ܥܹܕܬܐ ܟܲܠܕܵܝܬܐ: ܝܼܠܵܗ̇ ܥܹܕܬܐ ܩܵܬ݂ܘܿܠܝܼܩܵܝܬܐ ܒܪܹܐ ܠܵܗ̇ ܒܕܵܪܵܐ ܕ(16) ܒܥܸܠܬܐ ܕܦܘܼܠܵܓ݂ܵܐ ܕܲܒܪܹܐ ܠܹܗ ܓܲܘ ܥܹܕܬܐ ܕܡܲܕܢܚܵܐ ܝܸܡܵܐ ݂ ܒܫܲܢ݇ܬܐ ܕ1552: ܪܵܒܵܐ ܐܲܦܸܣܩܘܿܦܹ̈ܐ ܒܓܲܪܒܝܵܐ ܕܥܝܼܪܵܐܩ (ܬܲܝܡܢܵܐ ܕܬܘܼܪܟܝܵܐ ܘܓܲܪܒܝܵܐ ܕܐܝܼܪܵܢ)^[1]: ܟܠܹܐ ܠܗ݇ܘܿܢ ܕܲܠܩܘܼܒ݂ܠ ܓܘܼܒܵܝܵܐ ܕܩܵܬ݂ܘܿܠܝܼܩܵܐ ܦܵܛܪܝܼܵܪܟܵܐ ܕܥܹܕܬܐ ܕܡܲܕܢܚܵܐ ܡܵܪܝ ܫܸܡܥܘܿܢ ܬܡܝܼܢܵܝܵܐ ܒܐܘܼܪܚܵܐ ܕܝܘܼܪܬܵܢܵܐ ݂ ܘܲܡܓܘܼܒܹܐ ܠܗ݇ܘܿܢ ܓܲܘ ܡܲܘܨܸܠ ܦܵܛܪܝܼܵܪܟܵܐ ܐ݇ܚܪܹܢܵܐ ܫܸܡܹܗ ܝܘܿܚܲܢܵܐ ܣܘܼܠܵܩܵܐ: ܪܹܫܵܢܵܐ ܕܕܲܝܪܵܐ ܕܪܲܒܵܢ ܗܘܿܪܡܝܼܙܕ ܕܓܲܘ ܐܲܠܩܘܿܫ: ܕܲܫܩܸܠܠܹܗ ܫܘܼܡܵܗܵܐ ܕܝܘܿܚܲܢܵܐ ܬܡܝܼܢܵܝܵܐ: ܘܲܚܙܸܩܠܹܗ ܠܪܗܘܿܡܵܐ ܕܡܲܘܕܹܐ ܒܗܲܝܡܵܢܘܼܬ݂ܐ ܩܵܬ݂ܘܿܠܝܼܩܵܝܬܐ ݂ ܒܝܲܘܡܵܐ ܕ(20) ܒܢܝܼܣܵܢ ܫܲܢ݇ܬܐ ܕ1553: ܦܝܼܫܠܹܗ ܣܝܼܡܵܐ ܣܘܼܠܵܩܵܐ ܒܝܲܕ ܦܵܦܵܐ ܝܘܿܠܝܘܿܣ ܬܠܝܼܬܵܝܵܐ: ܦܵܛܪܝܼܵܪܟܵܐ ܠܥܹܕܬܐ ܟܲܠܕܵܝܬܐ ܩܵܬ݂ܘܿܠܝܼܩܵܝܬܐ: ” ܒܵܬܲܪ ܕܦܝܼܫܠܵܗ̇ ܝܼܠܝܼܕܬܐ ܪܘܼܫܡܵܐܝܼܬ ܡܼܢ ܣܝܼܩܘܿܡ ܣܝܵܡܝܼܕܹܗ”^[2] ݂

ܒܲܕܥܵܪܬܵܐ ܠܐܸܡܦܪܵܛܘܿܪܘܼܬ݂ܐ ܥܘܼܬ݂ܡܵܢܵܝܬܐ: ܡܫܘܼܬܐܸܣܠܹܗ ܝܘܿܚܲܢܵܐ ܣܘܼܠܵܩܵܐ ܟܘܼܪܣܝܵܐ ܕܦܵܛܪܝܼܵܪܟܘܼܬܹܗ ܓܲܘ ܡܕܝܼܢ݇ܬܐ ܕܕܝܼܵܪܒܲܟܸܪ (ܬܲܝܡܢܵܐ ܡܲܕܢܚܵܝܵܐ ܕܬܘܼܪܟܝܵܐ ܕܝܲܘܡܵܢܵܐ): ܥܲܠ ܪܲܚܝܼܩܘܼܬ݂ܐ ܕ(400) ܟܠܡ ܓܲܪܒܝܵܐ ܡܲܥܪܒ݂ܵܝܵܐ ܕܕܲܝܪܵܐ ܕܪܲܒܵܢ ܗܘܿܪܡܝܼܙܕ ݂ ܘܓܲܘ ܚܲܕ ܟܘܼܬܵܫܵܐ ܦܬܝܼܚܵܐ ܥܲܡ ܡܡܲܪܝܵܢܹܗ (منافسه) ܡܵܪܝ ܫܸܡܥܘܿܢ ܬܡܝܼܢܵܝܵܐ: ܦܝܼܫܠܹܗ ܕܒ݂ܝܼܩܵܐ ܡܵܪܝ ܝܘܿܚܲܢܵܐ ܣܘܼܠܵܩܵܐ ܘܕܸܪܝܵܐ ܓܲܘ ܒܹܝܬ ܐܲܣܝܼܖܹ̈ܐ ܘܲܩܛܝܼܠܵܐ ܒܫܲܢ݇ܬܐ ܕ1555 ݂

ܚܲܕ ܕܵܪܵܐ ܡܼܢ ܩܕܵܡ ܒܪܵܝܬܐ ܕܥܹܕܬܐ ܟܲܠܕܵܝܬܐ: ܘܲܒܫܲܢ݇ܬܐ ܕ1445: ܚܲܕܟܡܵܐ ܡܗܘܼܡܢܹ̈ܐ ܕܥܹܕܬܐ ܕܡܲܕܢܚܵܐ ܓܲܘ ܐܲܬ݂ܪܵܐ ܕܩܘܼܦܪܸܣ ܡܚܘܼܝܸܕܠܗ݇ܘܿܢ ܥܲܡ ܟܘܼܪܣܝܵܐ ܕܪܗܘܿܡܵܐ: ܐܲܝܟܵܐ ܕܦܵܦܵܐ ܐܘܿܓ̰ܝܼܢ ܪܒ݂ܝܼܥܵܝܵܐ ܡܫܘܼܡܗܵܐ ܠܹܗ ܥܹܕܬܲܝܗܝ ܒܥܸܕܵܢܵܗ̇: ܒܫܸܡ ܥܹܕܬܐ ܟܲܠܕܵܝܬܐ ݂

ܠܗܲܠ ܕܵܪܵܐ ܕ(19): ܗܵܢ ܦܘܼܠܵܓܵܐ ܥܹܕܬܵܢܵܝܵܐ ܗܘܹܐ ܠܹܗ ܡܲܒܘܼܥܵܐ ܕܟܘܼܬܵܫܵܐ ܩܸܢܛܵܝܵܐ ܠܪܵܒܵܐ ܡܼܢ ܡܗܘܼܡܢܹ̈ܐ ܕܥܹܕܬܐ ܕܡܲܕܢܚܵܐ: ܕܲܡܓܘܼܒܹܐ ܠܗ݇ܘܿܢ ܡܚܲܝܕܘܼܬ݂ܐ ܘܫܲܘܬܵܦܘܼܬܐ ܥܲܡ ܪܗܘܿܡܵܐ ݂

ܒܫܲܢ݇ܬܐ ܕ1830: ܦܝܼܫܠܹܗ ܡܫܘܼܢܝܵܐ ܟܘܼܪܣܝܵܐ ܕܥܹܕܬܐ ܟܲܠܕܵܝܬܐ ܡܼܢ ܕܝܼܵܪܒܲܟܸܪ ܠܡܲܘܨܸܠ: ܡܼܢ ܩܕܵܡ ܕܦܵܐܹܫ ܗ݇ܘܵܐ ܡܓܲܒܝܵܐ ܡܝܼܛܪܵܦܘܿܠܹܝܛܵܐ ܝܘܿܚܲܢܵܐ ܗܘܿܪܡܝܼܙܕ ܠܕܲܪܓ݂ܵܐ ܕܦܵܛܪܝܼܵܪܟܘܼܬ݂ܐ: ܘܚܲܪܬܐ ܦܝܼܫܠܹܗ ܡܫܘܼܢܝܵܐ ܠܒܲܓ݂ܕܵܕ ܒܫܲܢ݇ܬܐ ܕ1950: ܒܙܲܒ݂ܢܵܐ ܕܡܵܪܝ ܝܲܘܣܸܦ ܫܒ݂ܝܼܥܵܝܵܐ ܓ݂ܲܢܝܼܡܵܐ ݂

ܕܠܵܐ ܦܘܼܫܵܟ݂ܵܐ: ܡܼܢ ܒܲܝܢܵܬ݂ ܣܘܿܓ݂ܐܵܐ ܕܲܡܫܝܼܚܵܝܹ̈ܐ ܥܝܼܖ̈ܵܩܵܝܹܐ ܕܡܸܢܝܵܢܲܝܗܝ ܝܼܗ݇ܘܵܐ 1200000 ܚܲܕ ܡܸܠܝܘܿܢ ܘܲܬܪܸܡܵܐܐ ܐܲܠܦܹ̈ܐ ܡܼܢ ܩܕܵܡ ܩܪܵܒ݂ܵܐ ܩܲܕܡܵܝܵܐ ܕܒܲܪܩܵܩܵܐ (الخليج) ܒܫܲܢ݇ܬܐ ܕ1991 ݂ ܡܸܢܝܵܢܵܐ ܕܟܲܠܕܵܝܹ̈ܐ ܩܵܪܹܒ݂ ܗ݇ܘܵܐ ܠـ (750000) ܐܲܠܦܹ̈ܐ: ܠܦܘܼܬ ܚܘܼܫܒܵܢܵܐ ܐ݇ܚܵܪܵܝܵܐ ܕܥܵܡܘܿܖܹ̈ܐ ܒܫܲܢ݇ܬܐ ܕ1987: ܒܲܠܩܘܼܒ݂ܠ (300000) ܐܲܠܦܹ̈ܐ ܐܵܬ݂ܘܿܖ̈ܵܝܹܐ (ܥܹܕܬܐ ܕܡܲܕܢܚܵܐ ܘܥܹܕܬܐ ܥܲܬܝܼܩܬܐ) ݂ ܡܸܢܝܵܢܵܐ ܕܲܡܫܝܼܚܵܝܹ̈ܐ ܓܲܘ ܟܢܘܼܫܝܹ̈ܐ ܥܝܼܖ̈ܵܩܵܝܹܐ ܡܵܛܹܐ ܗ݇ܘܵܐ ܠـ 8%  : ܐܸܠܵܐ ܒܫܲܢ݇ܬܐ ܕ2018 ܟܡܵܐ ܝܠܹܗ ܡܸܢܝܵܢܲܝܗܝ ؟

ܡܫܲܪܸܪܝܼ (ܡܫܲܪܪܝܼ) ܚܲܕܟܡܵܐ ܡܲܘܕܥܵܢ̈ܘܵܬ݂ܐ ܕܘܼܟܬܵܢܵܝܹ̈ܐ: ܕܦܝܼܫܠܗ݇ܘܿܢ ܡܟܲܢܫܹ̈ܐ ܒܐܘܼܪܚܵܐ ܕܡܲܓܖ̈ܬܵܢܹܐ (مراسلين)ܕܫܘܼܬܐܵܣܵܐ (ܝܲܗܠܵܐ) ܕܡܝܼܙܘܿܦܘܿܬܵܡܝܵܐ: ܥܲܠ ܫܘܼܚܠܵܦܵܐ ܕܝܼܡܘܿܓ݂ܪܵܦܵܝܵܐ ܕܲܫܡܸܥܠܲܢ ܡܼܢ ܐ݇ܢܵܫܹ̈ܐ ܘܦܲܖ̈ܨܘܿܦܹܐ: ܕܦܝܼܫܠܗ݇ܘܿܢ ܣܥܝܼܖ̈ܐ ܐܲܘ ܚܸܙܝܹ̈ܐ ܒܝܲܕ ܡܲܓܖ̈ܬܵܢܲܝܢ ܕܘܼܟܬܵܢܵܝܹ̈ܐ ݂ ܦܝܼܫܬܐ ܝܠܵܗ̇ ܐܡܝܼܪܬܐ ܕܐܸܕܝܘܿܡ ܐܝܼܬ݂ ܒܸܫ ܒܵܨܘܿܪܵܐ ܡܼܢ (400000) ܐܲܠܦܹ̈ܐ ܟܲܠܕܵܝܹ̈ܐ ܒܥܝܼܪܵܐܩ: ܡܒܘܼܖ̈ܒܸܙܹܐ ܒܹܝܬ݂ ܒܲܓ݂ܕܵܕ ܘܟܘܼܪܕܸܣܬܵܐܢ ܘܫܸܛܚܵܐ ܕܢܝܼܢܘܹܐ ܘܒܲܨܪܵܐ ݂ ܠܵܐ ܟܠܹܐ ܠܗ݇ܘܿܢ ܥܲܣ̈ܩܵܘܵܬ݂ܐ ܘܲܬܥܝܼ̈ܫܵܬ݂ܐ (مصائب): ܕܐܬܹܐ ܠܗ݇ܘܿܢ ܒܪܹܫ ܡܫܝܼܚܵܝܹ̈ܐ ܥܝܼܖ̈ܵܩܵܝܹܐ: ܘܡܼܢ ܝܘܿܡ ܫܲܪܝܘܼܬܹܗ (استقلاله) ܕܥܝܼܪܵܐܩ ܒܫܲܢ݇ܬܐ ܕ1932 ݂ ܘܲܒܫܘܼܪܵܝܵܐ ܕܕܵܪܵܐ ܕܥܸܣܪܝܼܢ ܘܚܲܕ: ܠܵܐ ܦܝܼܫܠܹܗ ܚܸܙܝܵܐ ܚܲܕ ܡܸܬܚܵܐ ܕܲܢܝܵܚܵܐ: ܡܼܢ ܨܦܵܚܬܐ ܐܵܡܹܝܪܟܵܝܬܐ ܒܫܲܢ݇ܬܐ ܕ2003: ܡܼܢ ܚܲܕ ܓܹܒܵܐ ܡܼܢ ܚܨܵܪܵܐ ܪܲܒܵܐ ܕܦܝܼܫܠܹܗ ܣܝܼܡܵܐ (فُرض) ܒܝܲܕ ܐܸܡ̈ܘܵܬ݂ܐ ܡܚܲܝܕܹ̈ܐ: ܘܥܸܢܦܵܐ ܕܣܝܼ̈ܥܵܬ݂ܐ ܡܝܼܠܝܼ̈ܫܝܵܬ݂ܐ ܐܸܣܠܵܡܵܝܹ̈ܐ: ܘܲܪܕܘܼܦܝܵܐ ܕܐܬܹܐ ܠܹܗ ܒܪܹܫ ܡܫܝܼܚܵܝܹ̈ܐ ܡܼܢ ܢܦܵܠܬܐ ܕܛܲܟ݂ܣܵܐ ܕܨܲܕܵܐܡ ܚܘܼܣܲܝܢ ݂

ܝܲܘܡܵܢܵܐ ܥܹܕܬܐ ܟܲܠܕܵܝܬܐ ܒܸܬܪܵܨܵܐ ܝܠܵܗ̇ ܡܼܢ ܡܗܘܼܡ̈ܢܵܗ̇ ܕܐܝܼܬ ܒܐܲܬ݂ܖ̈ܵܘܵܬ݂ܐ ܕܬܲܘܬܵܒ݂ܘܼܬܐ: ܓܲܘ ܐܘܼܚܕܵܢܹ̈ܐ ܡܚܲܝܕܹ̈ܐ ܕܐܵܡܹܝܪܟܵܐ: ܐܘܿܪܘܿܦܵܐ: ܐܘܿܣܬܪܵܠܝܵܐ: ܟܵܢܲܕܵܐ: ܢܝܘܿܙܠܲܢܕܵܐ: ܚܘܼܝܵܕܵܐ ܣܘܿܦܝܵܬܵܝܵܐ ܕܕܲܥܒܲܪ: ܘܲܦܪܝܼܫܵܐܝܼܬ ܓܲܘ ܪܘܼܣܝܵܐ ܘܐܘܿܟܪܵܢܝܵܐ ܘܓ̰ܘܿܪܓ̰ܝܵܐ (ܬܸܒܠܝܼܣܝܼ) ݂

__________

[1] ܒܕܵܪܵܐ ܕ(16): ܓܲܘ ܐܸܡܦܪܵܛܘܿܪܘܼܬ݂ܐ ܥܘܼܬ݂ܡܵܢܵܝܬܐ ܘܦܵܪܣܵܝܬܐ

[2] ܡܼܢ (ܬܲܫܥܝܼܬܐ ܕܥܹܕܬܐ ܕܡܲܕܢܚܵܐ): ܪܝܼܡܘܹܢܕ ܠܘܿܟܘܿܙ: ܐܝܼܠܘܿܠ 1995: ܦ 328 ݂

ܦܘܼܬܵܚܵܐ ܕܥܹܕܬܐ ܕܡܲܪܝܲܡ ܒܬܘܼܠܬܐ (ܡܲܠܟ̇ܬܐ ܕܘܲܪܕܝܼܵܐ) ܓܲܘ ܒܲܓ݂ܕܵܕ: ܦܝܼܫܠܹܗ ܥܒ݂ܝܼܕܵܐ ܒܫܲܢ݇ܬܐ ܕ1960 ܠܡܵܪܲܢ: ܘܦܝܼܫܠܵܗ̇ ܝܼܕܝܼܥܬܐ ܗܵܕܹܐ ܥܹܕܬܐ ܐܵܦ ܒܫܸܡ: ܩܲܕܝܼܫܬܐ ܪܝܼܬܐ ܒܗܿܝ ܕܨܲܠܡܵܗ̇ ܐܝܼܬ ܓܲܘ ܥܹܕܬܐ ܡܼܢ ܫܲܢ݇ܬܐ ܕ1962: ܘܙܘܼܝܵܚܵܗ̇ ܗܵܘܹܐ ܒܝܲܪܚܵܐ ܕܐܝܼܵܪ ܡܼܢ ܟܠ ܫܲܢ݇ܬܐ: ܘܦܵܐܹܫ ܩܸܪܝܵܐ ܝܲܪܚܵܐ ܡܲܪܝܲܡܵܝܵܐ: ܘܩܵܪܝܼ ܓܵܘܹܗ ܨܠܵܘܵܬܐ ܘܥܘܿܢܝܵܬܐ ܠܩܲܕܝܼܫܬܐ ܪܝܼܬܐ ݂

ܦܝܼܫܠܵܗ̇ ܒܢܝܼܬܐ ܥܹܕܬܐ ܕܩܲܕܝܼܫܬܐ ܡܲܪܝܲܡ ܒܬܘܼܠܬܐ (ܡܲܠܟ̇ܬܐ ܕܘܲܪܕܝܼܵܐ) ܕܟܲܠܕܵܝܹ̈ܐ ܓܲܘ ܒܲܓ݂ܕܵܕ ܒܝܲܕ ܡܲܚܵܖܹ̈ܐ ܐܲܖ̈ܕܸܟ݂ܠܵܝܹܐ (ܣܵܐܡܝܼ ܗܸܢܕܝܼ ܘܡܘܼܢܕ݂ܸܪ ܗܵܡܵܢܕܘܿ): ܬܚܘܿܬ ܚܵܝܘܿܪܘܼܬܐ ܕ(ܒܲܗܓ̰ܲܬ ܪܵܦܵܐܹܝܠ ܟܘܿܬܵܢܝܼ) ݂

ܒܸܢܝܵܢܵܐ ܕܥܹܕܬܐ ܦܪܝܼܫܵܐ ܝܠܹܗ ܘܡܸܬܪܲܫܡܵܢܵܐ ܒܐܸܣܟܹܝܡܹܗ ܡܲܚܵܪܵܝܵܐ ܐܲܪܕܸܟ݂ܠܵܝܵܐ ܪܵܒܵܐ ܫܸܪܫܵܝܵܐ ݂ ܐܝܼܡܲܢ ܕܦܵܐܹܫ ܚܸܙܝܵܐ ܡܼܢ ܥܵܠܘܿܠܵܐ: ܐܝܼܬ ܚܲܕ ܡܝܼܛܘܿܦܵܐ ܪܵܡܵܐ ܥܲܡ ܚܲܕ (ܓ̰ܲܡܲܠܘܿܢ) ܡܬܲܠܬܐ ܚܵܒܹܫ ܨܲܠܡܵܐ ܕܲܒܬܘܼܠܬܐ ܡܲܪܝܲܡ ݂

ܒܸܕ ܚܵܙܹܝܚ ܠܒܲܪ ܬܲܪܥܵܐ ܕܡܲܥܠܵܢܵܐ: ܗܵܝ ܕܵܪܬܐ ܓܵܘܵܝܬܐ ܕܚܵܒ݂ܫܵܐ ܥܲܠ ܚܲܕ ܒܹܐܡܵܐ ܦܪܝܼܫܵܐ ܩܵܐ ܡܵܪܬܝ ܡܲܪܝܲܡ ܒܬܘܼܠܬܐ ݂

ܒܸܢܝܵܢܵܐ ܦܝܼܫܠܹܗ ܒܸܢܝܵܐ ܡܼܢ ܫܡܸܢܬܐ ܦܲܪܙܠܵܝܬܐ ܥܲܠ ܐܸܣܟܹܝܡܵܐ ܒܵܙܝܼܠܝܼܟܵܝܵܐ: ܐܝܼܬ ܠܹܗ ܚܲܕ ܗܲܝܟܠܵܐ ܩܸܢܛܪܘܿܢܵܝܵܐ: ܘܡܲܥܒܖܹ̈ܐ ܦܖ̈ܝܼܫܹܐ ܒܲܬܠܵܬܐ ܙܲܘܓܹ̈ܐ ܕܥܲܡܘܼܕܹ̈ܐ ܡܲܢܕܘܼܖ̈ܬܵܢܵܝܹܐ ݂ ܘܐܝܼܬ ܪܵܒܵܐ ܟܵܘܵܬܐ ܡܩܲܛܖܹ̈ܐ: ܘܥܵܠܹܐ ܠܥܹܕܬܐ ܚܕܵܐ ܩܘܼܒܬܐ ܡܲܢܕܘܼܪܬܵܢܵܝܬܐ ܘ(8) ܟܵܘܵܬܐ ܩܖ̈ܵܫܵܝܹܐ ܡܟܘܼܣܝܹ̈ܐ ܒܲܚܕܵܐ ܩܘܼܒܬܐ ܦܲܠܓܘܿ ܓܠܘܿܠܵܝܬܐ ܥܲܡ ܚܲܕ ܦܘܼܢܣܵܐ ݂

ܘܐܝܼܬ ܚܲܕ ܒܹܐܡܵܐ ܩܕܵܡ ܡܲܕܒܚܵܐ ܦܬܝܼܚܵܐ: ܘܐܝܼܬ ܓܵܘܹܗ ܕܘܼܟܬܐ ܠܩܸܪܝܵܢܵܐ ݂ ܬܲܪܥܵܐ ܡܲܠܟܵܝܵܐ ܕܩܘܼܕܵܫ ܩܘܼܕܫܹܐ: ܚܵܒܹܫ ܬܠܵܬ ܩܸܫܬܵܬ݂ܐ ܖ̈ܲܒܹܐ ܘܚܘܼܕܖ̈ܵܢܵܝܹܐ ܘܬܲܪܬܹܝܢ ܩܸܫܬܵܬ݂ܐ ܡܨܲܒܬܹ̈ܐ ܙܥܘܿܖܹ̈ܐ ݂ ܘܐܝܼܬ ܒܵܬܲܪ ܡܲܕܒܚܵܐ ܓܲܘ ܓܘܼܕܵܐ ܕܓܸܢܝܵܢܵܐ: ܨܲܠܡܵܐ ܕܡܲܪܝܲܡ ܒܬܘܼܠܬܐ: ܡܲܠܟ̇ܬܐ ܕܘܲܪܕܝܼܵܐ ܛܥܝܼܢܬܐ ܠܗܿܘ ܫܲܒ݂ܪܵܐ ܡܲܠܟܵܐ ݂

ܘܐܝܼܬ ܓܲܘ ܡܲܥܒܪܵܐ ܓܲܪܒܝܵܝܵܐ ܚܲܕ ܒܹܐܡܵܐ ܚܵܒܹܫ ܨܲܠܡܵܐ ܕܩܲܕܝܼܫܬܐ ܪܝܼܬܐ ܒܲܠܩܘܼܒ݂ܠܹܗ ܨܲܠܡܵܐ ܕܝܘܿܚܲܢܵܐ ܦܲܘܠܘܿܣ ܬܪܲܝܵܢܵܐ ܓܲܘ ܡܲܥܒܪܵܐ ܬܲܝܡܢܵܝܵܐ ݂