ܣܘܼܟܵܠܵܐ ܕܲܚܫܲܚܬܐ (ܩܲܪܲܩܘܿܫ) ܒܠܸܫܵܢܵܐ ܬܘܼܪܟܵܝܵܐ: ܝܼܠܹܗ ܛܲܝܪܵܐ ܐܘܼܟܵܡܵܐ (ܟܘܿܡܵܐ): ܥܕܲܟܹܝܠ ((لا يزال) ܗܵܢ ܪܸܬܡܵܐ ܡܘܼܦܠܚܵܐ ܝܠܹܗ ܒܲܪܘܝܼܚܘܼܬ݂ܐ: ܐܸܠܵܐ ܘܵܠܹܐ ܕܠܵܐ ܡܲܢܫܹܝܚ ܕܫܸܡܵܗ̇ ܡܵܪܹܐ ܫܸܪܫܵܐ ܐ݇ܣܘܼܪܵܝܵܐ ܝܠܹܗ (ܒܲܟ݂ܕܹܝܕܹܐ: ܒܲܓ݂ܕܹܝܕܹܐ): (ܕܐܸܬܝܵܐ ܝܠܹܗ ܐܲܝܟ݂ ܕܲܒܣܘܿܓ݂ܐܵܐ ܡܼܢ ܒܹܝܬ݂ ܟ݂ܘܿܕܵܝܵܐܕ (ܒܹܝܬ ܐܲܠܵܗܵܐ): ܗ : ܕ: ܕܘܼܟܵܐ ܐܲܘ ܒܲܝܬܐ ܕܩܲܡ ܝܵܗܹܒ݂ ܠܹܗ ܐܲܠܵܗܵܐ)[1]: ܐܲܝܟܵܐ ܕܚܵܙܹܝܚ ܡܲܦܠܲܚܬܐ ܕܗܵܢ ܫܸܡܵܐ ܒܲܙܢܵܐ ܐܘܼܣܝܼܵܝܵܐ ݂

_______

[1] ܓ̣ܵܐܢ ܡܵܐܪܝ ܡܹܝܪܝܼܓ݂ܘܿ: (ܡܲܕܢܚܵܐ ܡܫܝܼܚܵܝܵܐ ܓܲܘ ܐܸܡܒܪܵܛܘܿܪܘܿܬܐ ܐܸܣܠܵܡܵܝܬܐ): ܟܘܼܢܵܫܵܐ ܕܣܬܘܿܕܝܵܐ ܐܵܪܵܒܝܼܟܵܐ: ܛܲܒ݂ܥܵܐ ܕܦܵܪܝܼܣ: 2005 ݂

ܠܦܘܼܬ݂ ܝܘܼܒܵܠܹ̈ܐ: ܒܸܕܥܵܪܵܐ ܝܠܵܗ̇ ܡܫܝܼܚܵܝܘܼܬ݂ܐ ܓܲܘ ܫܸܛܚܵܐ ܕܢܝܼܢܘܹܐ: ܘܓܲܘ ܡܕܝܼܢ݇ܬܐ ܕܒܲܟ݂ܕܹܝܕܹܐ ܠܚܘܼܬܵܡ ܕܵܪܵܐ ܪܒ݂ܝܼܥܵܝܵܐ ܐܲܘ ܫܘܼܪܵܝ ܕܵܪܵܐ ܚܡܝܼܫܵܝܵܐ ݂ ܘܫܲܪܝܼܪܵܐܝܼܬ ܘܲܠܦܘܼܬ݂ ܡܲܒܘܼܥܹ̈ܐ ܡܬܲܟܠܹ̈ܐ: ܡܫܘܼܪܹܐ ܠܵܗ̇ ܣܒ݂ܲܪܬܐ ܘܡܲܫܚܲܕܬܐ ܒܲܡܫܝܼܚܵܐ ܒܕܵܪܵܐ ܫܒ݂ܝܼܥܵܝܵܐ (ܡܵܬܵܐ ܢܸܣܛܘܿܪܢܵܝܬܐ ܝܗ݇ܘܵܐ ܒܫܸܪܫܵܐ)[1]: ܘܩܘܼܪܒܵܐ ܠܫܲܢ݇ܬܐ ܕ 615 ܦܝܼܫܠܵܗ̇ ܡܘܿܢܘܿܦܝܼܙܵܝܬܐ[2] ݂ ܒܕܵܪܵܐ ܕ (11) ܘ (12): ܪܵܒܵܐ ܡܫܝܼܚܵܝܹ̈ܐ ܬܲܓܪ̈ܝܼܬܵܝܹܐ ܬܪܸܟܠܗ݇ܘܿܢ ܘܲܫܒ݂ܸܩܠܗ݇ܘܿܢ ܠܲܡܕܝܼܢ݇ܬܲܝܗܝ ܡܼܢ ܒܵܬܲܪ ܣܝܵܡܬܐ ܕܚܲܝܠܵܐ ܥܲܠܠܲܝܗܝ ܕܥܵܒ݂ܪܝܼ ܓܲܘ ܡܲܫܠܡܵܢܘܼܬ݂ܐ: ܘܲܫܟܸܢܘܼܢ ܓܲܘ ܒܲܟ݂ܕܹܝܕܹܐ ݂ ܘܲܒܫܲܢ݇ܬܐ ܕ 1743: ܥܒ݂ܸܕܠܗ݇ܘܿܢ ܚܲܝ̈ܠܵܘܵܬ݂ܐ ܕ(ܢܵܐܕܹܪ ܫܵܐܗ) ܚܨܵܪܵܐ ܠܲܦܢܝܼܬܐ ܕܒܲܟ݂ܕܹܝܕܹܐ: ܘܩܲܡ ܓܵܢܒ݂ܝܼܠܵܗ̇ ܘܡܘܼܚܪܸܒ݂ܠܗ݇ܘܿܢ ܠܥܹ̈ܕܵܬܵܗ̇ ݂ ܦܝܼܫܠܗ݇ܘܿܢ ܡܐܲܠܨܹ̈ܐ ܐ݇ܢܵܫܹ̈ܐ ܕܡܵܬ݂ܐ ܕܐܵܙܠ݇ܝܼ ܘܥܵܪܩܝܼ ܠܡܲܘܨܸܠ: ܐܲܝܟܵܐ ܕܲܡܫܘܼܬܸܦܠܗ݇ܘܿܢ ܓܲܘ ܣܘܼܬܵܪܵܐ (دفاع) ܥܲܠ ܡܕܝܼܢ݇ܬܐ[3] ݂ ܦܝܼܫܠܵܗ̇ ܒܲܟ݂ܕܹܝܕܹܐ ܩܵܬ݂ܘܿܠܝܼܩܵܝܬܐ ܒܚܘܼܬܵܡܵܐ ܕܕܵܪܵܐ ܕ(18): ܟܲܕ ܡܼܢ ܩܕܝܼܡ ܩܸܢܛܪܘܿܢ ܝܗ݇ܘܵܐ ܕܟܘܼܪܣܝܵܐ ܐܲܦܸܣܩܘܿܦܵܝܵܐ ܕܐ݇ܣܘܼܪ̈ܝܵܝܹܐ ܐܲܪ̈ܬ݂ܘܿܕܘܿܟܣܵܝܹܐ ݂

ܥܕܲܟܹܝܠ (لا تزال) ܥܕܲܡܵܐ ܠܝܲܘܡܵܢܵܐ: ܚܵܒ݂ܫܵܐ ܡܕܝܼܢ݇ܬܐ ܕܒܲܟ݂ܕܹܝܕܹܐ ܥܹ̈ܕܵܬ݂ܐ ܐ݇ܣܘܼܪ̈ܝܵܝܵܬ݂ܐ ܩܵܬ݂ܘܿܠܝܼ̈ܩܵܝܵܬܐ ܘܐܲܪ̈ܬ݂ܘܿܕܘܿܟܣܵܝܵܬܐ ܥܲܬܝܼ̈ܩܵܬ݂ܐ ݂ ܩܝܼܡܠܹܗ (ܕܵܥܹܫ) ܒܲܓܢܵܒ݂ܬܐ ܘܡܲܚܪܲܒ݂ܬܐ ܕܐܲܢܲܝ ܥܹ̈ܕܵܬ݂ܐ: ܠܵܐ ܒܲܠ ܩܝܼܡܠܹܗ ܒܡܲܩܲܕܬܲܝܗܝ ܒܥܸܕܵܢ ܟܒ݂ܵܫܬܹܗ ܠܲܡܕܝܼܢ݇ܬܐ ܒܡܸܬܚܵܐ ܕܥܸܣܪܝܼܢ ܘܐܲܪܒܥܵܐ ܝܲܪ̈ܚܹܐ: ܡܼܢ ܝܲܪܚܵܐ ܕܐܵܒ 2014 ܠܥܲܕ ܬܸܫܪܝܼܢ ܩܲܕܡܵܝܵܐ 2016 ݂ ܘܐܵܦܸܢ ܐܝܼܬ ܗ݇ܘܵܐ ܚܪܵܒ݂ܵܐ ܘܲܚܒ݂ܵܠܵܐ: ܐܸܠܵܐ ܥܕܲܟܹܝܠ ܥܕܲܡܵܐ ܠܝܲܘܡܵܢܵܐ: ܐܲܢܲܝ ܥܹܕܵܬ݂̈ܐ ܟܠܵܝܵܐ ܝܠܲܝܗܝ ܓܲܘ ܦܵܬ݂ܐ ܕܨܵܦܘܿܚܹ̈ܐ: ܘܐܲܡܝܼܢܵܐܝܼܬ ܡܲܩܪܘܿܒ݂ܹܐ ܝܠܲܝܗܝ ܣܵܗܕܘܼܬܲܝܗܝ ܡܫܝܼܚܵܝܬܐ ܥܲܠ ܕܲܥܒܲܪܲܝܗܝ ܒܲܥܝܼܕܵܐ ܥܒ݂ܝܼܪܵܐ ݂

ܕܪܝܼܓ݂ܵܐܝܼܬ ܘܡܼܢ ܝܘܿܡ ܚܘܼܪܵܪܵܗ̇: ܕܥܸܪܵܗ̇ ܠܒܲܟ݂ܕܹܝܕܹܐ ܪܘܼܚܵܗ̇ ܫܸܪܫܵܝܬܐ: ܘܥܲܡ ܕܥܵܪܬܐ ܕܥܵܡܘܿܪ̈ܵܗ̇ ܡܼܢ ܝܲܪܚܵܐ ܕܢܝܼܣܵܢ 2017: ܦܝܼܫܠܵܗ̇ ܡܕܝܼܢ݇ܬܐ ܕܒܲܟ݂ܕܹܝܕܹܐ ܚܲܕ ܩܸܢܛܪܘܿܢ ܘܣܲܪܢܵܐ ܪܹܫܵܝܵܐ ܠܚܘܼܕܵܬܐ ܐ݇ܣܘܼܪܵܝܵܐ ܘܲܡܫܝܼܚܵܝܵܐ ܓܲܘ ܫܸܛܚܵܐ ܕܢܝܼܢܘܹܐ ܘܓܲܘ ܐܘܼܚܕܵܢܵܐ ܕܒܹܝܬ ܢܲܗܪ̈ܝܼܢ ݂

_______

[1] ܥܹܕܬܐ ܕܡܲܕܢܚܵܐ: NDA

[2] ܐ݇ܣܘܼܪ̈ܵܝܹܐ ܐܲܪ̈ܬ݂ܘܿܕܘܿܟܣܵܝܹܐ:  NDA

[3] ܚܙܝܼ̣ ܓ̰ܵܐܢ ܡܵܐܪܝܼ ܡܹܝܪܝܼܓ݂ܘܿ: (ܡܲܕܢܚܵܐ ܡܫܝܼܚܵܝܵܐ ܓܲܘ ܐܸܡܒܪܵܛܘܿܪܘܼܬ݂ܐ ܐܸܣܠܵܡܵܝܬܐ): ܟܘܼܢܵܫܵܐ ܕܲܣܬܘܿܕܝܘܵܐ ܐܵܪܵܒܝܼܟܵܐ: ܛܲܒ݂ܥܵܐ ܕܦܵܪܝܼܣ 2005 ݂

ܠܲܝܬ̇ ܚܘܼܫܒܵܢܹ̈ܐ ܪ̈ܘܼܫܡܵܝܹܐ ܡܬܲܟܠܹ̈ܐ ܥܲܠ ܥܵܡܘܿܪܹ̈ܐ ܕܗܵܕܹܐ ܡܕܝܼܢ݇ܬܐ (ܘܓܲܘ ܗܵܢ ܐܲܬ݂ܪܵܐ): ܒܥܸܠܬܐ ܕܲܦܠܵܫܹ̈ܐ ܘܲܩܪ̈ܵܒܹܐ ܡܸܬ݂ܝܲܒܠܵܢܹ̈ܐ: ܘܬܲܘܬܵܒ݂ܘܼܬ݂ܐ ܐܲܡܝܼܢܬܐ ܕܐ݇ܢܵܫܹ̈ܐ: ܘܥܲܡ ܗܵܕܹܐ: ܡܸܬܡܲܨܝܵܢܝܼܬܐ ܝܠܵܗ̇ ܕܚܵܫܒܲܚ ܕܠܵܐ ܒܵܨܘܿܪܵܐ ܡܼܢ (40000 ـ 50000) ܢܸܫܡܹ̈ܐ ܚܵܝܝܼ ܗ݇ܘܵܘ ܓܲܘ ܒܲܟ݂ܕܹܝܕܹܐ ܡܼܢ ܩܕܵܡ ܨܦܵܚܬܐ ܕ(ܕܵܥܹܫ) ݂ ܚܲܕܟܡܵܐ ܚܘܼܫܒܵܢܹ̈ܐ ܘܪܸ̈ܥܝܵܢܹܐ: ܟܒܲܪ ܠܵܐ ܪܵܒܵܐ ܩܲܛܝܼܢܹ̈ܐ: ܐܵܡܪܝܼ ܕܥܵܡܘܿܪܹ̈ܐ ܕܒܲܟ݂ܕܹܝܕܹܐ ܡܛܹܐ ܠܗ݇ܘܿܢ ܠ (70000) ܢܸܫܡܹ̈ܐ ݂  ܘܙܵܕܹܩ ܠܲܢ ܕܡܲܘܣܸܦܲܚ (ܡܲܙܝܸܕܲܚ) ܐܲܠܦܵܝܹ̈ܐ ܕܦܲܪ̈ܨܘܿܦܹܐ ܥܪ̈ܝܼܩܹܐ ܘܡܘܼܪ̈ܚܸܩܹܐ (ܒܹܝܬ 5000 ـ 13000 ܦܲܪ̈ܨܘܿܦܹܐ): ܡܼܢ ܒܲܓ݂ܕܵܕ ܘܡܲܘܨܸܠ: ܕܐ݇ܬܹܐ ܠܲܝܗܝ ܠܒܲܟ݂ܕܹܝܕܹܐ ܡܼܢ ܫܲܢ݇ܬܐ ܕ 2003: ܟܲܕ ܥܪ̈ܝܼܩܹܐ ܡܼܢ ܓܘܼܢܚܹ̈ܐ ܕܣܝܼ̈ܥܵܬ݂ܐ ܐܸܣܠܵܡܵܝܹ̈ܐ ܘܡܝܼ̈ܠܝܼܫܝܵܬ݂ܐ: ܕܦܝܼܫܠܗ݇ܘܿܢ ܡܫܘܼܬܐܸܣܹ̈ܐ ܡܼܢ ܒܵܬܲܪ ܢܦܵܠܬܐ ܕܛܲܟ݂ܣܵܐ ܕܫܘܼܠܛܵܢܵܐ ܓܲܘ ܥܝܼܪܵܐܩ: ܐܲܝܟܵܐ ܕܪܵܒܵܐ ܟܸܟ̰ܚܵܐ ܦܝܼܫܠܹܗ ܦܪܝܼܥܵܐ ܠܲܒܢܵܝܵܐ ܡܲܫܪ̈ܝܵܬ݂ܐ ܘܒܵܬܲܝ̈ ܓܲܘܣܵܐ ܐܲܡܝܼܢܹ̈ܐ ݂

ܘܡܵܐ ܕܝܼܗ݇ܘܵܐ ܩܵܐܹܡ ܕܥܵܡܘܿܪܹ̈ܐ: ܬܸܫܥܝܼܢ ܓܲܘ ܡܵܐܐ (90 %) ܡܸܢ ܥܵܡܘܿܪܹ̈ܐ ܕܒܲܟ݂ܕܹܝܕܹܐ: ܝܼܗ݇ܘܵܘ ܐ݇ܣܘܼܪ̈ܵܝܹܐ ܩܵܬ݂ܘܿܠܝܼܩܵܝܹ̈ܐ: ܘܦܵܝܫܵܢܹ̈ܐ ܝܼܗ݇ܘܵܘ ܟܲܠܕܵܝܹ̈ܐ ܘܐ݇ܣܘܼܪ̈ܵܝܹܐ ܐܲܪ̈ܬ݂ܘܿܕܘܿܟܣܵܝܹܐ: ܘܚܲܕ ܟܘܼܢܵܫܵܐ ܪܵܒܵܐ ܙܥܘܿܪܵܐ ܡܼܢ ܐܵܪܸ̈ܡܢܵܝܹܐ ܐܲܪ̈ܬ݂ܘܿܕܘܿܟܣܵܝܹܐ ݂ ܐܸܠܵܐ ܗܿܝ ܡܕܝܼܢ݇ܬܐ ܕܦܝܼܫܬܐ ܝܗ݇ܘܵܐ ܚܫܝܼܒ݂ܬܐ ܕܝܼܠܵܗ̇ ܡܫܝܼܚܵܝܬܐ ܟܠܵܢܵܐܝܼܬ ܡܼܢ ܩܕܵܡ ܫܲܢ݇ܬܐ ܕ 1980: ܚܙܹܐ ܠܵܗ̇ ܡܛܵܝܬܐ ܕܥܸܣܪ̈ܵܝܹܐ ܕܝܼܩܪ̈ܵܬ݂ܐ ܡܲܫܠܡܵܢܹ̈ܐ: ܐܲܝܟ݂ ܚܲܕ ܩܵܐܹܡ ܡܼܢ ܦܘܿܠܝܼܛܝܼܩܝܼ ܕܬܲܥܪܲܒܬܐ (تعريب) ܕܫܸܛܚܵܐ ܕܢܝܼܢܘܹܐ ܕܲܥܒ݂ܝܼܕܵܐ ܠܹܗ ܨܲܕܵܐܡ ܚܘܼܣܲܝܢ ݂

ܫܲܪܒܵܐ ܐܲܘ ܬܘܼܢܵܝܵܐ ܕܩܲܕܝܼܫܬܐ ܡܵܪܬܝ ܫܡܘܿܢܝ ܘܫܲܒ݂ܥܵܐ ܒܢܘܿܢܵܗ̇: ܝܼܕܝܼܥܵܐ ܝܠܹܗ ܠܘܵܬ݂ ܡܫܝܼܚܵܝܹ̈ܐ ܕܥܹܕܬܐ ܕܡܲܕܢܚܵܐ ܒܐܲܬ݂ܪܵܐ ܕܒܹܝܬ ܢܲܗܪ̈ܝܼܢ ݂ ܐܬܹܐ ܠܹܗ ܬܘܼܢܵܝܵܐ ܕܣܵܗܕܘܼܬܐ ܕܗܵܕܹܐ ܝܼܩܲܪܬܐ ܝܗܘܼܕܵܝܬܐ ܒܦܵܣܘܿܩܵܐ ܕܫܲܒ݂ܥܵܐ ܡܼܢ ܣܸܦܪܵܐ ܬܪܲܝܵܢܵܐ ܕܡܲܩܒ݂ܵܝܹ̈ܐ: ܒܙܲܒ݂ܢܵܐ ܕܡܲܠܟܵܐ ܐܲܢܛܝܼܟ݂ܘܿܣ ܪܒ݂ܝܼܥܵܝܵܐ ܐܝܼܦܝܼܓ݂ܵܢܘܿܣ ݂ ܒܗܿܝ ܕܝܗܘܼܕܵܝܹ̈ܐ ܟܹܐ ܡܝܲܩܪܝܼ ܗ݇ܘܵܘ ܩܵܢܘܿܢܹ̈ܐ ܕܐܲܠܵܗܵܐ: ܘܲܡܗܘܼܝܡܸܢܘܼܢ ܒܲܩܝܵܡܬܐ ܘܚܲܝܹ̈ܐ ܥܵܠܡܝܼܢܵܝܹ̈ܐ ܡܼܢ ܩܕܵܡ ܡܫܝܼܚܵܝܘܼܬܐ ܒܲܬܪܹܝܢ ܕܵܪܹ̈ܐ ݂ ܦܝܼܫܠܗ݇ܘܿܢ ܕܒ݂ܝܼܩܹ̈ܐ ܫܲܒ݂ܥܵܐ ܐ݇ܚܘܿܢܵܘܵܬ݂ܐ ܥܲܡ ܝܸܡܲܝܗܝ: ܘܦܝܼܫܠܗ݇ܘܿܢ ܥܸܨܝܹ̈ܐ ܕܐܵܟ݂ܠܝܼ ܒܸܣܪܵܐ ܕܲܚܙܘܼܪܵܐ[1]: ܘܟܲܕ ܠܵܐ ܩܒܸܠܠܗ݇ܘܿܢ: ܦܝܼܫܠܗ݇ܘܿܢ ܣܵܗܕܹ̈ܐ ܚܲܕ ܒܵܬܲܪ ܗܿܘ ܐ݇ܚܹܪ݇ܢܵܐ: ܘܲܩܕܵܡ ܥܲܝܢܹ̈ܐ ܕܝܸܡܲܝܗܝ ݂ ܗܿܘ ܩܲܕܡܵܝܵܐ ܦܝܼܫܠܹܗ ܡܙܘܼܠܗܸܙܵܐ ܚܲܝܠܵܢܵܐܝܼܬ ܘܲܡܪܘܼܦܝܵܐ ܓܲܘ ܢܘܼܪܵܐ[2] ݂ ܘܲܒܪܹܫ ܟܠܹܗ ܐܵܗܵܐ ܐܘܼܠܨܵܢܵܐ: ܡܵܪܬܝ ܫܡܘܿܢܝܼ ܝܸܡܲܝܗܝ: ܟܹܐ ܝܵܗܒ݂ܵܐ ܗ݇ܘܵܐ ܠܗ݇ܘܿܢ ܠܒ݂ܝܼܒ݂ܘܼܬܐ ܠܲܦܝܵܫܵܐ ܫܲܪܝܼܪܹ̈ܐ ܘܡܸܬܩܲܘܝܵܢܹ̈ܐ ܒܢܵܡܘܿܣܐ ܕܡܵܪܝܵܐ: ܘܠܵܐ ܙܵܕܥܝܼ ܡܼܢ ܡܲܘܬܐ ݂ ܘܝܗܸܒ݂ ܠܵܗ̇ ܠܸܒܵܐ ܩܵܐ ܒܪܘܿܢܵܗ̇ ܙܥܘܿܪܵܐ ܕܠܵܐ ܙܵܕܹܥ ܡܼܢ ܣܵܝܘܿܛܹ̈ܐ (ܓ̰ܲܠܵܕܹ̈ܐ): ܟܲܕ ܒܐܝܼܡܵܪܵܐ ܐܸܠܹܗ: ܗܘܝܼ ܠܒ݂ܝܼܒ݂ܵܐ ܘܲܩܒܘܿܠ ܠܹܗ ܡܲܘܬܵܐ ܕܐܵܦ ܐܲܢ݇ܬ ܡܵܛܹܝܬ ܠܐܲܚܘܿܢܘܵܬܘܼܟ݂: ܕܐܵܬ݂ܝܵܢ ܘܚܵܙܝܵܢܘܼܟ݂ ܥܲܡ ܐܲܚܘܿܢܘܵܬܘܼܟ݂ ܓܲܘ ܫܡܲܝܵܐ[3] ݂

_______

[1] ܚܙܝܼ: ܟܬܵܒ݂ܵܐ ܩܲܕܝܼܫܵܐ ܠܦܘܼܬ݂ ܬܲܫܥܝܼܬܐ: ܓ̰ܵܐܢ ܒܘܿܬܵܐܢ: ܛܲܒ݂ܥܵܐ ܕܠܹܐ ܟܠܘܿܒ: ܚܙܝܼܪܵܢ 2000 : ܦ 616 ݂

[2] ܝܵܬ ܡܲܒܘܼܥܵܐ: ܦ 616 ݂

[3] ܝܵܬ ܡܲܒܘܼܥܵܐ: ܦ 617: ܦܵܣܘܿܩܵܐ ܡܼܢ ܡܲܩܒ݂ܵܝܹ̈ܐ: ܣܸܦܪܵܐ ܬܪܲܝܵܢܵܐ ݂

ܬܲܫܥܝܼܬܐ ܕܫܘܼܬܐܵܣܵܐ ܕܥܹܕܬܐ ܕܡܵܪܬܝ ܫܡܘܿܢܝܼ ܕܐ݇ܣܘܼܪ̈ܝܵܝܹܐ ܐܲܪ̈ܬ݂ܘܿܕܘܿܟܣܵܝܹܐ ܓܲܘ ܒܲܟ݂ܕܹܝܕܹܐ ܠܵܐ ܝܠܵܗ̇ ܦܝܼܫܬܐ ܝܼܕܝܼܥܬܐ ݂ ܡܲܒܝܘܿܢܹܐ ܐܘܼܪܚܵܐ ܕܢܸܩܫܹ̈ܐ ܕܥܲܠ ܬܲܪܥܵܐ ܡܲܠܟܵܝܵܐ ܕܡܲܕܒܚܵܐ ܪܵܡܹܙ ܠܕܵܪܵܐ ܬܪܲܥܣܝܼܪܵܝܵܐ[1] ݂ ܘܥܲܡ ܗܵܕܹܐ: ܡܸܬܗܲܘܝܵܢܬܐ ܝܠܵܗ̇ ܕܕܵܥܹܪ ܒܸܢܝܵܢܵܗ̇ ܠܕܵܪܵܐ ܕ (18)[2]: ܟܲܕ ܐܝܼܬ ܚܲܕܟܡܵܐ ܡܲܘܕܥܵܢ̈ܘܵܬ݂ܐ ܬܲܫܥܝܼܬܵܢܵܝܹ̈ܐ ܓܲܘ ܣܪ̈ܝܼܛܵܬ݂ܐ ݂ ܘܗܵܕܟ݂ܵܐ: ܦܝܼܫܠܵܗ̇ ܢܣܝܼܟ݂ܬܐ ܚܕܵܐ ܣܪܝܼܛܬܐ ܒܫܲܢ݇ܬܐ ܕ 1728: ܓܲܘ ܥܹܕܬܐ ܕܡܵܪܬܝ ܫܡܘܿܢܝܼ ܘܲܫܲܒ݂ܥܵܐ ܒܢܘܿܢܵܗ̇ ܘܠܵܥܵܙܲܪ ܡܵܪܲܝܗܝ[3] ݂ ܘܗܵܕܟ݂ܵܐ ܣܵܗܕܘܼܬ݂ܐ ܝܠܵܗ̇ ܠܥܹܕܬܐ ܕܡܵܪܬܝ ܫܡܘܿܢܝ ܬܲܫܥܝܼܬܵܢܵܐܝܼܬ: ܐܸܠܵܐ ܒܚܲܕ ܥܸܕܵܢܵܐ ܡܬܲܚܲܪܬܐ: ܕܵܥܪܵܐ ܠܬܘܼܠܬܐ ܩܲܕܡܵܝܵܐ ܡܼܢ ܕܵܪܵܐ ܕ (18) ݂

_______

[1] ܐܵܫܘܿܪ ܡܫܝܼܚܵܝܬܐ: ܓ̰ܵܐܢ ܡܘܿܪܝܼܣ ܦܝܼܝܹܗ: ܒܲܝܪܘܼܬ 1965: ܦ 449 ـ 452 ݂

[2] ܥܹܕܵܬ݂ܐ ܘܕܲܝܪܹ̈ܐ ܓܲܘ ܟܘܼܪܕܸܣܬܵܐܢ ܕܥܝܼܪܵܐܩ ܩܕܵܡ ܘܒܵܬܲܪ ܐܸܣܠܵܐܡ: ܢܵܪܝܼܡܵܐܢ ܡܘܼܚܲܡܲܕ ܐܲܡܝܼܢ: ܒܹܝܬ ܨܲܘܒܵܐ ܕܣܵܢܬ ܟܵܢܬܵܐܢܲ ܐܝܼܵܪ 2001: ܦ 190 ـ 195 ݂

[3] ܐܲܫܘܿܪ ܡܫܝܼܚܵܝܬܐ: ܓ̰ܵܐܢ ܡܘܿܪܝܼܣ ܦܝܼܝܹܗ: ܒܲܣܪܘܼܬ 1965: ܦ 451

ܦܝܼܫܬܐ ܝܠܵܗ̇ ܟܪܝܼܟ݂ܬܐ ܥܹܕܬܐ ܕܡܵܪܬܝ ܫܡܘܿܢܝܼ ܒܚܲܕ ܫܘܼܪܵܐ ܪܵܡܵܐ: ܡܵܛܝܵܐ ܪܵܡܘܼܬܹܗ ܠ (4) ܡܝܼܬܪܹ̈ܐ: ܡܛܵܝܬܐ ܠܥܹܕܬܐ ܗܵܘܝܵܐ ܒܐܘܼܪܚܵܐ ܕܚܲܕ ܬܲܪܥܵܐ ܦܲܪܙܠܵܝܵܐ ܡܼܢ ܓܲܪܒܝܵܐ: ܚܵܐܹܪ ܥܲܠ ܥܵܠܘܿܠܵܐ ܡܼܢ ܓܹܒ ܡܲܕܢܚܵܐ ݂

ܒܲܠܚܘܿܕ ܡܼܢ ܒܵܬܲܪ ܦܣܵܥܬܐ ܕܬܲܪܥܵܐ: ܐܝܼܬ ܚܕܵܐ ܣܸܡܲܠܬܐ ܪܲܒܬܐ: ܒܲܩܕܝܼܡ ܝܲܪܝܼܟ݂ܬܐ ܝܗ݇ܘܵܐ ܘܲܦܫܝܼܛܬܐ: ܐܝܼܢܵܐ ܝܲܘܡܵܢܵܐ ܡܣܘܼܩܲܠܬܐ ܝܠܵܗ̇ ܒܟܹܐܦܹ̈ܐ: ܘܟܹܐ ܡܗܲܕܝܵܐ ܠܪܹܫܵܐ ܕܬܲܠܵܐ ܕܲܒܢܝܼܬܐ ܝܠܵܗ̇ ܥܹܕܬܐ ܥܲܠܠܹܗ[1] ݂ ܒܲܡܢܵܬܵܐ ܥܸܠܵܝܬܐ ܕܗܵܕܹܐ ܣܸܡܲܠܬܐ: ܢܦܵܠܵܐ ܝܠܹܗ ܬܲܪܥܵܐ ܓܲܪܒܝܵܝܵܐ ܕܥܹܕܬܐ: ܐܸܠܵܐ ܬܲܪܥܵܐ ܓܹܒܵܢܵܝܵܐ ܨܲܘܒܹܗ ܠܡܲܕܢܚܵܐ ܝܠܹܗ ݂

ܓܘܼܕܵܢܹ̈ܐ ܕܥܹܕܬܐ ܕܡܵܪܬܝ ܫܡܘܿܢܝܼ ܡܟܘܼܣܝܹ̈ܐ ܝܠܲܝܗܝ ܒܟܹܐܦܹ̈ܐ ܚܘܵܪܹ̈ܐ: ܘܐܝܼܬ ܐܵܦ ܫܝܼܫܵܐ ܩܸܛܡܵܝܵܐ ܕܡܲܘܨܸܠ: ܦܵܬܵܐ ܓܲܪܒܝܵܝܬܐ ܕܥܹܕܬܐ ܡܲܚܙܵܐ ܚܲܕ ܢܸܩܫܵܐ ܦܠܝܼܛܵܐ (ܡܒܲܝܢܵܐ) ܒܲܕܡܘܼܬ݂ ܨܘܼܪܬܐ ܕܣܵܗܲܕܬܐ ܡܵܪܬܝ ܫܡܘܿܢܝ ܘܫܲܒ݂ܥܵܐ ܒܢܘܿܢܵܗ̇ ݂

ܒܲܠܚܘܿܕ ܒܲܥܒ݂ܵܪܬܐ ܠܥܹܕܬܐ: ܡܵܨܹܝܚ ܕܚܵܙܹܝܚ ܠܚܸܫܟܵܐ ܕܕܘܼܟܵܐ: ܒܫܘܼܪܵܝܵܐ ܕ 2018 ܡܵܨܹܝܚ ܗ݇ܘܵܐ ܕܚܵܙܹܝܚ ܗ݇ܘܵܐ ܩܸܛܡܵܐ ܕܝܘܼܩܕܵܢܵܐ ܕܦܝܼܫܠܹܗ ܥܒ݂ܝܼܕܵܐ ܒܝܲܕ (ܕܵܥܹܫ) ܒܓܹܒܵܐ ܝܲܡܝܼܢܵܝܵܐ: ܕܲܡܛܹܐ ܠܹܗ ܐܵܦ ܠܚܲܕܟܡܵܐ ܟܘܼܪ̈ܣܵܘܵܬܐ ܕܓܲܘ ܥܹܕܬܐ: ܕܝܼܗ݇ܘܵܐ ܡܓܘܼܘܲܢܬܐ ܒܓܲܘܢܵܐ ܟܘܿܡܵܐ ܒܥܸܠܲܬ ܩܸܛܡܵܐ ݂

ܥܹܕܬܐ ܦܝܼܫܬܐ ܝܗ݇ܘܵܐ ܒܢܝܼܬܐ ܥܲܠ ܐܸܣܟܹܝܡܵܐ ܒܵܙܝܼܠܝܼܟܵܝܵܐ: ܘܐܝܼܬ ܗ݇ܘܵܐ ܠܵܗ̇ ܬܠܵܬܵܐ ܗܲܝܟܠܹ̈ܐ: ܐܲܝܟ݂ ܥܹܕܬܐ ܕܩܲܕܝܼܫܹ̈ܐ ܣܲܪܓܝܼܣ ܘܒܵܟܘܿܣ ܓܲܘ ܒܲܟ݂ܕܹܝܕܹܐ: ܚܲܕ ܕܲܪܓ݂ܵܐ ܦܵܪܹܫ ܠܲܢ ܡܼܢ ܚܲܕ ܓܘܼܕܵܐ ܚܘܼܕܪܵܢܵܝܵܐ ܥܵܠܹܐ ܠܹܗ ܚܕܵܐ ܩܘܼܒܬܐ ݂

ܚܕܵܐ ܓܵܗܵܐ ܐ݇ܚܹܪܬܐ: ܦܵܐܹܫ ܚܫܝܼܒ݂ܵܐ ܗܵܢܵܐ ܒܸܢܝܵܢܵܐ ܡܼܢ ܐܸܣܟܹܝܡܹ̈ܐ ܬܲܦܢܟ݂ܵܝܹ̈ܐ ܠܥܹܕܵܬ݂ܐ ܡܲܥܪ̈ܒ݂ܵܝܵܬ݂ܐ ܕܐܵܬܘܿܪ̈ܵܝܹܐ ܘܐ݇ܣܘܼܪ̈ܝܵܝܹܐ ܐܲܪ̈ܬ݂ܘܿܕܘܿܟܣܵܝܹܐ ܘܩܵܬ݂ܘܿܠܝܼܩܵܝܹ̈ܐ ݂ ܦܝܼܫܠܹܗ ܡܨܲܘܒܵܐ ܩܕܘܿܫ ܩܘܼܕܫܹ̈ܐ ܠܡܲܕܢܚܵܐ ܘܗܿܘ ܒܸܬܪܵܨܵܐ ܝܠܹܗ ܡܼܢ ܬܠܵܬܐ ܡ̈ܢܵܘܵܬ݂ܐ: ܒܦܲܠܓܵܐ ܐܝܼܬ ܡܲܕܒܚܵܐ ܪܹܫܵܝܵܐ: ܘܥܲܠ ܓܹܒܵܢܹ̈ܗ ܩܲܒ݂ܪܵܐ ܡܼܢ ܓܹܒܵܐ ܕܓܲܪܒܝܵܐ: ܘܒܹܝܬ ܐܲܪ̈ܟܹܐ ܕܥܹܕܬܐ ܡܼܢ ܓܹܒܵܐ ܕܬܲܝܡܢܵܐ ݂

ܐܸܣܩܘܿܩܬܐ ܘܥܲܡܘܼܕܹ̈ܐ ܕܬܲܪܥܵܐ ܡܲܠܟܵܝܵܐ ܕܥܹܕܬܐ ܕܡܵܪܬܝ ܫܡܘܿܢܝܼ: ܝܼܠܲܝܗܝ ܢܸܩܫܹ̈ܐ ܕܵܥܪܝܼ ܠܕܵܪܵܐ ܬܪܲܥܣܝܼܪܵܝܵܐ: ܘܟܹܐ ܡܛܲܦܣܝܼ ܫܲܒ݂ܪܹ̈ܐ ܕܡܵܪܬܝ ܫܡܘܿܢܝܼ: ܡܲܩܒ݂ܵܝܹ̈ܐ ݂

ܦܵܬ݂ܘܵܬ݂ܐ ܕܐܲܢܲܝ ܨܲܠܡܹ̈ܐ ܘܠܒ݂ܘܼܫܲܝܗܝ ܒܐܸܣܟܹܝܡܵܐ ܡܓ݂ܘܿܠܵܝܵܐ: ܡܲܚܙܘܿܝܹܐ ܝܠܹܗ ܚܲܕܟܡܵܐ ܡܲܒܘܼܥܹ̈ܐ ܕܡܲܥܒܕܵܢܘܼܬ݂ܐ ܦܘܿܠܝܼܛܝܼܩܵܝܬܐ ܘܡܲܪܕܘܼܬܵܢܵܝܬܐ ܥܲܠ ܐܲܡܢܵܐ ܡܫܝܼܚܵܝܵܐ ܓܲܘ ܐܲܬ݂ܪܵܐ ܕܒܹܝܬ݂ ܢܲܗܪ̈ܝܼܢ ܒܕܵܪܵܐ ܬܪܲܥܣܝܼܪܵܝܵܐ ݂ ܘܲܡܛܲܦܘܿܣܹܐ ܝܠ݂ܗ ܐܲܘ ܡܲܡܬ݂ܘܿܠܹܐ ܚܲܕ ܢܸܩܫܵܐ ܡܒܲܝܢܵܐ ܠܚܲܕ ܓܲܒ݂ܪܵܐ ܠܒ݂ܝܼܫܵܐ ܟܘܿܬܝܼܢܵܐ: ܡܵܪ̈ܲܝ ܬܲܪܬܹܝܢ ܥܲܝܢܹ̈ܐ ܣܟܝܼܪܹ̈ܐ (ܕܒ݂ܝܼܪܹ̈ܐ): ܕܵܒܹܩ ܒܲܬܪܹܝܢ ܐܲܪ̈ܝܹܐ ܡܩܲܝܕܹ̈ܐ ݂ ܗܵܢܵܐ ܢܸܩܫܵܐ (ܕܵܢܝܼܐܹܝܠ ܥܲܡ ܐܲܪ̈ܝܹܐ): ܝܼܠܹܗ ܛܘܼܦ̮ܣܵܐ ܬܲܦܢܟ݂ܵܝܵܐ ܠܚܸܟ݂ܡܬܐ ܕܡܵܨܹܐ ܒܲܪܢܵܫܵܐ ܕܡܵܛܹܐ ܐܸܠܵܗ̇ ݂

ܘܥܲܠ ܣܩܘܿܦܬܐ ܕܬܲܪܥܵܐ: ܡܵܨܹܝܚ ܕܚܲܙܹܝܚ ܚܲܕ ܢܸܩܫܵܐ ܪܵܡܹܙ ܠܬܲܫܥܝܼܬܐ ܐܲܘ ܣܝܼܩܘܿܡܵܐ ܕܲܡܚܲܕܲܬ݂ܬܐ ܕܥܹܕܬܐ (ܕܵܪܵܐ ܬܪܲܥܣܝܼܪܵܝܵܐ ؟): ܘܐܝܼܬ ܓܲܘ ܬܲܪܥܵܐ ܡܲܠܟܵܝܵܐ ܟܵܘܵܬ݂̈ܐ ܓܠܝܼܦܹ̈ܐ ܘܲܚܦܝܼܪܹ̈ܐ ܡܼܢ ܓܹܒܵܐ ܕܣܸܡܵܠܵܐ ܘܝܲܡܝܼܢܵܐ: ܥܲܠ ܨܘܼܪܬܐ ܕܨܠܝܼܒ݂ܵܢܹ̈ܐ ݂

ܡܼܢ ܒܵܬܲܪ ܦܣܵܥܬܐ ܕܬܲܪܥܵܐ ܡܲܠܟܵܝܵܐ: ܘܲܬܚܘܿܬ ܩܘܼܒܬܐ ܡܒܘܼܗܪܲܢܬܐ ܒܚܲܕ ܒܲܗܪܵܐ ܩܨܝܼܦܵܐ (ܩܲܠܝܼܠܵܐ: باهت): ܒܸܕ ܚܵܙܹܝܚ ܠܡܲܕܒܚܵܐ ܟܹܐܦܵܝܵܐ ܕܪܵܡܵܐ ܝܠܹܗ ܡܼܢ ܐܲܪܥܵܐ ܒܚܲܕ ܕܲܪܓ݂ܵܐ ݂ ܒܝܲܪܚܵܐ ܕܟܵܢܘܿܢ ܬܪܲܝܵܢܵܐ ܫܲܢ݇ܬܐ ܕ 2018: ܐܲܪܥܵܐ ܕܥܹܕܬܐ ܗܵܠܵܐ ܡܟܘܼܣܲܝܬܐ ܝܗ݇ܘܵܐ ܒܩܸܛܡܵܐ ܕܝܘܼܩܕܵܢܵܐ ݂

ܘܥܲܠ ܓܘܼܕܵܢܵܗ̇ ܓܵܘܵܝܹ̈ܐ: ܓܵܠܝܵܐ ܥܹܕܬܐ ܕܡܵܪܬܝ ܫܡܘܿܢܝܼ ܠܚܲܕ ܡܸܢܝܵܢܵܐ ܡܼܢ ܟܹܐܦܹ̈ܐ ܘܫܝܼܫܹ̈ܐ ܚܦܝܼܪܹ̈ܐ ܥܲܠܠܲܝܗܝ ܢܸܩܫܹ̈ܐ ܡܣܲܩܠܹ̈ܐ ܒܲܨܠܝܼܒ݂ܵܢܹ̈ܐ ܐ݇ܣܘܼܪ̈ܝܵܝܹܐ ݂ ܘܥܲܠ ܣܸܡܵܠܵܐ ܕܡܲܕܒܚܵܐ ܪܵܡܵܢܵܐ: ܐܝܼܬ ܚܲܕ ܬܲܪܥܵܐ ܙܥܘܿܪܵܐ ܡܗܲܕܹܐ ܠܚܲܕ ܫܩܵܩܘܿܢܵܐ ܣܸܡܵܠܵܝܵܐ ܡܣܲܩܠܵܐ ܒܚܲܕܟܡܵܐ ܨܘܼܒܵܬ݂ܐ ܝܵܥܝܼܬܵܝܹ̈ܐ (زخارف نباتية).

ܦܝܼܫܠܵܗ̇ ܡܪܘܿܡܲܡܬܐ (رُممت) ܥܹܕܬܐ ܕܡܵܪܬܝ ܫܡܘܿܢܝܼ ܕܐ݇ܣܘܼܪ̈ܝܵܝܹܐ ܐܲܪ̈ܬ݂ܘܿܕܘܿܟܣܵܝܹܐ: ܘܲܡܚܘܿܕܲܬ݂ܬܐ ܒܲܚܕܵܐ ܨܘܼܪܬܐ ܓܠܝܼܬܐ ܒܚܘܼܬܵܡܵܐ ܕܕܵܪܵܐ ܕܥܸܣܪܝܼܢ ݂ ܓܲܘ ܬܡܵܢܝܼ̈ܢܵܝܵܬ݂ܐ ܕܕܵܪܵܐ ܥܒ݂ܝܼܪܵܐ: ܠܗܵܠܵܐ ܥܹܕܬܐ ܐܝܼܬ ܗ݇ܘܵܐ ܠܵܗ̇ ܚܲܕ ܫܩܵܩܘܿܢܵܐ ܕܦܝܼܫܠܹܗ ܡܘܼܚܪܸܒ݂ܵܐ ܒܢܝܼܫܵܐ ܕܡܲܪܘܲܚܬܐ ܕܥܹܕܬܐ ݂ ܥܕܲܟܹܝܠ (ܗܵܠܵܐ) ܥܵܡܘܿܪܹ̈ܐ ܕܡܵܬ݂ܐ ܐܵܡܪܝܼ ܠܲܢ ܕܓܲܘ ܬܡܵܢܝܼ̈ܢܵܝܵܬ݂ܐ: ܠܵܐ ܩܒܸܠܠܹܗ ܡܲܟܬ݂ܒܵܐ ܕܥܲܬܝܼ̈ܩܵܬ݂ܐ ܕܓܲܘ ܡܲܘܨܸܠ ܩܝܵܬ݂ܬܐ ܠܒܸܢܝܵܢܵܐ ܥܲܬܝܼܩܵܐ ܕܥܹܕܬܐ: ܒܚܲܪܬܐ ܡܘܼܢܫܹܐ ܠܗ݇ܘܿܢ ܘܲܣܪܸܒ݂ܠܗ݇ܘܿܢ ܐ݇ܢܵܫܹ̈ܐ ܕܡܵܬ݂ܐ ܠܗܵܢܵܐ ܟܸܠܝܵܢܵܐ ܪܘܼܫܡܵܝܵܐ: ܘܲܣܥܹܐ ܠܗ݇ܘܿܢ ܘܲܦܠܸܚܠܗ݇ܘܿܢ ܒܠܲܝܠܹܐ ܘܝܲܘܡܵܐ ܠܚܘܼܕܵܬܵܐ ܕܒܸܢܝܵܢܵܐ ݂ ܘܢܵܦܠܵܐ ܦܵܬܐ ܡܲܥܪܒ݂ܵܝܬܐ ܕܥܹܕܬܐ ܡܼܢ ܗܿܘ ܙܲܒ݂ܢܵܐ ܥܲܠ ܪܹܫܵܐ ܕܒܘܼܪܓܵܐ ܕܙܲܓܵܐ ܕܦܝܼܫܠܹܗ ܓܠܝܼܦܵܐ ܒܲܚܕܵܐ ܨܘܼܪܬܐ ܣܩܝܼܠܬܐ ݂

[1] ܢܘܼܗܵܪܵܐ ܡܼܢ ܦܘܿܠܝܼܢ ܒܘܿܫܵܝܲܪ (ܡܝܼܙܘܿܦܘܿܬܵܡܝܵܐ) ܟܵܢܘܿܢ ܩܲܕܡܵܝܵܐ 2017 ܘܟܵܢܘܿܢ ܬܪܲܝܵܢܵܐ 2018 ݂

ܚܙܹܐ ܠܵܗ̇ ܥܹܕܬܐ ܕܡܵܪܬܝ ܫܡܘܿܢܝܼ ܕܓܲܘ ܒܲܟ݂ܕܹܝܕܹܐ ܣܠܵܒܵܐ ܘܝܘܼܩܕܵܢܵܐ ܒܝܲܕ (ܕܵܥܹܫ): ܘܲܒܗܵܢܵܐ ܩܵܐܹܡ ܝܗ݇ܘܵܐ ܒܲܣܥܵܪܬܲܢ ܐ݇ܚܵܪܵܝܬܐ ܐܸܠܵܗ̇ ܒܟܵܢܘܿܢ ܬܪܲܝܵܢܵܐ 2018: ܐܲܝܟ݂ ܕܒ݂ܣܘܿܓ݂ܐܵܐ (على الأرجح): ܠܵܐ ܗܘܹܐ ܠܹܗ ܩܘܼܕܵܫܐ ܐܲܠܵܗܵܝܵܐ ܒܗܵܕܹܐ ܥܹܕܬܐ ܡܼܢ ܥܸܕܵܢ ܕܥܵܪܬܐ ܕܲܡܫܝܼܚܵܝܹ̈ܐ ܠܒܲܟ݂ܕܹܝܕܹܐ[1] ݂ ܠܗܵܫܵܐ ܠܲܝܬ ܟܵܗܢܵܐ ܡܼܢ ܐ݇ܣܘܼܪ̈ܝܵܝܹܐ ܐܲܪ̈ܬ݂ܘܿܕܘܿܟܣܵܝܹܐ ܕܪܵܥܹܐ ܠܲܒܢܘܿܢܹ̈ܐ ܕܗܵܕܹܐ ܡܲܪܥܝܼܬܐ: ܘܲܡܫܲܡܸܫ ܬܠܵܬ ܥܹܕܵܬܵܗ̇: ܐܝܼܬ ܒܨܝܼܪ ܡܼܢ (150) ܝܼܩܪ̈ܵܬ݂ܐ ܕܐ݇ܣܘܼܪ̈ܵܝܹܐ ܐܲܪ̈ܬ݂ܘܿܕܘܿܟܣܵܝܹܐ ܕܥܝܼܪܹ̈ܐ ܠܒܲܟ݂ܕܹܝܕܹܐ[2]݂

_______

[1] ܢܘܼܗܵܪܵܐ ܡܼܢ ܦܘܿܠܝܼܢ ܒܘܿܫܵܝܲܪ (ܡܝܼܙܘܿܦܘܿܬܵܡܝܵܐ) ܟܵܢܘܿܢ ܩܲܕܡܵܝܵܐ 2017 ݂

[2] ܝܵܬ݂ ܡܲܒܘܼܥܵܐ