ܠܦܘܼܬ݂ ܐܲܒ̇ܘܵܬܐ ܘܝܘܼܒܵܠܹ̈ܐ: ܥܒܸܪܵܗ̇ ܡܫܝܼܚܵܝܘܼܬ݂ܐ ܓܲܘ ܫܸܛܚܵܐ ܕܢܝܼܢܘܹܐ ܘܲܡܕܝܼܢ݇ܬܐ ܕܒܲܟ݂ܕܹܝܕܹܐ ܒܫܘܼܠܵܡ ܕܵܪܵܐ ܪܒ݂ܝܼܥܵܝܵܐ ܐܲܘ ܫܘܼܪܵܝ ܕܵܪܵܐ ܚܡܝܼܫܵܝܵܐ ݂ ܘܲܒܚܲܕ ܐܸܣܟܹܝܡܵܐ ܒܸܫ ܡܫܲܪܪܵܐ: ܡܲܚܙܝܼ ܚܲܕܟܡܵܐ ܡܲܒܘܼܥܹ̈ܐ ܕܡܲܫܚܕܲܬܐ ܐܲܘ ܣܒܲܪܬܐ ܡܫܝܼܚܵܝܬܐ ܓܲܘ ܗܵܕܹܐ ܦܢܝܼܬܐ ܡܫܘܼܪܹܐ ܠܵܗ̇ ܒܕܵܪܵܐ ܫܒ݂ܝܼܥܵܝܵܐ ݂ ܠܦܘܼܬ݂ ܝܲܠܝܼܦ ܓ̰ܝܘܿܓ݂ܪܵܦܝܵܐ ܦܝܼܬܵܐܠ ܟܝܼܢܝܹܗ: ܡܸܢܝܵܢܵܐ ܕܥܵܡܘܿܪܹ̈ܐ ܒܫܘܼܠܵܡ ܕܵܪܵܐ ܕ(19) ܝܼܗ݇ܘܵܐ 3000 ܢܸܫܡܹ̈ܐ: 2000 ܡܫܝܼܚܵܝܹ̈ܐ: ܘ 1000 ܐܝܼܙܝܼܕܵܝܹ̈ܐ[1] ݂ ܐܸܠܵܐ ܒܟܠܹܗ ܕܵܪܵܐ ܕܥܸܣܪܝܼܢ: ܡܸܬܡܲܨܝܵܢܬܐ ܝܠܵܗ̇ ܚܘܼܫܒܵܢܵܐ ܕ 2566 ܢܸܫܡܹ̈ܐ: ܡܸܢܲܝܗܝ 1517 ܐܝܼܙܝܼܕܵܝܹ̈ܐ: ܘ 258 ܡܲܫܠܡܵܢܹ̈ܐ: ܘ 791 ܡܫܝܼܚܵܝܹ̈ܐ ݂ ܡܼܢ ܡܫܝܼܚܵܝܹ̈ܐ: ܬܠܵܬܐ ܚܘܼܡܫܹ̈ܐ ܝܲܥܩܘܿܒܵܝܹ̈ܐ ܝܠܲܝܗܝ (ܐ݇ܣܘܼܪ̈ܵܝܹܐ ܐܲܪ̈ܬ݂ܘܿܕܘܿܟܣܵܝܹܐ): ܘܦܵܝܫܵܢܹ̈ܐ ܐ݇ܣܘܼܪ̈ܵܝܹܐ ܩܵܬ݂ܘܿܠܝܼܩܵܝܹ̈ܐ ܝܠܲܝܗܝ[2] ݂ ܒܫܘܼܪܵܝܵܐ ܕܕܵܪܵܐ ܕܥܸܣܪܝܼܢ ܘܚܲܕ: ܡܼܢ ܩܕܵܡ ܨܦܵܚܬܐ ܕ(ܕܵܥܹܫ): ܐܝܼܬ ܗ݇ܘܵܐ ܫܟܝܼܢܹ̈ܐ ܓܲܘ ܡܕܝܼܢ݇ܬܐ ܕܒܲܥܫܝܼܩܵܐ 10000 ܢܸܫܡܹ̈ܐ: ܐܲܝܟܵܐ ܕܐܝܼܙܝܼܕܵܝܹ̈ܐ ܡܵܛܝܼ ܗ݇ܘܵܘ ܠܲܬܪܹܝ ܬܠܝܼܬܵܝܹ̈ܐ ܕܐ݇ܢܵܫܹ̈ܐ[3] ݂ ܘܲܥܕܲܡܵܐ ܠܝܲܘܡܵܢܵܐ ܡܲܥܒ̇ܕܵܐ (ܒܹܝܬ݂ ܥܲܒܝܼܕܘܼܬ݂ܐ: معبد) ܕܩܲܒܵܐ (ܩܘܼܒ̇ܬܐ) ܐܝܼܙܝܼܕܵܝܵܐ: ܓܲܘ ܒܲܥܫܝܼܩܵܐ ܝܠܹܗ ݂ ܘܝܼܠܹܗ ܡܲܥܒ̇ܕܵܐ ܕܡܘܼܚܲܡܲܕ ܐܲܠܪܲܕܘܵܢܝܼ: ܕܟܠ ܫܲܢ݇ܬܐ ܩܵܛܪܝܼ ܓܵܘܹܗ ܚܲܕ ܥܲܕܥܹܐܕܵܐ ܪܲܒܵܐ ܒܲܥܪܘܼܒ݂ܬܐ ܩܲܕܡܵܝܬܐ ܡܼܢ ܝܲܪܚܵܐ ܕܢܝܼܣܵܢ ݂

ܓܲܘ ܬܲܫܥܝܼܬܐ ܡܫܝܼܚܵܝܬܐ ܕܲܡܕܝܼܢ݇ܬܐ: ܦܝܼܫܠܵܗ̇ ܡܫܘܼܬܐܲܣܬܐ (ܡܲܕܪܲܫܬܐ ܝܲܥܩܘܿܒܵܝܬܐ ܡܫܲܡܲܗܬܐ ܩܘܼܪܒܵܐ ܠܫܲܢ݇ܬܐ 630)[4] ݂ ܡܛܹܐ ܠܹܗ ܡܸܢܝܵܢܵܐ ܕܝܵܠܘܿܦܹ̈ܐ ܠـ 300 ܝܵܠܘܿܦܹ̈ܐ: ܘܗܵܕܹܐ ܡܲܚܘܘܿܝܹܐ (ܡܲܚܙܘܿܝܹܐ) ܝܠܵܗ̇ ܠܡܲܥܒ̇ܕܵܢܘܼܬܐ ܕܲܥܝܵܕܹ̈ܐ ܘܝܘܼܒܵܠܹ̈ܐ ܕܐ݇ܣܘܼܪ̈ܝܵܝܹܐ ܐܲܪ̈ܬ݂ܘܿܕܘܿܟܣܵܝܹܐ ܓܲܘ ܦܢܝܼܬܐ ܩܵܐ ܪܵܒܵܐ ܕܵܪܹ̈ܐ: ܡܼܢ ܩܕܵܡ ܥܒ݂ܵܪܬܐ ܘܲܦܪܵܣܬܐ ܕܩܵܬ݂ܘܿܠܝܼܩܵܝܘܼܬ݂ܐ ݂ ܓܲܘ ܒܲܥܫܝܼܩܵܐ ܐܝܼܬ ܟܢܘܼܫܝܵܐ ܐܝܼܙܝܼܕܵܝܵܐ ܟܲܒܝܼܪܵܐ: ܘܐܝܼܬ ܐܵܦ ܚܲܕ ܡܲܣܓ݂ܕܵܐ ܙܥܘܿܪܵܐ ܠܡܲܫܠܡܵܢܹ̈ܐ ݂

ܨܦܸܚܠܹܗ (ܕܵܥܹܫ) ܠܲܡܕܝܼܢ݇ܬܐ ܒܟܵܢܘܿܢ ܩܲܕܡܵܝܵܐ ܫܲܢ݇ܬܐ 2015 ݂ ܘܡܼܢ ܥܸܕܵܢܵܐ ܕܦܝܼܫܠܵܗ̇ ܟܒ݂ܝܼܫܬܐ ܡܕܝܼܢ݇ܬܐ: ܘܲܠܝܲܘܡܵܐ ܕܚܘܼܪܵܪܵܗ̇ ܒܬܸܫܪܝܼܢ ܬܪܲܝܵܢܵܐ ܫܲܢ݇ܬܐ 2016: ܩܝܼܡܠܗ݇ܘܿܢ ܩܪ̈ܵܒ݂ܬܵܢܹܐ ܐܸܣܠܵܡܵܝܹ̈ܐ ܒܲܓܢܵܒ݂ܬܐ ܘܡܲܚܪܲܒ݂ܬܐ ܕܥܹܕܵܬ݂̈ܐ ܪܹ̈ܫܵܝܵܬ݂ܐ ܕܐܝܼܬ ܗ݇ܘܵܐ ܒܲܡܕܝܼܢ݇ܬܐ: ܡܵܪܬܝ ܡܲܪܝܲܡ ܒܬܘܼܠܬܐ ܢܵܩܘܿܦܬܐ ܠܐ݇ܣܘܼܪ̈ܵܝܹܐ ܩܵܬ݂ܘܿܠܝܼܩܵܝܹ̈ܐ: ܘܡܵܪܬܝ ܫܡܘܿܢܝܼ ܢܵܩܘܿܦܬܐ ܠܐ݇ܣܘܼܪ̈ܵܝܹܐ ܐܲܪ̈ܬ݂ܘܿܕܘܿܟܣܵܝܹܐ ݂

ܘܡܼܢ ܥܸܕܵܢܵܐ ܕܚܘܼܪܵܪܵܐ ܕܲܡܕܝܼܢ݇ܬܐ ܕܒܲܥܫܝܼܩܵܐ: ܕܥܸܪܘܼܢ ܐ݇ܢܵܫܹ̈ܐ ܐܸܠܵܗ̇ ܕܪܝܼܓ݂ܵܐܝܼܬ ܘܲܡܫܘܼܬܸܦܠܗ݇ܘܿܢ ܒܢܘܼܚܵܡܵܐ ܘܡܲܚܝܲܝܬܐ ܕܐ݇ܣܘܼܪܝܵܝܘܼܬ݂ܐ ܘܐܝܼܙܝܼܕܵܝܘܼܬܐ: ܒܫܸܛܚܹ̈ܐ ܕܢܝܼܢܘܹܐ ܘܒܲܐܬ݂ܪܵܐ ܕܒܹܝܬ݂ ܢܲܗܪ̈ܝܼܢ ݂

_______

[1] ܓܲܘ ܬܘܼܪܟܝܵܐ ܐܵܣܝܵܝܬܐ: ܡܢܵܬ݂ܐ 2: ܐܲܪܢܲܣܬ ܠܝܼܪܘܿ: ܦܵܪܝܼܣ 1891 ݂

[2] ܚܙܝܼ܆ ܐܵܫܘܿܪ ܡܫܝܼܚܵܝܬܐ: ܓ̰ܵܐܢ ܦܝܼܝܹܗ: ܦ 461 ݂

[3] ܚܙܝܼ: ܩܲܪܲܩܘܿܫ ܐܲܝܟܵܐ ܕܲܚܦܹܐ ܠܗ݇ܘܿܢ ܡܫܝܼܚܵܝܹ̈ܐ ܡܼܢ ܫܸܛܚܵܐ ܕܢܝܼܢܘܹܐ: ܐܘܿܦܲܪ ܕܵܐܘܪܝܼܵܐܢ: ܟܪܝܼܣܬܝܵܐܢ ܠܘܿܫܘܿܢ: ܦ 137 ݂

[4] ܚܙܝܼ: ܐܵܫܘܿܪ ܡܫܝܼܚܵܝܬܐ: ܦ 462 ـ 463 ݂

ܠܡܲܪܝܲܡ ܒܬܘܼܠܬܐ (ܒܬܘܼܠܬܐ ܩܲܕܝܼܫܬܐ): ܡܼܢ ܩܕܵܡ ܒܢܵܝܬܐ ܕܲܚܕܵܐ ܥܹܕܬܐ ܚܕܲܬܐ ܒܝܵܬ ܫܸܡܵܐ ܒܫܸܢܹ̈ܐ 1924 ـ 1932: ܘܗܵܢܵܐ ܝܘܼܒܵܠܵܐ ܚܲܕ ܥܝܵܕܵܐ ܟܝܵܢܵܝܵܐ ܝܠܹܗ ܘܲܦܪܝܼܣܵܐ ܝܠܹܗ ܠܘܵܬ݂ ܐ݇ܣܘܼܪ̈ܵܝܹܐ ܓܲܘ ܥܝܼܪܵܐܩ: ܐܵܦܸܢ ܕܚܲܕܟܡܵܐ ܓܵܗܹ̈ܐ ܗܵܢ ܥܝܵܕܵܐ ܟܹܐ ܡܲܝܬܹܐ ܫܓ݂ܘܼܫܝܵܐ ܘܠܵܐ ܩܲܛܝܼܢܘܼܬܐ ݂

ܦܝܼܫܠܵܗ̇ ܒܢܝܼܬܐ ܥܹܕܬܐ ܥܲܬܝܼܩܬܐ ܕܡܵܪܬܝ ܡܲܪܝܲܡ ܒܬܘܼܠܬܐ ܒܕܵܪܵܐ ܕ(19): ܒܙܲܒ݂ܢܵܐ ܕܦܵܛܪܝܼܵܪܟܵܐ ܐܲܢܛܘܵܐܢ ܐܲܠܣܲܡܚܹܝܪܝܼ (1852 ـ 1864): ܘܣܵܗܹܕ ܥܲܠ ܗܵܢܵܐ ܡܲܡܠܠܵܐ: ܗܿܘ ܢܸܩܫܵܐ ܟܹܐܦܵܝܵܐ ܕܕܵܥܹܪ ܠܫܲܢ݇ܬܐ ܕ(1856)[1] ݂ ܘܲܒܚܘܼܬܵܡܵܐ ܦܝܼܫܠܵܗ̇ ܬܠܝܼܚܬܐ ܗܵܕܹܐ ܥܹܕܬܐ ܒܝܲܕ ܕܵܥܹܫ ܐܸܣܠܵܡܵܝܵܐ ݂ ܘܦܝܼܫܠܹܗ ܒܸܢܝܵܐ ܚܲܕ ܒܸܢܝܵܢܵܐ ܒܚܘܼܫܵܚܹ̈ܐ (استخدامات) ܡܫܲܚܠܦܹ̈ܐ ܒܝܵܬ ܕܘܼܟܵܐ: ܚܒ݂ܸܫܠܹܗ ܚܲܕ ܐܵܘܵܢܵܐ ܕܩܘܼܒܵܠܵܐ (ܡܩܲܒܠܵܢܘܼܬ݂ܐ) ܕܐܵܪ̈ܚܹܐ: ܘܐܵܘܵܢܹ̈ܐ ܐ݇ܚܪܹ̈ܢܹܐ ܩܵܐ ܟܦܵܫܝܵܬܐ ܘܲܨܠܘܿܬܐ ݂ ܘܡܼܢ ܡܸܢܕܝܼ ܦܵܝܫܵܢܵܐ ܡܼܢ ܒܸܢܝܵܢܵܐ ܥܲܬܝܼܩܵܐ: ܦܝܼܫܠܹܗ ܢܛܝܼܪܵܐ ܚܲܕ ܢܸܩܫܵܐ ܕܥܲܠ ܟܹܐܦܵܐ ܒܲܡܫܘܼܚܬܐ 81 ܒـ 54 ܣܡ: ܕܩܵܪܹܐ ܣܝܼܩܘܿܡܹܗ ܫܲܢ݇ܬܐ ܕ1856: ܘܚܵܒܹܫ (9) ܣܸܪ̈ܛܹܐ: ܘܦܝܼܫܠܹܗ ܡܘܼܬܒ݂ܵܐ ܓܲܘ ܒܸܢܝܵܢܵܐ ܕܥܹܕܬܐ ܚܕܲܬܐ ܕܡܵܪܬܝ ܡܲܪܝܲܡ ܒܬܘܼܠܬܐ: ܘܲܦܝܵܫܵܐ ܝܠܹܗ ܚܸܙܝܵܐ ܠܝܲܘܡܵܢܵܐ ݂ ܘܚܲܕ ܠܘܼܚܵܐ ܚܦܝܼܪܵܐ ܥܲܠ ܓܘܼܕܵܐ ܕܥܹܕܬܐ ܡܼܢ ܓܵܘܵܐ: ܣܵܗܹܕ ܥܲܠ ܥܹܕܬܐ ܚܕܲܬܐ ܕܡܵܪܬܝ ܡܲܪܝܲܡ ܒܬܘܼܠܬܐ ܕܦܝܼܫܠܵܗ̇ ܒܢܝܼܬܐ ܒܲܝܢܵܬ ܫܸܢܹ̈ܐ ܕ 1924 ܘ 1932 ݂ ܕܵܟ݂ܪܵܐ ܗܵܕܹܐ ܟܬܝܼܒ݂ܬܐ ܐ݇ܣܘܼܪܝܵܝܬܐ ܕܒܸܬܪܵܨܵܐ ܝܠܵܗ̇ ܡܼܢ (14) ܣܸܪ̈ܛܹܐ: ܒܢܵܝܬܐ ܕܥܹܕܬܐ ܘܲܣܝܵܡܬܵܗ̇ ܒܪܵܥܝܘܼܬ݂ܐ ܕܦܵܛܪܝܼܵܪܟܵܐ ܓܲܒ݂ܪܵܐܹܝܠ ܬܲܒܘܼܢܝܼ ݂ ܡܵܨܹܐ ܐ݇ܢܵܫܵܐ ܕܩܵܪܹܐ ܡܵܐ ܕܐܵܬܹܐ: ܦܝܼܫܠܵܗ̇ ܒܢܝܼܬܐ ܗܵܕܹܐ ܥܹܕܬܐ ܠܝܵܠܘܿܕܬܐ ܕܡܵܪܝܵܐ ܕܦܝܼܫܠܵܗ̇ ܒܛܝܼܢܬܐ ܕܠܵܐ ܡܘܼܡܵܐ ܒܫܲܢ݇ܬܐ ܕ 1924: ܒܛܵܒ݂ܬܐ ܕܐܲܒ݂ܵܐ ܡܩܲܕܫܵܐ ܦܝܼܝܘܿܣ ܚܲܕܥܣܝܼܪܵܝܵܐ: ܦܵܦܵܐ ܕܪܗܘܿܡܵܐ: ܘܦܝܼܫܠܵܗ̇ ܣܝܼܡܬܐ ܬܚܘܿܬ ܚܵܝܘܿܪܘܼܬ݂ܐ ܕܩܲܕܝܼܫܘܼܬܹܗ ܐܲܓ݂ܢܵܛܝܼܝܘܿܣ ܓܲܒ݂ܪܵܐܹܝܠ ܬܲܒܘܼܢܝܼ ܒܫܲܢ݇ܬܐ ܕ 1932 ܡܫܝܼܚܵܝܬܐ[2] ݂ ܠܲܡܛܵܝܵܐ ܠܥܹܕܬܐ ܕܡܵܪܬܝ ܡܲܪܝܲܡ: ܐܵܢܲܢܩܵܝܬܐ ܝܠܵܗ̇ ܦܣܵܥܬܐ ܠܚܲܕ ܟܸܢܦܵܐ (شرفة) ܒܙܝܼܥܵܐ ܡܼܢ ܓܹܒܵܐ ܡܲܥܪܒ݂ܵܝܵܐ ܕܓܘܼܕܵܐ ܣܵܢܕܵܢܵܐ ܕܝܼܠܹܗ ܓܲܘ ܟܘܼܢܵܫܵܐ ܕܒܸܢܝܵܢܵܐ ݂ ܘܲܒܚܘܼܬܵܡܵܐ ܕܕܵܪܬܐ ܪܨܝܼܦܬܐ: ܐܝܼܬ ܚܲܕ ܐܵܘܵܢܵܐ ܕܣܲܓܝܼܐܘܼܬ ܚܘܼܫܵܚܵܐ (ܡܲܦܠܲܚܬܐ): ܐܲܝܟܵܐ ܕܐܝܼܬ ܗ݇ܘܵܐ ܚܲܕܟܡܵܐ ܢܝܼܫܵܢܩܹ̈ܐ ܕܲܚܕܵܐ ܥܹܕܬܐ ܥܲܬܝܼܩܬܐ ܕܡܵܪܬܝ ܡܲܪܝܲܡ ܒܚܲܕ ܙܲܒ݂ܢܵܐ ݂

ܢܵܦܠܵܐ ܥܹܕܬܐ ܚܕܲܬܐ ܕܡܵܪܬܝ ܡܲܪܝܲܡ ܒܓܹܒܵܐ ܬܲܝܡܢܵܝܵܐ ܕܕܵܪܬܐ ܕܥܹܕܬܐ: ܐܝܼܬ ܠܵܗ̇ ܚܲܕ ܣܘܼܟܵܡܵܐ ܐܲܪܕܸܟ݂ܠܵܝܵܐ ܫܲܦܝܼܪܵܐ ܘܣܲܚܢܵܐ ܡܼܢ ܒܲܪܵܐ ܕܒܸܢܝܵܢܵܐ ݂ ܚܕܵܐ ܥܹܕܬܐ ܝܠܵܗ̇ ܒܢܝܼܬܐ ܥܲܠ ܣܘܼܟܵܡܵܐ ܘܡܲܚܵܪܘܼܬ݂ܐ ܒܵܙܝܼܠܝܼܟܵܝܬܐ[3]: ܕܐܝܼܬ ܠܵܗ̇ ܚܲܕ ܗܲܝܟܠܵܐ ܥܝܼܩܵܐ ܘܲܢܚܝܼܒ݂ܵܐ: ܥܵܠܹܐ ܠܵܗ̇ ܚܲܕ ܩܪܵܫܵܐ ܦܬܘܿܚܵܐ ܥܲܡ ܩܸܣܛܪܘܿܡܵܐ ، ܘܡܼܢ ܡܲܥܪܒ݂ܵܐ ܥܵܠܹܐ ܒܘܼܪܓܵܐ ܕܙܲܓܵܐ: ܘܩܘܼܕܡܵܐ ܕܚܵܒܹܫ ܚܲܕ ܡܼܢ ܬܲܪ̈ܥܵܢܹܐ ܕܲܥܒ݂ܵܪܬܐ ܠܥܹܕܬܐ ݂ ܘܐܝܼܬ ܐܵܦ ܚܲܕ ܡܲܥܠܵܢܵܐ ܓܲܪܒܝܵܝܵܐ: ܐܸܠܵܐ ܒܸܢܝܵܢܵܐ ܣܢܝܼܩܵܐ ܝܠܹܗ ܠܡܲܥܠܵܢܵܐ ܬܲܝܡܢܵܝܵܐ ܕܐܝܼܬ ܗ݇ܘܵܐ ܒܲܩܕܝܼܡ ݂ ܒܓܵܘܵܐ ܕܥܹܕܬܐ: ܐܝܼܬ ܚܲܕ ܟܘܼܢܵܫܵܐ ܡܼܢ ܥܲܡܘܼܕܹ̈ܐ (ܣܛܘܼܢܹ̈ܐ) ܫܝܼܫܵܝܹ̈ܐ ܕܣܵܡܟ݂ܵܐ ܥܲܠܠܲܝܗܝ ܗܿܝ ܩܘܼܒ̇ܬܐ (ܩܲܒܵܐ: قبة) ܕܐܝܼܬ ܒܪܹܫ ܗܲܝܟܠܵܐ ݂ ܒܓܹܒܵܐ ܡܲܕܢܚܵܝܵܐ ܕܗܲܝܟܠܵܐ: ܐܝܼܬ ܚܕܵܐ ܕܘܼܟܬܐ ܥܝܼܩܬܐ ܐ݇ܚܝܵܢܵܐܝܼܬ ܩܵܐ ܓܘܼܕܵܐ ܕܙܲܡܵܪܹ̈ܐ: ܘܢܵܦܹܠ ܩܕܵܡ ܡܸܢܵܗ̇ ܡܲܕܒܚܵܐ ܕܦܝܼܫܵܐ ܝܠܹܗ ܒܸܢܝܵܐ ܥܲܠ ܚܲܕ ܒܹܐܡܵܐ ܝܪܝܼܡܵܐ ܡܼܢ ܐܲܪܥܵܐ ܒܲܬܪܹܝܢ ܕܲܪ̈ܓ݂ܐ ݂ ܘܒܵܬܲܪ ܡܲܕܒܚܵܐ: ܐܝܼܬ ܚܲܕ ܓܘܼܕܵܐ ܦܲܠܓܘܼ ܚܘܼܕܪܵܢܵܝܵܐ ܒܙܝܼܥܵܐ ܐܲܘ ܢܩܝܼܒܵܐ ܒܫܲܒ݂ܟܹ̈ܐ: ܘܐܵܗܵܐ ܚܲܕ ܬܲܦܢܟ݂ܵܐ ܝܠܹܗ ܥܝܵܕܵܝܵܐ ܕܡܲܚܵܪܘܼܬܐ ܡܫܝܼܚܵܝܬܐ ܡܲܥܪܒ݂ܵܝܬܐ ݂ ܬܲܪܥܵܐ ܡܲܠܟܵܝܵܐ ܕܩܵܕܹܡ ܠܡܲܕܒܚܵܐ: ܪܵܒܵܐ ܩܦܝܼܣܵܐ ܝܠܹܗ ܘܲܦܫܝܼܛܵܐ: ܘܟܹܐ ܦܵܐܹܫ ܦܬܝܼܚܵܐ ܓܡܝܼܪܵܐܝܼܬ ܘܐܲܡܝܼܢܵܐܝܼܬ: ܘܡܵܛܝܵܐ ܪܵܡܘܼܬܹܗ ܩܘܼܪܒܵܐ ܠܩܘܼܒ̇ܬܐ ܕܲܠܥܸܠ: ܘܩܪܝܼܫܵܐ ܝܠܹܗ ܒܲܚܕܵܐ ܩܸܫܬܐ ܡܒܲܩܲܠܬܐ (قوس مدبب) .

_______

[1] ܚܙܝܼ: ܟܬܵܒ݂ܵܐ ܕܢܸܩܫܹ̈ܐ ܐ݇ܣܘܼܪ̈ܝܵܝܹܐ: ܐܲܡܝܼܪ ܚܲܪܵܐܩ: ܦ  374 ݂

[2] ܝܵܬ ܡܲܒܘܼܥܵܐ: ܦ 376 ݂

[3] في العمارة الرومانية القديمة، البازيليكا عبارة عن مبنى عام كبير به وظائف متعددة، يتم بناؤه عادةً بجانب منتدى المدينة. كانت الكنيسة في الغرب اللاتيني تعادل (ستوا) في الشرق اليوناني. أعطى المبنى اسمه للشكل المعماري للبازيليكا.

ܐܝܼܬ ܗ݇ܘܵܐ ܒܠܸܒܵܐ ܕܒܸܢܝܵܢܵܐ ܡܩܲܕܫܵܐ ܚܲܕ ܡܲܕܒܚܵܐ ܫܝܼܫܵܝܵܐ (رخامي) ܫܲܦܝܼܪܵܐ ܥܲܡ ܥܲܡܘܼܕܹ̈ܐ ܘܩܸܛܪܹ̈ܐ ܡܫܲܚܠܦܹ̈ܐ ܕܦܝܼܫܠܗ݇ܘܿܢ ܣܠܝܼܒܹ̈ܐ ܒܝܲܕ ܩܪ̈ܵܒ݂ܬܵܢܹܐ ܐܸܣܠܵܡܵܝܹ̈ܐ: ܐܵܢܝܼ ܕܲܫܡܸܛܠܗ݇ܘܿܢ ܘܡܘܼܚܪܸܒ݂ܠܗ݇ܘܿܢ ܐܵܦ ܣܦܵܩܹܐ ܕܐܝܼܬ ܗ݇ܘܵܐ ܓܲܘ ܥܹܕܬܐ ݂

ܘܒܵܬܪܵܐ ܕܡܲܕܒܚܵܐ: ܓܲܘ ܓܘܼܕܵܐ ܦܲܠܓܘܿ ܚܘܼܕܪܵܢܵܝܵܐ: ܩܝܼܡܠܗ݇ܘܿܢ ܒܲܡܛܲܦܠܵܢܘܼܬ݂ܐ (تدنيس) ܕܲܚܕܵܐ ܒܲܗܪܵܢܝܼܬܐ ܫܝܼܫܵܝܬܐ ܫܲܦܝܼܪܬܐ ܡܨܲܒܲܬܬܵܐ ܒܥܲܡܘܼܕܹ̈ܐ: ܐܲܝܟܵܐ ܕܦܝܼܫܠܗ݇ܘܿܢ ܦܬܝܼܚܹ̈ܐ ܬܲܪ̈ܥܵܢܵܗ̇ ܘܲܡܒܘܼܪܒܸܙ ܠܹܗ ܡܵܐ ܕܐܝܼܬ݂ ܗ݇ܘܵܐ ܓܵܘܵܗ̇ ݂

ܪܵܡܙܝܼ ܐܲܢܲܝ ܚܪ̈ܵܒܹܐ ܘܲܬܠܘܼܚܝܹ̈ܐ ܩܲܛܝܼܢܹ̈ܐ ܘܲܡܓܲܒܝܹ̈ܐ: ܕܲܡܛܲܦܠܵܢܹ̈ܐ ܝܵܕܥܝܼ ܗ݇ܘܵܘ ܠܪܸܡܙܵܝܘܼܬܐ ܡܫܝܼܚܵܝܬܐ ܕܡܲܕܒܚܵܐ: ܕܨܵܡܹܚ ܡܫܝܼܚܵܐ ܓܵܘܹܗ: ܘܐܵܦ ܒܲܗܪܸܢܵܐ ܐܝܼܬܘܼܬܐ ܐܲܠܵܗܵܝܬܐ ܘܦܲܓ݂ܪܵܢܵܝܬܐ ܫܲܪܝܼܪܬܐ ܕܲܡܫܝܼܚܵܐ ݂ ܐܸܠܵܐ ܡܸܢܕܝܼ ܕܲܒܪܹܐ ܠܹܗ ܦܝܼܫܠܹܗ ܚܸܠܵܐ (هباء) ݂ ܡܪܲܚܡܵܢܘܼܬ݂ܐ ܝܠܵܗ̇ ܐܸܣܵܐ ܕܲܡܫܝܼܚܵܝܘܼܬܐ: ܘܗܿܝ ܝܵܗܒ݂ܵܐ ܦܣܵܣܵܐ ܠܚܘܼܕܵܬ݂ܐ ܐܲܡܝܼܢܵܐ: ܘܝܵܗܒ݂ܵܐ ܠܲܢ ܚܲܝܠܵܐ ܪܘܼܚܵܢܵܝܵܐ ܠܲܥܡܘܼܪܝܵܐ ܕܒܸܢܵܝܵܢܵܐ: ܘܲܡܚܲܕܲܬ݂ܬܐ ܕܡܵܐ ܕܬܵܠܹܚܠܹܗ ܒܲܪܢܵܫܵܐ ݂