: 4000 ܩܛܝܼܠܹ̈ܐ: ܡܸܢܲܝܗܝ 52 ܟܵܗܢܹ̈ܐ ܘܲܡܫܲܡܫܵܢܹ̈ܐ ݂ ܘܗܵܝ ܬܪܲܝܵܢܝܼܬܐ ܐܵܡܪܵܐ ܠܲܢ ܒܘܼܕ ܚܦܵܪܬܐ ܕܒܹܝܪܵܐ ܕܒܲܟ݂ܕܹܝܕܹܐ ܒܫܲܢ݇ܬܐ ܕ 1739 ݂

ܐܲܝܟ݂ ܕܡܘܼܢܗܸܪܲܢ ܕܥܹܕܬܐ ܥܲܬܝܼܩܬܐ ܙܥܘܿܪܬܐ ܝܠܵܗ̇: ܘܥܹܕܬܐ ܚܕܲܬܐ ܟܲܒܝܼܪܬܐ ܝܠܵܗ̇: ܗܵܝ ܩܲܕܡܵܝܬܐ ܣܵܗܕܵܐ ܠܝܘܼܒܵܠܵܐ ܥܒ݂ܝܼܪܵܐ ܘܗܵܝ ܬܪܲܝܵܢܝܼܬܐ ܣܵܗܕܵܐ ܠܩܸܪܝܵܢܵܐ ܐܲܘ ܐܸܣܟܹܝܡܵܐ ܚܲܕܬܐ ݂ ܐܲܢܲܝ ܬܪܹܝܢ ܒܸܢܝܵܢܹ̈ܐ ܟܹܐ ܡܫܲܬܐܸܣܝܼ ܠܚܲܕ ܩܸܢܛܪܘܿܢ ܪܘܼܚܵܢܵܝܵܐ ܪܹܫܵܝܵܐ: ܘܟܹܐ ܢܵܩܦܝܼ ܠܗ݇ܘܿܢ ܒܸܢܝܵܢܹ̈ܐ ܐ݇ܚܹܪ̈݇ܢܹܐ ܠܲܥܒ݂ܵܕܵܐ ܕܬܸܫ̈ܡܫܵܬ݂ܐ ܥܹܕ̈ܬܵܢܵܝܵܬ݂ܐ ݂

ܓܲܘ ܓܲܢܬܐ ܕܥܹܕܬܐ ܐܲܝܟܵܐ ܕܚܵܒ݂ܫܵܐ ܗ݇ܘܵܐ ܒܚܲܕ ܙܲܒ݂ܢܵܐ ܒܹܝܬ ܩܒ݂ܘܼܪܵܐ: ܣܵܡܹܟ݂ (ܟܵܠܹܐ) ܓܵܘܵܗ̇ ܚܲܕ ܨܲܠܡܵܐ ܪܲܒܵܐ ܕܡܵܪܝ ܓܝܼܘܲܪܓܝܼܣ ܡܬܘܼܪܨܵܐ ܡܼܢ ܫܡܸܢܬܐ: ܟܲܕ ܗܿܘ ܒܸܩܛܵܠܵܐ ܠܚܸܘܝܵܐ: ܐܲܒܟ݂ ܪܸܡܙܵܐ ܠܡܲܕܢܚܵܐ ܡܫܝܼܚܵܝܵܐ: ܗܵܢ ܨܲܠܡܵܐ ܦܝܼܫܠܹܗ ܡܘܼܚܪܸܒ݂ܵܐ ܒܐܝܼܕܵܬ݂ܐ ܚܲܢܦܹ̈ܐ ܒܥܝܼܪ̈ܵܝܹܐ ܕܵܥܫܝܹܵܐ ܩܵܛܘܿܠܹ̈ܐ ݂

ܕܠܵܐ ܦܘܼܫܵܟ݂ܵܐ ܛܥܸܢܹܗ ܡܵܪܝ ܓܝܼܘܲܪܓܝܼܣ ܒܟܠܹܗ ܡܸܬܚܵܐ ܕܚܲܝܹ̈ܗ: ܝܘܼܩܪܵܐ ܕܓܲܝܣܹ̈ܐ ܨܵܦܘܿܚܹ̈ܐ ܕܲܡܨܹܐ ܠܗ݇ܘܿܢ ܕܥܵܒ݂ܪܝܼ ܠܒܲܟ݂ܕܹܝܕܹܐ ݂ ܘܲܠܒܝܼܫܘܼܬ݂ ܓܲܕܵܐ: ܓܲܘ ܨܦܵܚܬܐ ܐ݇ܚܵܪܵܝܬܐ: ܘܫܒ݂ܘܿܩ ܡܼܢ ܚܪܵܒ݂ܵܐ ܘܣܘܼܝܵܒ݂ܵܐ (ܫܲܚܬܲܢܬܐ): ܦܝܼܫܠܹܗ ܡܫܘܼܚܠܦܵܐ ܒܸܢܝܵܢܵܐ ܬܲܘܕܝܼܬܵܢܵܝܵܐ ܠܕܘܼܟܬܐ ܕܲܡܬܲܪܲܨܬܐ ܕܲܡܦܲܩܥܵܬ݂ܐ (ܒܘܼܡܒܹ̈ܐ) ܘܲܠܡܵܐܢܹ̈ܐ ܡܦܲܩܥܵܢܹ̈ܐ ݂ ܘܐܵܦ ܚܙܹܐ ܠܵܗ̇ ܥܹܕܬܐ ܠܲܚܪ̈ܵܒ݂ܹܐ ܕܲܩܪܵܒ݂ܵܐ (ܦܠܵܫܵܐ) ܕܲܡܚܲܪܪܲܬܐ ܕܒܲܟ݂ܕܹܝܕܹܐ ܒܬܲܡܘܿܙ ܫܲܢ݇ܬܐ ܕ 2016 ݂ ܘܗܵܕܟ݂ܵܐ: ܩܪܵܒ݂ܵܐ ܡܚܘܼܒܸܠ ܠܹܗ (ܡܘܼܚܪܸܒ݂ ܠܹܗ) ܠܒܘܼܪܓܵܐ ܕܙܲܓܵܐ ܕܝܼܠܹܗ ܡܲܥܠܵܢܵܐ (ܬܲܪܥܵܐ ܪܲܒܵܐ) ܕܒܸܢܝܵܢܵܐ ݂ ܗܲܝܟܠܵܐ ܓܲܪܡܵܝܵܐ ܕܥܹܕܬܐ: ܕܲܦܝܵܫܵܐ ܝܠܹܗ ܚܸܙܝܵܐ ܡܼܢ ܪܘܼܚܩܵܐ: ܣܵܗܹܕ ܥܲܠ ܥܸܢܦܵܐ ܘܲܪܕܘܼܦܝܼܐ ܕܒܸܡܪܵܥܵܐ ܝܠܵܗ̇ ܡܸܢܲܝܗܝ ܝܵܪܬܘܼܬܐ ܡܫܝܼܚܵܝܬܐ ܕܲܡܕܝܢ݇ܬܐ ܕܒܲܟ݂ܕܹܝܕܹܐ ݂ ܐ݇ܣܘܼܪ̈ܵܝܹܐ ܐܲܪ̈ܬ݂ܘܿܕܘܿܟܣܵܝܹ̈ܐ ܝܼܗ݇ܘܵܘ ܒܨܝܼܪܘܼܬܐ ܓܲܘ ܒܲܟ݂ܕܹܝܕܹܐ: ܘܲܥܪܵܩܬܐ ܕ ܫܲܢ݇ܬܐ ܕ 2014 ܡܘܼܥܒ݂ܸܕܠܵܗ̇ ܕܒܸܫ ܒܵܨܹܪ ܡܸܢܝܵܢܲܝܗܝ ܘܐܝܼܬܘܼܬܲܝܗܝ: ܐܝܼܢܵܐ ܥܲܡ ܗܵܕܹܐ ܟܠܵܗ̇: ܩܝܼܡܠܗ݇ܘܿܢ ܡܗܘܼܡܢܹ̈ܐ ܕܡܲܪܥܝܼܬܐ ܒܢܲܩܕܘܼܬܐ (ܬܲܡܲܣܬܐ): ܘܲܫܩܵܠܬܐ ܕܚܸܠܵܐ (ܬܘܿܙ) ܡܼܢ ܥܲܠ ܥܹܕܬܐ ܕܲܟܢܝܼܫܵܐ ܝܗ݇ܘܵܐ (ܓ̰ܡܝܼܥܵܐ) ܥܲܠܵܗ̇ ܠܡܸܬܚܵܐ ܕܲܬܠܵܬܵܐ ܫܸܢܹ̈ܐ ݂ ܘܡܼܢ ܛܵܒ݂ܘܼܬ݂ ܓܲܕܵܐ: ܦܝܼܫܠܹܗ ܢܛܝܼܪܵܐ ܓܵܘܵܝܵܐ ܕܥܹܕܬܐ: ܗܿܘ ܡܸܢܕܝܼ ܕܲܫܒ݂ܸܩ ܠܹܗ ܕܕܵܥܪܝܼ ܡܗܘܼܡܢܹ̈ܐ ܕܡܲܪܥܝܼܬܐ ܠܲܡܕܝܼܢ݇ܬܲܝܗܝ ܬܲܫܥܝܼܬܵܢܵܝܬܐ ܘܲܠܥܹܕܬܲܝܗܝ ܩܲܕܝܼܫܬܐ: ܠܲܩܝܵܡܵܐ ܒܲܨ̈ܠܵܘܵܬ݂ܐ ܚܕܵܐ ܓܵܗܵܐ ܐ݇ܚܹܪܬܐ ݂